|
|
|
 Re: رحلة البحث عن .. رقم .. وطني .. مميز .. (توجد دراما) (Re: خالد الأيوبي)
|
الحلقة 3 (الأخيرة)
أكدت للموظف الشاب الذي يسعي في مساعدتي بأنهم صوروني و أخذوا بصماتي العشرة. فذهب بي إلي مكتب التصوير و البصمات مستفسراً
(إنت فلان الفلاني؟) سألتني أحدي الفتيات فأجبتها بنعم. قالت لي (إنت وين نحن من قبيل بنفتش ليك.... إنت ما إتصورت ليه؟)
وحاولت بلا فائدة أن أقنعها بأنني جلست في هذا الكرسي وقمتم بتصويري و أرسلتوني إلي هذا الجهاز و أخذتوا بصمات أصابعي.
و تدخل الشاب (خلاص ما مشكلة حسي صوروه و أخدوا بصماتو ... )
(و تاني أنتظر لمن يجي إسمي بعد عشرة ساعات عشان أدخل بياناتي؟؟؟ معقولة بس يا جماعة.؟) و جهت له سؤالي في شكل إستنجاد . ولم يخزلني .. فكر قليلاً ثم قال:
(أسمعي .. عليك الله يا فلانة تصوريهو و تفتحي ليه ملف في السيستم و تقومي تدخلي ليه أي معلومات بسيطة مثلا السكن – إسم الوالدة - أي معلومة و لو كانت وهمية عشان يتم حفظ ملفه)
ثم إلتفت إلي وواصل (بعدين إنت أمشي الصالة و ما تنتظر ينادوا إسمك. أمشي طوالي لأي موظف إدخال و قل ليه أنا أدخلت معلوماتي لكن عاوز أعدل فيها.
و تقوم تنزل معلوماتك الصحيحة كلها. وبي كدا تكون ما إنتظرت. كويس كدا ؟)
تركني مع فلانة التي كانت متزمرة وساخطة جدا لإعتقادها بأنني أنا المخطئ عشان ما إتصورت قبيل ولا أستحق هذا الإهتمام. وإستفزها تعليقي (المرة دي إن شاء الله الصورة ما تطفش تاني؟)
فقامت فجأة بإرجاع تذكرتي لي و رفضت تصويري و هي تقول (أنا ما بصورك إلا بتعليمات من الضابط). فضبطت أعصابي و سألت عن أين أجد الضابط؟.
كان هو نفس النقيب صارم القسمات حي الشعور. إهتم بأمري و لكنه لم يستوعب قصتي إلا بعد أن إستعنت بمنقذي الشاب موظف قاعدة البيانات فشرح له الأمر وأخذ منه تعليمات واضحة لقسم التصوير:
(سيادة النقيب قال ليكم أعمل ليه الإجراء حسب ما شرحت ليكم)
أخيرا تم كل شئ حسب خطة الشاب الطيب. إنتهيت من مرحلة إدخال البيانات (تعديلها) بسلام و سلاسة لولا ذلك السؤال الغريب الذي وجهته لي الموظفة في الختام
و في وجهها تعبيرا لم أجد له وصفاً غير التعجب: (المعلومات دي الدخلها ليك منو؟ ) .لم أفهم سؤالها فعقبت (إنتي طبعاً .. أقصد أنا .. ما فاهم و الله)
لم تكلف نفسها أن توضح لي بل قالت لي و هي تدعي عدم الإكتراث: (خلاص أمشي. بس إن شاء الله تكون متأكد من معلوماتك؟) ولأنه لم تتبقي لي رغبة أو طاقة للجدال مشـــيت
و إنتقلت إلي المرحلة 4 الأرشيف حيث تم عمل إسكاننق لمستنداتي و تم إلحاقها بملفي في الكمبيوتر. صرت علي أعتاب المرحلة الأخيرة 5 التحري و صارت الساعة الثانية بعد الظهر.
إنتظرت دوري – لم يتأخر غير ربع ساعة فقط فقد خفت الحركة و قل الإزدحام.
و لكن قبل أن أن أمثل أمام شرطي التحري كانت هنالك مفآجأة أخري غير سارة في إنتظاري:
سمعتهم ينادون علي إســـمي بإلحاح من الصالة. فهرولت مســرعاً : ( اللهم أجعله خيرا) . هناك أخذوني إلي موظفة أخري في نافذة إدخال بيانات أخري.
و كأني لم أكن هنا من قبل ، سألتني عن بياناتي كلها واحدة واحدة و من الأول. فكرت (ربما البنت السابقة التي تعجبت من بياناتي بلا سبب واضح قد مسحتها).
أعطيتها كل معلوماتي للمرة الثانية و أنا أستعين بكل ما أوتيت من صبر. و عندما إنتهيت قالت لي:
- يلا من هنا تمشي الأرشيف
- تاني؟
- تاني كيف؟ إنت مشيت الإرشيف قبل كدا؟
- أيوه
- أيوه ؟ أيوه كيف؟ معناها إنت عندك إستمارتين ولا شنو؟ كدي جيب الإستمارة الثانية
لم تقتنع بأني لا أملك إستمارة أخري. فنادت بأعلي صوتها تستعين بزميل: الراجل دا قال مشي الأرشيف قبل كدا و هسع قدم إستمارة و عملت ليه البيانات يادوب . معناها مقدم مرتين
و تجمهر حولي مجموعة من الموظفيين العساكر و الملكية و أمطروني بوابل من الأسئلة ظاهرها ( عشان نفهم دي حصلت كيف؟) و باطنها ( بصراحة نحن شاكين فيك)
فلم يكن أمامي إلا أن إستنجد بمن يحميني من شكوكهم: سعادة العميد مدير المركز. فدخلت عليه (توووووش)
رحب بي . ولكنه مثل سعادة النقيب إستعصي عليه فهم قصتي الشائكة ... غير أنه أبدي لي إحســاســا بثقته في صدق كلامي وسلامة موقفي.
