|
|
 معجم الألفاظ الصغيرونه
|
يقول المؤلف : ثم انى رأيت الزمان لم يعد الزمان .. و الناس تغيروا و تبدلوا
فكان كقول القائل :
تغيرت البلاد و من عليها ووجه الارض مغبر قبيح
و استجد على الناس ما استجد .. فاذا المعروف منكر و اذا المنكر معروف .. و تكاثر الناس في الالفاظ و المصطلحات .. فبعد ان كان كل كلب يدعى بوبي فاذا للكلاب اسماء و استحقاقات و مخصصات
و بعد ان كان كل طفل باببو فاذا الاسماء تتعدد و الهويات تتبدل
فعمدت بعد الاستعانة بالله الى جمع و تصنيف معجم للالفاظ التي تنكب لها اهلها حفظا لها من الاندثار و رعاية لها من الضياع
و هذا ما تيسر لي جمعه :
|
|
 
|
|
|
|
|
|
|
|
Re: معجم الألفاظ الصغيرونه (Re: حمور زيادة)
|
شاكوه ماكوه حلاوه لبان في الدكان اشكال و الوان : تقال لتهديد الغير بانك حتفتن عليهو و تكلم
الفتان ما بنريدو السكينه تقطع ايدو : دي تقوله لما زول يهددك انو يفتن فيك
الطياره نمرة تلاته : تقال لما تجي طياره ماره في السما .. و ما عارف اشمعنى نمرة تلاته دي
يا مطيره صبي لينا في عينينا : تقال و انتي جاري تحت المطره
عز الدين كبوشيه طلق مرتو الحبشيه عشان حتة طعميه : غنية فرح تقال عادة و انت جاري و لا اعرف الان ان كان عز الدين كبشويه فعلا متزوجا من حبشيه او انه طلقها لهذا السبب
عم علي بياع الزيت ساق مرتو وداها البيت و في البيت عاملزعلان و في البنبر وقع اتشنقل : اغنية فرح اخرى و واضح انو الشنقله كانت عقاب لعمو علي لانو ساق مرتو و الاغنية توضح النهج الاستعلائي الذكوري
اضان جلد : تقال للرفض مع طقطقة الاضان
للحدود : تقال للتكثير .. لتوصيف حاجه كتيييييييره أو مده طويله
| |
|
|
|
|
|
|
|
|
|
Re: معجم الألفاظ الصغيرونه (Re: حمور زيادة)
|
سلوى سلولو شعرا ملولو ، جات تتكحل طبزت عينا جات تتصور طلعت شينه : اغنيه سب تقال للتقبيح للاولاد او البنات على السواء .. و مفعولا اكيد .. اي زول بتتقال ليو ببكي طوالي
عضلات تبش : تقال للمفاخره و وصف العضلات القوية
تبش تبش عجور الصلعه تولع نور تبش تبش كركار الصلعه تولع نار : تقال للمعايره للزول الصلعه (رغم انو الصلعة عز ) و غالبا ما كانت تقال سرا للكبار
ام برمه ولدت ولد سمتو عبد الصمد : اغنيه تقال عند الخروج من المدرسه تعبيرا عن الانبرام و هو الذهاب
الجكو : كنايه عن المكان البعيد .. تقال للرد غالبا على سؤال ماشي وين او جبت الحاجه دي من وين فيقال ماشي الجكو او من الجكو و السغاله في الاجابه ظاااهره يعني زي ماشي السما
| |
|
|
|
|
|
|
|
|
|
Re: معجم الألفاظ الصغيرونه (Re: حمور زيادة)
|
قالو لي بتحبي .. حي أنا .. في السلاح الطبي .. حي انا .. قالو لي بتموتي .. حي انا .. في جزاير توتي .. حي انا : اغنية تقال حين الشك في علاقة حب بين طرفين
الأول ياكل (... ) مدور .. التاني ياكل باسطه بالصواني .. الطيش عند الله بعيش بدقوهو بالبراطيش : تقال دائما يوم توزيع النتائج و تبين لك تأصل الحقد في نفوس الصغار حين يدعون على الأول أن يأكل احم احم و لا ادري لماذا مدور تحديدا اذ كل انواع هذا المن دون مؤاخذه سيئه بما فيه الكفايه
