|
|
 حكم ومقولات في الزواج ضاحكه
|
احيانا تمر بذهنك بعض الذكريات التي تجعلك تبتسم عم أحمد شغال تاجر جوالات فارغه راجل صاحب حكم ومقولات ماثوره قبل الاغتراب وفي محاولة شراء اقامه سألني مره عملت شنو في موضوع سفرك اخبرته بارسالي مبلغ مالي لي فلان عشان اشتري لي اقامه !!
كان رده ها زول اقامتك دي (( عصيده وملاحا في الهواء)) ...
إستهترت بي كلامه وفعلا بعد فترة طويلة لا أقامة لا يحزنون الراجل عمل نايم بالقروش.
ينظر عم احمد الي الحياة بمعيار اخر نجده في منظورنا غريب ولو تمعنا مضامين وفلسفته للحياة نجد انه يسلك الطريق الصحيح بدون رتوش واضافات الفهم المعقد للحياة لقد حدثني بانه ينوي الزواج من امرأة اخري مضت فترة بعد مقابلتي له سألته عن مشروع زواجه؟؟؟؟ اجابني: (( ها زول الموضوع ماشي تمام التمام بعد رمضان الفيهو الزهج وسلي روحنا... لكن والله زهجو ذاتو بركه تعرف انا مشيت للوليه قلته اجس نبطها واحدد معاها الزواج كمان في شان تعرف شروطي شنو !!!
مشيت ليها نصيت نهار رمضان الشمس تفلق في الراس قلت ليها :
شوفي يا بت الناس انا نويت الزواج منك عندي مرتي الثانية في البيت واخواتي برحلك معاهم كان سمعته شكله بيناتكم لاني مفرز بين الغلطانه والصحيحه ولاني بسمع كلام شاكي منكن ولا مظلوم بلفخ دي بي دي.
ثانيا: أمي وابوي ديل كان لقيتهم بعجنو في الخرا ما عندك بيهم شغله .
ثالثا: اخوي عبدالرحمن في ليبيا كان قال ليك انتي طالق انتي طالق.
نستغرب كثيرا لاحداث تمر علينا في حياتنا لو نظرنا اليها بمنظور بعيد عن زاوية الدهشة نجدها عاديه بل نحن اصبحنا غرباء علي الاحداث استغربت عندما تزوج صديقي عبر الانترنت احدي بنات الدول العربية الافريقيه التي تطل علي البحر .
والاستغراب ليس في طريقة الزواج عبر الانترنت مع التواصل الاسفيري في العالم اصبح شيء طبيعي.
الدهشه كانت ان الصديق يهوي السباحه لذا دائما مواضيعه في هذا الاطار وكثيرا ما يقدم لي دعوة للذهاب معه للنادي بغرض السباحه وحتي في تعامله مع الانترنت يبحث عن الاماكن التي توجد بها شواطي الي ان سمعته فجأة بدون اخطاري سفره ورجوعه متزوج حيث قدمت له دعوه عبر الماسنجر زيارة سياحية للتمتع والسباحه علي الشاطي وعندما رجع انتهي الموضوع .
الزول مشي اسبح غرق في حب احدي حسان تلك البلد البحر بشيل عوامو .
وجه الاستغراب الراجل من رجع معاهو الزوجه ما شفتو تاني مشي النادي للسباحة الاغرب من كده كنا بنتفرج في التلفزيون علي قنوات رياضية تعيد لقطات الاولمبياد والفقره النسائية ناس الجمباز والرياضات الاخري بمجرد ما جات فقرة السباحه حبيبنا غير القناة ...
ليه يا الحبيب مغير القناة...????
ياخي البنات ديل شبه عاريات اجن اجلبغن فينا...
بادرته برد..... طيب بتاعات الجمباز ديلك لابسات سروال بي تكه ولا خلاس بقيت انصار سنة .
اصبحت السباحه والمويه تشكل له عقده نفسيه .
مرت علي خاطري طرفة ادروب وحوض السباحه بعد الجماعه طلعوا من الحوض ادروب بشرب في المويه من الحوض...
ده شنو يا ادروب قال ليهم شوربه ما نشرب ...
حبيبنا كره اي حاجه ليها علاقة بي المويه سباحه شوربه عصير....
الاندهاش العكسي الاخر كما معروف رفاهية الاسر هنا الحدائق تعرفت عليه من خلال ارتيادنا للتنزه الاسبوعيه بالحدائق رجل ظريف دمو خفيف له زوجة سودانية والاخري مصريه بعد كل هذا زائغ النظرات وهو يهوي المويه ولا يجيد السباحه .
تزوج السودانيه بطريقة غناء الحقيبه شافا طالعه من البيت تدفق موية غسيل العده من ديك وعيك .
اما المصريه تسكن معهم في العماره خلاف بينه وبين والدها حول وايت الموية (( تنكر المويه)) تتطور الي شكله لمح البت من باب الشقه من ديك وعيك ...
غاب عني فترة من مقابلته في الحديقه مع نساءه تقابلنا بالصدفه أوقع علي مسامعي خبر اكتشافه لشاليهات بها مناظر مياه جميله و احواض سباحه للكبار والصغار منها قضاء اوقات جميله ومنها ممارسة هواية السباحه . تواعدنا وتقابلنا باسرنا فعلا مكان جميل اصبح ملازنا بعد فترة غاب عني ايضا وعندما قابلته اخبرني بزواجه الثالث من سوريه تعرف عليها في مسبح الاطفال عندما كانت متواجده مع طفلها.... زوجها متوفي الولد رجلوانزلقت نطه جوه الحوض انقذ الولد دي بطريقة الافلام الهنديه ، لو لا الحوض بتاع اطفال كان راح فيها وهو حاليا ميت في حب والدة الطفل ، بادرني بجمله عقبالك تلقي ليك واحده تنقذ ابنها تشبك فيها عشان شويه شويه تحصلنا...
ايضا تذكرته حكاية المليونير: كان عندو معازيم في القصر مربي في المسبح تماسيح عشاريه نص السهره عرض علي المعازيم مبلغ مليون دولار لاي واحد يقطع المسبح عوم الما عايز فلوس يزوجو بنتو الجميله .
الناس كلها قعدت تتلفت فجأة نطه واحد للحوض قطع حوض السباحه في وقت قياسي .
اندهش واستغرب المدعوين والمليونيرمن شجاعة الرجل صافحه المليونير مهنئا قال ليهو اها المليون دولار و ل البنت.....
اعتذر الراجل قال ليهوا انا لا عايز المليون لا بتك انا عايز اعرف الدفرني من وراء ده منوا!!!!!!!!
|
|
 
|
|
|
|
|
| |
عباس الدسيس
فيس بوك
تويتر
انستقرام
يوتيوب
بنتيريست