|
|
|
 Re: جقه (بين هاشم والبندر ) ,,, (Re: الرفاعي عبدالعاطي حجر)
|
طيارة جات بي فوق (1)
شعر : هاشم صديق
طيارة
جات بي فوق
يا حاج أنا
............
شاقّه السما
المطلوق
عارفه البلد
ممحوق
و ( رادارنا )
دون ( طايوق )
يا حاج أنا
...............
طيارة
جات بي فوق
يا حاج أنا
اتْضَرّعت
واتبخترت
زي ( جقهّ )
خاشّه السوق
يا حاج أنا
.............
جايانا
من ( صهيون )
يا حاج أنا
تتحدي
زي ما يكون
وأصلو البلد
ممكون
سكن الطشاش
في عيون
حِس الوطن
معدوم
الا الهوان
مضمون
يا حاج أنا
..............
طيارة
جات بي فوق
يا حاج أنا
لا ( والي ) شاف
لا ديش
ومدفعنا
كان ملفوف
بردان
وجوه الخيش
يا حاج أنا
...........
جات خاشّه
دون تصديق
لا رخصه
لا تفتيش
سواقا ما اتكلم
لا حيّا
لا سلّم
لا حتي قال
معليش
والناس هموم
في هموم
مشغولة بس
بالعيش
وضيق الحشا
المحروق
ما صنقعت لي فوق
يا حاج أنا
.............
............
طيارة
جات بي فوق
يا حاج أنا
عيونها كشافات
صواريخها هدّامات
خَشّت
علي الخرطوم
والناس نعاس
للنوم
كسرت
علي اليرموك
اتفجّر المصنع
والصوت دوي
وفرقع .
الناس جرت
حافية
لا فاهمه
لا شايفه
بس من جحيم
خايفه
يا حاج أنا
...........
ناس جرت
لابسه
وناس باللخمه
كان جاريه
ما حاسه
ما لابسه
لو في الكراع
شبشب
لا حتي أي هدوم
بس الصراخ
مطلوق
واتشقق الحلقوم
يا حاج أنا
.............
الناس تقول
- يا ناس
( الصاخّه ) جات
بي ليل
جاتنا القيامة
تقوم .
اتطايرن دانات
واطاقشت عربات
و اتفرتقت ( قعدات )
واتكسّرت ( كاسات ) .
السرة ( بت تمانين )
في ( الجكّة )
( بت عشرين )
وادريس
وليد مرسال
كان بمشي بالعكاز
أصبح
بطل جمباز
طار فوق
ونطّ السور
سبق الجموع
جاري
زي التقول
( هايس )
دايس علي البنزين
..............
ناساً تقع
بالخوف
وفي ثانية
تاني تقوم
طارت سقوف
وقعت
واتهدّ واتكوّم
بي ( دانه )
( سوق بعشوم )
يا حاج أنا
.............
............
طيارة
جات بي فوق
خشّت سمانا
تحوم
كسرت
علي اليرموك
حرقت
حشا الخرطوم
بعد الرغيف
والسوق
واللقمه
ما بتحوق
صبح الهوان
مطلوق
( اسرائيل ) هنا
يا حاج أنا
.............
الله ليك
من مغسة
اليرموك
يا حاج عطا
والله ليّا
كمان
من كضبة الوالي
يا حاج أنا ،
صرح وقال للناس
- ( الوضع ما مقلق )
و ( الحاله حسه
تمام )
- أصلو الحريق
يا ناس
شرارة
جات طايرة
من مكنه
نارا ( لحام )
وحسه الأمور
( هدأت )
والجو ( نسيم )
وسلام
ما تصدٌّقو
العُملا
والخونه
في الاعلام .
طيارة كيف
يعني
تدخل سمانا
تحوم ؟!
وتجينا من
من بره
لامن تصل
( خرطوم ) ؟!
وتضرب كمان
صاروخ
في المصنع المعلوم
لمّا الحديد بالنار
أصبح كمان
( لكُوم ) ؟!