الحاكاي بمشي النار : عباره راتبه يقولها الصغار فزعا حين يقوم احد الصبيه بمحاكاة و تقليد اخر على سبيل السخريه .. و غالبا ما تسبق هذه العباره صرخه فزع : اللييييييييييله
| |
|
|
|
|
|
|
|
|
|
Re: معجم الألفاظ الصغيرونه (Re: حمور زيادة)
|
محمد ولد : تقال بصوت عالي معايرة لاي فتاة متشبهه بالاولاد .. و غالبا ما كان التشبه يعني انها لابسه بنطلون !!! و في هذا الزمن لو لبس الولد البنطلون مفروض نقول ليو حماده بت لأنو البنات بقى لبسهم الرسمي هو البنطلون
يا الله الخلقت كندا : تقال لافزاع الكبار .. اذ كانت تنطق ( يا الله الخلقتك انا دا ) و حين تظهر الخلعه على ملامح الكبار يسارع الطفل بالتفسير : مالكم الله خلق كندا و خلق امريكا
عباسيه مورده مريسه قويه هيه : هذه يقولها اولاد ام درمان للمعايره و السب
ربابة ربة البيت تصب الخل في الزيت لها سبع دجاجات و ديك حسن الصوت : ينشدها الاطفال عند الخروج من المدرسه .. و تنشد بفرح لا اعرف له سببا الان .. و اللطيف ان البيتين للشاعر بشار بن برد قالهما ليشحد ربابة جدادة يتغدى بها .. و هذا اول شعر تقوله العرب من اجل عضه جداد
النور ولع انا المدلع .. النور طفى انا المصطفى : تقال حين ينقطع التيار الكهربائي او حين يعود .. قبل اختراع الجنريترات .. و لا اعرف علاقة وليع النور بالدلع شنو
| |
|
|
|
|
|
|
|
|
|
Re: معجم الألفاظ الصغيرونه (Re: حمور زيادة)
|
بسي : المقصود بيبسي .. و غالبا ما تطلق الكلمه على اي حاجه بارده حتى لو عصير ليمون شرطا يكون جوه قزازه
ماما و بابا بحبوني .. و انا حبيتم بعيوني : اغنيه تقال و انت سرحان و بتلعب في حاجه .. و حبذا لو نخرينك سايله و عاضي لسانك
التوبه لحبوبه : تقال عندما تعمل حاجه غلط و تهدد بعلقه كاااااااااااربه و امك شايله السفنجه و جايه تطلع عين ابو اهلك فتقول لها بجزع التوبه لحبوبه ..اختيار الحبوبه كمرجعيه للتوبه يؤكد دورها الحنون في الأسره اذ حبوبه تقبل التوبه بكل سهوله .. هذا طبعا قبل زمن حبوبه التي قالت للحبييب انو البت مخطوبه فغضبت البت و دعت عليها ان تجيها الرطوبه في اغنية حنانه التي تعد من عيون الغناء السوداني الحديث
| |
|
|
|
|
|
|
|
|
|
Re: معجم الألفاظ الصغيرونه (Re: حمور زيادة)
|
يا مطيرة صبى لينا فى عينينا
تصحب لعب الاطفال فى رزاز المطر عند بداية هطوله
يا ام احمد دق المحلب فى ثوب احمد تقال عند الاختيار بالقرعة للعب
الكضاب ما بريدو السكينة تقطع ايدو وتقال عند الكذب
و نواصل يا رائع
| |
|
|
|
|
|
|
|
|
|
Re: معجم الألفاظ الصغيرونه (Re: محمد عبد الماجد الصايم)
|
في زمتك التخينه دي مش اخير من ضرب زيد عمرا لانه من قبيلة مختلفة و برر زيد ضرب عمرو بانه عميل
خلينا نعيد ياخ
ــــــــــــــــــــــــــــــــ
طبعا انت يا عمك على ايامكم كانت اغنية طياره جاتنا حوم شايله القنابل كوم جات تضرب الخرطوم ضربت حمار كلتوم
| |
|
|
|
|
|
|
|
|
|
Re: معجم الألفاظ الصغيرونه (Re: العوض المسلمي)
|
مع الإشادة بالفكرة ....
