|
|
 العودة النهائية لأرض الوطن..شوفوا لي مخرج!!
|
أها إنت ح ترجع السودان نهائي بتين ؟؟
سؤال يطرح في معظم جلساتي وونساتي مع الأصدقاء ومن يوم جيت البلد دي مغترب ..
وطبعاً أي يزول عندو إجابة مختلفة ..البيقول ليك ما راجع زاتو..والبيقول ليك بس أتم البيت ..والبيقول ليك بعد سنتين ..والبيقول ليك السنة دي اااخر سنة لي ..
عن نفسي إجابتي كانت واااضحة وصريييحة وقتها كإجابة تعجيزية ما ح تحصل وفي إشارة لي إني نظام ما راجع..
كان جوابي إني ح أرجع نهائي وأنهي علاقتي بي الغربة لمن ولدي يجي يقول لي " إلّا.."
وإلّا لمن لا يعرفونها هي كلمة سعودية ( ما عارف خليجية برضو ولا لأ ) ويستخدمها السعوديون تحدييداً للتأكيد على الشئ..
يعني لو سألت سعودي وقلت ليهو ليش أمبارح ما جيت زواج فلان ؟؟
بيقول ليك " إلّللا جيييت" ..
ما تتخيلو الكلمة دي كانت بتغيظني كيف لمن أسمعا من السودانيين القاعدين هنا ..يعني شوييية كده كنت ببلعا من السعوديين لكن تقول لي صحبك سوداني أمبارح حضرت كورة الهلال والمريخ؟؟
يقول ليك " إلّا حضرتها " !!!!
أها ده كان شرطي للعودة الطوعية للسودان وقتها ..ولمن وضعت الشرط د ه انا ما كنت متزوج من أسااسو ..ووضعت الشرط ده نظام مستحيييل الحاجة دي تحصل لي..ولو حصلت فتحصل وولدي عمرو بيكون بقا 17 سنة ووقتها انا زاااتي بدون إلّا دي بكون مشيت نهائي ..
محمد ولدي الله يديهو العافية ما كمّل أربعة سنوات لسة ..ولي شلاقتي السنة دي دخلتو المدرسة وما ادراك ما الكي جي ..والغريبة دخلتو إنترناشونال إسكول نظام ح يلاقي اللبناني والهندي والمصري والباكستاني ..
بعد تلاتة أيام فقط من الذهاب للمدرسة وانا في طريق العودة معاهو ونظام بتونس معاهو بي السؤال التقليدي :
أها أدوكم شنو الليلة في المدرسة؟
ويرد ليك هو الرد التقليدي برضو أدونا فطور وألعاب !!!
واصلت انا في الخفة الكتلت أم تفة وسألتو:
يعني ما أدوكم ABCDE ؟؟
وهنا كانت الصدمة !!!!
" إلّللللا..أدونا ليها يا بابا " .!!!!
|
|
  
|
|
|
|
|
|
|
|
Re: العودة النهائية لأرض الوطن..شوفوا لي مخرج!! (Re: عمر الفاروق)
|
ياخ والله كان كدا انا احسن منك
انا البذورة عندي شغالين لغة عربية فصحى كانه جدهم الخليل بتاع بحور الشعر داك ,
اليوم داك وانا برضوا مرجع ليلى ومحمد من المدرسة , فجاة ليلى قالت لي يا بابا قلت ليها نعم قالت لي : اني اشعر بالنعاس !!
قلت ليها انا ما قلت ليك ما تتكلمي تاني زي كلام قناة براعم ؟ واتكلمي معاي سوداني ؟
ولا اتلفتت قامت قالت لي : طيب يا بابا انا والله نعسانة طينة !
التوقيع
ـــــــــــــــــــــــ
اساسي رئيس لجنة جمع تبرعات حق تذاكر العودة الطوعية النهائية للزميل عمر الفاروغ
| |
|
|
|
|
|
|
|
|
|
Re: العودة النهائية لأرض الوطن..شوفوا لي مخرج!! (Re: عمر الفاروق)
|
يا أساسي موضوع اللغة العربية الفصحى ده قصة براااهو ..
