|
Re: هابى بلسطاين ديى!! (Re: Balla Musa)
|
ديدى عجاجة لقبت بعجاجة لأنها كانت تحب الرقص الساخن الذى يثير العجاج من براثن السيراميك.. كانت متقرضمة وقيل أنها عاملا فيها ولا أنثى الأنوفليس فى الجزيرة عندما كان القطن ذو تيلة طويلة وناس الجزيرة عندهم دم.. وقتها كان كل الناموس يهاجر الى الجزيرة مما جعل المناطق الأخرى خالية تماما من الناموس.. قيل فى ذلك الوقت كان ناس الجزيرة يكثرون من شرب البيبسى مما جعل دمهم حلوا..
ديدى عجاجة يتوافق عيد ميلادها واليوم السابع والعشرين من فبراير.. قيل أنها مولودة فى 29 فبراير ولكنها لاتسطيع الصبر حتى تصير السنة كبيسة وتقبل القسمة على اتنين.. وأشاعت عنها البنات أنها تحتفل بعيد ميلادها مرتين فى السنة ولم يزد عمرها عن ال24 سنة قط. ولكنها اتهمت من أطلقن الاشاعة بضحالة الثقافة إذ أنها تحتفل مرتين فى شهر فبراير, الأول عيد البلسطاين تضامنا مع الفلسطينيين والثانى عيد ميلادها..
وكما قلت لقبت بعجاجة نتيجة لرقصها الساخن الصاخب, فقد كانت تستهزأ بنورة فى أغنية كدكى: قلبى يتوه مع نورة لما تكمل الرقصة... وتجدع توبا فوق راسا وتقول كدى تمشى تندس! فديدى كانت تلبس فستانا مطرزا بالورود الفضية وكانت تجعله دائما يتثاءب عند الركبة.. لوحظت فى إحدى حفلاتها تمسك بأطراف الفستان مما شغلها عن الرقص, وعندما سألوها عن سبب ذلك قالت أن مصور الفيديو اكتشفت أنه يتلاعب بالكاميرا ويقلب الصورة, ولولا الشرط الجزائى للغت التصوير وطردته. لهذا السبب كانت تمسك بأطراف الفستان حتى لا ينكشف مايحمد رؤياه عند تقليب الكاميرا. ديدى كانت محل احتفاء بقفشاتها التى تأتى من كونها تعتقد أنها عرفت كل شئ قبل رصيفاتها خصوصا الأشياء التى ترتربط بالحضارة.. ففى إحدى المرات سمعت إحداهن تبوبر بالريال السعودى, فقالت بالله خلينا منها دى مستجدة نعمة , نحنا لما عرفنا الدونار دى كانت جيعانة وعريانة..
وكدن يفهمن أن الدونار عملة جديدة أرفع من الدينار السودانى وأدنى من الدولار الأمريكى, لولا أنها أخرجت ورقة عليها الرجل ابصلعة.
البوست عن الشلاقة والشليقين.. لو شليق أو تعرف شليقا فمرحبا بك الشليقات يمتنعن!!
| |
|
|
|
|
|
|
Re: هابى بلسطاين ديى!! (Re: Balla Musa)
|
حاج بخيت شيخ فوق الستين فى العمر ولكنه يعتز بمعلوماته المتجددة ويثق جدا فى ثقافته.. كان يعتبر من يشرب الشاى حتى آخر قطرة من الكباية إنسان قليل الثقافة..
حاج بخيت كان يعمل خفيرا فى الشئون الدينية فى عهد نميرى, وعندما تسأله يكتفى بقوله أنا شغال فى الدئون الشينية ولايقبل تصليح أو تصحيح فى ذلك ( فمافى واحد يتشالق من البورداب)..
إبان حرب البلقان انتشرت كلمتى البوسنة والهرسك.. وفى جلسة من الجلسات أمام دكان التعاون سأل حاج عثمان: انتو يا اخوانا شنو البوسنة والهرسك؟ فتصدى له حاج بخيت, وعادة مايوبخ السائل قبل الاجابة, فقال له والله جهلك مدوعل آعسمان!! ياخى كان سياسة مابتعرف السيرة مابتعرفا وكل يوم مصنقر للدرس بعد صلاة العصر فى الجامع؟
ياخى أصلك ماسمعت بالأوس والخزرج؟
حاج عثمان: هم ياهن الأوس والخزرج القالن لينا شيخ أحمد؟ حاج بخيت : ياهن زاتم.. حاج عثمان: نان الوداهم من المدينة ومرقن فى بلد الكفر شنو؟ حاج بخيت: المعايش جبارة آعسمان اخوى!!
ياخى نحنا فى الدئون الشينية دى عرفنا حاجات كتيرة ماكنا بنعرفا, والله الواحد لو شغال مجان مايندم.
| |
|
|
|
|
|
|
Re: هابى بلسطاين ديى!! (Re: Balla Musa)
|
أها مرة وانا جايى من الخرطوم بعد ماطلعت شهادة التسنين حقتى, ركبت البراق من موقف شندى. جمبى حاجة يكون عمرها زى ستين كدا, صفرا ومشلخة نوع الشلوخ القال عليهن العبادى: العارض برز سايق فيالق ستة كل فيلق يقول لى الكان قبيل مين انت وانا كان عمرى زى عشرة كدا..
نزلت فى الجيلى للفطور وجيت لقيت ليك الحاجة ماسكة الجريدة وتقرا.. انبهطت وقنبت اعاين فيها,ياربى دى بصحها بتعرف تقرا الجريدة؟ طبعا فى حلتنا الحريم الفى سنها وحتى ناس أمى لو قلت الجريدة بناولنك جريدة نخل, والمثقفة منهن خالس بتعرف أن وظيفة الجريدة هى القراطيس البلفوا فيها التسالى والفول والترمس والكبكبي..
يازول قلت دا موضوع أدهش ليك بيهو حسن ود خالى لما أصل الحلة ( دا طبعا بالاضافة لرحلة الخرطوم نفسها)..
وصلتى كدى فتشت على حسن وقلت ليهو: يازول الليلة شفت ليك حاجة عجيبة خلاس قال لى: زى شنو؟ قلت ليهو: شفت لى مرا قدر ناس حبوبتى وبتقرا فى الجريدة.. قال لى: تقول وحاة سيدى الحسن؟ قلت ليهو: وحاة سيدى الحسن جد..
أها حسن خاتى يدينو فوق راسو, جانا عبد الرحيم, قال فى شنو؟ حكيت ليهو قال: ها وحاة سيدى على أنا شفت مرا صغيرة كمان وماسكة سجارتا قصبة.. قلنا ليهو: كلنا شفناها فى ميدان الزار لما العاجبة دقوا ليها خواجة رندو ايام بت الكاشف.. قال: لا لا دى قاعدة فى بيت عدييل كدا وبتشرب فى السجارة..
أها حسن عاين لى وقال: هلا هلا... ياحليل زمن ناس حبوبتك فاطنة, قالوا لما وقعت من حمارا على الجمبة الفيها حقة صعوتا, الحقة صادفت كراعا كسرت عضم المخروقة كش, والحقة ساغ سليم ولا طفقا ما جاتا!!
عقب عبد الرحيم: هيع والله حبوبة فاطنة قالوا السفة بتكتحا كتح ولا أجعص راجل!
| |
|
|
|
|
|
|
|