|
|
 مروءة سودانيين (توجد حسرة)..(صورة)
|
علبة دواء..صغيرة الحجم أكبر قليلاً من علبة الكبريت..سعرها 21 ريال فقط..لكنها مهمة لتنظيم ضربات قلب في السودان..
ولأن الدواء غير متوفر في السودان..جاءتني رسالة بضرورة إرسال علبة واحدة فقط مع أي شخص قادم إلى الخرطوم اليوم الجمعة
أها طواااااالي ركبت ومن أقرب صيدلية اشتريت العلبة وتوجهت إلى المطار...
سودانيين ما شاء الله مجموعات مودعين ومسافرين..
وقع اختياري على واحد لابس بدلة بيج وشكله "مثقف"..
سلمت عليه..
الرجل للأمانة رد السلام ببشاشة ..
ولكن ملامحه تغيرت عندما طلبت منه توصيل علبة الدواء..
وليته لم يعتذر بهذه الطريقة الــبلــيدة:
لا والله ما بقدر..أنا شايل أدوية كتيرة ياخي..
يا ابن العم دي علبة صغيرة بتاعة دواء قلب..
أنقروا انتظرني؟؟
لا والله..ذهب مسرعاً لا يلوي على شيء..دافعاً عربة الأمتعة..
تاركاً وراءه أطناناً من الحسرة وعدم المروءة..
المهم بعد محاولتين مماثلتين..
لقيت شاب...لابس جلابية وطاقية..وشايل شنطة صغيرة وقاعد..
قلت ليهو بعد السلام..عندك قلم؟؟
قال لي بالحيل...اتفضل..
جلست بالقرب منه..
طلبت منه أن يمليني رقم الجوال المكتوب في الرسالة الجات من السودان
وفيها طلب الدواء..
طبعاً الراجل شبع قراية في الرسالة..
وملاني الرقم..
وكتبت الرقم..
قلت ليهو بالمناسبة ممكن تعتذر عادي..
لأنه قبلك في تلاتة من منزوعي المروءة اعتذروا..
قال لي والله الناس بتخاف ياخ..
لكن يا زول أبشر..
لم أكتف بهذا..
أخرجت له الدواء..شريط شريط..
وأخرجت له النشرة المطبقة في علبة الدواء..
قرأ منها ما تيسر..
وطلبت له رقم الجوال في السودان..
وتحدث لفترة طويلة مع المستفيد من الدواء..
واتفق على أن يقابله في المطار..
والحمد لله رب العالمين..
سؤال:
نحن ماشين وين؟؟
من نحن بلا مروءة؟؟
من نكون إذا انقطع المعروف بين الناس؟؟
|
|
  
|
|
|
|
|
|
|
|
Re: مروءة سودانيين (توجد حسرة)..(صورة) (Re: Mahmoud Mustafa Mahmoud)
|
سلام يا مصطفى
العنوان محزن وميلان حسره.
لكن تعال نوريك لو ماعارف.
يازول فى ناس وسودانيين برضو شقالين تجارة فى الادوية .
وبيطلبوا من المسافرين الخرطوم يوصولوا ليهم ادوية ضرورية للحياة وبنفس اسلوبك الطلبت بيهو من الناس الاعتذروا ليك ديل .
عن تجربة يا محمود مرة لقيت واحد شايل ليهو جهاز قياس سكر والحقيقة المسافر ما انا واحد صديقنا شال منو الجهاز عشان يوصلوا ليهو الخرطوم .
ودعنا صاحبنا وطالعين لقينا زولنا الما بيغبانا شايل كيس وبيطلع منو جهاز تانى وبيكوس على زول تانى عشان يشيلو جهاز تانى .
سالنا احد المعارف الشقالين فى المطار قال النوع ده شقال تجاره والشخص ده تحديداً معروف لديهم.
الحاجه التانية يا مصطفى الناس بقت تخاف من اولاد الحرام يجيك واحد شايل ليهو مخدرات ولا مصيبة .
وحكاية الجماعه الشيلوهم البنقو وحكم عليهم بالاعدام بتكون سمعته بيها.
نصيحة لو عندك حاجه زى دى الجاء لمعارفك من اصحاب الوكالات او العاملين بالمطار لديهم معرفة بالمسافرين اكتر والثقه بتكون متوفره.
