|
|
 تكريم الشاعر الدكتور محمد بادى (ودبادى)
|
ستمتعت أمس الاحد على قناة النيل الازرق حفل تكريم (زين) للشاعر القامة الدكتور/ محمد بادى ، بمناسبة عودته للوطن من الأغتراب ، ولقد كانت سهرة قمة فى الروعة من حيث الاعداد والحضور الأنيق والذى مثل كافة اشكال الطيف الفنى والسياسى والثقافى ، وكذلك حضره لفيف من عشاق شعر ودبادى البسطاء والكادحين والذى منحهم فكره وشعره الذى يتغنى بهم، امس ابدع ود بادى وغنى للترابلة والكادحين والفقراء فى بلدى فكان التجاوب أكثر من رائع ، التحية لأمة تكرم شعراءها المبدعين ، واقدم هنا بعض قصائد المبدع ودبادى أن شاء الله تعجبكم
|
|
 
|
|
|
|
|
|
|
|
Re: تكريم الشاعر الدكتور محمد بادى (ودبادى) (Re: هاشم محمد الحسن عبدالله)
|
ائعة ود بادي : شيخنا ود الشايقي
يجيك الحول وحول بي زول والزول غول
هيا فقاسه مامعقول هيا قشارة مامعقول
عليك عز دينك المعقول تضربي الجملة بالميت
قداحات فول وعيشو تموت لي دمسيسي عرض وطول
ونحن تعابة نحن غلابة لا نقداً ولا محصول
وجاز اللمبه في غلبة وحق الفطره للطلبه وركوب التكسي بالقلبه
ولولا الروح بقت سلبه نمص الصلصه من علبه وكان الجاتنا في الرقبه
وده كلو كوم وتاني ام العيله كوم الوليه الفنجرية حلاوة نبق
والوليه الغجرية ودايري دق البطن منفوخة ديمه طبق طبق
ويجيها الحول وحول بي زول والزول غول
ومره تديك الهواده وترمي زي زولين زيادة
الله أريتو الزول يزاول ياحكم صفر ده فاويل
مرقتم بت الذين ودايري تعمير القبايل
واب شنب تعبان يعدهد يلحس الكوع رغم أنفو الكان مقاول
في اليمين مقلوده سيسي واحد الله
وبالشمال مطبوقه سوسو مالو تاني
واب شنب شايل أماني تلاته حركه
وكل حركه معاها بركه وفي البطن بنجوسه فرفر
والقطر بي وراها صفر والله يستر
عيني باردي وماني حاسد وربنا يتم المقاصد
نحن عارفين الله أعظم والرزق ينزل مقسم للبجاهد والمعسم
الا اسمعو يارفاقة الربايه خشم بيوت والمعايش ماها توت والمعذب اخير يموت
الوليد إن كان مبرجل شن بسوي يصبح المصران مهوي يمسي والمصران مهوي
لا يبهرج لا يضوي الولد كان يربا قوي عملة استرليني سايرة ويبقي صاروخ أرضي جوي
النجاح مو من كتير والكتير البشبه العنزين يطير والبطير من أرض جاعت كان أخير
ودار أجيكم بي بشارة وقولو خير
ربنا يخلي الخواجه ماتمر قدامنا حاجه الا ينضم فيها حاجه
ياخلق ياعقلي صبه تلحسو الرز بالمربه تبلعو عروق المحبه
تلدو كبه وراها كبه عشان تقيف ماتاخدو حبه
انت ياجاموسه دُري وهو اليكتح وانت ضري
الليله يقطعو حبل سُري بكره يظهر حبل سُري
والعداد ماسكاهو سِري لاتحدثي لا تقِري
إلا تنشري وتدُري ويلا يادايتنه جُري
انه قول المعري خففي الوطأه خليلي هاهنا قبر سليلي
جِمي جِمي وبكره تمِي ويلا يانخلايه رميِ
أرمي أردب فول وسمسم وخلي ملك الموت يلملم
وتاني أزرعو ما تشاءوا وتاني أحصدو ما تشاءوا
لابطوناً كالخيامه لا ولادة ولا قيامة لا سمايه ولا كرامه
لا ديونا ولا طعاما قد تقولون حراما لست مفتي ولماذا لست أفتي لست أدري
شيخنا ود الشايقي خريج الخلاوي يعشق الماحي وطارتو والمدايح وأب كساوي
قافل أضانو من الخلايق لا مصايب لا بلاوي الا في عرس وطلق قد يجيب بعض الفتاوي
حالتو ساتره ونص كم اسطي في سوق السماسره بيعه رابحه وبيعه خاسرة
