|
|
 حمادة بالع زرارة
|
نص للاستاذ الفاتح جبرة بعنوان حمادة بالع زرارة بعد ان قمت بعمل سناريو لهذا النص لكى يصبح عمل مسرحى قابل للتمثيل واستميح جبرة للعبث بالنص
وسوف اقوم بمراسلة جبرة على عنوانة البريدى فى حال ان النص سوف يمثل على خشبة المسرح من قبل اى جهة وارجو الى حين الموافقة من صاحب النص ان اسمع بعض الاراء فى هذا المنتدى والتى احسب انها اراء سديدة وارجوا ان كانت هناك ملاحظات تفيد النص من حيث زيادة قوة السيناريو او الاخراج ان تفيدونا بها .
عاد (حسنين) في مغرب ذلك اليوم منهك القوي متسخ الثياب وقد ربط رأسه بضمادة كبيرة تظهر عليها بعض أثار الدماء وجلس إلى اقرب (عنقريب) وهو في حالة من الإعياء
(الزوجة بخلعة )
عزيزة : سجم أمي يا حسنين الحصل ليك شنو ؟؟ في ركشة أتقلبت بيك ولا حيطة
: وقعت فيك ؟؟ سجم امى سجم امى تعال كدي النشوف راسك ده
( أمسكت عزيزة برأس حسنين تتمعن في ذلك الشريط من الشاش الذي تم ربطه دائريا بإحكام على رأسه)
عزيزة : ألفلقك جنس الفلقة دى منو ؟
حسنين : البوليس
عزيزة : الشنو ؟
حسنين : البوليس يا عزيزة (مواصلا) أخير أنا عوض صاحبي أيدوه أتكسرت وجبصوها ليهو
عزيزة : وانتو الوداكم للبوليس شنو كمان
حسنين : والله قالو المظاهرة ما قانونية وما عندها تصديق قاموا فرقونا بالبنبان والهراوات حفاظا على الأمن
عزيزة : لا يعنى الناس ديل قاصدين شنو قطع رزق وكمان قيها جلد وفيلق
(يبدو إن حسنين كان متألم بعض الشيء جراء إصابته )
عزيزة :( مواصله) أجيب ليك حاجة تأكلا ؟
حسنين : لا لا ما تسوى لي أي حاجة. بس جيبي لي حبتين بتاعت صداع وكوز موية بارد
( نام حسنين بعد أن بلع الحبة ) من التعب والإنهاك اللذان نعرض لهما في تلك التظاهرة التي شارك فيها وبعض ممن هم تعرضوا لما تعرض له فصل تعسفي عن عمله ومصدر رزقه دون حق أو قانون .
( بعد شهر من حادثة حسنين ..تم قطع الإرسال التلفزيوني فجأة لتتم إذاعة هذا الخبر العاجل:
تم اختطاف طائرة تتبع للخطوط الجوية وهي في طريقها إلي ( جمهورية البطريق) وعلى متنها
مائة وأربعون مواطنا هذا وقد طلب الخاطفون من قائد الطائرة التوجه إلى مطار العاصمة
بطريقيا حيث لا تزال الطائرة تقبع هناك تحت حراسة قوات الأمن البطريقية . والى مراسلنا في
بطريقيا (الجوهر الفردي ) ومزيدا من التفاصيل صورة الجوهر الفردي وهو يمسك بالمائك
ويقوم بالضغط على سماعة الأذن غير المرئية )
المذيع : الو جوهر هل تسمعني .
جوهر : ايوه أسمعك
المذيع : إذن يا جوهر ما هو الموقف الآن على الأرض عندكم وهل هنالك أي مطالب للخاطفين ؟
جوهر : الموقف . الآن الطائرة تقبع منذ الساعات الأولى من صباح اليوم تحت الحراسة المشددة من قبل قوات الأمن هنا بعد أن تم إجبار قائدها على الهبوط في هذا المطار تحديدا ..إما عن الخاطفين فلم تعلن هويتهم بعد لكن في الغالب الأعم هم من مواطنينا وحتى هذه اللحظة لم يتم الإعلان عن أي مطالب.
(المذيع مقاطعاً جوهر)
المذيع : عفوا الجوهر الفردي يتردد في الأوساط هنا بأن الطائرة تقل أسرة أحد كبار المسئولين والتي كانت في طريقها للعلاج في الخارج .
جوهر : لم يتم التأكد من هذه المعلومة حتى الآن وسوف نوافيكم بتفاصيل متى ما تأكد ذلك .
