|
|
 Re: هترشات دائش (Re: عادل الباهي عبدالرازق)
|
اعتزاري لمن يصله طرف الصوت لم أقصد التعميم
بنت ميمونة وهي في بعد سن الثمانية عشر تكورت وتدورت وجسما بقي زي الزير ماشاءالله
يا أرض أحفظي ماعليك لكنها كانت تمني نفسها في عريس لقطة أسم وجسم ووش مبتسم
كل ما تشرق شمس يجيها عريس وطوالي ردها لشقيقتها الكبري حسن شنو البعرسوا انا؟
شوفي خلقتوا كيف أسع دا جقر أقابلوا أنا من الصباح؟ انا مواصفاتي أول شرط راجل يكون
زي عاصي الحلاتي أو الممثل التركي مهند شقة ملك وسيارة في السلك ويخرج حسن من حياة بنت ميمونة ويكسب زمنوا تمر أيام ويتقدم بله لها وطوالي تشبك أمها أوووب علي
أنا الانتهيت معقولة ياناس أعرس بله بتاع البقالة أول حاجة أسموا شين ويجيب اللوز والنهار
كلوا يرص في علب الصلصة وريحتوا قرنجال وحلبه مالي بدفن روحي بالحيا انتوا لو زهجتوا
مني ببطل القراية وامشي افتش لي شغل ويأخذ المسكين بله شاكوش . شهر شهرين كمان
تجي جارتهم والله يابتي جبت ليك عريس مكمل من مجاميعوا خلقة واخلاق وكمان حاجي
بيت الله الحرام سته مرات ومغترب في السعودية وانتي بتعرفيهوا ود ستنا البيتهم فيهوا المجزرة .
بت ميمونة طوالي تركب وش ككو للجاره شوفي يا خاله أنتي شايفاني انا عارضا نفسي للزواج
ولمن أعرس بعرس ود ستنا مالي عاضاني ######ه وماتقولي لي حاجي ستة مرات ولا عشرة مرات
اصلوا حيشفع لي يوم القيامة . طوالي الجارة ترد عليها هيا بتي أستهدي بالله ود ستنا والله راجل
خلوق وبيشيل حملوا وماشايفا فيهوا عيب ومغترب في السعودية . بنت ميمونة أخلاقا تصل راس
نخرتا عيبوا أموا مدغلبة وقصيرة بعدين بنتي لو شالت جينات حبوبتا العاملة جسما زي أنبوبه أبرسي
دي اقع بيها وين ؟ وتاني هم ماتقولي لي مغترب في القشورية دي مغتربين القشورية الزمن دا طلعوا
مواسير ساكت تلقي بيت العزابة في جده او الرياض مستف زي بنطون شندي زمان لاشغل ولا مشغله
ماعندهم غير لعب الكوشنينة والفارغة
الزمن ماشي وبت ميمونة كل عريس عندها فيهوا رأي لمن دخلت الزون ( أي زول حريف كوشتينة بيعرف شنو
الزون ) يعني قربت تحرق وتاني لو عندها جوكرين في يدها مابينفع بتحرق بتحرق المهم وبداء المرض يتسلل
لذلك الجسم ذو القوام الممتليء يوم تقوم من الصباح تركب الصف في مستشفي مكه لعل الحظ يبتسم لها وتقابل
الطبيب وتكشف وتعمل ليها نظارة طبية قعر كباية ما بت ميمونة شوفا بقي طشاش . يومين ثلاثه تمد بوزة لاهلها
أصلكم ماشغالين بي الشغلة سنوني وضروسي كلهن موجعاتني وبيتهوززوا زي اللوري الشايل ليهوا فضية عده واللثه
ملتهبه وتمشي مستشفي الاسنان شيء قلع وشيء حشوة بلاهي خشما بعد ماكان الناظر الية يردد في سره أنا لااصدق ان هذا 00الأحمر المشقوق فم
بــل وردة مبتـــلة 00 حمراء من لحـم ودم
بقي زي السروال الماعندو تكة مخير الله يابت ميمونة دنيا فرندقس ومابتدي حريف
بت ميمونة الجسم أترهل والضعفة حصلت هم ساكت , وكل يوم مدورا ليها مشكلة .الصباح مع الخضرجي و
بعد الفطور مع نسوان الصناديق صرفتي وصرفتك وترجع تنوم وتستعد للشوط الثاني من المشاكل الجيران
مامرتاحين معاها وكمساري الحافله في غضب الله . جأتها في عصرية بنت الجيران وزوجها مغترب يا بت
ميمونة والله انتي ماشينة بس زبطي روحك ساي بي حبه كريمات من دكان قدر ظروفك بيجيك صاحب
النصيب وكمان قالوا في الصيدلية في حبوب البنات السلكن ديل كلهن أشترنهن من الصيدلية وبلعنهن
والكمدة بالرمدة الواحد تتكور وتتدور والعرسان المغفلين يجوا يطاقشوا مفتكرين القبة تحتا فكي . بت ميمونه
فتحت خشوما زي التمساح لكن الحبوب دي بتزبط شنو ولاشنو ؟ وحبوب السجم دي أسما شنو ؟ ونعل ماغالية ؟
ردت الجارة المكارة لالا ماغالية ماشائفا الخرطوم دي كلها بقت ترمش طالبات الجامعات والموظفات والفي البيوت
كل واحدة ماليا شنطتا منهن وهاك يابليع ( الخرطوم تطير عيشتا تلقاها من الصناعة الصينية المضروبه ولا
العروسات المضروبات الوش فانتا واليدين والرقبا كوكولا).