واخيرا ً المسأله يتحتاج حسن تصرف وتقدير من الشخص البتطلب منه يشيل ليك .
وبالتاكيد مرؤة السودانيين لاتحدها حدود.
| |
|
|
|
|
|
|
|
|
|
Re: مروءة سودانيين (توجد حسرة)..(صورة) (Re: بدرالدين الطائف)
|
.Quote:
واخيرا ً المسأله يتحتاج حسن تصرف وتقدير من الشخص البتطلب منه يشيل ليك .
وبالتاكيد مرؤة السودانيين لاتحدها حدود. |
صدقت.. والحركة دي إلا عندنا في السودان.. وده شيء طيب..
وإن دل على شيء إنما يدل على أننا شعب.. يحفظ الأمانة.. ولا فرط في المرسال..
لأنو أي واحد من جنسية تانية.. عادي.. يعمل رايح.. بالجهاز.. أو الدواء ده..
ده إن وثق فيه أصلاً صاحب الأمانة..
ولكن ضعاف النفوس .. من ناسنا.. بستغلوا المروة والأمانة والطيبة الزايدة دي..
لكن أول مرة أعرف إنو الناس ديل بتاجروا بالأدوية والأجهزة الطبية كمان..!!!
كان زمان.. الجوالات واللابتوبات..
وأظنها ستعود.. أكثر من ذي قبل.. بعد هبوط سعر الريال..
| |
|
|
|
|
|
|
|
|
|
Re: مروءة سودانيين (توجد حسرة)..(صورة) (Re: أحمد قلوب)
|
ربنا يشفي مريضك وكل المرضى
ما تلومهم ياخي لوم الاتسبب في الحال ده
المثل قال: أولاد الحرام ما خلوا لأولاد الحلال حاجة
أحكي ليك دي:
مرة ماشي السودان في المطار واحد جاب لي قميص ملفوف في جريدة
وقال لي دايرك تشيلو لي معاك .. قلبي اكلني هبشت هبشت
لقيت في حاجة قوية في نصو فتحتو لقيتو حاشر ليهو موبايل جواهو
في وقت كانوا بجمركوا الموبايلات في السودان
الراجل ما خجل وقال لي الموبايل ده لي ود يتيم وعليك الله تشيلو
قلت ليهو ما تقول من الاول موبايل ورجعتو ليهو
| |
|
|
|
|
|
|
|
|
|
Re: مروءة سودانيين (توجد حسرة)..(صورة) (Re: محمد جلال عبدالله)
|
الاخ مصطفى
الحمد لله على وصول الدواء لمن يحتاجه وربنا يجعله فى ميزان حسناتك
قبل شهر من الان حصل لى موقف مماثل
فقد ذهبيت للمطار لارسال دواء لأخى المريض فى السودان
كل زول اطلب منو توصيل الدواء لمطار الخرطوم يعتذر بلطف واحيانا يفوت يخليك وما يعبرك
اصابنى اليأس كما اصابتنى الحسره ,,, ونظرات من يعتذرون تصيبك كالسهم وهم يحدقون فيك بعيون ملؤها الشك والريبه
وبعد عناء من البحث وقفت بجانب شابين سودانيين ,,, سلمت عليهما ,,
واعتبرتها اخر محاوله وطلبت منهما ايصال الدواء ان كانا مسافرين ,,, قالا لى انهما غير مسافرين لكنهما مودعين لصديقهم المغادر الى السودان,,,
لكنهما على الفور اخذا منى الدواء واتصلا به فجاء واستلم منى الدواء بعد ان دوّن رقم جوال المستلم
عندها تبددت بعض حسرتى واحسست حينها ان هذا الشعب ما زال بخير
| |
|
|
|
|
|
|
|
|
|
Re: مروءة سودانيين (توجد حسرة)..(صورة) (Re: أيمن التوم حسن)
|
يناير 2005
مطار صنعاء – قبل منتصف الليل بساعة
برفقة عائلتي ونحن متجهون نحو الجوازات
استوقفني ابن بلدي
- السلام عليكم – الأخ ماشي الخرطوم؟
- وعليكم السلام – إن شاء الله – خير!
- لو سمحت ياخ طالب خدمة صغيييرة
- أبشر يا زول ولا يهمك – عندك شنو؟
- همباك صغيرة فيها عيدية للأسرة
- طيب .. شوف الـ fact الأولى: أنا ما معاكم هنا .. نحن ترانسيت جايين من بعيد ومسافرين من أمس
هدوم البرد اللابسنها والشايلنها في الإيدين براها ما هينة .. أنا شايل طفل في كتفي ولا بتوب والمدام زي ما إنت شايف ..
