|
|
|
 Re: عندما يبتسم الموظف أمامك.......أعرف إنو وقعتك سوداء (Re: د. ياسر عبد القادر)
|
وبعد أن يعاني الامرين...يصل مشلهت لمكتب الموظف المعني ,,,بعد كمية من الصراعات تبدأ من البوابة مرورا بالاستقبال و حتي مكتب الموظف المعني ,,,,و الذي يستقبلك بوجه مكفهر جدا بالرغم من انو الدنيا صباح,,ويعمل نفسو مشغول بالرغم من انو انت عارف و متأكد إنو ماعندو موضوع...أخيرا يتلفت و ينتبه لأنك واقف قدامو,,,يقوم يسأل: أيوا ياخينا ...عندك شنو؟؟ لا سلام ولا كلام
أيوا عندي المعاملة دي......تمد ليهو الورق...تاني يعمل مشغول...ويشيلو منك يعد مدة.....
يعاين فيهو من ورقة لي ورقة...وكلما يكتشف إنو ملفك مكتمل ...يزداد اكفهرارا...
وفجأة: يبتسم إبتسامة كبيرة....حتي يظهر أثر التومباك في أسنانو....
| |
 
|
|
|
|
|
|
|
|
Re: عندما يبتسم الموظف أمامك.......أعرف إنو وقعتك سوداء (Re: د. ياسر عبد القادر)
|
مشلهت (وبرضو حقوق الملكية محفوظة للدكتور) واقف في الشارع ...و مافي بتاع أمجاد راضي يوديهو بحجة إنو ما مرخص و مابيقدر يقطع الكوبري...لأنو الكجر واقف.. ..أخيرا أقنع واحد بتاع أمجاد إنو يقطع الكوبري أو حقيقة بتاع الامجاد كان مضطر لأنو كان لافي من الصباح ومالاقي ليهو مشوار...وبرضو مارضي الا بشرط ....إنو في حالة إتقبض... مشلهت هو المفروض يدفع للكجر.....وافق مشلهت مرغما لأنو مجبور...إنتصف النهار و عليه أن يلف اللفة دي كلها.....
المهم قدر و لطف...الدنيا سخانة...والكجر ما كان واقف...
بعد حولي الساعة ونصف ...في مشوار يستغرق أقل من نص ساعة في الاحوال العادية...كان مشلهت يصعد السلم و هو يتنهد و نفسو مقطوع.....
وصل المكتب الوصفوهو ليهو من تحت...ولقي بتين قاعدات يتونسو ونسة هامسة ومعها ضحكات مكتومة...وباقي الطاولات فاضية...(المكتب فيه ست طاولات)
السسسسلاااام عليكم...(بأخر نفس)... زول هبب ليهو مافي
يابنات العم.........
ردت واحدة بصوت (مضروب في أس عشرة كدا) بالنسبة للصوت الكان بتتكلم بيهو مع صاحبتها: داير شنو؟؟
رد مشلهت بصوت خفيض جدا: لا لا ماداير حاجة...بس كنت عايز أورنيق تمنطاشر...هم هناك قالو لي جيبو
أيوااا...هنا إنفرجت أساريرها...وبانت ضواحكها...
أيوا دا عند الشفة (بفتح الشين و تشديد الفاء) ....لكن الشفة نقلت من هنا
نقلت وييييييين
نقلوها شارع تزعة و تمنين العمارات
شنو؟؟؟؟؟
والزول الفي الرياض ماعارف انو نقلوها....
لا... بكون عارف... لكن يمكن نسي
طيب داك نسي...بتاع الاستقبال تحت ماعارف انو نقلوها؟؟؟
لا دا بيكون ماعارف...
طيب مافي زول غيرها؟
لا و الله هي بس البتشتغل أورنيك تمنتاشر...(قالتها بحنكشة ماخايلة)
طيب يا ست البنات ..إنتي ماعندك الاورنيك دا...كدي فتشي...يمكن يكون في واحد واقع تحت المكتب ولا يكون ملفوف فيهو سندوتش طعمية.....ولا .. ولا
أما أختنا ...نست الزول الواقف و رجعت تقطع مع صاحبتها
وعن صاحبنا مشلهت ...طلع الشارع ...يمكن يلقي بتاع ركشة يحنسو عشان يقطع الكوبري ...المرة دي علي البيت عدل ...لأنو الساعة قربت لي تلاتة ضهر
| |
|
|
|
|
|
|
|
|
|
Re: عندما يبتسم الموظف أمامك.......أعرف إنو وقعتك سوداء (Re: د. ياسر عبد القادر)
|
خر مشلهت صريعا علي أول سرير يلاقيه ...وهو محتضنا ملفه....وراح في نومة في ضل العصر
ماصحا إلا والشمس داقة في راسو
الساعة 8 صباحا من يوم الاتنين.. وهو في الشارع
الساعة 8 و نص هو داخل أمجاد
وإلي شارع تزعة وتمنين العمارات (أو كما قالت)
وجد مشلهت نفسه داخل المبني أخيرا... بعد صراعات و إستعراض بدءا من الحارس الخارجي ...و حرس البوابة (السيكيوريتي ) ثم بتاع الاستقبال ..فقد فيه كل ما يحمل من جرايد (لم يقراها) و قوارير مياه معدنية ( مقفولة بي صمة خشمها )...