والمفكر (اللي هو إنت يا حمور .. عشان ما تتخلع)
بعض الملاحظات:
| Quote: عم علي بياع الزيت ساق مرتو وداها البيت و في البيت عاملزعلان و في البنبر وقع اتشنقل : اغنية فرح اخرى و واضح انو الشنقله كانت عقاب لعمو علي لانو ساق مرتو و الاغنية توضح النهج الاستعلائي الذكوري |
في (شطر) ناقص هنا ، بجي بعد (في البيت عامل زعلان) ألا وهو (وفي القهوة قاعد فرحان) ، وبإضافة هذا (الشطر) تصبح (القصيدة) تعبر عن النهج الإستعلائي الذكوري بشكل أوضح ، كما أن الجزء الأخير من (الشطر) الأخير المفرد ، أي قولهم (وقع إتشنقل) ، كانت تكرر إلى ما لا نهاية مع خفوت الصوت تدريجياً .
| Quote: ام برمه ولدت ولد سمتو عبد الصمد |
لها بقية ، مثل أم برمة جابت حمار ، وهكذا إلى آخر مواليد أم برمة ، وأسماء كل منهم . وهي جزء من ملحمة طويلة في هذا الخصوص. أتذكر يا حمور إنها كانت من الأغاني بتاعت البنات (الشفع) ، ولا ما كده !!
| Quote: محمد ولد : تقال بصوت عالي معايرة لاي فتاة متشبهه بالاولاد .. و غالبا ما كان التشبه يعني انها لابسه بنطلون !!! و في هذا الزمن لو لبس الولد البنطلون مفروض نقول ليو حماده بت لأنو البنات بقى لبسهم الرسمي هو البنطلون |
كان لها بقية توضح عاقبة هذا السلوك من البنات المتشبهات بالأولاد ، وما حصل من فضيحة إثرها في شارع الظلط !!!
لنا عودة ....
| |
|
|
|
|
|
|
|
|
|
Re: معجم الألفاظ الصغيرونه (Re: Motaz Ahmed)
|
شــوفوا صفية جابت عدة للفضية معروضات الجعلي سوق الخامسة
الاغنية المفضلة لصديقي مأمون ( وقد قمنا بزيارة ميدانية لمعروضات الجعلي - سوق الخامسة في إحدى جولاتنا الميدانية )
| |
|
|
|
|
|
|
|
|
|
Re: معجم الألفاظ الصغيرونه (Re: humida)
|
| Quote: شــوفوا صفية جابت عدة للفضية معروضات الجعلي سوق الخامسة |
حميضه .. كنت داير اقول ليك الكلام ده يطرشني ما سمعت بيو لكن خفت من لسانك
فيا زول يا سلااااااااام ذكرتني فعلا البتاعتين ديل .. كتر خيرك يا عمك
| |
|
|
|
|
|
|
|
|
|
Re: معجم الألفاظ الصغيرونه (Re: Motaz Ahmed)
|
دي جديدة .. خليني افكر فيها
شكرا لمرورك يا معتز
| Quote: أتذكر يا حمور إنها كانت من الأغاني بتاعت البنات (الشفع) ، ولا ما كده !! |
ااااااي يا اخوي كانت اغنية بنات .. اللي بعدو
| |
|
|
|
|
|
|
|
|
|
Re: معجم الألفاظ الصغيرونه (Re: حمور زيادة)
|
حمور يامفكر ويا زعيم ابت ذات السنون القوية
سلام
قريبا بعود لسودان التعدد القديم
كونوا وامجد والجميع بخير
كل التحايا لتبلدينا وريئس بورداب مدني حبيبنا الغالي ابارو
| |
|
|
|
|
|
|
|
|
|
Re: معجم الألفاظ الصغيرونه (Re: حمور زيادة)
|
بالغت ياحمور يا زيادة
غايتو ديناصور جنس دنصره!!!!