الـ fact التانية رغم كدا ما بخذلك بس يا ريت فعلا حاجة بسيطة وصغيرة ..
- جدا .. جدا
وطوالي نادى على واحد جانا شايل حقيبة متوسطة وخفيفة الوزن
- أها فيها شنو ومنو المستلم ؟
صاحبنا فتح الشنطة – والله على ما أقول شهيد – فيها حوالي عشرة باكو سجاير KENT ؟؟؟؟؟؟؟؟؟؟؟؟؟؟ وما فيها ولا حاجة تانية.
قال: ما تستغرب الحاجة دي عادية وفي المطار ما فيها شيء أصلا هنا في صعوبة في تحويل المصاريف والسجاير دا بحبوه اليمنيين
وطبعا في السودان غير متوفر .. أخوي بمشي إبيعو لليمنيين في السفارة وكدا .. وياها دي مصاريف العيد ..
أها رأيكم شنو يا جماعة ؟؟؟؟؟
من ناحية الزول دا عيالو مفلسين والدنيا قبايل عيد
ومن ناحية أنا جايي من بلدا طيرو عجمي وإجازة فقط عشرة أيام لحضور العيد ( 12 سنة ما حضرت عيد في البلد) والحاجة دي إمكن تجيب ليها شبهة وجرجرة.
...
بتشيلوها ول بتعتذرو ؟؟؟؟؟؟
| |
|
|
|
|
|
|
|
|
|
Re: مروءة سودانيين (توجد حسرة)..(صورة) (Re: طه إبراهيم عبد الله)
|
* نفس الأشكال المتكررة تقابلك في مطارات دبي والقاهرة واديس وجدة وميناء أسوان ، ومطارات وموانئ أخرى لم أدرك إليها سبيلاً ، يوزعون بضائعهم على الغاشي والماشي :) ويحمّلون الناس ما لا طاقة لهم به.
* طلب أحدهم إيصال أمانة من بلاد الغربة إلى الخرطوم، طلب المسافر منه تقديم الأمانة أولاً إلى أمن المطار لفحصها ، رفض صاحب الأمانة وقال: إنت زول ما عندك مروة ، وفات :)
* ذات رحلة تفاجأ الركاب داخل الباخرة بأنّ كلاّ منهم يحمل خلاطاً من نفس الماركة واللون والموديل وكلهم استلموه بحجّة توصيله هدية عيد إلى أحدهم في الجانب الآخر. لاحظ ضابط الجمارك الأمر وطلب من الكل وضع الخلاط في عهدة الجمارك والقدوم لاستلامه غداً، جاء الغد ولم يعد أحد من أجل الخلّاط فالكل مشغول بنفسه ومشاكله والتجهيز لرحلة طويلة إلى الخرطوم، :) ، اضطر صاحب الخلاطات للظهور أمام الجمارك لتسوية ما يفوق على الـ 250 خلاطاً مرسلة على أساس أنها هدية شخصية :)
* قصص متواترة عن ضحايا حسن النية، يحملون أمانات بكل براءة يقضون بها سنوات من أعمارهم خلف القضبان ثم يصبحون دون ذنب من أصحاب السوابق ، هذا إن سلموا من حبل المشنقة.