وهو شيخ متصوف في أهازيج الليل يمدح ياليلي ليلك جنه معشوقك أوه وأنه
وتجيب المدحه ليلي وتهرول غيرهن وتزيد الشيخ غلباً قاب قوسين وأدني
ونساوين الحواري لاتغيب عن عقلو أبدا أوصافها كالاتي حاجه سعده لجنه خردة
حاربة في المهديه وهي ألت لجلافيت وكراضم وعن قريباً ستزول الابديه
واحيلت للمعاش واراحت واستراحت ثم تأتي سعديه وهي رهن الخدمات
وعيون فاتنات تعرف الوقت المناسب وتُحاسب وتحٌاسِب لست في الدنيا حراما
اخر العنقود ليلي افخر العينات ليلي اجمل الزوجات ليلي
زات مرة والممرات كثيرة شيخنا صلي الصبح نافله وبآياتٍ قصيرة
وتعوذ ودعي الله بأن لايتجوز ثم نقنق وتمنطق وبراس السبحه طقطق
ومضي يتلو الكتاب مره بالمال والبنون فتبسم وتنسم ثم آيات الزواج فتجهم
فإذا مالاقي مثني وثلاث ورباع وقف الشيخ طويلاً مثلما فِعل الضباع
وبكي من أجل هون البقرية وشهيق كالدجاجه البيطريه
قال يبكي وهو يرخي من حبالو الوتريه انها دنيا الشماته فأنا لا أملك غير تلاته
انني قصرت في حق الكتاب ساعاني ما أعاني من عذاب
اين مني زوجةُ بكر فتيه اين مني الصندليه اين مني المحلبيه والعطور البلديه
والعطور الاجنبيه في نقاءٍ كبحيرة طبرية
ثم قال استغفر الله وحفحف وتقيف ومضي يطلب الله عروسه يمشي من غير فرامل وتروسه
جات ضحية سمينه هايله ومدهنه جزارو فالح في تجارة القرصنة
خلف الكراع فوق الكراع وكدوسو زي المدخنه بين كفتين من الخشب حرق شباب السوسنه
وتمر سنه وتفوت سنه وشيخنا خلي المئذنة وبقي في الحرد والطنطنه
وبقي يوم هناك ويوم هنا وهو زاتو عجز وانتنا
شيخنا يالشيخ البجم خلف زرازير السجم وحدين اساميهم عرب ووحدين اساميهم عجم
بدا بي محمد ثم زوجات الرسول العشره ثم كل الذين تجمهرو للبيع تحت الشجرة
طلحة الخير والزبير ثم سعد وسعيد ثم سته مبايعين وكمل اسماء الصحابه والكرام التابعين
وتابعين التابعين والنجوم البارزين واسامي الخالدين ثم عبد مايشاء من البنين
عبدالرحيم عبدالسعيد عبدالمعين عبدالغفور ثم سمي في الختمام
عبد مالك الملك ذو الجلال الاكرام
وتبحر في القوافي وتراتيل المضافي قمر الدين
وقمر صناعي الدين ونور الدين ونار الدين ولهب الدين
وسيف الدين وسكين دين وخنجر دين ومطوة دين وموس الدين وعاد لاوين
واخر الدور بقت الوحده تفقش في تمانية شهور وتلدي أناتي دور فوق دور
ومافي ضكور والراجل تقول مسحور ومابخليلو مرةً بور
وزرعتو مابتقع واطه وعصرو عليهو وزادو عليهو في المالطه
والزريعه عملت ليهو زرناطه يكتب الطلبات دست المقاسات بالدست
لحسو قدر العندو ست حتو درج الخزنه حت والوليه تنبح اكان اصبحت واكان مست
جيب حقايب وعجايب ومفسته ومنسته وسما وجواري واراضي طواني وأكما واهلما وهلما
انها نكبة روما والمتمه ان طعم العرس حلوٌ ولذيذ وهو باقات وأقداح نبيذ والخوازيق
ستأتي وإنتفاخات القرنتي وعيال كالنمتي ولا تقاوم بالدينتي
انت تصرخ بنتي بنتي وهي تصرخ حني حني وتتي تتي (ولا علينا) .
| |
|
|
|
|
|
|
|
|
|
Re: تكريم الشاعر الدكتور محمد بادى (ودبادى) (Re: هاشم محمد الحسن عبدالله)
|
هوي ياوليدودبادىد
هوى يا وليد يا دلوعة يا مرنوعة
أعدل إيدك المفدوعةواتلحلح
واقيف دغرى وواس صدرك
مع صدرى واتشدّع
ليك الحق ..........!!!!