الجارة المكارة زوجها المغترب أجازتوا علي وشك وهي من كثرة ماضعيفة أحرف جزار مايطلع منها ربع كيلو
لحمة وكلها عضام ومعصعصة تحلف تقول بدرالدين قلق لاعب المريخ وخائفا زوجها يعرس فيها قالت التترفق
للصيدلية ببت ميمونة وقعدت العصرية كلها تزن لبت ميمونه ماتخليكي عويرة والله كلامي دا تتذكريهوا في الكوشة
وكمان رجال الزمن دا عاوزين المرا الملايانا وتريانا أسع انا القدامك دي مش متزوجها ماشا أجيب حبوب السجم
دي عشان الراجل العامل عيونوا زي ميزان الشطه ما يعاين للبنات المنفخات بالحبوب ديل واروح انا في شربه
مويه . من كثرة ما الجارة زنت علي راس بت ميمونة لمن سرحت وافتكرت روحا خلاص الرحط قطعوا وبقت
تتململ في البنبر وفجاءة لفحت توبا وقالت للجارة نحصل الصيدلية قبل ما تقفل .لكن ماعرفتي لي أسم الحبوب
شنو . يابت ميمونه نحن نصل الصيدلية ونسأل ويافكيك علي الصيدلية أول مادخلن الصيدلية دي تلز دي خجلانات
في النهاية بت ميمونة قالت المضطر بيحضر موية برودوا وتوش بقت تسأل وتتلفت للوراء . أسمع عاوزين حبوب
قالوا بيستعملوها البنات الايام دي . الصيدلي من أول وهله عرف المقصود بس عاوز يتساخف . يا أخوات الصيدلية
دي كلها حبوب ياتوا حبوب العاوزاتنها. الجارة قالت ليهوا دقيقة النسأل بالتلفون ونوريك . نطت بت ميمونة عاوزا تسألي
منو؟ عاوزا أسأل أحسان بت الجزار السهتانا ديك العرسوها قبل شهرين . بت ميمونة مابتاعت مشاكل مخير الله هو عليك
الله أحسان دي أبوها جزار وتكوس للسمن بالصيدليات أبوها دا قاعد يضبح صهريج ؟ أتصلت الجارة بي أحسان بعد
ماسلمت طوالي قالت ليها أسمعي يا أحسان عاوزاك في أستشارة بس مايكون زوجك قريب منك قالت ليها لالا زوجي
بعيد . بدون احم ولادستور نحن مغروضين في أسم الحبوب البلعتيها قبل العرس أسما شنو . طوالي أحسان فتحت
فيها هووووي ختي شخيط وأقيفي بعيد حبوب شنو الببلعا انا , أنا يا أختي الجسم عندنا وراثه مافينا حاجة بتنجدع عشان
نفتش في الصيدلية عان دي بلاهي ياقاعدين يكفيكم شر الجايين ( ما أصلوا الشينه منكورة) لكن انا عندي صاحبتي
كان بتستخدم الحبوب دي . يـأختي طيب ينوبك ثواب أسما شنو ؟ هي الحبوب أنواع في تشاهد غدا , جاري الشحن
وثلاثه تسعات وكوني النجمة . لكن أي بنت بتشتري حسب حوجتها في تكبير وفي تصغير وفي زيادة وفي نقصان وريني
أنتي عاوزا تكبري شنو وانابقول ليك تشتري شنو ؟ لالالالا ما أنا العاوزاهم عاوزاهم بت ميمونة . أحسان عييييييك بت
ميمونة سعيلي الله محتاجاهم كلهم أنشاءالله ربي يفك صاجورا.