هذا المحمد حفظه الله ورعاه جاني قبل فترة وبي كل براءة قال لي :
بابا بابا ..أرييد توت بريّ !!!
والله يا أساسي وزييي ما أقول ليك كده رديت ليهو:
يا محمد والله أبوك كان ما بياكل في الفواكه دي إلا الموز ..وكنت بشتريهو من السوق الشعبي امدرمان وانا راجع من كورة الهلال بالليل لأنو الباعة بيكوركو 3 كيلو بي ألف !!!
تجي تقول لي توت؟؟؟ وأرييتو توت أخوي وأخوك ..توت بري؟؟؟
إنت جادي يا محمد؟؟
عارف يا اساسي محمد ده سكت كدااااا ومشى ..لحدي أسة بيكون ما فاهم ردي ده معناهو شنو؟ هل ح أجيب توت بري ولا لأ..
| |
|
|
|
|
|
|
|
|
|
Re: العودة النهائية لأرض الوطن..شوفوا لي مخرج!! (Re: عمر الفاروق)
|
عمر تكفى ادفنونا وارجعوا
شفت انا حددت ارجع متين؟
خليكم زينا اتخذوا قرار العودة اللا طوعية دى ياخى
مافى زول كتلو الجوع فى السودان!!!
عمر انا بحيرنى البمشى من هنا امريكا ويقول ليك
ماشى فور قووود مع انه الخواجات فور قوود دى بقولوها
لما يكونوا ماشين هوم وكده،،،
| |
|
|
|
|
|
|
|
|
|
Re: العودة النهائية لأرض الوطن..شوفوا لي مخرج!! (Re: محمد عبد الماجد الصايم)
|
ود الفاروق سلام وتهانينا لبلوغ ابنكم الكي جي
مبدئياً كدة مدرسة الولد بريئة من اتهامك ... يا راجل محمد دهـ يكون سمع (إلا) منك انت شخصياً والدليل
| Quote: تكفى يا صبري..ترى لسة عليّ قروض |
وبمناسبة اللغة العربية الفصحى
عندنا واحد من اهلنا فى الدمام عندهـ ولد اتعلم الكلام من قناة اسبيس تون ومعظم كلامه دراب دراب ... الولد دهـ فى سن إبني المشاكس دوماً ... مرة مشينا زيارة لناس تانيين وأول ما دخلنا بتاع الاسبيس تون شاف ولدي ومشى لامه وقال ليها وهو بيعاين لولدي "هيا بنا قبل أن يبدأ بالضرب"
أما عن العودة لأرض الوطن ... العشرة سنوات الأولى بالغربة صعبات شوية لكنها تخف من السنة الحادية عشر
| |
|
|
|
|
|
|
|
|
|
Re: العودة النهائية لأرض الوطن..شوفوا لي مخرج!! (Re: عمر الفاروق)
|
| Quote: تكفى يا صبري..ترى لسة عليّ قروض |
وراك يارجاااال
والله يا عمر حكاية الكلام دي حكاية
أنا عندي واحدة لاخة الكلام دا لخ رهيب شي فصحى وشي كلام مكسر وشيء ما مفهوم من أساسو وبقت عندها مشكلة في تركيب الجملة وتأكدت هنا ما حتتحسن
قلت لأمها من دربك دا تمشي السودان وبمهمة واحدة الأولا ديل تاني يوم يخشوا روضة ولو ما إتعلموا الكلام العديل حقنا دا ما تجي
فعلا بعد شهرين بس قالت لي هاك اسمع لقيتا ليك تتكلم بلسان سوداني مبين
.
ياخي طق الحنك دا لازم يكون مجيه
| |
|
|
|
|
|
|
|
|
|
Re: العودة النهائية لأرض الوطن..شوفوا لي مخرج!! (Re: عمر الفاروق)
|
| Quote: أها ده كان شرطي للعودة الطوعية للسودان وقتها .. |
ما دام ما حلفتا اعمل نايم بس ...