المذيع : شكرا الجوهر الفردي مراسلنا في جمهورية البطريق
( بعد هذه الحادثة تم انعقاد اجتماع طارئ )
(سعادتو وهو يشرب من زجاجة مياه معدنية ليروى ظمأه )
سعادتو : انتو عارفين انو المدام واخو المدام والأولاد في الطائرة دى
المجتمعين : (بصوت واحد ) عرفين سعاتك
سعادتو : وطيب وكت عارفين ما تعملوا حاجة
مسؤل 1 :والله يا سعاتك نحنا خاطبنا المسئولين في جمهورية البطريق قلنا ليهم ما تعملوا اى حاجة وما تتصرفوا أي تصرف لحدت ما يجى وفد مننا هناك يتفاهم مع الخاطفين ديل ود كلو يا سعاتك عشان الحفاظ على أرواح أسرة سعاتك
سعادتو : والخاطفين ديل ما عرفتوهم منو
مسئول 2 : والله يا سادتك أسماء جميع الركاب أتحصلنا عليهم من مكتب الخطوط
سعادتو : وطيب مش مفروض تكونوا عرفتوا الخاطفين منو
مسئول 1 : يا سعاتك ديل ميه وخمسين راكب نعرف الخاطفين منو كيف؟ لكن عندنا تيم استخباراتى امنى شغال عشان يجيب معلومات عن كل مسافر في السفرية دى
سعاتو : وطيب ح ترسلوا الوفد متين عشان انا ذاتى ح امشى معاكم
مسئول 3 : الوفد ح يمشى سعادتك بى طيارة خاصة الليلة الساعة عشرة مساء
( وصول الوفد الى مطار بطريقيا ) (توقفت حركة الطيران فى المطار الظلام دامس ما عدا كابينة قيادة الطائرة التى توجد بها اضاءة خافته التفت احد الخاطفين الى احد الاسر التى تقبع خائفة بعد ان راى ان جوازاتهم لا تشبه جوازات بقية الركاب
الخاطف (فى حزم ) جيبوا جوازاتكم ديل (ينظر الى الجوازات الدبلوماسية الحمراء ) بقى انتو اسرة المسئول فلان الفلتكانى مش كده
المخطوف : لا والله يظهر اسم على اسم
الخاطف : علموكم كمان الكضب ومال الجوازات دى حمراء ليه برضوا جواز على جواز (مواصلا فى تهكم ) وماشين وين
المخطوف : والله الحقيقة حمادة ده كان بيلعب مع البييبى سيتر وقام بلع ليهو زرارة بتاعت اللعبة الكان بيلعب بيها وماشين نعالجوا وكده
الخاطف : عشان بلع زرارة تسافروا بيهو جمهورية البطريق للعلاج ومال ده لو بلع ليهوا سوسته تمشو بيهو وين لاقين قروش الشعب الغلبان ده وتتفسحوا ذى ما عايزين .
(فى هذه اللحظة انبعث صوت من المايكرفون الداخلى للطائرة )
من برج المراقبة : الى الخاطفين اجيبو.. من برج المراقبة الى الخاطفين اجيبو
الخاطف : هنا الخاطفون ماذا تريدون
البرج : بل ماذا تريدون انتم ؟
الخاطف : نحن حركة حمصع ونود التحدث مع أي مسئول من حكومة بلادنا
البرج : لقد وصل للتو وفد من حكومة بلادكم هيا تحدث معه
( المسئول يمسك المايك وهو يقول )
المسئول : قلتوا انتو منو ؟
الخاطف : نحنا حركة حمصع
المسئول : حركة حمصع دى شنو كمان نحنا بنعرف حركة الغرب وحركة الشرق وحركة الشمال كمان انت يا حمصع طلعت لينا من وين
الخاطف : حمصع ده اسم الحركة ما اسمي وبعدين يا سعاتك نحنا ما حركة مسلحة
المسئول : طيب كان ما حركة مسلحة عوزننا نتفاوض معاكم ليه ؟ انحنا ما بنتفواض الا مع الحركات المسلحة
الخاطف (فى سخرية ) لا ما تخاف يا ساتك من ناحية مسلحين مسلحين عندنا حمادة وام حمادة واخوان حمادة
المسئول : (فى توتر ) اذا اردتم ان تثكلكم امكم فاهبشوا حماده ده او أي واحد فيهم
