|
|
 بعد ذهاب مبارك ووفاة عمر سليمان يا ساتر من احلام ناذر الخليفة
|
Quote:
بعد شوية حسني مبارك قبل علي وقال لي إنت ما شايف شغلك وإنت قاعد ساكت (وأنا مستغرب شغلي شنو والمشغلني منو!!) .. أنور التكينة جا يتدخل حسني مبارك نهرو ليك وقال ليهو إنتو الإتنين أنا حا أأدبكم وقام نادى : يا عمر سلمان ؟!! يا عمر سلمان ؟؟! جات ليك عجلة تالتة وقفت (أنا ما عارف قصة العجلات في الخلا داك شنو!!) جا ليك عمر سلمان واقف .. (أنا لحدي هسي ماشفت عمر سلمان مدير المخابرات المصرية على الطبيعة .. لكن حكمة ربنا شفتو في الحلم وعرفتو طوالي) ..!! حسني مبارك قال لي عمر سلمان أحرس لي بتي دي وشوف لي البت التانية لو في طريقة ترجع ..! عمر سلمان مشى على البحر ومعاهو أنور .. عمر سلمان بيعاين للبحر وأنور يصور سااااااي في البحر وأنا واقف متمحن ..!! بعد شوية جا عمر سلمان قال لي حسني مبارك خلاص أنا عرفتها بتك مشت وين .. إنت أمشي إرتاح وأنا الصباح برجعا ليك .. (ولد دا .. والله كان بيرجعا ليو ما عارف) ..!!
حسني مبارك دور عجلتو وإتخارج وأنور التكينة ردف بت حسني مبارك التانية في عجلتو ووصلا أوضتا ودي كان أخر مرة أشوف أنور التكينة في الحلم !!
بعد شوية عمر سلمان قال لي أنا حا أسامحك على تقصيرك في شغلك لكن لازم تخلي بالك من بت الريس التانية (وأنا لحدي هسي مستغرب شغلي في الحلم كان شنو والشغلني منو !!) قال لي لو شعرت بي أي حركة كدة ولا كدة بس كورك لي وأنا بجيك على طول ومعاي التعزيزات ..!!
ودور عجلتو وإتخارج على كدة ..!! |
|
|
  
|
|
|
|
|
|
|
|
Re: بعد ذهاب مبارك ووفاة عمر سليمان يا ساتر من احلام ناذر الخليفة (Re: د.محمد بابكر)
|
انا ما حصل قريت رؤى ناذر دي إلا الآن بس... مباااااااااااالغة مبالغة مبالغة... والشي المخيف وضوح التفاصيل البحكي بيها... فشكرا يا استاذ انور على البوست ده
الجزء التحت ده جذب انتباهي... واتكهربته لما محمد عادل قام... بالجد الكلام ده مخيف ... واعتقد انه واضح... ما عدا موضوع خدر ده ما فهمته... السمك ده بمثل الشعب السوداني او السودان.. والاربعة بتناقشوا انه منو فيهم (المالي يدّه) منهم.. محمد عادل بمثل الانصار، وقومته اعتقد بتمثل الثورة الحالية بقوامها الاساسي من طائفة الانصار وجناحهم السياسي حزب الامة، على الرغم من انه البدوها طلاب جامعة الخرطوم، لكن إعلام حزب الأمة نجح في انه يبرز دور الانصار وخروجهم... ده غير التنظيم العالي والعدد الكبير، الما انصار بقوا يمشوا ودنوباوي للمظاهرات... ميادة واضح انها بتمثل حكومة الانقاذ... وانها حاولت تملا شبكتها من الشعب السوداني (واظن ملي الشبكة هنا بعني القبول)... لكن ما اتمكنت... وماتت (جواهم)... عزّام للاسف ما عندي معلومات كافية عنه... ما حأقدر اربطه بالحلم... اما تراجي، فخليني اسكت احسن... بكري ابو بكر بمثل بالتأكيد سودانيز اونلاين ودوره في تحريك الناس دي كلها.. النعناع البتشربه بمثل حدث حيوعي الشعب السوداني اكتر واكتر.. عشان يقدروا يشوفوا ويسمعوا الناس ديل كويس...
