يا عمر صِديّق أنهم ود جبرين و عبد المنعم و تعالوا لِ بجاي...

Quote: الليله رسلت السلام يغريك يا الزين السلام ليك, وللمعاك في الأوضه قاعدين السلام يغري الطرابيش والقلاشين السلام من عين شمش لحد فلسطين أنا ما بوصفك يا صباحي بخاف من العين وانت من عين الحسود وادعاك جبرين وأنت بالعافي التختك في المصارين تبقالك هدم ياسيدي وسروال ونعلين الليله ات يا سيد الحصص وصمد النمرتين وانت ياسيد الجزيري تكاكي وزين وأنت ياسيد البسوق أرقوق موازين وأنت ماعارف قلبين لي مجنين ومابترسل لي جوابن فيهو سطرين وما بتقول لي نعيم صباح أمو أشتغل وين أنت ماعارف جواب السلامي يجيني وأطول لي شبرين وأنبسط لي بساطي زايده علي القوانين الله من خلاني طيره وأحصلو الحين وألقى في القهوه قبل الرسمي جالس في الدرابزين وينسر بالي بيكم يا الحنينين بعد الحال معاك أن شاءالله جالسين نتلاقى أنت طيب ونحن طيبين انت لا تقول الجواب جاني من وين الكلام نضم ام نعيم مو دايرلو تلقين الكاتبو وراق ود حســـــــــــــــــــــن اسطه في الطاحــــــــــــــــــــــــــــونة تاجــــــــــــــــــــــــر في الدكاكيــــــــن الليله دايره احكيلو العذر صمد نمرتين وقولو من قبل الملمات مانا فايقين ومنطبقات عليا تلاتي واتنين وختي ربع جنيه وبعضن تلاتين وقالوا مابنقبل عذردايرنو في الحين وأن قلته المقد ماجابلو مدين والعيشريف مبوص ومامرق هين اصلو لاتمرن مرق ولانا سايقين أنا طلبتك بالله ترسل لي جنهين

Quote: في درب البنات يايمة مااتبشتنت .. ما اتبهدلت ما اتغربت دابي أنا اتوكرت في بلداً بناتا بلا الخيول الجامحة فوق الريح تشابي وجوهن يمة كان شفتي القمر.. لجلج يضاحك في الروابـــــي عيونن يمة زي بحر المحيط الموج يولول .. والعرق لافحني فايت واخرابي سنيناتن بلا شخب الحليب الصافي يرهج في الكبابـــــــــي ريقن يمة زي خمر التمورالمن زمان طامرنو في جوف الخوابي رقيباتن رقاب الريل .. على الحدب البعيد شرفن على هوهيو كلابي العرجون يصارع في السبيط .. مندلي في قلب الجريد هتان ينقط في العسل ياريت شرابي ولونن يمة زي لون القمح ضروهو شوف ضراني كيف الله يضاريك ياالضرضر صوابي دريباتن عقاب التيه.. ما في خبير يشق التيه على بلد الدوابي مهورن غااالي مابقدر عليهن.. وحاتك إنت ما بقدر عليهن كمان شوفي المصيبة نفيستي فيهن منو البقدر يمد إيديهو لي كيس المرابـــــــــــــــي؟ دحين يايمة راجع لي دريبك أنا الغرقان وفي الموجات أشابي أصارع في الهلاك يايمة قاسي بعد قربت لي قيف الشرق تلفحني شيمة كاسحة مغربابــــــي مشاكل الدنيا مما فت منك.. إلى هادا الوكت، وأيضاً كذلك إلى ما بعدو مبشتنابـــــــــــي قعت الليلة زي فاقداً مزوزو أجرجر في التراب .. ودر حجابي وإن كان للقروش إن شا الله طايري.. معلم الله لي حولين اسم فرطاقة ما دخلت جرابي أنا لا مالاً لقيتو عشان أشوفك .. أجيكي أقدل مع الجنيات تجيكي العافية بس فضل شبابي والخبر المهم ما قلتو ليك يايمة قبال أنسى في آخر جوابي دا شيتن أصلو ما فكرت فيهو.. وحاتك ضمة ما كان في حسابي إرادة المولى مو خافي عليكن .. وكان دسيتا لا بد تجيكن خبيري مع البنات والليل يهوّد .. أهز ضرعاتي وارفع في حجابي أنا بقيت غناي ألعلع في البنادر.. متل ناس ود صليليح .. طنبرابي

