|
|
 بالنسبة لانجاز دكتور محمد المشرف ...
|
يادكتور ...
فتحت البوست تلاتة مرات عشان اهنىء فى كل مرة يحصل
عارض ومااكتب ...مرة يعلق ...ومرة اضغط مايفتح معاى ..
زيادة على ذلك وجدت ان الصفحات وصلت الاربعة ولقيتها
تقيلة اجى بعد الصفحة الرابعة ...لذلك قرر ان افرد
هذا البوست خصيصا للتهنئة بهذا الانجاز العلمى الذى
شرفتنا به ....وعلى قول سنيرنا الذى بنواحى جدة
المافى شنو ...الباندويث موجود والزمن موجود ...وتستاهل
الف بوست يادكتور ...مبروك مبرووووك منها لامدرمان ...
ومزيدا من النجاحات التى تستاهلها ....
|
|
 
|
|
|
|
|
|
|
|
Re: بالنسبة لانجاز دكتور محمد المشرف ... (Re: محمد عبدالرحمن)
|
Quote: زيادة على ذلك وجدت ان الصفحات وصلت الاربعة ولقيتها
تقيلة اجى بعد الصفحة الرابعة |
الديوان املأ ناس لان ود المشرف اشرف ويستاهل
انا كنت هناك والديوان ملان طب قلت اجي هنا كمان آخد لي انجمامة
وأشرب موية الشربات هنا في المحل الطرواة دي
وعقابلك يا امحمد ولدي
| |
|
|
|
|
|
|
|
|
|
Re: بالنسبة لانجاز دكتور محمد المشرف ... (Re: سيف النصر محي الدين)
|
Quote: زيادة على ذلك وجدت ان الصفحات وصلت الاربعة ولقيتها
تقيلة اجى بعد الصفحة الرابعة ...لذلك قرر ان افرد
هذا البوست خصيصا للتهنئة بهذا الانجاز العلمى |
مافي أجمل من كده....كلام يدل على إحساس عالي جدآ....ما أجمل أن يحوي البورد من يحملون هذه الروح الجميله.
مشكور محمد عبدالرحمن على هذا الدرس المجاني القيم.
ودي وتقديري.
| |
|
|
|
|
|
|
|
|
|
Re: بالنسبة لانجاز دكتور محمد المشرف ... (Re: سيف النصر محي الدين)
|
سئيلي الله شفتو اول يوم ما فتحو وانا في وسط زحمة اشارة مرور غتيتة كدة وقلت خلاص لما ارجع المكتب اخش ابارك
لكن اللوم بجب بالغفلات يا ود المشرف غايتو امسح لينا في وش بورد بكري الما بنستر ده
الف مبروك يا اخونا وحبيبنا وعجبنا وسر بالنا ونتمنالك الخير والطيب والرفعة
شكرا يا محمد عبد الرحمن وكت شلتنا في لوريك ده نقضي الواجب
| |
|
|
|
|
|
|
|
|
|
Re: بالنسبة لانجاز دكتور محمد المشرف ... (Re: محمد إبراهيم علي)
|
وتاني مبروك لود المشرف
يستاهل اكثر من تهنئة
ولصديقه محمد عبد الرحمن
_
امام مصري صلى بالناس صلاة عصر
قام نسى وصلى بيهم اكثر من عدد ركعات الصلاة المفروضة
الجماعة بعد الصلاة شدوه ليك
إيه ده ياشيخ العصر اربعة ركعات بس
قال ليهم ... في إيه؟
ده ربنا يستاهل اكثر من كده
| |
|
|
|
|
|
|
|
|
Re: بالنسبة لانجاز دكتور محمد المشرف ... (Re: محمد حيدر المشرف)
|
يا الله !!
يا الله !
ما أشد ظلام هذا النور "ابن عربى"
ومن فرحة كانت لتكون عابرة ..
لهذا الزخم الإنسانى الأجمل والذى عشته وعلى الإطلاق ..
ووالله لقد تملكتنى روح "الزين" فى عرسه ..
وحتى هممت "بالكواريك" فيكم : يا ناااس هووووى, محمد ود حيدر مكتووووول فوق حوشكم ده ..فوق حوشكم وفوقكم آجمعين !!!
والقصه ما قصة نجاح وتهانى وأمنيات ..
القصة قصة هذا التفرد .. هذه الفرادة السودانوية فى ارتكاب هذا التواصل الانسانى الرحيم وكاجمل ما يكون.. لم أجد فى شعوب الأرض قاطبة إهتماما بالتواصل فى المناسبات الاجتماعية كإهتمامنا نحن بذلك.
