جائزة غادة للكتاب الشباب (خواطر و رؤى)

Quote: بس انصر دينك على السؤال الفوق ده ..لانو سألونا ليهو قبل كده كتير.. بس فى حدود الاجتماعات الموسعة للجائزة وفى كم مرة من الاجتماعات دى كانت حاملة لواءه صديقتى العزيزة بت النيل التى كانت تبدئ قلقها من حتة "التصنيف الطبقى" إذا جاز التعبير و مرة أخرى نقلت لنا تعليق بعض الناس انو فقرة الافتتاح الخاصة بالشموع هى تشبه بالنصارى (بجيها بعدين وابقوا تعالوا معاى عشان ناخد وندى) وكان فى اعتراضات ايضا بخصوص الجوائز وانو الاجهزة الالكترونية دى ما بتشبة واقع اولادنا فى الاقاليم وانو ممكن بفوز واحد يكون هدوم مدرسة زى الناس ما لابسها .. او شنطة مدرسية ماعندو..او حق الفطور زااااتو مافى لن ننكر ان معظم ولا اقول "كل" العاملين على الاحتفال هم من" الطبقة المتوسطة" ده اذا فضل فيها باقى :) ولكل احتفال بنعمل اجتماعات موسعة وبندعو لها الشباب و الشابات فى اعمار غادة و اصدقائها و صديقاتها لنناقش معهم تفاصيل الاحتفال والجوائز ...ونستفيد من افكارهم والهدف الرئيس ان يكون الاحتفال جميل و جاذب وبعبر عنهم كفئة عمرية... وأن تكون الجوائز مناسبة لكون الجائزة ادبية و مشجعة ايضا للشباب على المشاركة ما عارفة يا هيثم النقص شنو فى شباب "القرى النائية" البخليهم يكونا سلبيين من المشاركة فى حاجة اخراجها جميل؟؟؟ ومنو القال انو طموحاتهم محصورة فى شنطة مدرسة .. وحق الفطور؟؟؟ لاحظ انو المشاركين اساسا عندهم مواهب أدبية والمواهب بتجى بى امالها و طموحاتها منو القال انو لاب توب بيشتغل بالطاقة الشمسية بيكون ما عندو معنى والزول الموهوب ده جعان؟؟؟ جائزة غادة هى عمل ثقافي التزمت بتوفير الرعاية للمواهب الادبية للشباب و توفير الدعم لهم لتطويرها والدعم ده يشمل توفير مداخل متعددة للاطلاع ولمعرفة (اجهزة كمبيوتر و انترنت + مكتبة عامة) بالاضافة لنادى غادة للكتاب و ورش التدريب على الكتابة الابداعية جائزة غادة ليست منظمة خاصة برفع الضنك المعيشى عن الشباب ( فى منظمات أخرى تعمل فى المجال ده) ولكنها تحتص برفع الضنك المعرفى عن كاهلهم و تصحبهم الى عالم من الاحتفاليات الجميلة تجعلهم يتطلعون اكثر واكثر ويحسوا اكتر بالقدرة على صنع المعجزات بالمشاركة فيها وتستنهضهم لتغيير واقعهم "النائى" وتدفع بخيالاتهم و مقدراتهم نحو التغيير كل الانسانية تسعى للجمال ودعنى اقبس مقولة قديمة جدا لهماميتا ذا كيلر فى احدى تجلياته حين قال وانا اقتبس بتصرف (يا سهام ياختى انتى قايلة الناس دى منذ بدء الخليقة بتفكر و تتفلسف و تعيد القراءات و تكتب وتتصارع معرفيا و سياسيا عشان شنو؟؟ ما عشان انو كلو زول بيبحث عن صنع الجمال فى العالم حسب رؤيته)