Quote: سلام صديقي قلنا نسلم عليك تعرف انا محسي لكن من حبي للشوايقه ناسبتهم

Quote: توطئة... كان رجل لطيف وظريف جداً. صورة طبق الأصل لشخصية بت ميدوب في رواية المرحوم الطيّب صالح (موسم الهجرة إلى الشمال). عليه، الرجاء عدم المؤاخذة في إيراد العبارات التى جرت على لِسانه مع بعض التحفظ...

Quote: بداية شتاء العام 1984 ، رصيف محطة اتبرا يعج بالمسافرين والمودعين، وبابور قطر كريمة يستعد للتوجه للخرتوم. بوفية المحطة مزدحم بالمسافرين، عشان الباسطة طبعاً بالسمنة وكده في بوفية محطة عطبرة. في هذه الأثناء، كنا أنا وصديقي نجوب الرصيف جيئةً وذهاباً في محاولة لتحديد مكان في إحدى عربات القطر نتسلل إليهِ عند ساعة الصفر. كنا كِلآنا يفضل السفر على (السطح)، نحب التسطيح لأنه مُريح ومجان، يعنى لاغلبة مسافرين، لا غلبة كماسرة، لاغلبة عساكر، لكنه في ظروف الشتاء صعب جداً نسبة لأنّ سقط صحراء العتمور ولفح زمهريره لايُحتمل.

Quote: اتبرا جميلة، وحلوة، وناسها طيبين... ونحن نتسكع فوق الرصيف أذكر الكثير من ناس اتبرا يعرفوننا ونعرفهم، الواحد فينا زي السيّد علي الناس تنادى فينا يمين وشمال، ونحن مستمتعين بالونسة معهم وكذلك كنا نستمتع بمغازلة الحسناوات المطلات من خلال نوافذ القطر. حددنا عربية ونمرنا عليها مظبوط جداً. خالية من الإضاءة كحال جميع عربات القطر الأُخرى وسطح يعنى ما فيها كنب ولا كراسي. بمجرد إطلاق الصافرة وتحرك القطر قفزنا إلى داخل العربة التى كانت مليئة بالركاب.

Quote: تحرك القطر. الناس في العربة فى حالة صمت والظلام يتسكع في فضاءها إلا من بعض بصيص الضوء يأتي وميضاً من خلال نوافذ العربة عندما يمر القطر بالقرب من عِمدان الكهرباء في المحطات. هذا البصيص لايعطيك فرصة كافية لِتميّز ملامح الركاب داخل العربة. حِليل القطر... القطر جميل وبيفتح مجال للتعارف والتآلف والونسة، السبب الذى يجعل الرحلة نوع من المتعة رغم مشقة السفر في ذلك الزمان. المُهم، عمنا الشايقي ده هو البدا الونسة وكمان إستلمها يا قول أهلنا. شايقى ذو نسب في الشايقية عميق وغريق، يعنى شايقى صِرف. لكنة شايقية عميقة وإنبهال فى الونسة لأبعد حد ومفردات، جعلتنى والله العظيم أكون فى قمة المتعةالسبب الخلانى أشاركو الونسة لى شقاوتى.