الا تجد/ى - يا هداك الله- أن الناس فى هذه البلاد "الغبشاء" ذات الحنان .. يغفرون لك كل شيء إلا غيابك عن افراحهم و مواقيت الحزن!.. وللحزن سطوته الشاهقة فى هذه البلاد الحزينة, وللناس أفراحهم كما لهم من الأحزان ما تنوء عنه الجبال. وهكذا فإن الفرح قليلُ والأحزان كثيرة.. وأقصاها -اى الأحزان- الموت .. موت أؤلئك الذين قاسمونا حزن الحياة .. واؤلئك الذين قاسمونا أفراحها القليلة المتفرقة ..ألا رحمة الله عليهم آجمعين ..
هذه "المقاسمة" .. هذه "الاشتراكية الوجدانية" .. هى جدوى الحياة عندنا وأطيب ما فيها .. وهكذا يغنى مغنينا الرسول " ايه الدنيا غير .. لمة ناس فى خير .. أو ساعة حزن "..
تفرقت بنا السبل فإلتقينا على سراط هذا الوطن المستقيم, وعلى هذا المنبر يتجلى فينا ذلك التراب بجوهره الانسانى الرحيم, بجوهره ذلك البرزخى السحيق وكأنه المهد الأول لمكابدات الحياة واعتمالها رهقاً طيباً فى النفوس .. أرضٌ طيبةٌ, تصليها الشموس وأيادى العسكر بشواظ النار فلا تقول الا خصباً .. ولا تفعل الا خصباً .. ثم ولا تموت أبدا, ولن تموت ..
وهكذا هو أنسانها, تفرقت بهم السبل ولكنهم عائدون ..أكاد أراهم الآن يرجعون لرحم تلك الأرض العظيمة .. مواسم الرجوع تؤذن فى الناس بالعشق نحو هذا الوطن من جديد, ليأتونه وعلى كل عشقٍ مضمَخٍ بالانفعال, وعلى كل غضبٍ طامحٍ طموح الدميرة والهبباى .. يأتونها, ليضخوا فى عروق الوجود دماء السودان الجديد, السودان الوعد, السودان الوطن الواحد, وبذات تلك الملامح الوسيمة فى برزخ الوعى الوطنى .. ذات الملامح الوسيمة التى فى يقينى الآن وأكاد أراها وأراهم يرجعون بها ولذات تلك الدوزنات الاليفة للاناشيد الأجمل وللثورة والهتاف ..
"وطن بالفيهو نتساوى .. نحلم, نقرأ, نتداوى ... مزارع, كهربا وموية .. تحتنا الظلمه تتهاوى"
تفرقت بنا السبل, بيد أننا عائدون, وسنلتقى على ذات تلك الدروب المتشاجنة بالوعود القديمة, وستحتفى بنا تلك الدروب .. وأخالها الآن تحتفى بالخطوات التى لم تمر بعد على ترابها الرحيم الا خاطراً سيكوننا ونكونه وعدا فى طريقه نحو التحقق والإمكان ..
فيوض من فيوض كثيرة تجتاحنى الآن, وما زلت أدور حولكم واحدا واحدا, وأخشي الإقتراب ..
وحالى وتماما وكما قال عالم عباس:
اذا زدت قربا إحترقت ..
لا أعلم ماذا أقول ولكن ..
كتر خيركم آ ناس ..
ولكم وعليكم السلام آجمعين ..
وواحد واحد ..
كتر خيركم كتير ..
مررت على كلماتكم الطيبه كلمة كلمة ..
وأدين لكم جميعا بهذه اللحظة التى أعيشها .. ولن استطيع معها وصفا و.. كفى
(عدل بواسطة محمد حيدر المشرف on 12-14-2012, 02:32 AM)
| |
|
|
|
|
|
|
| |
محمد عبدالرحمن
عبدالله ود البوش
Amani Al Ajab
سيف النصر محي الدين
الشيخ سيد أحمد
محمد إبراهيم علي
حيدر حسن ميرغني
طه جعفر
سناء الصباغ
ماضي ابو العزائم
احمد الأمين على إدريس
طارق جبريل
محمد حيدر المشرف
Imad Khalifa
حسن البشاري
عمر عشاري
Ehab Eltayeb
محمد عبد الرحيم جمعة
مها عبد الله
معاوية الزبير
rosemen osman
جمال خضر
كمبورة
Elawad
يوسف السماني يوسف
hafiz Issue
جدو
ساميه حامد
فيس بوك
تويتر
انستقرام
يوتيوب
بنتيريست