الخاطف : ايو انتو الهبشتوهم ديل ما كانوا ناس ما كانو ذى ناس حمادة ديل شوف يا سعادتك نحنا ناس عندنا قضية وما عندنا فى الدنيا دى حاجة نخاف عليها لا شركات لا ارصدة لا عمارات ومستعدين نموت عشان قضيتنا
المسئول : شوف يا حسنين انحنا عرفناك الخطفت الطائرة دى انت وعوض صاحبك واحسن ليك بالتى هي احسن تستسلموا وما تخلينا نخليكم تتجرسو وناس جمهورية البطريق ديل كلهم يشوفكم
الخاطف : البتجرس منو ؟ انا اخوك يا فاطمة
المسئول : طيب يا حسنين عندنا ليك مفاجأة اسمع صوت ام اولادك
عزيزة : يا حسنين .. يا حسنين
الخاطف : إذيك يا نعيمة
عزيزة : معقول يا حسنين تقول لى ماشى الدكان تجيب الفول للاولاد تقوم تخطف ليك طيارة
حسنين : لكن يا نعيمة عاوزانى اعمل شنو .. لفت الدكاكين كلها واحد رضي يسلفني على الحساب مافى كلهم قالوا ليا كان ما سددت الفات ما بنديك تانى قمت قلت احسن اتصرف
عزيزة :هسع الجماعة ديل ياحسنين مسكونا وقالوا ما بفكونا أكان إنت ما سلمت ليهم الطائرة ونهيت الاختطاف ده
(سعاتو يمسك بالمائك )
سعاتو : سمعت الكلام ده يا حسنين
حسنين : شوف يا سعاتك اولادى العندك ديل كان ماتوا ما مهم لانو نحنا عندنا قضية عادلة وممكن نضحى من اجلها لكن ( على الحرام) لو هبشتو واحد فيهم افجر الطيارة دى وتانى لا تشوف حمادة ولا أم حمادة وولدك دا اخليهو ليك يموت بى زرارتو
المسئول : انتو هسع ممكن تورينى الاسباب الخلتكم تخطفوا الطيارة دى وتعملوا العمله دى شنو
حسنين :انتو عايزننا نعمل شنو صالح عام وشلتونا . رزقنا وقطعتوهو وسنين نحنا صابرين على الضنك كمان لمن نجى نعبر سلميا في مظاهرة تضربونا وتقول لي بعد ده كمان الاسباب شنو
المسئول : ايوااا أنا كده فهمت حمصع دى . يعنى حركة المحالين للصالح العام مش كده
حسنين : ايواا ياها ذانتنا عليك نور
المسئول : طيب يا حسنين ياخى ما نتفاهم
حسنين : جدا مافيش مشكله
المسئول : نديك يا حسنين خمسين الف دولار قلتو شنو
حسنين : انتو قروش الشعب دى اقعدوا وزعو فيها ترضيات كده لمن تكملوها خمسين الف دولار دى يا سعاتك حتطلع من ياتو بند فى الميزانية
المسئول : لا لا ما تفهم غلط حاديك ليها انا يا حسنين من جيبى
حسنين : ايوه وانت ما موظف دوله جيبك ده بقى قدر كده كيف جيبت الدولارات دى كلها من وين ورثتها ولا إغتربت ليها
المسئول : ياخى انت مالك حاستلفا
حسنين : شوف يا سعادك الشغل بتاع اللعب الانفرادى ده ما بنفع معانا وانحنا ما ناسو ولو بتفتكر انو ممكن تشترينا عشان نسلمكم الطيارة على حساب حقوق الناس المفصولين ديل تكون واهم
المسئول : يعنى شنو يا حسنين
حسنين : يعنى لازم مطالبنا كلها تتنفذ في ظرف 24 ساعة
المسئول : ومطالبكم شنو بالتحديد
حسنين :ترجعوا أي زول فصلتوهو من عملو وتعوضوهو عن السنين القطعتو فيها رزقوا دى تعويض كويس وتصرفوا ليهو مرتبوا عن كل الفترة دى باثر رجعى
المسئول : يا حسنين لكن 24 ساعة دى مش شوية ديل 300 الف زول ليهم 17 سنه مفصولين عاوزنى ارجعهم ليك فى 24 ساعة
حسنين :طبعا لازم تكون عملية صعبة الشيل هين والرجيع صعب مش كده