Quote: أها، عمنا دا بداء يتكلم عن العِرِس فى زمنو وما يصحبه من إستعدادات، وتحضيرات، وهوايل. قال مبتداءً حديثه بقسم غليظ لِيثبت أنّ كلامه حقائق: وحات سيدي، العرس فى الزمن العلينا دا لغاويس ساكت. عِلِى زمنا أكان زمن زين، الزِرِيعىِ دى يقعدِن الحريم يسوّن فيها قبل شهر. وأحد سالوا: يا حاج الزريعة بتسوبيها شنو؟ ردَّ عليهو:هى عان نفر ده كمان، ضيفان الرماد بتدور تخلى خشُمُن ناشف. مِيا بيدوروا يشربو. وواصل، ودق الرِيحِى دا كمان نضمو برا! بيجيبو الضفرة، وبِت السودان، وبِت القِسيس ويلُخُو الدِلكِى والخُمرة. وحات سيدى، يومو اليجيبوها ليك، يجيبوها تريانىِ تنقط من الدِهِن والكركار والرِيحِىِ، وبتدور لك عنقريب نصيح وكرابو شديد ويفُرشولك فوقو العتنيبىِ الملونىِ وتقول كدى........ أنا على شقاوتي قلت ليهو: يا حاج عليك الله هسع ده كلام ده؟. ده عذاب. يا عمنا هسع الريحة بقت بخاخ( عمنا طبعاً راخى أضانو وبيسمع والواطه ضلام)، عندك توليت، ومرايات، وتجيك لابسة فستان النوم، والسرير دبُل نضيف ومفروش مليان مخدات والمرتبة إسفنج ( عمنا راخى أضانو ويصنّت) على اليمين يا عمنا المرتبة شِدة ما ليّنة تغتس فيها إنت والمراة التقلعكن ما تتعرف. طوالى فى الحتة دى عمنا قاطعنى بصوت عالٍ شقَّ الضلام: نان شِن الفايدىِ ما ودَر صُلُبا. إنفجرت الضحكات فى الضلام من من جميع أنحاء العربة. وأنا سكتَ ساااااكت، وتانى أصلى ما فتحتَ خشمى معاهو، رغم إنه واصل ونستو، وكان كل مرّة فى أثناء كلامو بيتعرض لى وهو ما قادر يشوفنى في الضلام: قُتَ لِى كيفِن المرتبة يا المطموس، شغلتكُن دىِ شغلة طرطشِىِ ساكت. ويواصل: أها عارفين، تروح السوق، تجيبلها توبين بنقالي، وتجيبلك كمان طِرقِىِ اللت زراق لى أُمها، النسابىِ كمان ليها مكانىِ، المِطيميس قالىِ العنقريب كيفنو؟ والله حِكايِ! وِلادة الزمن ده اصليِ وِلادِيِ مبشتنىِ ساكت. أنا ماسك خشمي على، وصاحبي الضحك كاتلو عدييييل كده. قلت له هامساً: أسمع يا فردة، أنا الواطة قبل تفتح حا أزوغ بالرااااحة للسطح، إن شاء الله البرد يكتُلنى، بس عمك الشايقي ده أصلو ما بخليهو الصباح يشوفنى.

Quote: قبل الشمس ماتشرق إتسللتَ بالرااااحة، وكان الناس في حالة هجعة في تلك اللحظات، وعمنا أتاريهو صااااحى وشاعر بحركتى اوّل ما مشيت على باب العربة طوالى قال لي: بتدور تِنسرِق منى يا الأغلـ..... أمانِىِ ماك ممسوخ، قُتلِىِ المرتبة كيفنها؟ عِرِفتنىِ بدور ازُرك وِكتين الواطة تصبح، مُو كدى؟. الناس في العربية إنبهلوا بالضحك، وأنا بسرعة إتخارجتَ للسطح، وإضطريت أقطع المسافة المتبقية للخرتوم في برد لا يعلمه إلا الله...

Quote: ناتيك خفافا او على ظهر الخيول ...ابشر بالخير والسلام ليك وللمعاك جالسين هلا ود المدير

