|
|
 ود البوكسي ـ أنثي الأنوفليس ـ بتاع الركشة ـ أبو سكسك ـ وخير وبركة ..!
|
من ضمن الأشياء التي تحدث في الخرطوم :
حسناً :
لا شك أنكم تذكرون أخانا في المعايش ( محمد ) الشهير بود (البوكس) ـ سبق أن حدثتكم عن واحدة من حكاويه التي لا تنتهي والتي تأتي لتحصد ما تبقي من دهشات سوي بداخلي أو في من حوله من مواطنين بسطاء .
اليوم صباحاً خرجت قاصداً مقر عملي ـ صباح فاتر لا يقل مثقال ذرة عن مجمل الصباحات التي سبقتها ، إذ لا جديد في هذه المدينة علي الإطلاق ـ فقط بدا لي الشارع خالياً من المارة ـ وللمفارقة وقفت في الشارع حوالي النصف ساعة قبل أن أجد وسيلة نقل تقلني إلي مقصدي ـ هي الخرطوم كان بي ناسها ولا بدون ناسها ـ كان في عطلة رسمية ولا مافي عطلة رسمية فالأمر سيان ، ضنك في كل شئ .
قبل ذلك كله نسيت أن أقول أن توتي علي وشك أن تختفي وكذا الحال مع عدد من قري البلاد وحلالها ـ وإنه لمن المهم هنا أن نوضح للفائدة العامة أن سبب الإختفاء لن يكون لممارسة العمل السري علي غرار ما يفعله السادة الشيوعيين السودانيين كلما لاح في آفاق بلادهم رائحة دكتاتور ـ بل أن إختفاء توتي وبقية الحلال سيكون بأمر النيل ـ أي والله العظيم النيل سيقوم ببلع توتي وغيرها وغيرها وغيرها بينما ذات النيل سيمر وعلي إستحياء من أمام القصر الجمهوري حاله في ذلك كما حال آلاف المواطنين الذين يمرون من أمام بوابات القصر الجمهوري علي إستحياء .
هل سبق لك أن شاهدت إختفاء مدن بفعل النيل من قبل ؟ أنا لم أشاهد ذلك لكنني شاهدت إختفاء أوطان بأكملها ـ الأوطان هينة كعب إختفاء الجنوب يا ولد ...!
وأنا أتحسس جبهتي ماسحاً بمنديل قماش أحمله ما تجمع من حبيبات العرق وحاملاً بيسراي ( جزمتي) محاوراً الخيران ومدن الماء وبرك الطحالب وأنثيات الأنوفليس التي تجمعت بفعل الأمطار الأخيرة ( جعلها الله أمطار خير وبركة) كما قال مذيع تلفزيوننا القومي في نشرة العاشرة مساء .
إذن وعلي بركة الله ها الملاريا تحاصر دروبنا ـ حتي أننا ما عدنا في حوجة لإجراء فحص مجهري . يكفي فقط وما أن تشعر بلسعة الأنثي حتي تبدأ في أخذ الحقن المقررة ـ فشينة والله بعد العمر ده تمشي الدكتور عشان ملاريا ثم .... ثم من أساسوا نحن شعب متعايش مع المرض ـ كان ملاريا كان بلهارسيا كان نزلة كان رز بي لبن كان قيامة رابطة ـ ياخ أنحنا متعايشين مع الكيزان تقول لي ملاريا ؟؟؟
متمدداً علي جراحاته يرقد (محمد ود البوكسي) وكأجمل ما يكون ـ لا أذكر إنني شاهدته علي هذا الوضع من قبل ـ يضع حذائه الأيسر عند رأسه ـ والأيمن تحت ساعده الأيسر ـ كان منظره للأمانة مثيراً للشفقة فكيف للشوارع أن (تخون) لهذه الدرجة ـ وقفت عند قدميه قرأت ما تيسر من آيات الله ـ ظننته قد إنتقل لرحمة مولاه وتمنيت له في سري داراً أفضل من داره وأهلاً خيراً من أهله تمنيت له كل حلم ، حلم به وكل أمر من أمورٍ ما كان لزمانه أن يحققها له تمنيت له كل شئ ظل يراوده ـ كل شئ أسره لي في تجلياته العظيمة وللأمانة لم تكن أحلامه قط لتخرج قيد ذراع عن حياة عادية ـ يعود فيها في الأمسيات لزوجته وطفلتيه حاملاً في يمناها الخبز وفي يسراه الطمأنينة ـ بمعني لم تكن أحلامه باهظة التكاليف ـ حاجات بسيطة يعني يجي ستمية جنية سبعمية وخمسين كان بالغت ـ وما أبسط أحلام الفقراء .