أديك كم واحدة صغيرونة على الطاير:
حلووقك.. أبو الدنان قطع رقووبكوتقال عند تزاحم التلاميذ في الفسحة لشراب الماء من المزيرة
محمد ولد ناقصة..
الأصل: محمد ولد.. شقا البلد.
ترمس ترمس كبكبيك.. أقلبك حبشي وألعب بيك (ماعارف أسباب النزول حقتا)
الحاج حجا وجا .. شراب البيرة ما خلا.. لا تحتاج لتفسير
(.....) جداد (....) حمام
تمها براااك
يا سعيد (.....) بعيد الليلة الوقفة وبكرة العيد
تحياتي على البوست اللطيف وكل سنة وانت طيب
| |
|
|
|
|
|
|
|
|
|
Re: معجم الألفاظ الصغيرونه (Re: حمور زيادة)
|
الجرس ضرب ... طلق العرب...
أنا انتهيت وماشي البيت أجيب لي أمي كسرة وزيت
البعيو ولدي حك لي شنبي
أولى بيوت.. وتانية بيوت.. تالتة ورابعة تاكل الدود..
الفتة أم توم... حمتنا ننوم
الروص الروص.. حباب التيوس
ترت ترت.. فلان القرد
(....) شطة بي ليمونة
كمبليتا وبي شخيتا
راسو كبير كرعينو رقاق.. شن سمو سمو العولاق
| |
|
|
|
|
|
|
|
|
|
Re: معجم الألفاظ الصغيرونه (Re: حمور زيادة)
|
حمور سلامات
Quote:
تبش تبش عجور الصلعه تولع نور تبش تبش كركار الصلعه تولع نار : تقال للمعايره للزول الصلعه (رغم انو الصلعة عز ) و غالبا ما كانت تقال سرا للكبار
|
انت ياعمك قاصد عمر الفاروق مش
| |
|
|
|
|
|
|
|
|
|
Re: معجم الألفاظ الصغيرونه (Re: حمور زيادة)
|
Quote: يا طارق يا احمد يا خالد
ياخ انت ختري ...!!
سوق طوالي لكن جيب اسباب النزول |
يا حمور يا زيادة.. لم تملأ الأماكن الشاغرة.. في تصحيح بعدين نقوم نعمل ليك ملحق
| |
|
|
|
|
|
|
|
|
|
Re: معجم الألفاظ الصغيرونه (Re: حمور زيادة)
|
لمن كنت صغير بلعب بالتراب .. ماما لبستني الجزمه و الشراب : اغنية طفولية كانت من درر الاغاني في عقد الثمانينيات . و هي اغنية مليئة بالهراء البرجوازي و الطفيلية الرأسمالية كما انها تقصي الهامش و تأطر لثقافة المركز و الحنكشه في نفوس الاطفال
| |
|
|
|
|
|
|
|
|
 Re: معجم الألفاظ الصغيرونه (Re: حمور زيادة)
|
سلام أخي حمور والاخوه المتداخلين
أم برمة لعل أعظم مايميزها اللحن المصاحب لها(وغالب مايكون بالضرب علي شنط المدارس ويصاحبه غبار من أثر الضرب بالارجل علي الارض_وميقاته عندما ترجع مبكرا للمنزل يمكنك سماع الايقاع خلف السور عند ظل الظهيرة حين عودة الطالبات الصغار من المدارس) ومن تاثيراتها السحرية أنك تستطيع ان تخرج اللحن بالضرب علي كل مايقابلك سواء بارجلك أو بالايدي,وهي اشبه بالمارش العسكري أو بفكرة الحان الريقي , ولولا أنها طفوليه أو فيها شئ من الهستيريا لكان للسودان وفتيات السودان الصغار القدح المعلي في إخراج لحن يوازي لالحان الريقي.. المهم.
قولهم تقول أخ ..تتلخ..
