|
|
 شخصيات ومحلات وذكريات امدرمانية (1)
|
نبدأ بالمحلات
.. محلات الأقمشة كان أشهرها "عباس رشوان" .. "هريدي" .. "شلقامي" بعدين "الطوخي" اهم محل للخردوات والألعاب كنا بنشتري منه لوازم الطبلية من حلاوة خاتم ولكوم واقراص طلقات مسدس اللعب .. والبالونات باحجامها المختلفة وشختك بختك ... الخ
يليه محل العجلات الشهير "حسن صالح خضر" اشهر العجلات الرالي الدبل .. بالنسبة لمحلات التمباك أشهرها "سورج" نمرة واحد في السعوط ثم عماري امدر وغيرها .. بالنسبة للكافتيريات اشهرها "ميامي" "خيرات" وكانن جمب بعض وتخيل لذة الساندوتشات
وفخامتها مع العصائر الممتازة في هذه المحلات .. بالنسبة للآيس كريم اشهرهم "برعي المصري" .. كان عنده أيس كريم يرمي في الشوك!!! بالنسبة للقهاوي طبعا اشهرها "ود الاغا" .. "شديد" .. "يوسف الفكي" .. ويحكي في هذا الخصوص بأنه المرحوم "خالد الفكي"
شقيق المرحوم "يوسف الفكي" كان مسئولا عن الطلبات ويعرف أين يجلس علية القوم وصفوتهم ومن هم وماهي طلباتهم فيقوم بتحضيرها .. يحكي ان احد الوافدين الجدد علي القهوة جلس وقعد يصفق ..جاءه المرحوم خالد الفكي وطلب منه ان يغادر القهوة وقال ليه
"دي ما قهوة صفيق" .. طبعا هناك محل "جورج مشرقي الشهير والذي كان يجتمع فيه مبدعي المجتمع من شعراء وفنانين ودراميين ولاعبي كرة كان منتدي ابداعي انطلقت منه اجمل الاعمال الغنائية ..
استديوهات التصوير هناك استوديو الوادي واستديو إبراهيم .. وفي نفس الشارع كان يوجد التزي الأفرنجي "الشيخ احمد الشيخ" وبجانبه دكان الفنان "أبراهيم عوض" للإكسسوارات النسائية .. بالنسبة للمخابز كان يوجد مخبز لا أذكر أسمه بجوار نقطة البوليس في المحطة الوسطي بجوار محلات سنجر للخياطة ومخبز تاني في شارع كرري .. المطاعم .. مطعم السطح فوق اجزخانة أبو نخلة .. في شارع العناقريب هناك اكثر من مطعم .. كان عندهم كبدة بالعدس لم اتذوق مثلها في كل اقاصي الدنيا التي زرتها .. بعدين مطعم الرياضيين بالبوستة صاحبه الصحفي الرياضي الهلالابي ميرغني أبو شنب وعلي واجهته صورة لعمالقة الكرة السودانية في عهدها البلاتيني .. بعدين تعالوا مروا علي شارع الصياغ .. "أولاد ملة" ر.. "أولاد تبيدي" .. محلات "أحفظ مالك" .. وغيرها .. محلات ايجاروإصلاح العجلات .. "مصطفي حسن" .. بالقرب منه واحد تاني نسيت اسمه بجانب "المرحوم الطيب خوجلي" ..أكشاك الجرايد واحد بالقرب من السينما الوطنية واخاله موجود لليوم وواحد بالقرب من المجلس البلدي .. واتنين في المحطة الوسطي بجوار جامع امدرمان الكبير ..
بالنسبة للحلوانية .ومحلات الباسطة "الطيب سيد مكي" .. محلات سلا بالملازمين .. ولاننسي محلات العدني الشهيرة للإكسسوار في شارع كرري ملتقي حسان امدرمان .. بالقرب منه محلات "نجيب كباشي" في الشارع المودي لكنيسة ماري جرجس بالمسالمة ..
بجواره محلات "ناس أبومرين" يقابلهم فوال مشهور .. في نفس الشارع هناك محلات الحبوب والزيوت نذكر منهم " ود الغول" .. " المرحوم عيسي .. المرحوم " عبد الله الشيخ" .. بالقرب منهم طاحونة بيومي .. أما محلات الحلاقة فأشهرهم "ود فرحات"
والذي كان يمثل دكانه ملتقي للرياضيين ولاعبي الكرة المشهورين آنذاك .. برضة دكاكين اليمانية علي صالح وولده محمد في ناصية شارع دنقلا سابقا والشنقيطي حاليا .. نوفل وغيرهم .. ثم في نفس المنطقة الجزر والخضرجية .. المرحوم احمد حسن جمعة جزارا
ورفيق دربه المرحوم ميرغني المأمون صاحب دكان خضار في مواجهته وفي نقس المنقطة محلات الدجاج والبيض البلدي ولاننسي صاحب محلات الدجاج الشهير المرحوم "كاك" المعروف لرواد دار الرياضة امدرمان .. بالقرب من شارع الصياغ
كان هناك محلات الطواقي التي ازالها المرحوم الرئيس نميري وكانت تمثل مجمتعا نسائيا امدرمانيا خالصا ..وفي نفس المربوع محلات "التشاشة" والفكهانية وهناك محل المرحوم الشاعر علي محمود التنقاري في مواجهة محلات التشاشة
وسوقا نسائيا في نفس المنطقة بييبعوا الكول والشرموط والمفاريك والهبهان والقرفة وأدوات الطهي.