Quote: ابتسم من فضلك ..الشافعة مى شافعة نصاح اميرة المدن مدينة هادئة ..بسيطة وعنيدة تحب القمر ..واشعة الشمس والاطفال الصغار وكل شى اخضر تسكنها العلاقات الحميمة .. تبسط ذاتها لكل زائر وتحتضن كل حبيب مقيم لها جدلية خاصة بها فى لحظة واحدة تعانق الجهات الاربع تقاوم الريح العتية لها مقدرة عالية فى تذويب الكراهية ..كما تنتف ريش طائر الشؤم لطيفة كالحرير ..وضحكات الربيع ..واشعة شمس الاصيل لها شموخ النخل ورقة الحمام مدينة باقية رمز للعطاء والتجدد نهر متدفق ملء الشاطئين ..وفية كالام الرؤوم وكذلك عقل يجمع الفكرة والخاطرة والشجن المقيم مدينة ترضع من ثدى الكون وتعيش فى امتداد المدى .. وتنتقى كل القلوب المحبة لها نقش خاص فى خاطرى هذه المدينة الساكنة هدوءا وروعة ندية كالزهرة صبوحة كالطفولة كالاحلام ابتسم من فضلك فانت فى مدينة الحصاحيصا ((الشافعة مى شافعة نصاح)) هذا المقطع كان مكتوبا على الزجاج الخلفى لعربة اجرة..اكتشفت لاحقا انه مقطع لاحدى اغانى الحقيبة كثيرا ما غنيتها واسمعتها غنائى عند كل مساء ايتها المقوشة من كل الاشياء الجميلة ايتها المنفلتة من ضلع النيل اخذة اجمل مافيه ايتها النسمة الاتية من ضوء المستقبل اهديكى مواويلى واشتياقاتى واغنياتى الكثيرة لك تضحك عصافير الامل انت الاضاءات الاولى..المسارات كلها اشتعال المدى..بالمنظور الاتى خلف الغيمة انت الهمسة والبسمة المفرحة تتوغل فيك ..كل المعانى النبيلة انت يامن ملكت الهناءات كلها واجبرتنى على الرحيل اليك باختزال المسافة..عند بداية التأمل تمتلئين فرحا يا ذات الصبح النبيل هذه المدينة التى تنام على ضفة النيل الازرق الذى يحدها يمينا ويسارا يمتد مشروع الجزيرة حيث الخضرة الدائمة بزراعة القطن والقمح ومحاصيل اخرى مدينة كالغمام المدينة التى التى اختارتها الايدى الصينية المدربة لاقامة مصنع الصداقة للغزل والنسيج والذى صار نواة لمصانع اخرى عديدة تحيط المدينة شمالا اى انها مدينة صناعية زراعية ولها اهمية قصوى فى المساعدة فى انتشال الوطن من وهدته ولمن لا يعرف عنها شيئا فهى المدينة التى يتشكل سكانها من كل الجهات السودانية..فى وحدة وطنية رائعة تجمعهم علاقات انسانية حميمة فالكل اهل واحبة والكل يعشق هذه المدينة بجنون اتذكر كثيرا..عوض ادريس صاحب محلات السنجك الشهيرة الاخ الصامت المبدع ومكتبته الخاصة العامرة هل لى ان انسى محمد حترى اظرف شخصية فى الوسط الرياضى وهو الهلالى المطبوع..ام حماده الذى تعرفه جماهير الكرة السودانية وهو المهووس بحب المريخ ام انسى جلساتى واصدقائى امام شجرة النيم الظليلة هذا المعلم الهام..فقد غرسناها اما منزلنا ورعيناها حتى صارت جزء من هذه المدينة بحى الامتداد العريق هل اتحدث عن مساهماتها الفنية بمن ابدأ بعبد المنعم حسيب الذى شدا بأجمل الالحان ام مصطفى سيد احمد مجدد الغناء السودانى الحديث الذى انطلق من ربوعها محلقا فى عوالم الطرب والغناء الى سمية حسن المطربة..التى كانت بحق امتداد للجيل النسائى الغنائى المبدع هذه امثلة لبعض فنانى المدينة الذين كثيرا ما عطروا سماءها بالنغم الشجى وبالاصوات الدافئة وبالجمال الساحر ومن ثم كانوا اضافة حقيقية لفنانى الوطن هذه المدينة التى امدت واضافت للمثقفين والكتاب والادباء مجموعة متميزة من فرسان الكلمة الكاتب المسرحى اللامع حمدنا عبد القادر صاحب الاضافات الثرة فى هذا المجال ..