وأخذني من يدي إلي التحري وطلب منهم أن يكملوا إجراءاتي علي وجه السرعة الآن. (ولو في أي مشكلة تعالوا لي)
فتحوا الكمبيوتر ووجدوا ملفي و بياناتي كلها في السليم إلا أنه ينقصها ملحقات الأرشيف (صور المستندات) .... بدت المسألة تتضح لي و عرفت سبب المشكلة .. فطلبت منهم أن يدوروا علي ملف آخر بإسمي.
و فعلا وجدوا ملف آخر بإسمي به ملحقات الأرشيف. فأخذوها و ضموها للملف الأول. ثم تحروا معي سريعا و تأكدوا من صحة معلوماتي .. (إتأكدوا كيف ما عارف)
................ و ..............
(( كلو تمام ســـعادتك أكملنا إجراءآتو .... يجي بكرة يســـــتلم رقمو الوطني طوالي ))
كانت الصالة و أنا أعبرها في طريقي للخروج خالية تماما و الساعة في جدارها تشير إلي الرابعة .. .... و كنت أنا أفكر محتــاراَ في شــيئين:
الأول: ((ما سبب تعجب تلك الموظفة من بياناتي))
و الثاني: (( هل يا تري الآن أمشي آكل ولا أشرب قهوة ولا أنوووم ))
- تمت -
| |
  
|
|
|
|
|
|
|
|
Re: رحلة البحث عن .. رقم .. وطني .. مميز .. (توجد دراما) (Re: خالد الأيوبي)
|
| Quote: خلوا البت تعمل ليكم تحديث لأرقامكم |
لو كان قال ليك...أمشي لي البت ديك خليها تنشط ليك الرقم
كان طلعت من الساعة 11...بدلا من الساعة 4 ...
الظاهر عليها حدثت رقمك وطلبك زاتو وخلتك تتلبج
وتحدث في نفسك ...كل مرة...تسمع رقم جديد...
عموما حمدلله بسلامة الخروج برقم وطني...
ومع ذلك فرحلتي معه كانت أكثر مشقة...
فالبلد الولدوني فيها ...ما لقوها عديل
كدي...ودخلوني بي جوة وقعدوني في الكي بورد
عشان أكتب مكان الميلاد بنفسي : الولاية: المحلية
وأتأكد انو ما عندهم اسم بالطريقة دي.
وبدو يقترحوا في الحلول...امكن بلدكم غيرو اسمها؟
إمكن تبعوها لي محلية كذا؟ وكل ما يقولوا حاجة اطلع
ليهم شهادة الميلاد الاصلية...
حاولوا يجيبوا لي حلة قريبة من حلتنا ويعتبروني
مولود فيها...(ابيت كلو كلو) دايرين كمان بعد كم سنة
يجوا يغالطوني في الجروف...
المهم طلعتهم غلطانين ومرقت قلت ليهم لما تكونوا جاهزين
بجيكم راجع أطلع الرقم الوطني...فضاع مني زمن أكثر من زمنك
| |
|
|
|
|
|
|
|
|
|
Re: رحلة البحث عن .. رقم .. وطني .. مميز .. (توجد دراما) (Re: nazar hussien)
|
Quote: حاولوا يجيبوا لي حلة قريبة من حلتنا ويعتبروني
مولود فيها...(ابيت كلو كلو) |
المفروض يكونوا ربطوا برنامج الرقم الوطني في الكمبيوتر بي قاعدة بيانات التعداد السكاني الأخير و المفروض يكون نازلة فيها أي قرية و حلة و مدينة
لاحظت برضو أثناء وجودي واحد ما لقوا ليه بلده و لكنه ما كان (مفتح) زيك لصقوا ليه قرية في منطقتهم قام وافق عشان يتخارج بس
المشاكل الفنية دي يا نزار كوم و الفوضي و عدم النظام و المحسوبية دي كوم تاني
الله يدي العافية
| |
|
|
|
|
|
|
|
|
|
Re: رحلة البحث عن .. رقم .. وطني .. مميز .. (توجد دراما) (Re: Tumadir)
|
Quote:
المهم .. قالوا في بطاقة مفروض تطلع بعد كـدا!
المنظر فيها شنو بالضبط؟ |
المفروص ذاتو بقي خشم بيوت في السودان - عشان كدا نصيحتي ليك يا الصايم ما تستعجل في خطوة إستخراج البطاقة دي
لأنه بالمنطق كدا ما في داعي ليها ما دام أدوك رقمك و بياناتك محفوظة في السجل المدني ...... و غالبا المفروض بيكون هو الرسوم بتاعة البطاقة وليس البطاقة - وهو يكون فرض عين كمان
| |
|
|
|
|
|
|
| |
خالد الأيوبي
Mohd Ibrahim
nazar hussien
محمد عبد الماجد الصايم
Mohamed Foto7li
Tumadir
فيس بوك
تويتر
انستقرام
يوتيوب
بنتيريست