بعد انتهاء المكالمة أتلفتت الجارة لبت ميمونة قائلا عايني يا أختي قالوا الشغلانية دي أنواع أنا عن نفسي بشتري
حبوب جاري الشحن وكوني النجمة للوش انا حبوب تشاهد غدا ما محتاجاها ولدي اب جضوم منفخة زي اللقيمات
المطفحة في الزيت ماقصر ,الشفع ديل كلهم بيرضعوا سنتين وهو رضع سنتين ونص هلهلن ولحقن أمات طه وخلاهن
مقاس xxxxl والله كل ما احتاج للكسوة اقعد التجارا بين السوق الشعبي وسعد قشرة وكان تاني ربنا رزقني بي جنا
الا اخيط لي خرتاية عديل كدة اريتوا كبر تشاهد غدا دا لو جأني في جاري الشحن عشان ابلع راجلي دا لسانوا. أها
يابت ميمونة انتي عاوزا تشتري شنو وتخلي شنو عشان الوقت أتاخر . بت ميمونة كرشت راسا والله كلهن محتاجاهن
بس السعر غالي وصندوقي ما صرفتوا حقوا اشتري الباقيات وتسلفيني ولدك يومين ثلاثة يرضع لتشاهد غدا عسي و
لعل غدا نشاهد عريس داقي الباب أنشاءالله بتاع اللبن .
بعد ما أستدانت بنت ميمونة من الجارة أتلفتت علي الصيدلي عاين يا أخوي أنا عاوزا حبوب جاري الشحن وثلاثة
تسعات وكوني النجمة وتشاهد غدا لكن تعمل لي تخفيض وبجيب ليك بنات الحي كلهن زبائن . أبتسم الصيدلية
يا أخت دي صيدلية ما محلات عطارة الحاجة العاوزاها دي فتشي ليها عند العطار بتلاقيها أعشاب لكن عندنا بعض
من المطلوب اب نجمة والمسجور . خرجت بنت
ميمونة وجارتها الماكرة من الصيدلية مطأطأت الراس . وطوالي علي موقف الرقشات لمحلات العطار وما لبسن
الا ساعة وربع الساعة حتي كان بحوزة بت ميمونة كل الاعشاب عسي ولعل الله يفك صاجورا وتعرس . وهاك يا
شراب وقعت ليكم في الاعشاب زي عطشان السنين وتبلع في الحبوب وكل ما تشرق شمس تقوم علي المرايا تحسس التغييرات علي
جسدها المتهالك . أسبوع أسبوعين وبداء جسم بت ميمونة في التغيير الواضح للعيان السدر أتنفخ و الوش بقي
ابيض من وش اصالة نصري وتكورت وتدورت لكن حدث مالم يكن في الحسبان أذ أمتلاءت احد رواف بت ميمونة
وظل الرادف الاخر علي ضعفتة وتشوفا ماشا من هناك تحلف تقول هايس وعجلوا الشمال مركبين ليهوا كركاسا .
من هنا بدأت مأساة بت ميمونة والجري مع أطباء التجميل تمشي للطبيب وترجع علي غرفتها عدل قاطعت الناس
كلهم وندبت حظها العاثر الف مرة و مرة وأخلاقا بقت في راس نخرتا ولسوء حظ الجارة الماكرة حضرت لزيارة
بت ميمونة بعد ما فقدتها أيام عديدة ومن ما دخلت وقالت السلام عليكم نطت ليك بت ميمونة يسلموك البوليس
يا وش النحس الله يازيك أزايا تشوفي في عيالك وابوهم وطوالي الجارة شبكتا ما تداعيني الدعوة التسد حلقك
مالك يابت عملت ليك شنو؟ بت ميمونة عايني لي روادفي من ماشربت السم الهاري دا واحدة بقت ضعيفة و
الثانية سمنت عاوزا تطق . ضحكت الجارة بصوت عالي للمنظر وطوالي تبعتها كنت عاوزا أعمل ليك سمكرة
عشان سوقك يحر دي حسنتي فيك يا مسنوحة يابايرة شكلك كترتي من الجرعة يا كمان عين ساكت من عيون
خلق الله دي تعالي اوديك لشيخ فرج الله قالوا سروا باتع . بت ميمونة كما الغريق الذي يأمل في النجاة علي
قشة نمشي أسع ومن دربك دا ولفحت توبا وباب الشارع جاك بلاء , ماهي الا نصف ساعة وكانت بت ميمونة
راكبا الصف في أنتظار مقابلة شيخ فرج الله , كالعادة بدأن في القطيعة في الناس القاعدين في الصف . بت
ميمونة بصوت خافض لجارتها انتي يا أختي معقولة المرا اللابسا توب بني دي كايسا العرس ؟ بالتعرس ركبيها
أسع دي ما قدر أمي نحن الصغار ومكملات من مجاميعوا مالقينا ود الحلال خليها هي الكبيرة وعاملا وشيها
زي سرويس الضلع . الجارة هو يابت ميمونة صمي خشمك عليك والله تسمعك الا تمسح بيك الواطه دي . تتململ
بت ميمونة وتمشي تطفح ليها كوز موية من المزيرة وترجع تقعد وتتأمل في الحضور وتلتفت تاني علي الجارة
بهمس عايني للراجل القاعد ولابس الجلابية أوووب علي شوفي الوسامة دي كيف وشوفي الدقن الدائرية دي
ماشا الله عيونوا فيها شيء يحير يكون معرس ليهوا مرا هي وامها مربطاطنوا بالفقرا عشان كدة جاء للشيخ .
