|
|
 ماتــــــت عــطـش
|
أُمى ما ماتت عطش
ضربا السموم ريقا إتقرش
والموية جنبها بالقوارير
وديب فريزر حارقة تش
العصاير وكُلُ انواع الفواكه
جاهزة مخلوطة وفرش
ومعا كدى ماتت عطش
***
مرضاً لعين اسمو الخبيث
درش العِباد قشاها قش
إن عضَّ عضتو ما بتطيب
زي الاسد ينهش نهش
حيلتو كُلو على المساكين والغلابة
وحضرة الناس الغٌبش
ماتت عطش 000
***
يا أُمى يا فرح السنين
الكان تباشرنى وتهش
يا غرة الزمن الجميل
وتناغُم العين والرمش
اتارى يوم ما كنتى راحلة
بدت سحاباتك ترش
والشمس كان نوت الغُروب
كُل مالا تصغر وتنكمش
والناس بقت محتارة
ما بين تقنِّب او تمشْ
والدنيا صنَّت والحُزُن
بان وإترسم على كُلْ وش
وانا بين مصدق وبين مكذّب
وبرضو لازال مندهش
ماتت عطش 000
***
والله ما وقف العزاء
لا إتلم صيوان لابرش
وما غبتى عن بال الحروف
البيكى تسمو وتنتعش
ولا عن بال شتيلاتاً شتلتيهن
كبرن وشالن بقن حش
ولا عن درباً سقيتى عُشق
رويتى وانبت القش
ولا عن بال طويراتاً موالفنك
وفى جنبك بنو العِش
ولا عن بال صويحباتك وحبيباتك
وصدق الاخوّة الما بقت غِش
ولليلى نبكى على فراقك
يا اُمى والحال الوحِش
وا شريرى علي انا
ما برضى شافع وعضمى هشْ
ماتت عطش000
***
غاب الفرح من يوم رحيلك
يا امى هاجرنى وطفش
والليل كأنو نسى المودّة
البينى بينو عِمى وطِرش
نجم السهيل خاطرو إنكسر
لا شُفتو تانى ولا رقشْ
ما دمت يا وجع الوجع
جواي تدمدم وترتعش
الدنيا صِبحت مالها قيمة
وما بتسوى عندى ولا قرش
وما فى زول بقدر يفوت من قدرو
والمكتوبلو فى اللوح والعرش
ما تت عطش **
***
and#8234;© 2013 Mi
|
|
 
|
|
|
|
|
|
|
|
Re: ماتــــــت عــطـش (Re: معاوية الزبير)
|
يايوسف ياود الحداد
مزقت أسياج القلوب
بتلك الكلمات المؤثرة
التى تجعل الدموع تذرف
الام غاليه
نعم غالية
لكنها لا ولن تكون غالية على ربها
نسأل الله أن يبدلها دارا خيرا من دارها
وأن يجعل قبرها روضة من روضات الجنة
إنا لله وإنا اليه راجعون
ولاحول ولاقوة إلا بالله
تاج السر
| |
|
|
|
|
|
|
|
|
|
Re: ماتــــــت عــطـش (Re: يوسف الحداد)
|
Quote: وما فى زول بقدر يفوت من قدرو
والمكتوبلو فى اللوح والعرش |
الاخ يوسف نسأل الله ان يتغمد الوالده برحمته ويسكنها الفردوس مع الفائزين برضائه
احر التعازي لكم ونسال الله لنا ولكم وللجميع بالصبر الجميل في فقد اي عزيز وحبيب
رثاؤك برا بوالدتك وجاء معبرا وعميقا ولامس اشارات الابن البار بوالدته فطوبى لك بذلك
مودتي
الرحـــال
| |
|
|
|
|
|
|
|
|
|
Re: ماتــــــت عــطـش (Re: درديري كباشي)
|
Quote: الام غاليه
نعم غالية
لكنها لا ولن تكون غالية على ربها
نسأل الله أن يبدلها دارا خيرا من دارها
وأن يجعل قبرها روضة من روضات الجنة
إنا لله وإنا اليه راجعون
ولاحول ولاقوة إلا بالله
|
غالية الشوية دي؟
أتمنى يمر يوم من غير ما تمر ذكراها على الخاطر
لكنه أمر الله
هم السابقون ونحن اللاحقون
قصيدة معبرة جدا
لك التحايا
| |
|
|
|
|
|
|
|
|
|
Re: ماتــــــت عــطـش (Re: tabaldy)
|
الاخ العزيز
tabaidy
سلام الله عليك ولك التحية
واشكر مرورك الجميل وكلامك الطاعم
والله يجبر خاطرك يا طيب
ورحم الله امواتنا واموات المسلمين ف كل مكان
لك الشكر وتعظيم سلام يا غالى ..