المسئول : (في استجداء ) كدى يا حسنين خليهم 72 ساعة
حسنين (بعد تفكير) اها خليناها ليكم لكن أي عمليات لف ودوران وعدم مصداقية نحنا حنفجر الطيارة دى فى حتتا دى والاولاد ديل لو هبشتوهم ساكت حتندموا وحتدفعوا التمن وما تنسى ناس حمادة معانا هنا
المسئول : (التفت سعاتو لبقية افراد الوفد الذين جاءوا معه قائلا ) يا جماعة والله ناس حسنين ديل باين عليهم جادين في الموضوع .ياجماعة شوفو ليكم طريقة معاهم عشان حمادة ده يمشى يطلعو ليهو الزرارة
مسئول1 : شوف يا سعاتك المسئولين فى جمهورية البطريق قالوا خلاص مستعدين ينفذوا عملية اقتحام الطايرة واجلاء الرهائن
المسئول : لا لا هجوم شنو ورهائن شنو . انتو عاوزين اولادى يروحو فيها
مسئول 2 : يا سعاتك ما معاهم تانى مية واربعين
المسئول : (بجدية ) شوفو شليوا خيار الاقتحام ده من راسكم
المسئول3 : اها والحل شنو .. لانو يا سعاتك المسئولين في مطار بطريقيا قالوا انو الموية والاكل بدأت تنفذ من الطايرة المخطوفة
المسئول : والله انتو عارفيننا شعب طيب وقلبو حنين وكمان مسلم ومسالم عشان كده انا بفتكر نرسل لى ناس حسنين وعوض ديل طيارة خاصة فيها وفد من العلماء يمشو يدوهم كلمة كلمتين ويامروهم بالمعروف واكيد حيتنازلو ويسلمو الطيارة
(وفد العلماء يصل الى جمهورية البطريق)
برج المراقبة : الو برج المراقبة يتصل
الخاطفين : نعم ماذا لديكم
برج المراقبة : معنا اخوة لكم جاءوا للتفاوض معكم
(يمسك رئيس الوفد بالمائك )
رئيس الوفد : السلام عليكم ورحمة الله تعالى وبركاته يا اخوانى الكرام
الخاطفين : وعليكم السلام معانا ياتو مسئول
رئيس الوفد : لا يا اخوانى الكرام نحن وفد من العلماء جينا لاثنائكم عما تقومون به وان تقوموا بتسليم انفسكم والطايرة . اذ ان الله سبحانه وتعالي يامر بعدم قتل النفس التى حرم الله قتلها الا بالحق
حسنين : ويااخى الكريم وكت انتو عارفين كده لمن النفس دى اتقتلت بدون وجه حق انتو كنت وين . وعملتو شنو طلعتو ليكم بيان قلتو الكلام ده غلط جايين هسع تقولو لينا الله قال والرسول قال
رئيس الوفد : مقاطعا ياخى الكريم
حسنين : مقاطعا رئيس الوفد يا خى فكنا بلا دجل معاكم انتو هسع بدل تقولو للحكومة الناس ديل انصفيهم لانك قطعتى رزقهم وعندهم اطفال صغار عاوزين لبن واولاد عاوزين حق فطور واكل وعلاج جايين قاطعين المسافة دى كلها عشان تحنسونا . يلا ارجعو بلاش مسخرة معاكم اصلوا ماشفناكم يوم وقفتو مع الحق ولا قلتوا حتى البغلة فى الابريق
رئيس الوفد : مقاطعا يا خى الكريم
حسنين : مقاطعا يا خى فكنا بلا اخى بلا امى وامشو شوفو ليكم شغلة (حسنين مواصلا حديثة لبرج المراقبة ) شوفو يا برج المراقبة كلموا الناس ديل قولو ليهم المهلة فضل ليها تمانية ساعات لو المطالب بتاعتنا ما اتحققت ح نفجر الطيارة دى
برج المراقبة : الو يا خاطفين الو ماهى الاحوال داخل الطيارة
الخاطفين : لقد بداء الاكل والماء ينفد ونريد بعض الماء والماكولات نرجوا ان تقوموا بتحضيرها وسوف نوافيكم بطريقة ادخالها الى الطايرة
برج المراقبة : حسنا سوف نخبركم حينما نقوم بالانتهاء من تجهيز الطعام .
