نحن ما الشعب السودانى المهذب و المثقف و العزيز..جينا يا مدينة نحن إيد ممدودة صادقة بالعصاير و الخبيز..........جينا يا مدينة نحن إيد مشدودة قوة لمن البركان يغيظ..............جينا يا مدينة نحن مايانا الأبينا والطردنا الإنقليز..................جينا يا مدينة الليلة شن حاصل علينا؟! المرارات تحتوينا المدامع فوق عينينا والغنيوات الحزينة القيم مركوزة فينا يلا نختار السفينة
نحن جيل سوداني واعد لا يعرف المستحيل..............جينا يا مدينة نحن جيل سوداني واضح لا يكضب لا يميل..............جينا يا مدينة نحن من تلك المعاني الراكزة في شعر الخليل.............جينا يا مدينة نحن من تلك الفوارس من زئير ترهاقا لى عبد الفضيل...جينا يا مدينة نحن عشاق الأغاني ويلا يارشا يا كحيل.................جينا يا مدينة ونحن مداح الخلاوي البضوو الدنيا ليل..................جينا يا مدينة الليلة شن حاصل علينا؟! المرارات تحتوينا المدامع فوق عينينا والغنيوات الحزينة القيم مركوزة فينا يلا نختار السفينة
نحن أحباب الرواكيب والعناقريب والسبيل................جينا يا مدينة نحن ما الشعب المهذب نحن ما الشيخ الجليل.............جينا يا مدينة نحن ما البت المرتبة تشبه الشعب الأصيل................جينا يا مدينة نحن ما الأم البتمسح عن حناجرنا العويل.................جينا يا مدينة الليلة شن حاصل علينا؟! المرارات تحتوينا المدامع فوق عينينا والغنيوات الحزينة القيم مركوزة فينا يلا نختار السفينة
نحن أولاد المزارع و المزارع فى الأصيل...............جينا يا مدينة نحن أخوان المساكين الحنينين و اللى حار بيهم دليل......جينا يا مدينة نحن ناس حرَّم تقيِّل جيبو قهوة و جنزبيل.................جينا يا مدينة نحن ما تلك الأنامل ترسم الوطن الكبير..................جينا يا مدينة نمشى فى جمر المآسى مهما كان دربو الطويل...........جينا يا مدينة الليلة شن حاصل علينا؟! المرارات تحتوينا المدامع فوق عينينا والغنيوات الحزينة القيم مركوزة فينا يلا نختار السفينة
نحن ما عشم الصديق الجانا يكسح ساعة السيل و الحريق...........جينا يا مدينة تلقى فى إيدينا موية لما يشتعل الحريق............................جينا يا مدينة تلقى فى إيدينا جمرة لمن الماعون يضيق..........................جينا يا مدينة نحن ما الشعب البشمر و البتلِّب شان يصارع الموجة يمرق لى الغريق..جينا يامدينة نحن ما الإيد البتمسح دمعة الأبو و الشقيق..........................جينا يا مدينة الليلة شن حاصل علينا؟! المرارات تحتوينا المدامع فوق عينينا والغنيوات الحزينة القيم مركوزة فينا يلا نختار السفينة
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة