نادر عارفني روحي محرقاني عشان ما قادره اتريّض بسبب المرض... قال لي: انت فتحتي البوت عشان مغيوظة انك موقفة الرياضة... ...
امس بالليل انتكسته، بعد ما حسيت اني بقيت كويسه، تاني امس حلقي قفل ورجعنا للغة الإشارة... غايته الليله ماشه الدكتور اشوف آخرة القصة شنو....
سمارت إنتي... اتحرّكي... الموضوع د ما في منه فكاك... والواحد حقو يقتنع انه الرياضة والاكل الصحي هم الحالة العادية، والاستثناء هو الجغمسة!
ساره علي... من حسي بتشجعي سمارت...؟؟ بناءا عليه، هاك الفيديو ده from my idol
د.القلب (وتُقرأ، دكتورة القلب)... ياخ انا قبل يومين في ظل الغتسان العايشه فيه قريت ليك كلام في بوست ما عن معزّتي عندك، وبعداك راح منّي... والله القلوب شواهد يا حبيبة... وانا برضه بكن ليك تقدير واحترام ومحبة شديدة... وفخورة بالصداقة دي شديد...
يلا خليك معانا في برنامج الرياضة ده... بعد ده فضيتي إلى حد كبير... انا زي ما قلت لسمارت، بستخدم الجري كطريقة تقلل الضغط النفسي بتاع كتابة الthesis..
رايوة!!! انت يختي قروشك محرّقاك ولا شنو... رسليهم لي طوالي لو ما عايزاهم... تعرفي، فترة كده كنت بستخدم الصرف المادي كمخدّر يأجل لي موضوع الرياضة ده.. يعني كنت بشتري الآلات بتاعت الرياضة واختها في البيت.. وقبل ما اشتري الآلة اكون متحمسة واني دي خلاص هي الحتكون سبب النجاح، بعد ما اجيبها اعلّق فيها الهدوم... لكن في النهاية نهرته روحي واستعدلته...
أووووه، خالد من منازلهم... ألف مرحب بيك في البورد بداية.. واهلا بيك full time loser... ايوه عليك الله واصل... انت شاب صغير ما زينا انا وخالتك سمارت دي (سمارت حتقول لي جايبه سيرتي مالك!)... شد حيلك وارجع للبرنامج عليك الله....
حسب الapp، شايفاك شاده حيلك... فارق النقاط ماشي ينقص.. أها، دايره القروش ولا ما دايراها!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
مريم بنت الحسين
فيس بوك
تويتر
انستقرام
يوتيوب
بنتيريست