شان ولدوك فوق اسفنج
وحتى أول جديد سوهو ليك بالبنج
وهسع هوايتك إنك تلعب البنق بونق
وليك الحق عشان فطموك
بعد مازدتا فوق سنتين
وفى سن عشرة نومك كان على الليدين
غطاك بالشاش وفرشك بيحرير الصين
والبتدورو كلو بتلقى غاب قوسين
ابوك مليان وجيبو سمين وقلبو سمين
وفاتحلك حساب فى البنك والتأمين
وليك الحق...........!!!!!!!!!!
عشان ما خضتا فى وحل المطر والطين
ومن الترعة ما سويت شراب الهين
وما قيلتا فى ضل دومة بى فرعين
وما شاققتا عرق النيل مع الوزين
وليك الحق........!!!!!
عشان ادمنتا عيشة اللين
مشي الاسفلت ما جربتو بالكرعين
ركوب اللورى فى شمساً تصر العين
وما عانيت وقوف الصف وراء التموين
عشان يا انتى ما بتدرى سجل ابواتك البدرى
دحين اسمع .. أقيف واسمع
سماك الباكى مجدو الزال
يا ما كانوا تحتوا رجال
ابوخنجر وابوشوتال
والصقر البجيك خوجال
صوتن كان يمين جلجال
ومكسيين كمال وجلال
لكن الزمن اسرع
سيفن بلحس الفقره
وما كان برضو بالحقرة
وكانوا بضبحوا الشقره
وكانوا بضوقو العادوه نوم الكوع
وكانوا بموتوا فى شان حرمة المفزوع
الجعلى اب شرابا حار وقالوا بعدى يومو خنق
والشايقى البياكل النار وفوقو نحاسو متخنق
ودرفون البجا الصقار وحاقب سيفوا ياكل الشق
والغرباوى عينو شرار وكضب القالوا عندو عرق
والنيلى البعرفوا كتار على كتل الأسود جرّق
والبطحانى والشكرى وغيرهم من أهل فخرى
ومنهم أصلى لا بشبع ولا بقنع
هوى يا وليد
حصل جربتا كب السارية
فى القلعة وخلا العتمور
وشفتا بروقه تترقص وتتحرقص
تقول مطويه فى قرقور
وعاوى الزيفة ينفخ
فى جبال النقعة زى الصور
والحصحاص يجرفوا السيل
يكنسوا على مهاوى الخور
وقلب الصاقعة يتطرقش
يكب النار دمار وشرور
وشفتا الحال عرق مقلوع
جبل متروم فرع مكسور
جمال غرقانة بى حالا
وحد المويه فى الغرغور
ود ابن ادم المسكين
نجاتو تحت قرون التور
والعوتيب يجيك يجرى
يشيلك وانتى ما بتدرى
وما بيرفع
هوى يا وليد ...
حصل سادرتا بالديداب
وقدامك مراحك وراكب الخباب
ودربك طولوا يملا العين
سحاب وغبار ومويتو سراب
وهوى كرباجك البكاى
يبكى على ضهور الضمر الانجاب
وتسرى الليل وما تضوق هجدة
لو كان النجم ما غاب
وبعد أيام تجيك لفته
ويلوحلك فى البوادى سحاب
وتكرف من دعاش العينة تملا رئاك
عطر وأطياب
تلقى الوادى خضر زى تقول
ماكان خراب ويباب
وبت ام ساق تقييل من ضحاها
على المعالى ونسمة الهباب
وتفرش ليك حزمة نال تحت
سيالة تريانة فروعها قراب
وتنفخ كل آهاتك مع المزمار
تصوغ الحان ملانة شباب
وتنسي الدنيا كل الدنيا
ماعندك معاها حساب
خلاف برقا يشيل حرقاص
أو رعدا تقول رصاص وكت فركع
هوى يا وليد ...