الجارة يابت ميمونة بطلي بكاء الببكيك شنو ؟ بت ميمونة جنس البزار دا ماببكي ؟
الزمن يمر وبت ميمونة وجارتها يزحن من كرسي لي كرسي حتي من الله عليهن بالدخول لشيخ فرج الله وطوالي
شبكت الشيخ انا داخلا فيني عين في أوراكي ديل زول شافن وما صلي الله النبي وتاني حاجة عاوزا لي عريس
أنشاءالله مجنون بعالجوا بالكمون واصافحوا بالقانون . الشيخ أول حاجة ختي البياض وانا بديك بخرات تستعمليهم
الروادف بتتزبط والعريس بيجي بس أنتي تساعديني. بت ميمونة فهمت الشيخ غلط أجي أساعدك كيف ومعاها
صرت وشي . الشيخ تساعديني قابضي قابضي أي راجل تشوفيهوا في الشارع في المواصلات قابضيهوا بالكلام
الزمن بقي صعب تعملي فيها تقيلا قطرك بيصفر , نطت الجارة أجي قطر بت ميمونة يصفر أكثر من كدة كيف ؟
|
|
 
|
|
|
|
|
| العنوان |
الكاتب |
Date |
| هترشات زول دائش | عادل الباهي عبدالرازق | 01-07-13, 11:46 AM |
 Re: هترشات دائش | عبدالكريم أحمد الامين | 01-07-13, 12:14 PM |
| Re: هترشات دائش | عادل الباهي عبدالرازق | 01-07-13, 12:24 PM |
| Re: هترشات دائش | الامين موسى البشاري | 01-07-13, 12:46 PM |
| Re: هترشات دائش | عادل الباهي عبدالرازق | 01-07-13, 01:08 PM |
| Re: هترشات دائش | عادل الباهي عبدالرازق | 01-07-13, 01:12 PM |
| Re: هترشات دائش | عادل الباهي عبدالرازق | 01-07-13, 01:22 PM |
| Re: هترشات دائش | عبدالله ود البوش | 01-07-13, 02:06 PM |
| Re: هترشات دائش | عادل الباهي عبدالرازق | 01-07-13, 02:25 PM |
| Re: هترشات دائش | عبدالله ود البوش | 01-07-13, 02:38 PM |
| Re: هترشات دائش | عادل الباهي عبدالرازق | 01-07-13, 03:01 PM |
| Re: هترشات دائش | عادل الباهي عبدالرازق | 01-07-13, 03:20 PM |
| Re: هترشات دائش | محمد البشرى الخضر | 01-07-13, 03:46 PM |
| Re: هترشات دائش | عادل الباهي عبدالرازق | 01-07-13, 04:10 PM |
| Re: هترشات دائش | محمد البشرى الخضر | 01-07-13, 04:47 PM |
| Re: هترشات دائش | عادل الباهي عبدالرازق | 01-07-13, 05:01 PM |
| Re: هترشات دائش | عادل الباهي عبدالرازق | 01-08-13, 00:57 AM |
| Re: هترشات دائش | عادل الباهي عبدالرازق | 01-08-13, 01:41 AM |
| Re: هترشات دائش | عادل الباهي عبدالرازق | 01-08-13, 08:54 AM |
|
| |
عادل الباهي عبدالرازق
فيس بوك
تويتر
انستقرام
يوتيوب
بنتيريست