الحملة القومية لاستعادة البروف أمين.م. سليمان لملكوت البَلْ !!

Quote: التحيات الطيبات، و التحيات الطيبات لكل من سأل عنا في غيبتنا المجيدة، كل من إتصل أو أبرق معزيا ... و الحقيقة اني - قدس الله سري و سر صلعتي الشريفة - طلعت أهم باكتر مما تخيلت إذ لا تمر فترة بدون تلفون أو ايميل من زول يسال عن الحال و المال و ده من لطف الناس و كرمهم لا أكتر لا أقل ! أول حاجة يا حبشي أنا ما موقف، أنا وقفت براي ..و يا مولانا الملك يا ريت لو الموضوع زعلة من بكري عشان سحب بوستي عن كلام معاوية الصايم في البشرى ... أو عشان زعلتي من كلام معاوية في البشرى .... أنا قرفت من المشهد كلو، من المكان ده و كمية الانحطاط و الدرك الوصل ليهو، قرفت من رقبتي و من الشعب السوداني الشقيق في عضمتو اللي مثقفينو لو إختلفو معاك في رأي ممكن يقولو ليك إنت في المتوسطة كنت ما شادي حيلك، ثم لا يجدو في أنفسهم حرجا يتكلمو ليك عن الأخلاق و الديمقراطية و التبادل السلمي للسلطة !! بعدين يا وهبه الكلام الجابو البشرى ده أنا ما كتبتو في سودانيات، كتبتو في ايميل للبشرى لمن قال لي أرجع اكتب ، بكتب في سودانيات و سالوني كذا مرة ليه خليت الكتابة في س. أونلاين و كل مرة اجابتي بتكون إنو أنا ما ح أجاوب علي السؤال ده إحتراما للناس الهنا و الهناك، س. أونلاين ده البيت و لو عندي رأي في بيتي بقولو في البيت مافي بيوت الناس، و تجربة الادارة في سودانيات، س. أونلاين دايره ليها الف سنة مما تعدون عشان تصل لربعها !! بكري بدير المكان ده بعقلية إنو حقي... العايز يقعد فيهو بشروطي و مزاجي يقعد... الما عايز يتخارج و ينقطنا بسكاتو !! و الكلام ده قلتو لبكري لمن مشيت ليه أريزونا في موضوع إستقالة الناس الجماعية قبل سنة و شوية، و قلتو ليه في التلفون ( و قبل إسبوعين كنت بتكلم معاهو ) و هذا الرجل أخ و صديق و زول حارة و كرم لا يحدو حدود، و مقدرة علي الصفح شفتها في انسان ، لكنو لا يصلح لادارة منتدي مدرسة الحلفايا الابتدائية، ناهيك عن إدارة أكبر منتدي سوداني !! قبل فترة طويلة إتصل علي واحد من الأخوان في السودان الشقيق قال لي كلم لي بكري لعضوية، قلت ليه الأسبوع الفات كلمتو لزول تاني و بكري قال لي هسي باب العضوية قافل لمن افتحو بدخل ليك زولك، قلت ليه لمن تشوف عضوية جديدة إتصل بي و أنا بكلم ليك بكري ! الراجل رسل لي ايميل أول أمس عملت ليه فورورد لاب صلعة إنو يا حبيبنا فلان ده فردة بالله أدي عضويه، بعد شويه رسل لي ايميل قال لي خليه يرسل لي صورة من اقامتو و جواز سفرو !!!! لحدي هسي ما عارف الكلام ده هزار ولا جد !!! الغريبة حبيبنا ده قاعد في السودان الشقيق إجازة ما مرق !! غايتو أبصلعه يمحن الجن !! يا عم حمد ... ما عارف التناقض وين انك تقرأ و ما تكتب، عن نفسي أول تلاته شهور ما كنت بقرأ ذاتو، لانو القرف كان مستفحل لكن هسي عادي بقرأ زي كاني بكتب فيهو.. و زي ما قالت ستهم (و الزمن بنسي حزن و فرح ياما ) !! المهم يا حلوين، شاكر و ممنون حقيقة و إنبسط من البوست و من سؤال الناس أسال الله أن أكون أحسن مما تظنون و أن يغفر لي ما لا تعلمون !!! رد · 2 · أعجبني· منذ ‏11‏ ساعة