|
|
 Re: ساعة لأجل الوطن (Re: عاطف فارس)
|
ساعه لأجل الوطن
كيف حتكون المظاهرات في فهم ساعه لاجل الوطن؟؟
اولا حابي اسرح بخيالي شويه واتخيل الفكره في مراحل تنفيذها وكيف النظام حيتعامل معاها؟؟ لو افترضنا اننا حددنا يوم البدايه وقلنا الناس تتلم في اقرب محطه مواصلات لبيوتها.. حيحصل شنو؟ اول حاجه الامنجيه والكجر استعدادت حتكون مضاعفه وطوالي الحتات المشهوره بالشغب حيتمركزوا فيها يعني طلمبه الغالي عربيتين ودفار وباشدار كم عربيه وشارع السجانه بالنص برضو حيوزعو ليهو ولو شافو 10شباب ومعاهم 5نساء في محطه برضو حيوقفو فيها بكسي يعني حتات الديم والسجانه وماننسي جبره وشارع الستين ديل براهم دايرين كم عربيه واي عربيه فيها كم واحد؟؟ ما نحكها شديد طيب الفكره ما امان وكل الناس(واقفه مستنيه المواصلات ولا ظاهرو ولا هتفو) يعني شباب اركويت لو طلعو في الشرقي كميه وفي الخيمه كميه وفي البلابل ومستشفي الشيخ والمركز الاسلامي حيكون ديل دايرين كم ؟ ماننسي ناس بري اللساتكم من غير مظاهرات بحرقوها ! لازم اوزعو ليهم كم عربيه. نحن طبعا هدفنا ندخل مناطق جديده في المعركه يعني حتات الكثافه السكانيه جنوب الخرطوم والناس الغلابه في الانقاذ والازهري ومايو والسلمه وعد حسين الماعندهم اعلام ديل بعد نكتب ليهم في الحيط ونجدع ليهم المنشورات في بيوتهو اكيد حيعرفوا وديل بالمناسبه لحد يوم الليله فيهم كتيرين ماسمعو بيوم الكرامه ولا عارفين طلاب جامعه الجزيره بالضبط حصل ليهم شنو..المهم ديل لو مرقو لينا شويه شويه اكيد حيجهجهو الجماعه والعربات حتتوزع زياده .طيب وين ناس جنوب الخرطوم يعني وانت طالع من الرميله والاماب وداخل علي الشجره والعزوزاب برضو لو في اي محطه طلعو 15ولا20من شباب لنسوان حيكونو شويه لانهم الا مايعرفو والله النسوان بس املن المحطات المهم حتات ابو ادم والكلاكلات ديك الا اجيبو قوات بحري وام درمان ...طيب لو جابو قوات بحري وناس شمبات والدناقله والدروشاب الحلفايه طلعو حيتصرفو كيف وفي نفس الزمن كمان ناس الحاج يوسف من حله كوكو لحد جوه شارع واحد وجوه الردميه والوحده كل محطه طلعو لينا فيه 20ل25حيتصرفو معاهم كيف؟؟؟ نمشي ام درمان طبعا عارفنها دي قيامه من صالحه لحد وادي سيدنا ودار السلام غرب سوق ليبيا في اي محطه مرقو 20؟؟؟اها تتخيلو البحصل شنو؟؟ خلونا ما نستعجل نشوف مثلا شباب متكل في محطه في الكلاكله جا نازل فيهم عمك ابو فلان صاحبهم راجع علي البيت ،نادوه ياعمنا نحن واقفين دايرين نجهجه بكسي الرباطه داك دايرين نساهر بيه رسل لينا ولدك اتونس معانا .. كدا عمك سمع القصه وفهم الحكايه وعرف الشباب ديل دايرين اخلو الرباطه ديل ما يمشو من هنا يعني بكره امكن عمك دا زاتو تلقاهو واقف يعني الواقفين ساي ديل ولا عملو مظاهره خدمو الثوره ..طيب الحتات المابكون لقو عربات تقيف فيها ديل اكيد اليوم الاول والتاني حيحسو بالامان والهتاف حيدور وكل محطه حتتلم مع التانيه ...