خليك من إللللا
انا عندي ود اختي مشى اجازة السودان وجات تزورم مهندسه مدنية سايقة ليها بوكس الشغل
محمد احتار في المنظر وبعد ما طلعو جرى لي امو وقال ليها :
"بوبليس السودانيين ....حرمة !!!! ....تسوق سيارة !!!! ووو وانيت !!! بعد ؟؟؟؟؟"
اهااا ...بعد دي كيف ما افظع من ألللا
| |
|
|
|
|
|
|
|
|
|
Re: العودة النهائية لأرض الوطن..شوفوا لي مخرج!! (Re: طاهر بدر)
|
الحبيب عمر الفاااروق (( شكلك متألم شوية وياخي بعد الشر عليك )) يا عمر ياخ ده حا يكون اكتر قرار مجحف اتخذتو في حياتك والله انا جيت من السودان هسسسسسسسسسة قبل عشرة يوم لكن لو سالتني راجع متين بقول ليك نفس كلام خالي صديق الموج داااك لووووووووووووووولز ..
اما بمناسبة الكلام بتاع الاطفال هنا ده ياخ انا برضو منة الله بتي ربنا يحفظها هسة في قريد ون وفي مدارس انترناشونال برضو المهم عندها استاذه خصوصي بتجيها في البيت وبعد الحصة بمشي بوصلها مرة قلت ليها نادي الاستاذه يلا علشان نوصلها مشت وقفت ليك جنب باب اللوضة كده وقالت للاستاذه ( تيتشر ليتص قو) والله اخوك زاتو لامن اتمحن ده غير انها حافظة النشيد الوطني السعودي اكتر من نشيدنا الوطني زااتو لكن اخوك قعد يحفظ فيها وهسة ماشة كويس ... لكن بعد ده كلو يا عمر ما راجعين اها شنو ليك ... ولو انت مصر يا عمر يا اخوي ياخ قدم في اللوتري وخلي اخونا الخير يشوف ليك واسطة هناك وامورك بتمشي ،، المافي شنو ... ويا عمر يا اخوي روق المنقا .. ولو مسالة مخارج خلاص ياخ شوف اقرب مخرج ليك واخرج بيهو وسوي يو تيرن هههههههه .. والله صحي ..
تحياتي : ياسر العيلفون
فنان حفلات وداع عمر الفاروق ورئيس اللجنة الفنية للدعم اللوجستي ورفع المعنويات ..
| |
|
|
|
|
|
|
|
|
 Re: العودة النهائية لأرض الوطن..شوفوا لي مخرج!! (Re: ياسر السر)
|
الله يعينك يا عمر ولسه الحالة دى صلاح ما دخل المدرسة..
صلاح حا يقول ليك إيش لون الكلام ده يحصل من محمد وإنت تبقى تلولح فى عقالك يمين شمال..حمكتو بالغة...صحى قالوا القناعات بتتغير مع مرور الزمن..
عشان كده خليك لابد وطنش بس.......ربنا يحفظهم يارب. ويسعدكمأها أنا من جماعة البيت المصنف 
تحياتى ....
| |
|
|
|
|
|
|
|
|
|
Re: العودة النهائية لأرض الوطن..شوفوا لي مخرج!! (Re: ismeil abbas)
|
...السودانى قبضو ليك البوليس فى احدى الدول الخليجية
..قبضو ليك مخالف بالثابتة ..مسكو من يدو ...الزول
(خرت) يدو من العسكرى وقال ليهو (اسمع انت قائل انا
جيت هنا بالساهل ) واطلق ساقيه للريح ...
زمان الموز من الصرف للصرف ..اسى الصرف ذاتو بقى
مافى ...
طبعا ولدك دا النوع البمشى يتقلقص على الجماعة
فى الاجازة ....انحنا وبابا والسيارة ..الله يستر
على ناس الثورة والعباسية من القد الماشى عليهم ...
| |
|
|
|
|
|
|
|
|
|
Re: العودة النهائية لأرض الوطن..شوفوا لي مخرج!! (Re: محمد عبدالرحمن)
|
وضاحة :
إنتي شترا ..صاح؟
عندي إحساس إنك النوع اللو صوروها في عرس والناس بتصفقبيطلعوا كل الفي الصورة يدينهم مضمومة وإنتي اليدينك فاتحة!!
غايتو إلا الاية بتاعت ﴿لَئِنْ شَكَرْتُمْ لَأَزِيدَنَّكُمْ دي عاجباك وقلتي تدخليها في جملة..