..............
- اهمال وبس
حنشوف
ونلقي دليل
..............
عامل لحام
مهمل
( يلحم )
في ( نص الليل ) ؟!!
يمكن ( عميل )
مدسوس
زرعوه
جّوه الحوش
أو يمكن التحقيق
يلقاهو
زول مهبوش
راكب
( حمار النوم ) .
...............
يا حاج أنا
خلي الهوان
والسوق
شوف الضمير
ممحوق
و ( حبل الكضب
مطلوق )
زمن الصِدِق
مسروق
...............
كنا العُزاز
ما ( نُوق )
وكت الحقارة
نثور
الدم يفور
في عروق .
حسه البلد
مفتوح
وبقت الكرامة
جروح
ووش الخجل
محروق
ياحاج أنا
..............
.............
( في الجو
طيارات )
( اسرائيل ) هنا
يا حاج أنا
............
في بحرنا
( مدمرات )
( ايران ) هنا
يا حاج أنا
.............
............
طيارة
جات بي فوق
خشت
علي الخرتوم
كتلت
( جداد ) التوم
............
الله ليك
يا حاج عطا
والله لي
يا حاج أنا
.............
ليمون سقايتو
عشيه
والمويه
لا ملقيّه
لا محرية
............
مقطوعه
من صبحية
يا حاج أنا .
29/11/2012
| |
  
|
|
|
|
|
|
|
|
Re: جقه (بين هاشم والبندر ) ,,, (Re: عبدالمجيد الكونت)
|
يا حجر انت ما سمعت نكتة المسطول بخصوص الجقاجق ولا شنو ؟
المفردات من شاكله جقة وجقاجق وام فتفت دي ما بتاعت د/ البندر ولا شاعرنا هاشم
بقدرما هي لغة الشارع الحبوب
ـــــ
بخصوص النكتة كان انت ولا كان من يأنس في نفسه الكفاءة فاليتبعني وراء الماسنجر والله الموفق
| |
|
|
|
|
|
|
|
|
|
Re: جقه (بين هاشم والبندر ) ,,, (Re: الرفاعي عبدالعاطي حجر)
|
يعني لغة الشارع الحبوب دي تنطبق على قوش ؟ كويس فهمتنا حاجه ؟
يعني انت في طرح جقه على المجرم قوش كنت تناديه بلغة الشارع الحبوب ؟؟
يا خضر حسين لغه الشارع الحبوب من مفردات شتات والرندوك ذات مدلولات لها
علاقه عضوية بالعام وثقافته وربما لها دلالات ومغازي سياسيه اكبر ... عموما
نقبل دا رأي ,,, في ذهنيتي مفردة جقه شوهت من قصيدة هاشم الحلمنتيشية واعتقد
حسب رأيي الخاص جداً ان هاشم صديق افتقد لذائقه الشارع وزرع المفردة الواخذه
عموما جقه لها معنى سلبي في الشارع السوداني .
وين الشارع السوداني ؟؟؟ جقه جقه جقه يعني ببساطه تلاقيني امرأة سودانية اقول
ليها ياجقه وفق الشارع السوداني الحبوب عااااااااااادي يا جقق اوع الزعل مرفوع.
..............................................................حجر.