اقيفو خلونا ما نتسرع نحن اصلا ديرين لينا يومين تلاته نعمل ليهم سهر الجداد ولا نومو يعني ما اي محطه فيها 10ولا 15 اعملو هتاف ومظاهره مامكن محطه الصباح فيه 50ولا 100مستنين المواصلات بعد المغرب اطلعو 15؟!!! ديل نسوان الفريق بس ،مفروض اكونن اكتر من كدا يعني ديل مفروض بعد العشاء طوالي اشيلو بخاخاتهم واي حيطه اكتبو فيها واي بيت ما جاهم واحد طالع منو اجدعو منشور ليهم بفوق عشان ازيدو الاعلام و بكره لو ما جا البيت كله اجي واحد امثلهم ... طيب مامكن استنجدو بالجيش!!!!!! والله بيني وببنكم دي من سابع المستحيلات لانهم خايفين منه ... طيب ما مكن اجيبو قوات من الاقاليم ؟؟؟. ليه ومدن الاقاليم البخليها تتفرج شنو من كتره الراحه وعدم المرض ؟؟؟ طيب في حل تاني ممكن اعملوهو؟؟؟ حظر تجول!!!! لكن يا اهلنا ديل اصلا ما معترفين انه في ثوره ولا الشعب رافضهم وحتي جرائتهم الفيس بوك ما دايرين اقفلوه يعني لو عملو دي معناها اعترفو وانظار العالم كلها حتتوجهه علبهم ودي هن ما عندم ليها طريقه ولا بقدرو عليها ... وكمان الاغبياء ديل ابقو اشطر مننا ما حنبقيه بالنهار تاني لو دايرين ابقوهو طول اليوم ماعندنا مشكله بس اجيبو لاي بيت اكلو وشرابو.. خيالي واسع صاح؟؟؟ طيب خلوهو واسع ولا ضيق الصعب شنو عشان ما يتحقق؟؟ ماكلنا عارفين انه شعبنا داير الثوره وبكره كوز المويه خليك من الحرامي الدجال داك!! يعني الحينقص انو شعبنا اعرف صاح؟؟ لكن اعرف كيف ونحن غير الفيس بوك البشوفوه 20ولا25الف باستمرار والباقين مواضيع السياسه دي الا تجيهم في محلهم.. هو زاتو الفيس وينو البننشر فيهو صفحه ساعه لاجل الوطن واخبار الغبش العدد المعجبين فيهن الاتنين ما زايد علي 1500!!!!! طيب وين الباقيات؟؟ والله ناس يوميات البشير كتر خيرهم غيرو غلافهم بالفكره وبدو معانا تمام مع بدايتنا الاعلنا ليها يوم7ديسمبر بعد داك موضوع جامعه الجزيره الكان من الممكن نستفيد منو تمام بسبب الفوضي ضيع لينا لدايتنا كلها خلانا نبد تاني من الصفر... طيب وين الصفحات الكبيره وين ناس قرفنا وين رصد السودان وين ناس شراره وبطولاتهم؟؟؟ والله ناس قرفنا ديل راسلناهم لكن ما عبرونا وناس رصد ديل اصلا ما عرفنا واحد منهم وناس شراره طرحنا مامقنع ليهم !!! يعني بصراحه يا عمر عربي خليك في خيالاتك دي ومافي طريقه انك تبقيها حقيقه!!!! طيب كدي خلوني النحاول محاوله اخيره امكن واحد اسمعني وبسمعو هو الباقين اسمعوني !! وبكره القى ناس شراره وقرفنا ويوميات البشير ورصد السودان والتغيير الان واحرار و....و....وكمان طلاب الجامعات فطبشرحوها للطلاب في اركان النقاش و كلهم في الفيس خاتين شعار الفكره وبدعو ليها وحتي شباب التتظيمات السياسيه ضغطو علي قياداتهم اتبنو الفكره وكل ناشطينا وسياسينا واعلاميينا بقينا في صف واحد صف النضال بفهم وخطه وتكتيك والبخالف الوحده دي كشف نفسو انو ما صادق وقاعد في نصنا وهو منافق وداير حكومه السجم تدمر باقي الفضل... عليكم الله الكلام دا لو خيال ساي ما جميل؟؟؟؟
|
|
 
|
|
|
|
|
| |
عاطف فارس
فيس بوك
تويتر
انستقرام
يوتيوب
بنتيريست