|
|
 نص للاذكياء فقط#
|
تخيل روحك ما مولود
وانك زول من نسج خيالك
حتى خيالك مالو وجود
الا سفاسف من افكارك
فكرة انك تصحي قبيل
تلقي هدومك لابسه التوب
واقفه تعاين ليك في بالك
وات كت مافي
مقضي اليوم بتفتش ذاتك
بين طيات الزمن الاشتر
تاعب نفسك دون ما تعرف
انو ضميرك في دولابك
وزاتو بعاني مشاكل الدنيا
راح مفتاح الضلفه الأولي
وفات التاني يبلغ عنو
فاتت ساعه تحوم جواتك
بين ماضيك السابح عكسك
وبين الحاضر حاضره صلاتك
كل الغبش اختاروا طريقك
سته فصول عايشين سنواتك
وياك براك أهملت سنينك
لا بيضتها
لا جيرتها
لا ختيت سبلوقه في سقفها
لا اهتميت تسقيها محايتك
ما تعملنا فيها زعلت
وأنت مقصر في واجباتك
يوم ما تصحي وتلقاك مافي
ما تتضايق
اسأل ناس البيت عن شكلك
أمكن واقع من جنباتك
أو متدسي براك من نفسك
ويمكن خجلان منك ذاتك
ولو ما لقيتلك ساكت حل
اوعي تفرط فيها سيادتك
اوعي تخلي ضليلك اعفصك
لازم تعرف انو ########
ولو كت شاكي وما متأكد
اطفي النور
وفتشو جنبك
ما بتلقاهو
ما معروف الضل ود امو
ما بستني ضلام وحياتك
خليك واعي
شيلو وغتسو جوه النيل
غسل منو بواقي نجاستك
واحذر تعمل فيها مفتح
شأن ما تعطش موية النيل
وأبدا حساب زمنك طوالي
اضبط مليون في ساعاتك
واعرف يا زول
اننا راجينك تتدلي
في ساعة حيطه ملاقاتك
ما تتأخر
دي الشمس وراك بتتبخر
دايرينك تمشي وتتبختر
تعلنلنا جهرا مآساتك
وأتذكر
انو مشيك في درب الخوف
ما بتكرر
اكسر حاجز الخوف جوانا
واستثمر فينا بنوك ثرواتك
يا زول
من نسج خيال العامه
لا تتلفت في صلواتك
صلينا معاك ضهرا مستعجل
رتب فينا صفوف قواتك
وافتح باب سرداب الدنيا
تلقي الدنيا مشقلب حالا
باب الفرح مقلوع
والحسره لاحسه الكوع
شبعان بقاسي الجوع
من طيش قراراتك
الدمعه لما تسيل
تحرق حشا الضاريك
تكويهو نار الهم
يصرخ بي اناتك
تلقي البيوت تبكي
حتى الحزن حزنان
يبكيها ذلاتك
الحيره محتاره
الطيبه مكاره
الخوه غداره
ترجاها هفواتك
يا ماشي نص الليل
أعمل حساب نفسك
انزل معاك في البير
جيب لي منو مطر
ارويبو أقرب زول
وانساهو ان فاتك
غنيلي للقمره
خليها تتراقص
فوق ارضنا السمراء
تعزف باوتارك
يا طالع الشجره
ما تاكل الثمره
ما تعصي أمر الله
خليك في جناتك
وان ضاقت الجنه
المويه قدامك
اركب سفينة نوح
في الطود كراماتك
يا زول علي كيفك
لو تغمدها سيوفك
أو تدي ناساتك
اصحي خليهو الخيال
الهم وصل قمم الجبال
الروح معلقه في الحلق
والموت بعزل في الخلق
رافض الوقوف في سكتك
والأرض بتطنطن وراك
زعلانه من جهل العقول
عطشانه لو يرويها زول
تنضر تفرهد وتشكرك
اسقيها من حق الحلال
تديك رزقك كل يوم
وزياده ترجع تبسطك
اوعاك تنكر فضلها
واياك تعمل زيهم
تهمل ترابا وعزتك
قتلوها نخاسة الكلام
شتلوها اهات وانتقام
قسموها بي اسم السلام
خنوقها شأن ما تندهك
مغصوبه تحمل بالحرام
صامت دهور من الكلام
رقدت تحت ضل النخيل
تتضاري متلها والنعام
مخصوص عشان ما تفضحك
جدعوها مكسورة جناح
بتهاتي بالليل والصباح
تدعونا حي علي الفلاح
ماسكالا سيف في ملتك
وصل الزهج حد الكفاف
قرف القرف من الهتاف
غرق القمر وسط الضفاف
وترانا راجين جيتك
يا زول تعال قبل المسيح
قبال تقومها قيامة ابوك
وهمومك أنت تحرقك
ارجع سريع
ارجع تعال
امرق نياقك من صخور هذي الجبال
وادينا يوم نشرب لبن
نديها يوم تشرب زلال
لاقيهو ربك في طوي
تلقانا خايضين المحال
زاهدين دوام في دنيتك
اوعاك من درب الغلط
جيب لي معاك رطلين زلط
اديني من سدك ده خط
أو كبري يقطع حجتك
لا تنسي تطنيش الخراف
الكبري ما اخر المطاف
عشنالنا سنواتا عجاف
ماكلينو حق اهلي الضعاف
ان شاء الله يكبر ينفعك
وين المدارس والبيوت
وين البلع في بطنو حوت
بترلونا ودوهو الخلا
جابوبو ستين ألف بوت
قاصدين جيوشهم تقهرك
امسك عصاك بيد حديد
فج البحر شطرين صديد
واكسينا من عندك جديد
ما تنسي انو الليله عيد
نيلين بغنن فرحتك
يا فرحة القلب البكاك
يوم سبت بيتك لي الكلاب
طردوك من ملكك غصب
غصبوك تنكر امتك
معليش
مصيرنا نعدل المعووج
ونبني حلمنا فوق للموج
ندق لي كل حرامي خروج
ونتوسد معاك ارضك
نشيل من الفرح نديك
وتدينا السعاده جبال
فيا زولا تراك خيال
معشعش في الضمير صاحي
لا تنسانا من عطفك
وما بننساك لو حيين
ولا ظنيت اذا متنا
فلا تجزع علينا دحين
ولا تشفق علي عهدك
استغفر الله العظيم
قبال نقفل هالكلام
اسمحلي اقريك السلام
من امه دوم اتمنتك
اصنع صنيعك في الضفاف
وارميهو لي تأل البحر
اجزيهو خير ان كفتك
اخر الكلام تسلم كتير
تسلم معاك كل القصص
تسلم بطينا جابتك
هذا النص لشاعر عاصم محمد عثمان من أولاد السودان وعايش فيهوكمان!
|
|
  
|
|
|
|
زهير عثمان حمد
فيس بوك
تويتر
انستقرام
يوتيوب
بنتيريست