كمال وكلماته المميزة هاشم كرار وتحقيقاته الجريئة عثمان عابدين ومحطاته التى ينتظرها الجميع الى الاخ فيصل محمد صالح احد ربان جريدة الخرطوم ومن شعراءها..الطيب الماحى..وعوض ود الكامل والشاعر المبدع.. عفيفى اسماعيل هذا المتمكن مع مجموعة اخرى من الكتاب والمبدعين لا يفوتنى ان اذكر ابناءها من الرياضيين الذين مثلوا السودان فى كثير من المحافل الدولية فكلنا قد شاهدنا وعاصرنا شواطين..عروة..وابو العز..وعليوة جاد كريم وايوب..مركز وكندورة زاهر مركز الذين كانوا نغمة ترددها جماهير الهلال العاصمى وابناء السودان عموما فى اللقاءات الدولية وهناك لاعبو المريخ العاصمى جاديكا..ونميرى الشبل المعجزة الذى صال وجال فى ملاعب العالم لاعبا فى فريق الشباب عرفه العالم بفنه وسحره الذى استمده من مدينة الحصاحيصا لاعبا بنادى الهلال مع عشرات الموهب الفنية التى لعبت فى اكثر من نادى سودانى مازال الالم يسكننى تحتوينى النهايات الحزينة اين انت اين يا بعضا منى يا كلى اشتهى ان التقيك يبكينى حزنى..تشطرنى دواخلى تتعمق الكلمات داخلى فانبرى الى نفسى حزينا المدينة التى تكتمل نقوشها..بتفردها وحسها العالى فى الانتقاء.. تشابه كل المدن الحالمة المشبعة بالندى والرؤى حتى الاغتسال..تتوضأ نورا وضيا والقا الجناين تستظل بظلها.. الحمامات الفاردة الجناح تبدو خجولة عند مقامها فعند حضورها كل البهاء كل من اتى اليها زائرا..او فى اقامة مرتبطة باداء مهام معينة ينجذب اليها..ويحط رحله ويقيم اقامة دائمة لانها المدينة التى يحس كل انسان بانسانيته..وسودانيته وحريته هذه المدينة التى قاومت كل اشكال القهر هذه المدينة المتمردة ..القادرة على اقتلاع كل باغ من ارضها الطاهرة هذه المدينة معشوقة المدائن ان كان على المك عاشقا لامدرمان وجماع يهيم بالحلفايا وعبد الحى يتباهى بسنار وود المكى بالبيض بل والسياب بجيكور فاننى اغرس قلمى بدمى لارسم احرفها حرفا حرف ومن كل هذا انضم مسبحة واطوق بها جيد المدينة الحبيبة التى تكتسى مسحة من الوقار بجلال شيوخها وكبارها فاكتسبت اصالتها من اصالتهم وازدانت جمالا بحسانها..والفة ومحبة من وفاء الامهات لك الله..ايتها المدينة الصامدة يا اميرة المدائن احتويك اقر بانى انتشلتك من ذاتى بعد ان كان الضياع فريسة سهلة لعمرى تتفتح المسافات بينى وبينك رقصة البدء تجاوزنها مرارا تأملينى فانت سهم اضاء عمرى توحدت فيك اقسم انى..ما وجدت سرك الذاتى الا فى الحنايا ترواحنى اشياؤك الصغيرة نبيلة انت ترقصين فى ضوء المسافة تتجلين كوردة مسقية دوما بتبع راق شتاؤك القارس يحتوينى دفئا وحرارة كلما ابتعدنا ازددنا لقاء ...... مقاطع من مقال نشرته بصحيفة الخرطوم ..1994

Quote: هنالك توامة بين القرير والباوقة، والسيالة بمدينة عطبرة حييث وُلدت وتفتحت عيوني علي ضفاف النيل والجروف، وداعب أُذناي أنين السواقي وصوت بوابير اللستر، وفي مشواري مع الحياة عشقت الشوايقة وغناهم، وتتبعت أخبارهم حتى إعتقد الكثيرون أنني إنتمي إليهم وهذا شرف أتمناه. سلآم وتحايا لك ولآهلنا الشوايقة...