وأنا في حالي ذلك جاء نفر كرام من أصدقائنا المشتركين حملناها من أوج الشمس محاولين الدخول به لراكوبة (حماد) وهو ترزي مشهور في نطاق محيطنا ـ في الطريق فرفر (محمد ودالبوكسي) علت منا الابتسامة ـ فرحنا نوعاً ما إذ أن صاحبنا لا زال علي قيد الحياة ـ ما هي إلا لحظات حتي نهض واقفاً أمامنا ـ أسمعوني أنا وين ؟
وإليكم ما حدث :
أنا دائماً ما أردد بأننا ننتمي للعالم السفلي ـ بمعني أن جميع شعوب العالم الثالث كائنات وهمية لا علاقة لها بالإنسانية ـ فأنا مثلاً لا شك عندي علي الإطلاق بإنو الناس الحايمين ديل عبارة عن حاجات لا أدري كنههم بالضبط لكنني أستطيع أن أؤكد بأنني لم أصل للقناعة التي تجعلني أقول أننا المواطنين الحايمين ديل عبارة عن بشر لهم ما لهم من حقوق وعليهم ما عليهم من واجبات ـ من مآسي هذه النظرية إنني مؤخراً بقيت ما شغال بي حاجة الشغلة ـ فسيان الأمر عندي حتي إنني وفي غمرة عدم الإشتغال بالحاجات ما عدت فارزاً خط السيد الصادق المهدي إمام الأنصار من خط نافع علي نافع من خط هيثم مصطفي لاعب وسط الهلال من خط هيثرو . أي والله ما عدت (قاعد إنتظر سامحني غلطان بعتذر بعتذر بعتذر) والمشكي لي الله .
وعودةً لود البوكسي ـ فقد حدث في اليوميين الماضيين أن تلبدت سماء الخرطوم بغيوم عجيبة ـ شالت السماء كإمرأةٍ علي فراش الوضوع إنتظرناها تكب ـ صبر عليها البعض ـ غير أن الكثيرين راودتهم الغيوم عن أنفسهم خصوصاً الناس مارقة من (إجازة رمضان وتلك حكوة أخري) .
كان ود البوكسي من الذين لم يستطيعوا الصمود أمام هذه الغيوم فتسلق بدوره أقرب زجاجة خمر مكملاً بذلك بهجته التي يقول أنه لطالما إفتقدها ـ قال محمد بعد إستفاقته أنه إستعان بقزازتين (عرقي أبو سكسك) عشان يقدر يباصرالهموم قبال يباصر الغيوم ـ
المهم كان ذلك في السابعة من مساء أول الأمس ثم راح في نومة عميقة صحي بعدها علي جلبة أصوات ـ كان ذلك تقريباً في العاشرة مساء ـ ثم تذكر فيما تذكر أن لديه أسرة ومسؤليات جسام وحليب صغار ورغيف وعييييك عيك عيك من عينة تلك الأشياء التي يحاول الناس مباصرتها بـ أبو (سكسك) .
قال محمد ود البوكس :
نهضت من مرقدي إتفقت مع بتاع ركشة
أسمعني أنا ماشي مايو حتوديني بي كم ؟
بتاع الركشة : بالساهلة ياخ
ود البوكس : يازول لا ساهلة لا صعبة قول كلامك
بتاع الركشة : خمستاشر جنيه
حق الله بق الله تم الإتفاق علي مبلغ تسع جنيهات ـ وتلك مفارقة أخري يعني عادي في السودان ممكن تلقي زول يقول ليك الحاجة دي بي ستين الف وتشتريها بي تلاتاشر جنيه .
المأساة لم تكن في الإتفاق بل في إنو صاحبنا ده قدر ما الله أداه من شفتنة ما عرف لمنزله طريقاً ـ قال لي أنه ظل وبمساعدة بتاع الركشة يسأل الناس في ليل مايو عن منزله ولم يجد جواباً .
بعد رهق طويل أقنعه بتاع الركشة إنو يا ود العم ياخ إنت يمكن ساكن مانديلا . موش يمكن باللاهي ؟ فذهبا لمانديلا وهي حلة تجاور مايو وتقع علي إمتدادها الجنوبي غير أنهما فشلا في سعيهم ... قضيا الساعات الأولي من ليلة الأمس بحثاً عن المنزل ولم يجدا له طريقاً . أقنعه بعد ذلك بتاع الركشة أن يعود به حيث أقله أول مرة وقد كان .
طلب منه خمسون جنيهاً بتمام الكمال ـ أخرج ما بجيبه من جنيهات سبع وأربعون جنيهاً ثم رغيفات يابسات ثم رطل ونص حليب كان يحمله ـ مسجلاً بذلك (أي بتاع الركشة) أكبر دخل يسجله بتاع ركشة منذ أن وطئت (لساتك) الركشات أرض البلاد ـ ثم إفترقا قبل أن يخلع حذائه وينام متوسداً الأرض .
وأنا ماعارف لكنني بدأت أخاف .... كمان جابت ليها روحان من البيت ؟؟؟ ومشاوير ركشات بي خمسين جنيه ـ هو ذا أبو سكسك يا صحاب فإجتنبوه .