| |
|
|
|
|
|
|
|
|
|
Re: جقه (بين هاشم والبندر ) ,,, (Re: Emad Mohamed)
|
لك التحية استاذنا الفاضل الرفاعي حجر وضيوفه الكرام
داخل السطر
غايتو انا في سمعي من حبوبتن لي
عندها مثل قاعدة تقوله
(( الدقق وعرس الجقق ))
وفي الغالب بيقال للزول المعرس مرة وبرضه كايس العرس تاني او زولة تكون لديها اولاد واتقدمت في العمر وفقدت زوجها لسبب ما
وبرضه اتزوجت
وكما اسلف من قبلي مفردة من صميم قلب الشارع
لكن انا السوال المحيرني بالجد
هل البندر استخدم الجقق في وضعها الطبيعي او ابتزل المعنى المتعارف عليه هههه ؟؟؟؟
وبرضه نشوف ناس الدراية واهل الاختصاص
خالص التقدير والاحترام
| |
|
|
|
|
|
|
|
|
|
Re: جقه (بين هاشم والبندر ) ,,, (Re: حبيب نورة)
|
يا رفاعي ورفاقته ..يبدو والله أعلم عندكم ثقوب في ثقافتكم الشعبية
لأنه معروف (الجقة) هي المرأة المكتنزة ومتحللة الاعضاء
ودي تلقاها معروفة في السوق من مشيتها التقيلة لثقل بعض الأجزاء المعلومة لديكم
وأظن (والله أعلم) هي الموصوفة كتير في أغاني الحقيبة زي (تمشي خطوة ..انتين مستحيل ) ومش عارف أيه (الوحيل)
والأخيرة تقودك إلى الشاعر الجاهلي القال ما معناه تمشي (كمر السحاب ..فلا ريث ولا عجل)
وأظن جقة الأخ الجاهلي أكثر حيوية وأقل جقاقة من بتاعت أخونا (الحقيبي) البتمشي خطوة (والتانية يا الله )
بناء عليه :أفتكر الشاعرين الحديثين هاشم وبندر قد وفقا في اختيارهما لمفردة (جقة)
فطيارات اسرائيل قدلت في سماء السودان كما تقدل وتتجدع الجقق (فلا ريث ولا عجل)
اما في حق المجرم السيكوباثي (قوش) ..فهو جقة من تكوينه الجسدي ..أو أقرب إلى الجقق
أما ما وراء تكوينه الجسدي من حيث جققته ..فأمر لا علم لنا به.
والله أعلم
| |
|
|
|
|
|
|
|
|
|
Re: جقه (بين هاشم والبندر ) ,,, (Re: حبيب نورة)
|
صورتك منوره يا كونت .
.........
حبيبا والله اللنك دا لازم تكشف عنه ممن ؟ وماذا اراد بك ؟؟؟
.................................................................................حجر.
| |
|
|
|
|
|
|
|
|
|
Re: جقه (بين هاشم والبندر ) ,,, (Re: ismeil abbas)
|
Quote: يا رفاعي ورفاقته ..يبدو والله أعلم عندكم ثقوب في ثقافتكم الشعبية
لأنه معروف (الجقة) هي المرأة المكتنزة ومتحللة الاعضاء
ودي تلقاها معروفة في السوق من مشيتها التقيلة لثقل بعض الأجزاء المعلومة لديكم
وأظن (والله أعلم) هي الموصوفة كتير في أغاني الحقيبة زي (تمشي خطوة ..انتين مستحيل ) ومش عارف أيه (الوحيل)
والأخيرة تقودك إلى الشاعر الجاهلي القال ما معناه تمشي (كمر السحاب ..فلا ريث ولا عجل)
وأظن جقة الأخ الجاهلي أكثر حيوية وأقل جقاقة من بتاعت أخونا (الحقيبي) البتمشي خطوة (والتانية يا الله )
بناء عليه :أفتكر الشاعرين الحديثين هاشم وبندر قد وفقا في اختيارهما لمفردة (جقة)
فطيارات اسرائيل قدلت في سماء السودان كما تقدل وتتجدع الجقق (فلا ريث ولا عجل)
اما في حق المجرم السيكوباثي (قوش) ..فهو جقة من تكوينه الجسدي ..أو أقرب إلى الجقق
أما ما وراء تكوينه الجسدي من حيث جققته ..فأمر لا علم لنا به.
والله أعلم |
المثقف في اعلى حالاته التبريرية .
...............................................................حجر.
| |
|
|
|
|
|
|
|
|
|
Re: جقه (بين هاشم والبندر ) ,,, (Re: الرفاعي عبدالعاطي حجر)
|
Quote: أخى الرفاعى لك التحية..