(اجتماع مع المسئولين في جمهورية البطريق )
اجتماع وفد امني على مستو عال برئاسة سعادتو مع المسئولين في جمهورية البطريق للتوصل لحل لانها تلك الازمة وقد قام مسؤلو الامن بعرض عدد من السيناريوهات الامنية التى تقود الى عملية اقتحام الطيارة وتخليص الركاب والرهائن الا انو سعادتو رفض جملة وتفصيلا تلك السيناريوهات لخوفه على حياة افراد اسرته مما حدا بأحد المسئولين من جمهورية البطريق بعد ان زهج منو ان خاطبه قائلا
مسئول البطريق : انتو وكت بترفضوا الاقتحام عشان خوفا على حياة اسرتكم ما كان تخافوا على حياة اسر الجماعة القطعتو رزقهم ديل عشان الامور ما توصل ليها مرحلة خطف طيارات
(هنا وصلت لمكان الاجتماع مكالمة من برج المراقبة )
برج المراقبة : من برج المراقبة الى المسئولين نفيدكم بان الخاطفين يحتاجون الى تزويدهم بالماء والماكولات .
(فى هذه الاثناء تهلل وجه المسئول الامنى لجمهورية البطريق وخاطب سعادتو قائلا
مسئول البطريق : ممكن دى تكون ثغرة عشان ما ننهى عملية الاختطاف دى
سعاتو : كيف
مسئول البطريق : ح نشرح ليك بس روق شويه
سعاتو : طيب قبل ما تشرحو لي كدى خلونى اكلم حسنين ده (يمسك بالمائك)يا حسنين يا حسنين انا سعاتو رد علي
حسنين : عملتو لينا شنو فى الموضوع رجعتو الناس الفصلتوهم كلهم
سعاتو : كدى يا حسنين روق شوية وخلينا نتفاهم
حسنين : مافيش مفاهمة يا سعاتو افكر مطلبنا دا واضح
سعاتو : يا حسنين ياخى المية الف دولار عملناهم ليك ميتين الف .اها قلت شنو
حسنين : ياخى انا ما قليت ليك الحته بتاعت بيع القضية دى نحنا ما بنعرفا ما تضيعوا الوكت ساكت رجعوا الناس ديل وادوهم حقوقهم
سعاتو : طيب اولادى عاملين كيف كويسين حمادة اتعشى
حسنين : مشردين ليكم 300 الف اسرة سبعتاشر سنه وتقول لي حمادة اتعشى اما ناس ما عندها ذمه انا اولادى ليهم عشرة سنين ما قاعدين يتعشو وعائشين على وجبه واحده (مواصلا فى حزم ) شوف فضل ليكم خمسة ساعات وما تكتر كلامك معاى ساكت
سعاتو : ياحسنين ياخى خليك عاقل والله الاذى والظلم الحصل ليكم ده كلو نشيلو منكم ونعوضكم ونرجعكم الشغل بس فكو الركاب ديل
حسنين : كده بدون أي ضمانات عشان بعدين تفكونا عكس الهواء ده لو ما عملتوها لينا جريمة حرابة وكمان قطعتونا من خلاف
سعاتوا : خلاف شنو يا حسنين هو معقول زول يطالب بى حقوقو يقطعوهو من خلاف
حسنين : مش انتو؟ انتو البتكتلو الزول فى حقو والله تقطعونا حتت نحنا عاوزين ضمانات
سعاتو : ضمانات ذى شنو يا حسنين
حسنين : دايرين الامم المتحدة تشرف على مسألة اعادة المفصولين دى
سعاتو : ياحسين ماتصعب الموضوع ساكت ما تقوم بتدويل القضية كفايا القضايا المدولة العندنا
حسنين : قايتو عاوزين ضمانات دوليه وكمان عاوزين مويه واكل عشان الركاب جاعو وعطشو
سعاتو : (في حنية ) حمادة جعان
(الجبهه الداخلية . احتل خبر اختطاف الطائرة والمفاوضات التى تجرى بين الحكومة والمتفاوضين عناوين الصحف المحلية والعالمية وشاشات الفضائيات واصبح الخبر متصدرا لكل الميادين وكانت عناوين الصحف المحلية
- معتوه يختطف طايرة بها مائة وخمسون راكب ويطالب باللجو السياسى لدى جمهورية البطريق
- اسرة مسئول كبير بين الركاب المختطفين
اصبح موضوع الطايرة هو حديث المجالس وشمارات الناس
- معتوه شنو حسنين ده انا بعرفو كان شغال معانا باشكاتب فى المالية معتوه شنو البختف ليهو طيارة والله كانو الفى الصوانى ديل هيلكوبتر ما خلوها
