|
|
 حمى الضنك
|
والله شر البلية ما يُضحك
قبل اسبوع وفي مثل هذا الوقت بالضبط اشتكيت من ارهاق وصداع وحمى ومبادئ نزلة برد واتصابرت لحدى ما خلص العمل ومشيت البيت.
المهم لانه ما بحب امشي المستشفيات الا للشديد القوي، طنشت الموضوع وقلت له بعدين بنبقى كويسين
اخدت لي نومة وصحيت الساعة 11 بالليل ومن ما صحيت عرفت في حاجة ما طبيعية، راقد تحت المكيف طوالي بالله لمن زفرت من شدة النفس ما حار الكمبرسور بتاع المكيف لمن اشتغل، اما سخانة الجسم فوالله تجيب قميصك المكرمش وتجي للمكوة اما الصداع فلو وزع على اهل جدة كفاهم ودا كله ما مشكلة، المشكلة في العيون او في الحقيقة الحتة الفوق المقل، بالله يا جماعة التقول في زول مشرطها بسكين وكابي فيها شطة، لو راجل ارفع عينك دي لفوق عشان بصرك يرتد اليك خاسئاً وهو حسير (الله يكفينا شر كسرة العين) اما تكسر الظهر والمفاصل فيا حليللك يا ملاريتنا الحنينة، بالله الضهر مكسر التقول وقع فيهو جزار اعور بساطور قديم ومصدي، ودا كوم ووجع الجنبات والضلع كوم تاني، بالله تنوم على الجنبة اليمين مصيبة تنوم على الشمال مصيبة، حلك الوحيد تنوم (منفقس) علي ركبك وايديك (انا ما نمت) 
المهم
الخميس الصباح بدري طقيت المستشفى، قالوا لي دكتور اخصائي مافي، ما متضايق، قلت لهم انا سالتكم من اخصائي؟ بجي بعد ساعتين، ولا دقيقتين المهم في دكتورة طوارئ دخلوني عليها وقالت لي لوزك ملتهبة وحاول قلل من السجائر وادتني حبوب ومضاد حيوي ورجعت البيت
|
|
 
|
|
|
|
|
|
|
 Re: حمى الضنك (Re: محمد عمر الفكي)
|
تحياتي اخي محمد؛؛
وحمدلله علي السلامة...
نفس الفلم ده دخلتو الاسبوع الفات ..بس دكتوري طلع شاطر من قولت تيت طلعت حمي الضنك
والدكتور هندي وطبيب عام ...عمل فحص للدم +ملاريا
انا كنت واثق إنها ما ملاريا ..لانو الحمي ووجع الضهر ما بتشبه ملاريتنا الحنينة ..
الدكتور شبكني ليك دربّات وفيفادول بس ...وتاخد دش في الحمام كلما الحمي تجي وتزيد...
المدام ما قصّرت ...العصائر بالجردل فضلت خيرك ..
والحمدلله أهو بنفرفر في الدنيا أم قدود دي.
| |
|
|
|
|
|
|
|
|
Re: حمى الضنك (Re: محمد عمر الفكي)
|
الخميس والجمعة اشيل وابلع في الحبوب، الحلق بقى كويس بس حال باقي الجسم في حالو، السبت مشيت الشغل، اول واحد قابلني قال لي انت ما عندكم مراية في البيت؟ من دربك دا على المستشفى، وفعلاً طوالي على المستشفى ذاتو لدكتور انف واذن وحنجرة، المسكين قايل الموضوع مشكلة في الجهاز التنفسي المهم قالوا لي ما عندك اي حاجة لكن شوف ليك طبيب عام، قام قال لي اعمل حاجة اسمها CBC وفحص لحمى الضنك وانا ماشي البيت هسي وتعال لي العصر، المهم جيت العصر ولقيت الدنتيجة فيها حمى ضنك، قابلت الدكتور كتب لي بندول واداني اجازة يومين قال لي اشرب سوائل كتير، طيب العلاج يا دكتور؟ مافي علاج اسرب لبن كتير صديق (هندي)
رجعت البيت، غشيت البقالة التحت قلت له عندك عرديب؟ قال لي وايش عرديب؟ ياخي بتسموهو شنو هنا؟ المهم قلت له تمرهندي ، اداني كيس صغير كدا وقال لي دا فلبيني، شلتو وكبيتو في كورة واستنيتو انحل ومن دون ما اعرفو مُر ولا طاعم اشيلو ولانه بطني طامة، غمضت وشربت!!!! بالله الزقوم الزقوم بس ، الشئ اتاريه الفلبينيين مالينو ملح ويا الحمام جاك زول للاستفراغ.
باقي اليوم راحة وبالليل مواعيد النوم اتدمدت ونمت، جاتني صحية لقيت السرير دا ماشي موية؟ دا شنو دا كمان؟ ياربي رجعنا لزمن بول السرائر تاني؟ بالله المرتبة والبطانية والملاية التقول في زول غسلن! اتاريهو دا العرق
طبعاً النوم زي نوم الديك في الحبل، قمت قلت اشغل التلفزيون وما دام سهر سهر احسن اشوف لي حاجة تلهيني عن المصيبة دي شوية، اها بالله شغلت التلفزيون بجاي والحفلة بدت بجاي، ناس نوبة يشيلوا ويدقو في النوبة فوق راسي، وماشاء الله التقول عندهم قائد اوركسترا، اصلهم ما بغلطوا طقة في الاضان دي وطقة في التانية .
استاذنكم عندي مواعيد فحص تاني في المستشفى وبرجع ان الله حيانا
| |
|
|
|
|
|
|
|
|
|
Re: حمى الضنك (Re: محمد عمر الفكي)
|
الله يسلمك يا حاج العوض وان شاء الله المرض دا ربنا ما يبتلى بيهو انسان في الدنيا دي
دكتور بشير
حمد الله على سلامتك وما تشوف شر ان شاء الله
| |
|
|
|
|
|
|
| |
محمد عمر الفكي
العوض المسلمي
بشير أحمد
فيس بوك
تويتر
انستقرام
يوتيوب
بنتيريست