الرؤية الخاصة بالفنان بادي.. اختيارك ليه او ظهوره بمثل الدعوة للشعب السوداني لإنه يتوحد وينفض القبلية (زي ما بتقول الأغنية)... انت والبعام بتمثلوا الشعب السوداني... البنقز من الآلات المشهورة عندنا.. بالتالي بوافقك في تفسيرك لاختيارك بين النموذج المصري ونموذجنا الخاص... ما حيكون نموذج ساهل.. لكن الظروف القاهره (سيد الكشري) حتخلينا نقبل بيه غصباً عننا...
بنات حسني مبارك الاتنين هم مصر والسودان.. وحُسني مبارك زي ما بسيّر مصر بسيّر السودان (كان)... البحر ده هو الجامعهم عشان كده البتّين ساكنات جنبه... واحده فيهم (المصرية) اخدها البحر... والتانية (السودانية)، كان بحاول ياخدها البحر، وانت كنت حارسها.. جاني خاطر لتفسير لآخر لقصة البحر، في انه هو (التيار الاسلامي)... انت دورك برضه بمثل دور الشعب السوداني في انه يحرس بلده عشان (التيار الاسلامي ما ياخدها).. رغم انه ده ما مناسب مع الواقع... علاقة عمر سلميان مع السودان قوية ومعروفه من زمن انقاذه لمبارك من محاولة الاغتيال ديك.. وهو معروف عنه (الله يرحمه) رجل حكيم، وقوي... ممكن يكون كان عنده دور في القرار المصري بعدم الرد القوي على السودانيين في وقتها، وابتزازهم بدلاً من الانتقام منهم بصورة رعناء..
الجزء ده مخيف!
Quote: بعد شوية ذو اليد رجع لي خدر العود ورجع لي نهيرو تاني وبكري رجع يعاين في اللاب توب وديلاك رجعوا لي سمكم .. ناس السمك إتغالطوا بعد شوية محمد عادل اتحامق شال شبكتو وحربتو وجرى على الخور .. رمى الشبكة وشال الحربة قعد يطعن في الموية الجارية بعد شوية جر الشبكة طلع سمكة كبيرة زي الورل جا شايلا وجا رماها في الطربيزة قدام الجماعة والجماعة ساكتين بعد شوية محمد عادل سل سكينتو من ضراعو شك السمكة نصين وقطعا سرعة سرعة وأكلا براو ما خلى فيها الا الشوك ..!!
الباقين وشهم حنبك ميادة كمال لفحت شبكتا وجرت على الخور حاولت ترمي الشبكة إنزلقت ووقعت في الخور قعدت تكورك : ألحقووونيييي !! ألحقونييييييي !! أنا فت طوالي تلبت من مكاني قلت لي بكري : يا بكري أديني المفتاح سرعة أحصل ميادة قبل تغرق ! بكري ولا حت عاين لي .. بدون ما يرفع وشو من اللاب توب قال لي دي ما شغلتك أمشي كمل القدامك داك !! حنستو يا بكري عليك الله أديني المفتاح !! بكري أبى يرد علي .. أخوكم طوالي ما إتردد رجعت ورا وجيت جاري داقي راس جوة الخور (ما جعلي أحمق .. أسوي شنو عاد) !! فتشت لي ميادة لقيتا لحقت أمات طه (بالمناسبة أمات طه الأربعة شالم البحر في قصة المثل المعروف دا ) !! جيت طالع زعلان من الخور .. عاينت لقيت ناس السمك ولا هاميهم .. مشيت عليهم قلت ليهم ما عيب عليكم البت تغرق قدامكم وإنتوا قاعدين تتفرجوا ؟!!.. الجماعة هاجوا ليك فيني .. مالك ومالا ؟ إنت أساسا متلب وراها مالك ؟! مش هي معانا .. أمشي شوف شغلتك .. جيت راجع محلي زعلان أخدت لي بُقة من الجك وقعدت أراقب الجماعة بي توتر .. بكري مواصل في خياطتو وخدر المسكين ذو اليد زاريهو زرة السنين .. بعد شوية أشوف ليك تراجي شالت شبكتا وجات جارية على الخور .. قبل ما تنزل فت وقفت علي حيلي (ما جعلي أحمق أسوي شنو عاد) ؟! قلت ليو يا بكري ثبت تراجي دي قبل ما تلحق ميادة !! بكري ولا حتى عاين لي قال لي : stay away from tragie .. قلت ليهو I cant قال لي خلاص أعمل الدايرو .. قعدت أعاين لي تراجي جات بي كل ثقة رمت ليك شبكتا في الخور وأنا متوتر وجاهز ..! بعد شوية جرت الشبكة جابت ليها سمكة أكبر من سمكة محمد عادل طوالي رفعتا وجرت تكاوي في عزام ومحمد عادل .. طلعت سكين شقت السمكة وقطعتا وأكلتا براها وقشت خشما !!! بعد شوية عزام أتوتر شال شبكتو وجا على البحر متردد .. الزول داير يرمي شبكتو إنزلق ووقع جوة وقعد يكورك ..!! عاينت لي تراجي ومحمد عادل لقيتم بيعاينو من بعيد وما شغالين بالموضوع .. عاينت لي ناس خدر لقيتو لسع زارينو في الغنية وطبعا أنا أساسا قنعان من بكري طوالي جريت على الخور وتلبت (ما جعلي أحمق أسوي شنو عاد) !! جممبلغ جوة الخور وصلت قاع الخور لقيت عزام قاعد هناك حاولت أجرو يطلع يتنفس أبى جاط فيني قال لي خليني أغرق !! قلت ليهو علي بالطلاق ما تغرق وأنا قاعد . أرح لا فوق ..!! قال لي أمشي فوق عشان تراجي ومحمد عادل يشمتو فيني !! قلت ليهو هو دا كلو عشان شنو ولي شنو ؟ عشان سمك ؟! يخرب يومو السمك البيخليكم تكتلوا نفسكم كدة ..!.. قال لي يا زول أمشي خليني هنا .. قلت ليو أها أنا كمان بوريك فهمي .. أنا قاعد هنا وغرقان معاك وأصلي ما طالع .. ورقدت في قاع الخور ونفسي بقى يضيق شوية شوية .. عزام يحنسني عليك الله أطلع .. قلت ليهو والله ما أطلع إلا تطلع معاي .. قال لي والله أنا ما طالع داير أغرق .. قلت ليو وأنا برضي بغرق معاك .. بعد شوية عزام راسو لف .. ونفسو إنكتم وأنا بعاين ليهو لمن غرق ... والوكت دا أنا نفسي إنكتم وبديت أفقد الوعي وأجر نفس بي صعوبة جدا ..
بعد شوية فت قمت من السرير وأنا بلهث بي صوت مسموع ونفسي داير ينقطع .. إتلفت لقيت الواطة فجر والأذان بيأذن .. مشيت التلاجة راسي لافي .. فتحت اشرب موية .. عاينت جوة التلاجة لقيت الجك الكنت بشرب منو في الحلم داك !! نفس شكل الجاك داك بس دا فيهو موية ما سائل أخضر .. إتخلعت وراسي ضرب والقصة ما وقعت لي .. في النهاية شربت منو كم جغمة كدة ورجعت تاني نمت ..!!
... |
| |
|
|
|
|
|
|
| |
انور التكينة
ناذر محمد الخليفة
Hani Arabi Mohamed
احمد التجانى احمد
saif massad ali
د.محمد بابكر
مريم بنت الحسين
فيس بوك
تويتر
انستقرام
يوتيوب
بنتيريست