ويا وطن عز الشدائد
|
|
  
|
|
|
|
|
|
|
|
Re: ود البوكسي ـ أنثي الأنوفليس ـ بتاع الركشة ـ أبو سكسك ـ وخير وبركة (Re: خضر حسين خليل)
|
خالص الود خالص التحايا جماهير شعبنا وهي تعاني الفيضانات وأنثى الأنوفلس و مؤخرا التوهان من البيوت
نرجو من العاملين والعاملات في إنتاج أبو سكسك القليل من الغش والخداع المالي البلد حبكة علي أبو سكسك فلا ضير بالقليل من الموية بالقدر الذي يجعل الوصل للبيوت ممكنا
شكرا يا خدوري ياخ دي كتابه عميقه وممتعه بشكل عجيب مع إعتذاري لود البوكسي عن نوبة الضحك المتواصلة عند قرأة قصته هذة
| |
|
|
|
|
|
|
|
|
|
Re: ود البوكسي ـ أنثي الأنوفليس ـ بتاع الركشة ـ أبو سكسك ـ وخير وبركة (Re: مرتضى احمد عبد القادر)
|
يا مورتا تحايا وود
النكتة بتاعت عمك بتاع اهل مكة دي سمعتها ولا احكيها ليك ..
خلاص احكيها ليك هههههههه .. قال ليك واحد عمك من البنكسروا في بيوت
الشراب بالايام المهم قعد في الكمبو يجي اسبوعين وجاء راجع الحلة اول ما خشا
الشارع لقى ليك لافتة شارع عمر بن الخطاب كسر يمين لقى ليك قدامو مدرسة
خولة بنت الازور يا زول رجع خلف لقى ليك دار الارقم لتحفيظ القرأن يا جماعة الخير
راسو ضرب لمن لقى ليك دار اللجنة الشعبية لحارة القادسية شمال بس الزول زي ود البوكس
قال انا وين ... وفي نص الحلة قعد يكورك يا اهل مكة من منكم يدلني علي داري
ود البوكسي دقس في موضوع الركشة ابو 50 الف ده
| |
|
|
|
|
|
|
|
|
|
Re: ود البوكسي ـ أنثي الأنوفليس ـ بتاع الركشة ـ أبو سكسك ـ وخير وبركة (Re: خضر حسين خليل)
|
خدر يا صاحب القلم الطاعم ...
كل سنة وانت اطعم
.
.
.| Quote: أنا دائماً ما أردد بأننا ننتمي للعالم السفلي ـ بمعني أن جميع شعوب العالم الثالث كائنات وهمية لا علاقة لها بالإنسانية ـ فأنا مثلاً لا شك عندي علي الإطلاق بإنو الناس الحايمين ديل عبارة عن حاجات لا أدري كنههم بالضبط لكنني أستطيع أن أؤكد بأنني لم أصل للقناعة التي تجعلني أقول أننا المواطنين الحايمين ديل عبارة عن بشر لهم ما لهم من حقوق وعليهم ما عليهم من واجبات ـ من مآسي هذه النظرية إنني مؤخراً بقيت ما شغال بي حاجة الشغلة ـ فسيان الأمر عندي |
.
.
كلام في اصم الصميم زاتو ... والمفارقة مضحكة بين دول تحاكم رؤساء على (شبهة) فساد ... وبين فساد يسرح ويمرح والبقول بغم ينجرا في راسو موس بما لا يرضي الله .. ويحسبون انهم يحسنون صنعا
ابقى عافي يا صديق ... واتمدد ونحن كنا بنقول على سكسك صاحب الاسم (الساحر والاطفال)
| |
|
|
|
|
|
|
|
|
|
Re: ود البوكسي ـ أنثي الأنوفليس ـ بتاع الركشة ـ أبو سكسك ـ وخير وبركة (Re: خضر حسين خليل)
|
| Quote: فليس من المعقول إنو زول حقوقوا كلها مهضومة يصاب برضوا بي عسر الهضم |
"بوبليسك" يا خدر ياخ (شيل دا من دا يرتاح دا عند دا)
.
.
والله يا صديق ...تخيلتك تماما وانت في مشوار الحياة اليوماتي تتخير الفجج الناشفة من الطين والموية ...
بس برضو رغم انك اخترت الحارة ...حااااسدنك على القدرة ياخ
عن حالنا ... نخبرك عنها حال بداية ترنمك بمطلع " شن بتقوووووولو"""
ابقى عافي ودافي
| |
|
|
|
|
|
|
| |
خضر حسين خليل
باسط المكي
حبيب نورة
مرتضى احمد عبد القادر
معتصم ود الجمام
طاهر بدر
محمد عبد الماجد الصايم
فيس بوك
تويتر
انستقرام
يوتيوب
بنتيريست