العربية عينها قوية والكراكة نمرة تلاته
(ربما كانت عين العربية توصف بالقوية نسبة لشدة الاضاءة من فوانيسها -وخصوصا أن الاضاءة كانت تعتمد علي الرتائن والفوانيس واللمبات الزيتية -والوصف ليس لماتوصف به عين الشخص-والكراكه(التراكتور) نمرة تلاته ربما نسبة للتروس وليس لرقم اللوحة).
السمين بقع والضعيف بقيف (وهو لفظ للعبة سميت بنفس الاسم وفيها يدور الاطفال ويمسك بعضهم ببعض حتي يقع أحدهم او أكثر)
الليلة والليلة بصات أبو رجيلة وهنا توثيق لمرحلة مهمة في حياة المواصلات بالسودان حيث انضمت بصات من نوع المارسيدس الفاخرة لاسطول الكندات والبصات واللواري البدفورد .واللفظ يقال لبيان العاقبة الوخيمة المترتبة علي الفعل الصادر من الشخص المذكور له العبارة.
ومن الالفاظ الحديثة التي توثق ايضا للمواصلات (تراترا لستك قدام ولستكين وراء) وهي تبين انضمام الرقشة أو التكتك بالعامية المصرية.(وربما يقال للتقليل من شأن المذكور له اللفظ-او لغير ذلك عندما يذكره الفرد(الاصدقاء) لبعضهم البعض كمثال أن يقول :- تراترا رمضان شتات, ويعني يافلان ان رمضان ايامه اكتملت واليوم اعلنوا الوقفه وغدا العيد).
الروب , وهو لفظ يذكر بدلالة التوبة وغالبا مايكرر .والروب هو اللبن الرائب يعني نفسر اللبن باللبن.
وفي الالعاب تذكر الالفاظ التاليه
"حكمك تشق اللين"اي اني حكمت عليك ان ترمي بحيث تتخطي رميتك الخط المخصص لبداية اللعب.ويقال اللفظ لتطفيش اللاعب الحريف بعيدا.
"تكس صراحوا"وهي رمية خاصة وتكون بان يرمي اللاعب بفيه ثم يقذف بملابسه المضراب أو الجلة أو البليه بعيدا عن شرور الاخرين وفيها من التحايل الكثير واللفظ يذكره الرامي عندما يصطدم المضراب بشئ.(شكلوا بكون هبيل صح؟)
حكمك تدق النظر.وهي وضعية خاصة للرمي.
بي جازك .وهو لفظ يقال لمن صار له مطلق الحرية والتصرف وتتبع اللفظ اشارة من اليد مفتوحة بكامل الاصابع(وقد يكون معني اللفظ فرتق ياخ)
خرجت. وهو لفظ يقال عندما تخرج الامور من دائرة الاختصاص , ويتبع اللفظ مد لليد مبسوطة كامل الانبساط
مع ادامة النظر فيهاوهي خاوية
حناكيش. وهو لفظ لمن هم في دعة من العيش.
فقري وبنوم بدري, مقددا أو شفت .وهو لفظ للشخص الحريف ,الحاذق ,جيد التصرف او الكيس .
الليلة جينا وكيا لي المابينا, وتقال لفرض الحضور في المكان والزمان المعين.ومعناها ها قد حضرنا اغاظة في من لايريدنا هنا.
ايوا تَلَك: او ايوا تلاك: وتعني (نعم هذه او نعم تلك هي).
كي :وهو لفظ يصعب كتابته وينطق بتثبيت طرف اللسان في مقدمة الحلق وجر وسطه لاسفل ليخرج اللفظ المعني في شكل طرقة خفيفة تعني (نعم)
كرو كرو اديني واديك : وهولفظ يقال عند رؤية الطيور البيضاء اللون والتي تسمي كرو كرو يصاحب اللفظ مد الايدي وتحريك الاصابع.وقد نسي الكاتب مدعاة ذلك.ربماكان السبب لنمو الاظافر(دجل يعني بالواضح كدا)
هاك سن الحمار واديني سن الغزال, تقال عندما تكسر سن ويراد ابدالها باحسن منها(حيث توضع السن في لفافة ويتم قذفها بعيدا ).