دى لو قاله واحد غير هاشم صديق كان شالو حالو ...... |
جرت علينا جمله من التغييرات الحاده وكان الله في العون .
تسلم يا سمعه الموضوع لم يبدأ بعد .
........................................................................حجر.
| |
|
|
|
|
|
|
|
|
|
Re: جقه (بين هاشم والبندر ) ,,, (Re: الرفاعي عبدالعاطي حجر)
|
يا الرفاعي ياخي إزيك أولاً
سوف نفتيكم فيما ليس لنا فيه علم
وليس لنا فيه علم - دي زي - قليل الأدب حيث يقولها العرب والمعنى المقصود هو عديم الأدب
ولكن عبارتي مقلوبة المعنى لما تم شرحه
نخش في الموضوع:
يقول السودانيين عبارة (جقاجق) لجزئية اللحوم التي تشكك ستارة البطن مع دهونها
أي تلك الأجزاء المترهلة الخفيفة من اللحم
ويقال جقة لحال كون المرأة كبرت في السن وترهلت
ويقال للرجل جقة أيضاً إذا تره وأنت تعلم قليلاً ما يترهل الرجال حتى وإن كبروا في السن
ولكن لعل الترهل المقصود عند ود البندر هو ترهل من نوع آخر أي ترهل في الحالة الفكرية أو نوع من الإنحطاط قد يصيب شخص ما
فيصبح بذلك جقة !
__________________
المصدر = راسي دا
| |
|
|
|
|
|
|
|
|
|
Re: جقه (بين هاشم والبندر ) ,,, (Re: عبدالمجيد الكونت)
|
نبدأ الان بعد شكر جميع المرور
عاصم فقيري تقديري لا اتفق معكـ ولعلك ايضاً تحاول اسباغ مسوغ تجميلية فجقه مفرده مهينة للمرأة اذ تدفع بها وفق دلالات لغة الشارع الحبوب الى كائن معزول فمهما حاول البعض رفع الضيم من على كلمة جقه ودلالاتها فتبقى جقه مفردة غير مقبولة اذما اطلقناها على بنات ونساء وامهات واخوات لنا في الانسانية عليه نؤسس حوار ونواصل , نعود لقصيدة الشاعر الشفيف هاضم صديق فأقول ان القصيدة في اطارها العام ركيكة التركيب بسيطه المعنى لا خيال فيها ولا صور شعرية ولا اي جماليات ولعل هاشم صديق الذي انتج للوعي الملحمة يكاد يعجز خلال العشرين سنة الماضية من اضاءة حقيقية إلا القليل جداً ولا يصل مرحلة التفوق على ما كان في زمانات سابقة نسأل سؤال بسيط ما العلاقة بين جقه داخلة السوق وقصف الطيران الاسرائيلي لبلدنا ؟ وكيف هو دخول الجقة السوق ؟؟ وما الذي جعل الجقه في دخولها السوق هل هي الهوينة كما يمشي الوجي الوحل , لا اعتقد ان القصيدة الركيكة تعبر عن الموقف ولعل هاشم الملحمة والصالح العام وغيرها مما حفظنا وادمنا لا تناسبه هذه الاهزوجة بسيطة المعاني فقيرة الفكرة , وفيها ما يشير الى تمييز فتعالوا بصراحة نردد السؤال : كيف تدخل الجقه السوق وهل مدلول ومعنى جقه يمايز دخول الرجل السوق والمرأة السوق ؟؟؟
نواصل.
....................................................................................................................حجر.
| |
|
|
|
|
|
|
| |
الرفاعي عبدالعاطي حجر
بله محمد الفاضل
خضر حسين خليل
Dr Salah Al Bander
Emad Mohamed
فرح الطاهر ابو روضة
حبيب نورة
ismeil abbas
Asim Fageary
فيس بوك
تويتر
انستقرام
يوتيوب
بنتيريست