| |
|
|
|
|
|
|
|
|
|
Re: ماتــــــت عــطـش (Re: درديري كباشي)
|
الحبيب الدرديرى
لك التحية والامنيات قوافل
شكراً لمرورك المعطر واطراءك السمح
مقترحك رائع لكن وين صديق ووين عيسى روي
الله يديهم العافية وياخذ بيدهم ..
لك التحية دوماً اخى درديرى ولمشاعرك افلطيبة
| |
|
|
|
|
|
|
|
|
|
Re: ماتــــــت عــطـش (Re: يوسف الحداد)
|
يوسف الحداد ...
تحية ترفل وداًً وتجله ....
الحزن يا صديقي يكتبنا ... نعيشه ونحترق .... ولكن صدقني أخي يوسف .... قليلون فقط هم الذين يحيلون أحزانهم لمثل هكذا إبداع ......
رحم الله والدتك وأسكنها فسيح جناته مع الصديقين والشهداء وحسن أولئك رفيقا ؛؛؛؛
كنت كما أنت دائما ً .... إن شاء الله تسلم ياخ ......
مع خالص ودي وتقديري ؛؛؛؛؛
| |
|
|
|
|
|
|
|
|
|
Re: ماتــــــت عــطـش (Re: إدريس محمد إبراهيم)
|
لها الرحمة والمغفرة
Quote: مرضاً لعين اسمو الخبيث
درش العِباد قشاها قش
إن عضَّ عضتو ما بتطيب
زي الاسد ينهش نهش
حيلتو كُلو على المساكين والغلابة
وحضرة الناس الغٌبش
ماتت عطش 000 |
أكيد لما يكون وزيرنا ده
http://www.ourfull.net/contents/newsm/5822.jpg
المرض الخبيث يبيع فينا ويشتري
ما شعبنا بقى منهش للحرامية ثم المرض
والافظع رغم الجرم والظلم والموت المجاني
شاعرنا ينفخ ملئ شدقيه مطبلا
لعمر البشير جاعله تاج عزته ورمز كرامته ,,
| |
|
|
|
|
|
|
|
|
|
Re: ماتــــــت عــطـش (Re: إدريس محمد إبراهيم)
|
الاخ العزيز إدريس محمد ابراهيم
تعظيم سلام يا حضرة الوطن العزيز ومليون تحية
الشوق دوام والاحترام وحلو الكلام
واطيب تعابير الغرام ولحن الاناشيد الشجية
اشكر مرورك واطراءك الانيق
ولك الشكر ايضا على مواساتك لى
ورحم الله امواتنا واموات جميع المسلمين
لك الشكر ايها الشفيف ودمت ..
| |
|
|
|
|
|
|
|
|
|
Re: ماتــــــت عــطـش (Re: امين العبادى)
|
امين العبادى
الله لايوريك مكروه فى عزيز لديك
اشكر نبل مشاعرك
مداخلتك بتخفف كتير مما اعانيه
لك التحيات الطيبات مثنى وثلاث ورباع
نجيك فى الافراح ..
الحداد
| |
|
|
|
|
|
|
| |
معاوية الزبير
تاج السر محمد حامد
أشرف الرحال
سيف الدين عيسى مختار
إدريس محمد إبراهيم
عمار عبدالله عبدالرحمن
فيس بوك
تويتر
انستقرام
يوتيوب
بنتيريست