القمره خنّقت : وهو لفظ يطلق لخسوف القمر.
محمد معانا ماتغشانا: وتقال لتفريق الرياح التي يصاحبها ضجيج وضوضاء ناتج عن طيران الاواني المنزلية مثل الكفتيرة والجردل والطش والصواني وذلك في الاحياء السكنية عند المغربية حيث تنشف الاواني بعد وجبة الغداء في النشافة ,والنشافة ذات ارجل واطار من الالواح الخشبية مشدود عليها شبك من الاسلاك الحديدية(سلك النملي).
بستفة:بستف يبستف بستفةً وقولهم بستفتو وهو اعطاء درس بعد وضع الامور في نصابها يعني بالواضح تجعله هزء
الحجاز بدوا عكاز: وتقال لمن يفصل في المشاكل بان لاشك سيصيبه من الرشاش شئ.(واسطة الخير في حل المشكلة سوف يعطونه ضربة ).بدوا تعني يعطونه وليس كما في اللهجة الشامية بمعني يريد.لان بصورتها الشامية تعني يستاهل في حين ان المراد قولها لدواعي التحذير.
بعض الالفاظ اندثرت والحمد لله
مثل .. , شوف العربي عيبوا كدا وكدا داسي البن في جيبوا
.........................................................................
محمد السيد
الخبر
| |
|
|
|
|
|
|
|
|
|
Re: معجم الألفاظ الصغيرونه (Re: Eng. Mohammed al sayed)
|
الاخ محمد السيد شكرا للتحليل و الاضافات القيمة
و بعيدا عن المزاح و الهزل الذي تناولت انا به الموضوع فان الالعاب القديمة و الالفاظ الدارجه تعبر عن العقلية المجتمعية و تؤرخ لافكار المجتمع التي لم تتم صياغتها في نظريات و لا احتوتها كتب
| |
|
|
|
|
|
|
|
|
|
Re: معجم الألفاظ الصغيرونه (Re: حمور زيادة)
|
ياخوانا أحرجتونا والله،
لقيت نفسى مسكييينة،،،،
أنا بتذكر،
شليل وينو؟
خطفوا الدودو،
شليل وين راح؟
خطفوا التمساح،
و ما عارف قصة شليل دة شنو؟؟؟
و برضو التمساح عرفناه، لكن الدودو دة،
ما ورونا ليهو......
| |
|
|
|
|
|
|
|
|
|
Re: معجم الألفاظ الصغيرونه (Re: Hala Hassan)
|
ديل المقابل الصبياني لبت ام لعاب البنوتيه
اوعي تكوني ما لعبتي ببت ام لعاب ؟
ده طبعا غير الحجله و نط الحبل
بتاعة الحبل البعلقوهو بتين في رجلينم و واحده تنط جواهاو و براهو كم مره و يرفعوهو شويه شويه ديك اسمها كان شنو ؟
| |
|
|
|
|
|
|
|
|
|
Re: معجم الألفاظ الصغيرونه (Re: حمور زيادة)
|
حمور سلامات تاني
لمن كنت صغير في الجزيرة و كان الزمن زين كنا بنلعب:
الصوت صوت غنمي...
كضاب يا عربي...
حمور....ماااااع....
صفور.... مااااع...
خضور... مااااع....
و يقال انها أسطورة قديمة تنبأت بمولد أبت، بس علي الحليفة و الجزية خضور و صفور ديل ما عرفتهم لحدي هسي، قدر ما فكرت و نظرت...
نرجوك الإلهام يا عظيم...
| |
|
|
|
|
|
|
| |
حمور زيادة
7abib_alkul
محمد عبد الماجد الصايم
العوض المسلمي
Motaz Ahmed
humida
انعام حيمورة
طارق أحمد خالد
محمد الطيب حسن
الملك
فيس بوك
تويتر
انستقرام
يوتيوب
بنتيريست