يا زولة اخوك حااامد شاااكر والله والسعودية دي حبااااابا .. بس بالمناسبة اقول ليك حاجة وتصدقيها؟؟
أولادي الإتنين السودان نفع معاهم لأبعد الحدود بينما أجواء السعودية بتخليهم طوالي في حالة أمراض وإن إختلفت الدرجات..
إنتي طبعاً همك كلو الملاريا لكن والله يا وضحضح أمراض الأطفال البنشوفا هنا عند ناس تانيين تقولي الحمممد لله يا ملاريا..
إنتي قايلة المرض ده إلا حمى؟؟ أجججي يااا الدكتورة ؟ :)
ياخ انا بعرف لي ناس هنا اولادهم عمرهم خمسة وستة سنوات ولسة ما نضموا..وفيهم المستوحد وفيهم الما بيطيق يخالط الناس وفيهم العندو هشاشة عظام وفيهم الما عندو مناعة و و و وربنا يشفي الجمييع ياخ..
بعدين إنتي قايلة شفع السودانيين كلهم عندهم ملاريا هناك؟؟ ياخ ماشاء الله هناك في شفع مبغبغيين ومرتاحييين وبينومو بي الإسبيلينت وما عارفين إنو في حاجة إسمها نجوم..
| |
|
|
|
|
|
|
|
|
|
Re: العودة النهائية لأرض الوطن..شوفوا لي مخرج!! (Re: عمر الفاروق)
|
والله يا عمر القصة دي صعبة شديد ..فاهمة شعورك ..، بس ياهو ده حال الغربة بتدي بجاي وتاخد بجاي ..لكن ركز شديد ان يتكلم بالسوداني ..
تعرف ملوكة بتي تاني كلمة قالتها شنو بعد بابا لاحظ ما ماما ..قالت : "إيشي" ..، انا يومين عندي صداع بعد كلمتها دي
وما زعلت عشان ما عايزاها تتعلم "الأمهرا" لكني لأني حسيت أنو في زول باثر فيها أكثر مني وده خلاني اراجع حساباتي شديد..
| |
|
|
|
|
|
|
|
|
|
Re: العودة النهائية لأرض الوطن..شوفوا لي مخرج!! (Re: داليا حافظ)
|
يا عمر الفاروق
خليك في بكانك دا...العودة النهائية لي بلدا بقت ما هيلنا...
تجربتنا مع الغربة بدأت من الستينات مع الوالد...
وأغلبنا مولودين في الغربة...وأولادنا مولودين
هنا...ما فينا زولا قلب لسانو بدءا من أبوي
وأي ترجمة في مركز شرطة بنادونا...
وعلمناهم قولة...دا سمح...ودا كعب...قررربوا يتعلموا (الرسول سبعة مرات
عليك كان ما سويت لي كيت وكيت) أولادنا بندخلهم مدارس أجنبية غصبا عننا
لأنو النظام الدراسي هنا لا يسمح بإستيعاب الاطفال الا من أعمار كبيرة
شوية....ونحن كقوم شفقانين عايزين أولادنا من سن تلاتة سنين يدخلو
الروضة وخمسة او قبلها بي شوية لازم يدخلو المدرسة...شايلانا الهاشمية
أها مافي ليهم طريقة يقولوا (إلللا....وتكفي...) برجعو البيت
لي كلامنا....(ها جنا ما تتر غادي...) أسحف لي اختك دي...
والموضوع دا ماشي ليه سنين...تصدق بالله لامن نرجع السودان
بفتكروا ولادنا جايين من الخلا هسسسي دي...
يوم ضربوا لي ناس الشرطة هنا عشان اترجم ليهم عبارات
سوداني كاسر لي هندي سنو...