ما مشكلة....بس المهم الشفة
وصل للمكتب رقم ستة...أو كما قالوا له...
تلاتة ترابيز....في واحد موظف بيقرا في جريدة ( الدار)
سلام عليكم..(.بدأ مشلهت)
رد الموظف: وعليكم السلام ...(دون أن ينزل الجريدة ويشوف منو السلم دا)
ياخي بسأل عن الشفة؟؟؟
والله ما جات الليلة...(برضو بدون ما ينزل الجريدة....)
طيب ممكن أعرف حتجي متين؟؟؟
نزل الموظف الجريدة: شنب ضخم ...مع سفة( دوقار لوري)
والله ماعارف ..لكن كدي النسأل ليك...(مع بصقة خفيفة)
يا قسومة...إنت الشفة دي قالت مشت وين,,,؟؟؟
جاء صوت رجالي رفيع أو رقييق من جوة: الشفة دي قالت : أخت مرة أخوها عندها ولد عيان ..رقدوهو في مستشفي أحمد قاسم...مشت تشوفو
طيب....تمتم مشلهت:: ما قالت بتجي متين
رد أخونا أب شنب و سفة دوقار لوري من وراء الجريدة.: والله مستشفي أحمد قاسم دي بعيدة...ولو جات ما أظن تجي قبل تلاتة...الترحيل بكون طالع...ما أظن تطلع معاك المكتب هنا...
أحسن تجي بكرة....
طيب...طيب... همهم مشلهت
وبدأت رحلة البحث عن أمجاد للعودة من حيث أتي
| |
|
|
|
|
|
|
|
|
|
Re: عندما يبتسم الموظف أمامك.......أعرف إنو وقعتك سوداء (Re: د. ياسر عبد القادر)
|
تاني يوم من دغشا بدري كان مشلهت قدام باب مكتب الشفا...الساعه سبعه صباح التلاتاء......
سبعه ونص .. الشفة ماجات
تمانية ونص... ماجات
تسعه ...جاء صاحبنا أب شنب طابق جريدة الدار في أباطو,,,
مشي علي تربيزتو ....وقعد...كأنو ماشايف مشلهت
جاء مشلهت: سلام عليكم
رد أب شنب: أهلا ياخوي
مشلهت: الشفة ماجات
اب شنب: لسه ماجات
مشلهت: لكن مش الترحيل جاء؟؟؟
أب شنب: أيوا جاء لكن هي مابتجي بالترحيل.....بتجي بالمواصلات لكن بترجع بالترحيل
مشلهت: حكمتو بالغة
الساعة عشرة وربع...تسمع صوت جلبة شديدة بالسلم ...وصوت أجش بيشاكل تحت....وبعض من ألفاظ
بعد شوية داخلة واحدة تبرطم بكلام مامفهوم...ومشت قعدت في كرسي من غير سلام و لا كلام....
إنفرجت أسارير مشلهت....أكيد دي الشفة
مشلهت: السلام عليكم........لا يوجد رد
مشلهت: الشفة؟؟؟
ياني زاتي...في شنو....؟؟؟
لا بس داير أورنيك تسعطاشر....لا أسف...سبعطاشر,,,,لا أقصد طمنطاشر...أي طمنطاشر....
هنا إبتسمت الشفة حتي بان سن دهب قديم في نابها
أيوا ياخوي ...هو عندي هنا...لكن الدفاتر خلصانة مني...طلبتها من المطبعة وقالو بجيبوها الاسبوع الجايي
مشلهت: لاحول ولا قوة
طيب ممكن تفتشي لي الدرج يمكن تلقي واحد واقع هنا ولا هنا....
رمقته بنظرة ......
لالالالا اسف ماقصدي.....طيب لكن انا ما مسافر.....وإجازتي إنتهت
الشفة: هوي يا المغتربين ...كلكم بتقولو كدا...الفيلم دا بشووفوا كل يوم.......
لا لا خلاس......طيب أعمل شنو؟؟؟؟
والله ماعندي ليك حل ...لامن تجيني الدفاتر
أب شنب من وراء جريدة الدار: كدي شوف مكتب محلية كرري
مشلهت: لكن كرري دي ما بعيدة علي
اب شنب: طيب شوف مكتب محلية العيلفون
لاحولاااا......طيب العيلفون اقرب شوية...وين مكتبهم دا
اب شنب : زح الجريدة شوية.....بس إنت روح هناك وبتلقاهو جنب السوق...ورجع الجريدة تاني
| |
|
|
|
|
|
|
|
|
|
Re: عندما يبتسم الموظف أمامك.......أعرف إنو وقعتك سوداء (Re: د. ياسر عبد القادر)
|
توجه مشلهت إلي سوق الخضار حيث يوجد خاله السماني تاجر الخضار......
