إلى متى يواصل ((محمدية)) ضبح الأغنيات الجميلة؟؟

Quote: يا جميل قبل فترة أتناقشت مع شباب عن المزيكة السودانية، وكانت المناسبة تقريباً حضورنا لحلقة من حلقات برنامج أغاني وأغاني . أنا قلت ليهم محمدية دي بقى يديك حق الحكومة بس لا زيادة ولا نقيصة، لكن أنا بحب شغل أولاد الجيل الجديد أمثال حزيفة خاطر وحسام وعثمان محي الدين واسماعيل عبد الجبار وغيرهم . الشباب ديل أستغربوا بطبيعة الحال، لسبب بسيط نحن شعب وجداني للحد البعيد، حالم ورومانسي وما ناكر للجميل . محمدية أعطى للموسيقى السودانية ولم يستبقِ شيئا، ولكن التكتيك وخطط اللعب أتغيرت وما عاد زمّار الحي يطرب . يعني لما تسمع المزيكة الطاعمة المجنونة البتمرق من كمنجة كارين في فرقة ياني الأسطورية بتجيك كاروشة في حتة الله يعلم تحكها كيف . مع إنو الكمنجة بتاعة محمدية وبتاعة كارين واااااحدة، لكن الفرق إنو دي شابة مقبلة على الحياة وبتحب الجمال، وعايشة وسط ناس سمحين وأرواحهم حلوة . ناهيك عن المواكبة والقراية والتدريبات والتمارين المتواصلة والسعي للتفوق والإبهار . أها السبب شنو البمنع محمدية إنه يقدم لينا مزيكة طاعمة زي دي طالما كتوف الأوتار متلاحقة ؟ خلونا موضوعيين ودغريين وما نقعد نشكّر في هلال 87 ساهي . الكورة مدورة وحوة والدة بالجملة