* نعم هناك طوارئ وهناك حالات إنسانية حقيقية تستحق المساهمة، ولكن يمكنك في هذه الحالات أن تنسق بشكل أفضل لإيجاد قناة لتوصيلها، وبعدين عينك في الفيل وتطعن في ظله ؟
سلاماً
| |
|
|
|
|
|
|
|
|
|
Re: مروءة سودانيين (توجد حسرة)..(صورة) (Re: Hani Arabi Mohamed)
|
Quote:
للأسف تصرفات البعض قتلت ما تبقى من المرؤة .... |
مع التقدير لصاحب البوست وارجو الاذن لاروي قصة حقيقية حدثت معي قبل فترة في مطار الرياض مع سيدة كريمة لا اعرفها قدمت لي مساعدة وهي في ظرف عزاء
ارسل لها الدعاء والشكر ولاسرتها الكريمة عبر الاثير
تيجاني
**
نسيت ذكر أننى اضطررت لحمل 3 قطع فى اليد عند المغادرة وهو محظور بقانون الطيران فاللاب توب مع عدم ترتيب الاغراض احرجنى وكنت انتظر احد موظفى الخطوط بالرياض للمساعدة ولكن ظروفه لم تمكنه واصبحت امام بوابة الجوازات لا ادرى ما افعل ولن انسى طيلة حياتى ان سيدة كانت تودع زوجها واطفالها والدموع فى عينيها بحرقة لاحظت وقوفى لمدة طويلة والموظفين يسرعون بالمسافرين للدخول لصالة المغادرة وهى تذهب وتعود لوداعهم وبذكاء عجيب انتبهت لعدد القطع بطرفى ورغم ان بيدها طفل الا انها بدون استئذان اختطفت احدى الشنط خاصتى ودخلت بها الصالة لتفادينى الاحراج مع الموظف المدقق على مدخل البوابة وانا فى دهشة من امرى وطلبت منها تركها دون جدوى وواصلت سيرها غير عابئة بكلامى وتركتها غصبا عنى لان زوجها واطفالها من خلفى والدموع فى عينيهم جميعا .دخلت الصالة ووضعت اغراضى ورايتها جالسه تبكى توجهت ناحيتها فناولتنى الشنطة دون كلام وسالتها اراك تبكى بحرقة زائدة لعله خير فاجابتنى ان والدتها توفيت وفى طريقها للعزاء بالسودان فاحسست اننى اصغر من السمسمة امام هذه السيدة العملاقة وهى فى اكبر المصائب تنظر الى مسافر لا يعنى لها شيئا لتساعده... لك الله سيدتى فانت عنوان الشموخ لهذا الشعب الابى ولك الصبر وللوالدة الرحمة بظهر الغيب طول الدهر . حاولت مساعدتها فى مطار الخرطوم الا أن أقاربها سبقونى فى أستقبالها ..
| |
|
|
|
|
|
|
|
|
|
Re: مروءة سودانيين (توجد حسرة)..(صورة) (Re: التيجاني عبد الباقي)
|
| Quote: وبالتاكيد مرؤة السودانيين لاتحدها حدود. |
للامانه ، الادويه حتي لو كانت تجاره ، مافي مشكله اشيل طوالي.
Quote: لم أكتف بهذا..
أخرجت له الدواء..شريط شريط..
وأخرجت له النشرة المطبقة في علبة الدواء..
قرأ منها ما تيسر.. |
ايوه , لازم افتحه شريط شريط وروشيته روشيته ، (للضمان) انت المزعلك شنو يا حوده
مش اولاد الحرام ما خلو لاولاد الحلال حاجه
مرًه وانا مسافر، قابلني واحد في المطار شايل ليه شنطه كامله (من غير خجله) وطلب مني بما انو عفشي شويه!!! ان احمل هذه الحقيه معي.
للضمان ، طلبت منو يسلمني الشنطه بعد التفتيش (تفتيش الامتعه)، عشان لو في حاجه كده ولا كده ما نحصًل بتاعين الطلح.
بصرحه، انا ما بحب ارحرج احد، لكن بتاع الشنطه ده مبالغه.
المرؤة برضو حلوه
| |
|
|
|
|
|
|
|
|
|
Re: مروءة سودانيين (توجد حسرة)..(صورة) (Re: محمد هاشم ابوزيد)
|
الأخوة المتداخلين الكرام...
لكم الشكر..
وقبل أن أتناول الرد عليكم نفر نفر ،،
يجب أن أذكركم بهذا الإقتباس:
| Quote: علبة دواء..صغيرة الحجم أكبر قليلاً من علبة الكبريت..سعرها 21 ريال فقط..لكنها مهمة لتنظيم ضربات قلب في السودان.. |
عشان المسألة ما تجيب ليها عمم وجرادل وموبايلات..أوكي؟؟
..
تحياتي..
..
| |
|
|
|
|
|
|
| |
Mahmoud Mustafa Mahmoud
بدرالدين الطائف
عوض أبو عيش
Hani Arabi Mohamed
قسم الفضيل مضوي محمد
أحمد قلوب
محمد جلال عبدالله
أيمن التوم حسن
محمد هاشم ابوزيد
فيس بوك
تويتر
انستقرام
يوتيوب
بنتيريست