- والله قالو ليك سعاتو قال الروب ومتجرس جنس جرسة (فى شماته ) اولادو ما قالو فى الطيارة قالو كانو ماشين يعالجو ولدهم الصغير في الخارج قالو بلع ليهو زرارة
- بلع ليهو زرارة وادينو الخارج يتعالج والله سيد جارنا ده ولدو الصغير بلع ليهو ابرة خياطة قاعدين بيهو في الحوادث تلاته يوم لمن الابرة اتهضمت
- صحى قالو الخاطفين الاتنين ديل صالح عام وبيطالبو يرجعو الناس الاتفصلوا للشغل تانى
- يعنى يعملو شنو عملو تظاهره سليمة قامو جلدوهم وفلقوهم وفرتقو المظاهرة
- عليكى الله يا سعاد شوفى جنس الكلام ده الزول يقطعو رزقو ويجوعو اولادو وكان عاوز يسلم ليهو مذكرة ساكت يقومو يجلدوهم
(خطة الاجلاء ) اخيرا وافق سعاتو بعد عمليات تحنيس وشد وجذب من قبل مسئولى الامن بجمهورية البطريق على خطة الاقتحام وجلاء الرهائن بعد ان تم شرح الخطة له والتى تقضى بادخال الطعام على تربزة ترولى ذات عجلات يوضع فيها الاكل بواسطة احد افراد القوات الخاصة ذات التدريب المتقدم في عملية افشال عمليات اختطاف الطائرات على ان يرتدى ذلك الشخص ذى جرسونات المطار كتمويه علي ان يتم وضع قنبلة تستخدم عند مثل هذه الحالات تحديدا وتنفجر بمجرد حمل الماكولات التى على الترولى وتلك القنبله عند انفجارها ينبعث منها دخان كثيف يحجب الروية وعند استنشاقة يصيب الشخص بحالة من فقدان الوعى المؤقت مما يجعل مهمة القوات الخاصة التى سوف تكون على اهبة الاستعداد سهلة اذا ما عليها الا الدخول مستخدمة كمامات الاكسجين والمصابيح الكاشفة والقبض على الخاطفين
( بينما كان عوض يمسك بكرة البلاستيك التى تشيه القنبلة اليدوية ويقف فى منتصف الطائرة بين الركاب وكان حسنين ينظر عبر النافذة امام كابينة القيادة وهو ممسك بمسدس الاطفال ويتحدث لبرج المراقبة
برج المراقبة : لقد قمنا بتجهيز الماكولات والماء وهي في طريها اليكم
حسنين : طريق شنو اقيف لمن اقول ليك
برج المراقبة : لا تخف فنحن سوف نرسلها لكم مع احد الطهاة الذين يعملون في المطار
حسنين : قبل ان ترسلوها يجب ان تقوموا باخلاء جميع الجنود الذين في المدرج وامام الطايرة تماما
برج المراقبة : حاضر يا سيدى
حسنين : ما تقول حاضر ساكت شوفو يا ناس البطريق ما تعملو لينا فيها تفتيحة أي حاجة كده ولا كده انحنا ح نفجر الطيارة دى
برج المراقبة : لا اطمئن سوف نخليهم جميعا الان فى التو واللحظة
(صدرت الاوامر للجنود بالانسحاب من مدرج المطار وقام حسنين بمتابعة ذلك من خلال زجاج كابينة القيادة )
برج المراقبة : الان سوف نقوم بارسال الماء والماكولات لكم
حسنين : شوفوبقول ليكم تانى ما دايرين أي حركات
برج المراقبة : لا اطمئن
(وصل الشخص الذى يقود عربة الترولى المحملة بالماء والماكولات والذى كان حسنين يقوم بمراقبته وهو يقطع المسافة بين مبانى المطار الى حيث تجثم الطايرة فتح حسنين الطايرة حيث دخل الشخص والذى طلب منه حسنين العودة من حيث اتى ثم قام بقفل باب الطايرة توقف حسنين امام حمادة ليعطيه سندوتشا وكوب ماء لكنه وعند حمله للسندوتش تفجرت القنبله وقع مسدس الاطفال الذى كان يحمله حسنين فى حجر حمادة عم الدخان الاسود الخانف المكان صرخ حسنين
حسنين : معقولة معقولة معقولة
عزيزة : انت ياراجل الفلقة دى خلتك تهضرب ولا شنو هو في حاجة في البلد دى ما معقولة الزول يقطعو رزقو وكان قال بغم يتجلد .... انتهت
|
|
 
|
|
|
|
Shaker Hamid
فيس بوك
تويتر
انستقرام
يوتيوب
بنتيريست