حصل صحاك عز الهجعة
صوت شتماً بعيد مخنوق
وجاتك شخرة الطنبارى
مشتاقاً يسوى القوق
ونومك طار واتقسم
والرشرش صبح مفروق
واتلفحت نص من توبك الجرجار
على الدلوكة سايق سوق
وتلقى هناك بنات بلدك ولاد بلدك
يعلو الصفقة تقدح فى القلوب الشوق
ونغم الفال ابشرن يا بنات بالخير
والجنيات تطير لا فوق
وكم زغرودة تتفجر
تفور بالناس بعد ما تروق
يعوم الوز صدورو تشابى
للمجهول وما بتضوق
تميل زينوبة زى البان
يمين وشمال تودى الطوق
واخوان ام شلخ ينكبو جوه الداره
زى صقرا نزل من فوق
ضرب الصوت والركزة بيفرق الناس
عشان زينوبة ما بتحوق
وعاد تتحزم الجنيات
وتتنظم تقيف في روق
وكل واحد يهز ضرعاتو
والحجبات تزح لافوق
جفير الخوسة فايت الكوع
وسيرو مع العضل مطبوق
والطاقية تحت الحاجب المعقود
هدية أم زين وما مشرية من السوق
ويتقدم عريس السمحة رافع صوتو
كان بسوقوا بيهو النوق
والعنجاوى ينزل فوق ضهورن
بس تقول منشحطة فيهو بروق
يبدا مجرو بالترقوة ويتحدر
مع الضلع القصار ملصوق
واحمر عين يشم الدم بعد ما يرش بنات
عمو ويزيدن شوق
وثابت حيطة لا بتهز ولا بتلز
وصارى جبينو كلو عروق
وقال بعد العقد طلقانة ما يحجزوهو
إلا يخلو ضهروا شقوق
هناك الحال مغير جد
وهيجة الناس تفوت الحد
وكان حجازو مد الليد بتسمع كع
هوى يا وليد ...
حصل شارفت دغشا بدرى
فوق حجرة مخانق النيل
فى سنة تساب والشرقي
حزم القيف وطفح الكيل
وشوفتا الهيبة فوق اسيادا
والشخرى البكتل الحيل
وشفتا الجارى يحفر
فى جروف كوكبنا
بس داير يشقو عديل
يجيك بي صدرو متحزم
ومتلقف صفوف فى صفوف
يحاكى الخيل
ومويتو الهايجة تبلع جب
وتجقم فى مدالق السيل
وفوق الرملة مشرور
العشارى طويل
معشعش بين نوايبو الطير
حليلو جزايرو جاها النيل
وحالف ما يخلى شبير
حزم اطرافا يكسر فيها
بالهدام وينحر فيها بالقرقير
وبكرة يموصها يشرب طينها
يزرع فيها شلالات هدير وهدير
وتكسح مركب النواتة عايمى
على قرون الموج جناحها كسير
رواسيها مالى اصابعوا فى المجداف
يقوم لافوق ويجى من تانى فوق الدفة
رافع ايدو ينده فى جملة الصلاح واهل الخير
هناك الموت يمين شافوهو شوف العين
ومافى شفيع ومافى مجير
تقول الزول يعرف اجلو
ومكان موتو لولا إنو
ما كشفو الإله لى غير
شن فضل بلا الغرق البدور ناعى
وفعلا كانوا يا هو مصير
ومشيت المركب الغرقاني بين موجتين
طفروا منها النواتا بطن اللجّة قالوا اخير
تماسيحاً يقالدوا الموج يصارعوا
عتاوة العرق الكتالو مرير
ساعة يعومو بالضرعات وساعة فج
صدورن ضمة مااتبلت ولو قطير
ديل يا وليد ولاد النيل
رضو الهيجة من صدروا
ومن الطيبة رضعوا كتير
الواحد فعايلو كتر ونضمو دقاق
نهرتوا يمين تسوى الفاق
ومراً أصلاً لا ضاقوه لا بنضاق
كفاك يا وليد بلاش فاقة
خلاص أنا تهتا فى الاشواق وما برجع
وهسع ضمة لا شايفك ولا بسمع .
