|
|
 علوية مخدات .... او سيرة عرقى البلح
|
تجمعنا الاربعة
اناوفخرى وعوض شفقة وحربى السندوق
سالتهم
اها ياشباب الليلة وين
اجاب فخرى بسرعة :-
تصدق انا الليلة من الصباح نفسى كوارع علوية مخدات
قاطعه شفقة بخبث :-
يافخرى ياخ عذبتنا بى كوارع مخدات دى ياخ على الطلاق انا خايف لامن تموت يقول ليك اتشهد تقول كوااااااااارع
افاق حربى السندوق من سرحته قائلا :-
يخوانا بالجد كدة فى سر فى كوارع المرة تقول بتخت فيهم حاجة قدر ماتاكل مابتشبع القصة شنو
رد فخرى بخبرة
انت ماعارف ولا شنو قالوك ياخى مخدات دى لامن كانت بتعمل العرقى زمان كان برضو نفس الحكاية دى انضف عرقى (بحرى الجدول ) كلها
قلت بخبث :-
والله يافخرى انت بتاع قنابل
اتنحنح فخرى قبل يقول
ياخ قنابل تطلع د.... يازول والله جد مرة عبد العزيز خالى حكى لى قال لى عرقى مخدات دة الا تمشى ليهو من العصر البدرى لانو لو اتاخرت شوية بكون قطع قال لى المرة دى كانت بتعمل كمية محدودة جدا جدا بجو بيشيلوها الناس المهمين فى البلد القاضى ... ضباط القسم ... بتاعين البلدية والناس المهمين زى ديل وبفضل شى بسيط بنكابس فيهو نحنا الغلابة ديل ياحصلنا ياما حصلنا
قاطعه السندوق سائلا
وطيب هى وكت بتعرف ناس مهمين زى ديل الخلاها تعرس عبد النبى المكنيكى الجربان دة شنو
تقمص فخرى دور العارف ببواطن الامور مرة اخرى قبل ان يقول:-
ياعمك انت قايلو هو عرسة كيف
سالت بلهفة :-
كيف ؟؟؟
قال:-
قالوك الزول دة كل يوم لامن يقفل الورشة
قاطعه السندوق :-
يازول ورشة شنو الزول دة من قمنا جينا ماعندو غير صندوقو حق العدة القاعد بيهو تحت الشجرة الفى اول السوق ديك
احتدت نبرة صوت خرى وهو يقول
ياخ انا قاصد الصندوق دة زاتوووو ... بعدين تعال ياسندوق انت وكت عارف قصدى اللو........ الليك شنو
قال السندوق مغتاظا من مناداته بلقبه :-
يازول انت ماتطلع بينا العالى ياتحكى زى الناس يا تبطل ماممكن كل ....
قاطعته خائفا من ضياع الجكاية
يافخرى ياخ سيبك من الزول دة وكمل
واصل فخرى الحكاية وهو يؤجل غيظه من السندوق الى سانحة اخرى
اها قالوك الزول دة كل يوم يقفل (صندوقو) دة ويمشى يلقى ليك العرقى كلو كنسو الجماعة اها يقعد يسب فى الدين ويشتم مايخلى زول ويمشى يجيب من اى ست عرقى تانىة وقالوك هو من يشرب الكاس الاول يقعد يعوعى
مخدات يامخدات
اديتى النضيف للناسات
ضحكناجميعا بصوت عال قبل ان بستمر فخرى فى الحكاية
اها لامن الحكاية دة غلبتو وماعرف ليها شاور عمك محجوب الجلاد بتاع السروج وقالوك محجوب دة زاتو كان خبير كبير بحرى الجدول اهاقام عمك محجوب قال ليهو ياعبد النبى ماعندك طريقة فى عرقى الزولة دى الاتعرسة اها وبى كدة حقك فى النضيف بكون محفوظ متين مامشيت بتلقى رااااقد لاقاضى ولا المحافظ زاتو بقدر بهبشو
يتبع ...
|
|
  
|
|
|
|
|
| العنوان |
الكاتب |
Date |
| علوية مخدات .... او سيرة عرقى البلح | عبد الله فقير | 02-01-13, 10:26 PM |
| Re: علوية مخدات .... او سيرة عرقى البلح | عبد الله فقير | 02-02-13, 08:52 AM |
| Re: علوية مخدات .... او سيرة عرقى البلح | عبد الله فقير | 02-02-13, 11:09 AM |
| Re: علوية مخدات .... او سيرة عرقى البلح | ASHRAF TAHA | 02-02-13, 11:18 AM |
| Re: علوية مخدات .... او سيرة عرقى البلح | Shawgi Yassin | 02-02-13, 11:24 AM |
| Re: علوية مخدات .... او سيرة عرقى البلح | عبد الله فقير | 02-02-13, 03:48 PM |
| Re: علوية مخدات .... او سيرة عرقى البلح | عبد الله فقير | 02-02-13, 03:46 PM |
| Re: علوية مخدات .... او سيرة عرقى البلح | محمد قسم الله محمد | 02-02-13, 06:01 PM |
| Re: علوية مخدات .... او سيرة عرقى البلح | عبد الله فقير | 02-02-13, 07:52 PM |
| Re: علوية مخدات .... او سيرة عرقى البلح | عبد الله فقير | 02-05-13, 09:32 PM |
|
| |
عبد الله فقير
فيس بوك
تويتر
انستقرام
يوتيوب
بنتيريست