ولنا عودة
|
|
 
|
|
|
|
|
|
|
|
Re: شخصيات ومحلات وذكريات امدرمانية (1) (Re: عمر الفاروق عبد الله الشيخ)
|
حامد شرفي من الفيسبوك اضاف
القرب من سينما الوطنيه امدرمان محلات راديو حامد للراديو والتلفزيون واول وكيل لشركة جلاتلي هانكي وجواره الصائغ عزت مجلي بساده وايضآ بنفس المكان ستديو امدرمان الوطني لصاحبه العم عبدالله المصوراتي والد رجل الاعمال صلاح عبدالله المصوراتي صاحب معامل واستديوهات كاميرا ارتست ومحلات اولاد بنده وبار ابوستولس ومحلات جورج مشرقي واولاد الاغا ومحلات الخواجه كربيت والمشحمه الذريه وصيدلية النجاح كان يجلس قربها العم احمد داؤود بالقرب من عيادة دكتور عزالدين المهدي جنوب نادي الخريجين ثم شمالأ بعد الجامع عباس رشوان وعبدالله شلقامي وقصادهم محلات علي خليل وشركة الزيات ومحلات محمد الامين حامد .. ودكان عمنا المرحوم محمد الطاهر دياب ..
| |
|
|
|
|
|
|
|
|
|
Re: شخصيات ومحلات وذكريات امدرمانية (1) (Re: عمر الفاروق عبد الله الشيخ)
|
من الفيسبوك قروب اولاد امدرمان
السموءل أبو لين
ياعمر نسيتنا ياخي سوق الجلود والأنتيكا والمراكيب بدوي الجاك شلقامي وعبدالعظيم المطبعجي وأحمد عالم وعباس الشايقي والطيب الزين والمرحوم السرجلي وعمك طه الخراط ودكان النويري وحريش الدباغ وساهل بتاع الشاي ومامون بتاع القهوة والطاهر بتاع الجرايد وحوء الشحاده والظريف المرحوم أبوحواء وبت وقيع الله بتاعت الطواقي والزينه ست الجبنه وسكره ست الفول وعيش الريف وكباشي بتاع السندوتشات وأنجلو بتاع الأبنوس وعمك أدم بتاع مراكيب الجزيرة أبا وعمر بتاع طفايات التماسيج يا الله الواحد يدفع عمرو كلو ويرجع أمدر ويلاقي الناس دي كلها تاني
| |
|
|
|
|
|
|
|
|
|
Re: شخصيات ومحلات وذكريات امدرمانية (1) (Re: عمر الفاروق عبد الله الشيخ)
|
من الشخصيات التي كانت ترتاد سوق امدرمان او تملك محلا فيه:
المرحومان الثنائي ميرغني المأمون واحمد حسن جمعة ثنائي الحقيبة الشهير واحد جزار والتاني خضرجي والجزار اللاعب المرحوم متوكل احمد البشير لاعب الهلال والشاعر علي محمود التنقاري له دكان في سوق التشاشة والمرحوم شاخور الاب الروحي للمريخ دكان في شارع العناقريب ولاعب الهلال الاسبق المرحوم ود فؤاد كان خضرجي .
اما الشخصيات التي كانت ترتاد السوق بكثرة .. المرحومان الشاعر سيد عبد العزيز وعبيد عبد الرحمن وكانا صديقين للوالد عليه الرحمة يزورانه كثيرا في دكانه بجانب المرحوم الفاضل سعيد الذي كان يأتي لدكان الوالد لإجراء إتصالات هاتفية من الدكان .. وهنالك ايضا المرحوم القانون برعي احمد البشير والذي كان له اصدقاء كثر بالسوق والفنان الذري المرحوم ابراهيم عوض.
| |
|
|
|
|
|
|
|
|
|
Re: شخصيات ومحلات وذكريات امدرمانية (1) (Re: ياسر منصور عثمان)
|
كان فى السوق مواجه المحطة الؤسطى محلات لابيلا و هى محلات للأحذية تضاهى أحذية باتا
و كان فى الجهة الخلفية للسوق محلات المهداوى للملابس الجاهزة و الذى كان يرتادها الكثيرون
ثم كان توتو ترزى فى الموردة خلف سوق الموردة جوار منزل عثمان خالد و رحل بعدها الى الشارع الرئيسى
و كان محلات السكى للسمك
و كان هناك كشك ليمون فى الناصية الشمالية الغربية لسوق الموردة لم ار له مثيلا
| |
|
|
|
|
|
|
|
|
|
Re: شخصيات ومحلات وذكريات امدرمانية (1) (Re: عمر الفاروق عبد الله الشيخ)
|
شكرا عمر على إمتاعنا بريحة أمدرمان وسيرة أم درمان
| Quote: في شارع العناقريب هناك اكثر من مطعم |
أظن أحدهما اسمه المطعم الأفريقي أو مطعم أفريقيا والثاني المطعم الوطني
لا أنسى طعم الخشاف في أحدهما أبدا
وبــــــــاتا مقابل المحطة الوسطى للأحذية
مطعم سمير أميس ومطعم تاني أظن اسمه العين الخضراء كان مقابل مواقف البوستة
وكذلك هناك اللحوم الإفريقية بجوار موقف تكاسي أبو روف
وأولاد طلب في آخر شارع العنقاريب في اتجاه البوستة
| |
|
|
|
|
|
| |
عمر الفاروق عبد الله الشيخ
ياسر منصور عثمان
محمد بابكر احمد
تبارك شيخ الدين جبريل
جعفر محي الدين
فيس بوك
تويتر
انستقرام
يوتيوب
بنتيريست