ودبادى
| |
|
|
|
|
|
|
|
|
|
Re: تكريم الشاعر الدكتور محمد بادى (ودبادى) (Re: هاشم محمد الحسن عبدالله)
|
رسالة بت الخير
بت الخير يجيك الخير
وصل جوايك الكاتباهو للولد الحتالي
وكان الظن ترسلي ليه هين هينين من البركاوي
داك الطعمو حالي
ولو بالقل شخاليب دوم
وهنا والله ني ومسيخ وغالي
سؤالك يمة عن احوالي
كان شفتيها تغنيك عن سؤالي
انا اتوكرت في قلب البنادر
زي غريب شرقان مدلدل في الدوالي
جات شايلاني حرّة جوف
انا اتحديت مجالا مومجالي
مصايب الجامعة اكبر من جميع الشفتو
ولا سمعتو في ايام الخوالي
قعاد الكرسي كان شفتيهو
ورم ساقي زي سيد الزلالي
اقلب في الدفاتر من صباحا بدري
لامن تمسي ما بنسي انشغالي
اسوق الليل تحت ضوء الكهارب
وديمة هارب من فراشي
وهادو حالي
ده كلو عشان اجيب نمرا
انافس بيها واستر بيها حالي
والله عاد حالة ما بتسر البال
ومن يوم ما هديت ما انسر بالي
سلاطين العلم يايمة
ينسوا العشرة في فد يوم
يدفروك بره زي دفر الطبالي
وخايف من اجيك مرفود
وهادي الفكرة من ما جيت
معشعشه في خيالي
واخير افتح اضانك
قبل ما تلقي فوق اضني
ملويات حبالي
وكان حصل القدر يايمة لا تلوموني
لومي علي البنادر نورا اقوي من احتمالي
بناتا فيها رويانات جسومن بالدهون
تلصف بلا جلود السحالي
سبيبن ديمة بالحزم الكبار مبهول مردم
فوق قفاهن..وا حلالي
صدورن طامحة زي موية الدميري
الهايجي تكشح في العوالي
عيونن واسعة تبلع مية
زي ولدك تشرك للموحد والضلالي
وحاتك ضُمّه ما بقدر عليهن
ساعة اقيف قدامن
انكس راسي بي قدري وجلالي
مشيهن سوا زي سرب الغزال
لكن نفورن مو غزالي
عدادن مابخبرو
الا وين ما امشي الاقاهن قبالي
وقصاصن ينقّر بي عصاتو
ومايفرّق دربهن
من بين دريبات القماري
بخورن في سماء البندر
يدوخ متل مسك العشاري
رقيصن ينهزنو بلا الفلو
الّلماتو غابن منو في ضل الضهاري
يجمّع في قفاهو وينطرح
يتمطّى تتحتحت مفاصلو
وده ياهو الفاك جباري
دلالكين تجيب الضلّ
علي متاهات الضهاري
غناين اصلو ما سمعنابو
كنت بقول ليكي الا هسع ما ني طاري
وطنبورن مبرقع وحسو فاقع
لا في كنتر لا ودع فوقو بيراري
عشوقن في الرقيص
يتلوي متل سيد المغص
يوم يبقي في حالة طوارئ
والمداين ديمة فايري
زي وحوشا في البراري
والمـآسي كتيرة حاصلة
والمكضب يلاقي بوليس السواري
عاد دي حالتا بقدر اتستر معاها
خلاف احاكي الناس واجاري؟
وانتو راجيني يوم اجيكم بشهادتي
وينبسط ضهري وكباري
وبرضو خايفين من اجيكم بي غربية
وفي خجل قايد صغاري
والقدر بي غادي كاتب ليه شيتا
لاني حاري ولا ني طاري
حاجة واحدة تكون في علمك
اني جايي وتاني راجع لي دياري
وياني حمّيد القديم
الا بس فاقد حجابي وراح سواري
يمة كتري من رضاكي
وسلميلي علي المعاكي
وقولي لي حبوبة زيك
نحن شبنا وماك براكي
سلميلي علي جروفنا وحتى وزينا البكاكي
سلميلي علي بناتنا
وقولي ليهن ماني ناسي
طاري شلاخا مواسي
زي شقوق بيتاً سداسي
طاري نقشا فوق خدودن
بين ضفايرو وشوفو قاسي
جسمي في البندر ممدد الا بينكم بي حواسي
سلميلي علي البكادن والبشتت في التقاوي
في الكرد محراتو قالع
وصوتو فوق تيرانو عاوي
ماحزم بقجة ثيابو وقام فجر لاحق اللواري
اخيرو يحفر في جروفو
مالو مال حفر المجاري
سلميلي علي الضرايح
والفضل من الخلاوي
والفقير الفوق حصبرو
يكتب البخرة ويداوي
مع السلامة ودعتك الله
ولي وصيتك ماني ناسي
لي شفقتك مافي داعي
وابقي عشرة الراعي واعي
في بحور اهل البنادر من زمن طالق شراعي
كان نحجت بجيك غانم
وكان فشلت بجيك ضراعي
بت الخير
| |
|
|
|
|
|
|
| |
هاشم محمد الحسن عبدالله
عماد الشبلي
مبارك عثمان
saidahmed shami
مزمل خيرى
فيس بوك
تويتر
انستقرام
يوتيوب
بنتيريست