هل (تخجل) .. ان تعرض (نفسك) على طبيب (نفسي) ..؟

Quote: الاخ تمبس سلامات مافى خجل ولا حاجة - اهو زى بوستك دا يعتبر عيادة نفسية ويمكن يصل مرحلة عملية نفسية عديل كدا الواحد يجى يستمتع باللغة ويستفيد من التجربة ويطعم السرد الممتع .. هو فى تصليح نفسيات اكتر من كدا ؟ لكن بينى وبينك ابو عيادة داك منو خوف ....مش كان مشاهو عمنا صلاح ابو شنب :) .. على احسن الفروض كان مابقيت جنريتر بتكون زرت العيادة ..

Quote: ومشاركاتك قلت وان وجدت بتكون عدوانية ومخصصة (الشهادة لله فيما يستحق )

.. عارف الحاجة المهمة في المسالة دي شنو يا أحمد الامين .. انو النصح دا وتوجيه الكلام جا منك بي عفوية تامة ليس من وراهو غرض .. عارف الحاجة الدائما بتخلي الواحد طالع من معترك وداخل من معترك شنو ..؟ هي المسالة حقت الازدواجية والتكالب .. يعني يجيك زول بيهمهو امر زول تاني انت داخل معاهو في غيبوبة .. يشبكك ياخ عليك الهل الزول دا قريبنا يا من جماعتنا عليك الله انساهو وما تتداخل معاهو .. ويهمل الجانب المهم في المسالة واللي هو .. اساس المشكلة شنو ؟؟ واحيانا كتيرة جدا مع تكالب المجموعات الفي البورد دي واللوبيهات .. البتفتكر اناه ليها الحق في التصنيف وليها الحق في قيادة الامور .. بتلقى نفسك عرضة للشتيمة وعرضه لي اشياء كتيرة .. فإنت بتقابل الوضع بي نفس الدرجة العالية من الحساسية الفيهو ..
اقوليك حاجة غريبة جدا ..
كان لما يكون عندنا اي عمل خاص ببورداب الرياض بنضع ارقام اتصالاتنا وايميلاتنا .. في ناس نفوسم ضعيفه جدا ..
مرة انا قاعد في البيت بحاول انوم .. قام التلفون رنننن .. رفعتو لقيت الرقم من هاتف ثابت وحددت المنطقة المتصل منها الشخص داخل الرياض ..
فتحت الخط بعدما سلمت على المتصل .. قالي إنت علاء الدين تمبس البتكتب في سودانيزاونلاين ..
قلت ليهو ايوة انا تمبس ..ممكن اخدمك في شنـو ..؟
تخيل الزول دا في عبارات سريعة جدا .. شتم لي امي .. وابوي الله يرحمو بي شتيمة مغززة جدا وما اداني فرصة علشان اقوليهو الله يسامحك في حق امي وابوي ..
قطع الخط .. رجعت علي الرقم من الاشارة الاداني ليها عرفته انو متصل من كبانية او من مركز اتصالات علشان يطرش طراشو دا ومفتكر انو الواحد ما بيوصلو ..
لكن ان من طريقة كلامو ومن لسانو عرفتو انو بنتمي لي ياتو منطقة في السودان .. وجيت طوالي وجهت ليهو رسالة طالما انو بيقراني في المكان دا .. مفادها لو كررت المسالة دي تاني من اي مكان اتصال .. البلد دي ما السودان .. بجيبوك من اضانك جارينك وساعتها .. ما بعمل معاك حاجة غير اني اخد حق امي وابوي بي يدي ..
مع نفس النوعية الفاشلة دي يا أحمد الامين بتلقى ناس محترمة بتتصل عشان تناقشك بشكل جيد .. ودي الواحد بيضع ليها اعتبارات وربما بتعدل في مسيرتو في البورد دا .. وفي نوعية بتدخل ليك في الاماكن المفترض ما تتواجد فيها .. فقط من أجل انها تعتقد انها ح تنسف ليك الغرض من طرحك .. بين دا كلو وداك .. الواحد دائما بيبحث على انو يكون على اقل تقدير مقبول لدى الجميع ودي غاية صعبة لكن على اقل تقديرات يتبادل الاحترام الذي هو اساس كل شي واساس كل معاملات البشر .

مقابلتك مفتوحة في اي وكت يا أحمد الأمين .. لكن اول حاجة راجع صلاح عبد الله .. دا شوفو بقول شنو .. وكان حافظ انقابو رسل لينا طبلة .. ما عندك مشكلة بنسخ ليك مفتاح من المفاتيح المعاي