عماد عبدالله ، الديم سيرة، وبعض هضربة...

عماد عبدالله ، الديم سيرة، وبعض هضربة...
دي مجرد خرمة لونسة ديم في البيت هناك مع العمدة.. فيها حاجة دي !! ونسة معاهو وعنو وعن الديم.. ممكن ؟؟ وممكن تكون خرمة لونسة (بُنِّية) مقروءة، نغسل بها بعضاً مما علِق في نفوسنا من أدران وأوهام تجارية.. زمان لمن كانت جريدة الخرطوم تصدر من القاهرة ، كنت مُدمن (تداعيات) يحي فضل الله، أها دي برضها كانت نوع الكتابة الهبّاشة الساهلة الواقعية ، الكتابة البتخليك جارّيها لييييييييي آخر حرف فيها، وبعد داك تقراها مثنى وثلاث ورباع.. أوجاعنا كتيرة يا أخو، في كل حالاتنا، الظاهر إنو آن أوان التغيير.. تغيير لشنو ، الله أعلم..لكن العارفو إنو البكان ده، الحركة أصبحت فيهو (ون واي) الحكومة سوّت ، القيامة قامت، بقت حجوة أم ضبيبنة بين الدولتين اللي ما بيسوو (حِلّة) ، الحكومة تسوي في شغلها ومعاها جماعتها، والمعارضة وبقية خلق الله ساكينها بالعكاكيز ، وبرضو ما في فايدة.. طارق (مجنن) الله يرحمو كان في الحالات الزي دي بيجُر دين كده حتى تخشى أن يرسل له الله شهاباً من السماء،، هسي أجُّر ليكم هنا ده !! أما بعد، عماد عبدالله، ياخ إزيّك ، وأخبار الديم والناس والحياة الما بتشبه حياة خلايق الله.. ياخي ويعلم الله خرمان للديم خرمة المبالغة والله .. حأتكلم عنو وعنك !! إنت مش من الديم ؟؟ وتيب.. في ناس ممكن يجوا يقولوا ليك عاين الفارة ده جايي يتكلم عن أخوه ،أو إني جايي ألمعه أو أكسر تلج أو يمكن أقشر بيهو، ولكني أعلم أن دافعي ليس أي مما ذُكر، وهذا يكفيني.. ثم أن الرجل غائب عن هنا أو مُغيّب (لا فرق ).. ياخ نحن في ثقافتنا السودانية لم نتعود أن نذكر الآخرين إيجاباً، لو كانوا أخوانك أو أصدقاءك أو نشِّكرهم أو نتكلم عن حاجاتهم، أو نبدي اعجابنا بهم أو نقول في حقهم كلمة طيبة، أو أن نتناول سيرتهم وهم أحياء يمشون بيننا ، سيما الأقربون.. دعك عن حدوث ذلك بين الزوج وزوجته، ففي ذلك عيب عظيم، وإنتقاص من الرجولة!!! الأغرب أنه يمكننا أن (نشاكلهم) وأن نعلن الحرب عليهم!! ولكني لن ينتابني حرج في ذلك، رغم شكل الصعوبة البادية وذلك للإعتبارات التي ذكرتها أعلاه، وليس عماد هو المعني شخصياً، ولكن هو وسيلتي للتعبير، أكثر من كون تناول سيرته (بالإسم) هي الغاية.. لغاية هنا ، وشكراً يا عماد، يمكنك النزول الآن، فسأتكلم عنك بصيغة الغائب، رغم إمكانية وجودك هنا .. رافقتك السلامة.. حديث عن جانب – قد – يكون شخصي، وذلك حتى يتسنى تبيان نماذج من شباب الديم أوانئذٍ ، وسيساعد في ذلك كونه أخي ونشأنا سوياً.. الشاهد أن شكل العلاقات بين الأخوان في الديم وفي غيرها من الأحياء الشعبية القديمة في الخرطوم القديمة، لم تكن تحمل ذلك الطابع التقليدي لشكل العلاقة بين الاخوان، فهي علاقة صداقة أكثر منها أخوة، أخوك هو صاحبك أو واحد من أولاد الحلة، والفردة، والزول البتفك آخرك معاهو.. الديم حي قديم جداً، وقد يتميز عن غيره من الأحياء في شكل العلاقات الإجتماعية، وخصوصية نسيجه الإجتماعي، الذي يتكّون من أهل السودان الكبير باتجاهاته الجغرافية.. تداخلت تلك الأسر وتصاهرت وأنتجت ( الديم ) الحالي .. مجتمع الديم متسامح جداً، وغريب في نفس الوكت.. فمثلاً في حلتنا كان هناك مسيحيين، وأنصار سُنّة، وصوفية، وشيوعيين، وإتحاديين وأنصار، وناس ساي، وناس كانوا يهود وقلبوا، وبتاعين كورة، وبتاعين سِنّة، وبتاعين (كواميت) وكان في إنداية، وخانة بنقو، وبيت قمار وجامعين وكنيسة، وكانت منطقة كوريا (وما أدراك ما كوريا).. كلهم عايشين في وئام وتناغم.. كان أهل المساجد ينتهي يومهم بعد صلاة العشاء، ليبدأ يوم ناس ( هوي يا ليلى ) ونُدامى الراح، الغريب أننا لم نكن ننظر (للسِنّة) حينها على أنها رجس من عمل الشيطان!! كان مجتمع القعدات يجمع الجميع مسلمين ومسيحيين، موظفين وأصحاب مهن حرة، عُمّال وميكانيكية ونجارين، ميسورين وناس عاديين مافي زول بيجس بإنو أزيد أو أنقص من أي واحد من القاعدين، وكان شرابهم حينها نظيفاً معبأ في قوارير، يقعدوا يتونسوا، ويشربوا، والحلة ( أم شطة ) الما خمج تتسبك في هدوء، وينساب كذلك غناهم بهدوء لا يعكر صفو الليل الهادئ.. -- ما في تعديل ، بس وصية ودالموج، أن أفرتق الكلام وأوزعو كما المرارة.. (عدل بواسطة Salah Abdulla on 09-15-2012, 11:20 AM)

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]