السماني دا عندو عربية بوكس موديل واحد وتمانين...لكن بيوصل العيلفون
ممكن أستلفو منو ...وهو ما حيرفض....أكيد ....هو ذاتو لمن مشيت وديت ليهو الهدوم الجبتها لي أولادو...قال لي لو داير حاجة كلمني...
مشلهت: السلام عليكم
السماني: أهلاااااااان ود أختي ....إزيك
مشلهت : الحمد لله كيفك وكيف الاولاد
السماني: الحمد لله كويسين
مشلهت: إن شاء الله الهدوم عجبت الاولاد
السماني: والله طلعت سغيرونة شوية.........لكن بيلبسوها
مشلهت: والله جبتها ليهم من الهرم بلازا.......أحسن مكان
السماني: يازول مافي عوجة....وهو بيدخل ليهو في حزم جزر كدا شكلو عايز يديها لمشلهت...
مشلهت : لا لا ياخال...أنا ما داير خدار
السماني : طيب داير شنو؟؟؟
مشلهت: في الحقيقة أنا داير أمشي العيلفون
السماني؛ خير ...المات منو في العيلفون؟؟؟
مشلهت: لا مافي زول مات....بس ماشي أجيب اورنيك طمنطاشر بتاع شركة (..:.....)
السماني: والشركة دي ما عندها مكتب جنبنا هنا...الموديك لي هناك شنو؟؟
مشلهت: مشيت ليهم ..بس الموظفة قالت ماعندها دفاتر هسي...وأنا مستعجل عشان مسافر
السماني وهوبيرص في طماطم: و إنت صدقتها؟؟
مشلهت: و البيخليها تكضب شنو؟؟
السماني : كان تعصر ليها ...كان بتطلع ليك واحد
مشلهت: إستغفر الله يا خال...عموما أنا عايز أتسلف منك البوكس بكرة عشان أقدر أمشي العيلفون و أجي في نفس اليوم.
السماني: بكرة مابقدر لانو خالتك أختها نفسا في مستشفي سوبا...بنودي الغداء
بعد باكر تعال شيلو بعد ما أجيب الخدار الصباح...
| |
|
|
|
|
|
|
|
|
|
Re: عندما يبتسم الموظف أمامك.......أعرف إنو وقعتك سوداء (Re: د. ياسر عبد القادر)
|
الخميس الساعة حداشر ونص قبل الظهر
البوكس موديل واحد و تمنين ...قديم لكنو ينهب الظلط المكسر في طريق العيلفون نهب
مشلهت عايز يصل قبل نهاية الدوام...أو في الحقيقة قبل الترحيل ما يمشي
الساعة إتنين...البوكس وقف قدام المكتب.....
مافي أثر لأي ترحيل ولا بصات...حمد ربو ودخل.....
لاغفير برة....لا سيكيوريتي...ولا إستقبال ذاتو
الحمد لله ...إرتحنا من ناس نافذة الاستقبال و ثقالتهم
ودخل جوه....وجرايدو في يدو....ومويتو مقفولة.....مكسب برضو
دخل المكاتب مكتب ..مكتب..........غير الضبان مافي حاجة
لف المكاتب كلها.....لا إنس ولا جن
المكاتب مفتوحة.... والمراوح شغالة
طلع برة الحوش ...برة البوابة خالص
أخيرا...جاء زول ماري
يا ود البلد...سلام
الزول: مرحب حبابك (بلهجة بلدية)
مشلهت: الموظفين ديل مشو وين؟؟؟؟
الزول: قصدك أفندية المكاتب ديل؟؟؟
مشلهت : أيوة ياهم ذاتهم
الزول: هااازول ها....الليلة الخميس
ولم يكمل حديثه...حينما لمح رفيقا له من بعيييد...فصاح نحوه....اللمين...اللمين
ثم إختفي.......
| |
|
|
|
|
|
|
|
|
|
Re: عندما يبتسم الموظف أمامك.......أعرف إنو وقعتك سوداء (Re: د. ياسر عبد القادر)
|
إحباط غير محدووود
شعر مشلهت بإعياء شديد
و جات العربية تمت الناقصة
البوكس أبي يدور كلو كلو...
نزل مشلهت يفتش لي ميكانيكي ولا كهربائي
( ميكانيكي شنو في العيلفون.....حسب علمي زمان...العيلفون دي مافيها غير تلاتة عربات: عربية الطيب النص...وناس الوسيلة حسين ...وناس هشام الطاهر ....ناس هشام الطاهر عربية أبوهو مقرشة لأنو مغترب...عربية الطيب النص اخر موديل و كذلك ناس الوسيلة عربيتهم جديدة...يبقي مافي داعي لي مكنيكي هنا......(-: ......)
تحية لكل الاسماء دي وخاصة صديقي د. هشام الطاهر بإيرلندا...ود. الوسيلة بمدينة الملك فهد الطبية بالرياض....
أواصل
| |
|
|
|
|
|
|
| |
د. ياسر عبد القادر
فيس بوك
تويتر
انستقرام
يوتيوب
بنتيريست