سألتو قلت ليه الحصل؟ قال : أنا كنت شايل الصندوك داااك
الهندي المعفن دا عتّر لي لامن دقيت الدلجة...وقمت عاينت
سمح واديتو بلنجة في حنكو...أها جو رفعوني الجماعة ديل
وأجمل مافي الموضوع انو ناس الشرطة كانوا منتظرين
الترجمة بشوق شديد لما كملتها ليهم ضحكوا وقالوا لي
سوق الزول معاك...تاني لا يسوييها...والهندي خليناه
في مكانو.
| |
|
|
|
|
|
|
|
|
|
Re: العودة النهائية لأرض الوطن..شوفوا لي مخرج!! (Re: داليا حافظ)
|
سلام لعمر الفاروق
حالتك حتكون صعبة (بعدين) لو بإستخدام (إلا) تفكر العودة النوهائية لأرض البلد ، يا خي دي من أخف الكلمات ولو (حمودي) توقف عندها وما زاد على ذلك ، (إلا) السعودية يقابلها عندنا بالنوبية (إيو) وحيث درجنا منذ ولادة أطفالنا في السعودية على إستخدام النوبية لذا لا يستخدمون في المنزل اللهجة السعودية مطلقاُ بإستثناء كلمة (إلا) أكبرهم حالياً بالجامعة مغرم بحب السودان وبإصرار ذهب للدراسة الجامعية هناك ، وأصغرهم بالرابع تشوفه في المدرسة مع (ربعه) تقول دي سعودي ، ولكن ما إن دخل البيت يستحيل أن يتحدث معنا أو مع غيرنا بالسعودية ، سودانية بس وشئ من النوبية .
*عودة نهائية (إلا) كم!!!
| |
|
|
|
|
|
|
|
|
|
Re: العودة النهائية لأرض الوطن..شوفوا لي مخرج!! (Re: ولياب)
|
Quote: عمر انا بحيرنى البمشى من هنا امريكا ويقول ليك
ماشى فور قووود مع انه الخواجات فور قوود دى بقولوها
لما يكونوا ماشين هوم وكده،،، |
غايتو يا ود الموج ذكرتني بلدياتنا جنو كان يسمع الرادي ولفح ليك كلمة طقس دي من نشرة أحوال جوية ..
أها يوم العصرية كده والجو مقييم وهمبرييب والسحاب شاايل والرزاز ينقط ..طلع عنقريبو بررة فيي نص الحوش والملاية تهبببهبب..
أداها تكية في المخدة كده وكويعة وقال :
يا سلااام ياخ الجو طقس الليلة !!
| |
|
|
|
|
|
|
|
|
|
Re: العودة النهائية لأرض الوطن..شوفوا لي مخرج!! (Re: عمر الفاروق)
|
| Quote: يااا زول .. عليكـ أمان الله (إللللاَ) دي جوان أم سنتين قاعدة تقولا!! |
يا ود الصايم انا متأكككد جوان دي ما لفحتا من برة ..جوان دي بتكون جابتا من جوووة البيت !!
ياخ انا كل ما الاقيك قاعد أكششف في عربيتك بيجيني إحساس إنو عندك عقال وعلم السعودية راميهم في الطبلون ..
| |
|
|
|
|
|
|
|
|
|
Re: العودة النهائية لأرض الوطن..شوفوا لي مخرج!! (Re: عمر الفاروق)
|
| Quote: المخرج الوحيد انو الواد تطلعو من المدرسة وترسلو هو امو السودان ويجوك في الاجازة |
صورة لي سيف بخيت للنظر في الموضوع..
يا هندسة والله الرسيل للسودان بقا مدخل ما مخرج ..
قالوا الراجل مشى عرس في السودان وقعد مع المرا ستة شهور ورجع ..مهنتو ما بتعمل ليهو إستقدام والكفيل معاكسو ..مرتو ضربت ليهو قالت ليهو حمودي طلع سنونو..
قال ليها والله انا خايف حمودي يطلع جواز عديييل ويجي هنا مغترب وما أكون شوفتو ..تقولي لي سنونو ..؟
| |
|
|
|
|
|
|
| |
عمر الفاروق
طلحة عبدالله
محمد أبوالعزائم أبوالريش
وضاحة
صديق الموج
محمد عبد الماجد الصايم
محمد إبراهيم علي
الفاتح شلبي
Hani Arabi Mohamed
عزيز
ahmed haneen
حمد عبد الغفار عمر
طاهر بدر
ياسر السر
ismeil abbas
محمد عبدالرحمن
داليا حافظ
ولياب
khaleel
فيس بوك
تويتر
انستقرام
يوتيوب
بنتيريست