رفاق مصــــــــر .................(الجزء الثالث)

Quote: سيناريوهات المدافن النموذجية بينما كان (حاج طه) يتصفح إحدى الصحف وفى معيته ابن شقيقه (الأستاذ صلاح) وهما يركبان حافلة (سوق ليبيا-الإستاد) فى طريقهما إلى مستشفى (الجلطات) بالخرطوم حيث يرقد (مضوى) والد صلاح والشقيق الأكبر لـ (حاج طه) مصاباً بذبحة صدرية ، قرأ (حاج طه) خبراً صغيراً فى الصحيفة يقول : صرح أحد المسؤولين بالولاية بأن أجهزة الولاية قد شرعت فى إقامة وتشييد عدد من المقابر النموذجية فى مساحات شاسعة على أطراف العاصمة القومية وذلك بعد أن اكتظت المقابر الحالية وضاقت بالمتوفين وأن المقابر الجديدة سوف تشيد طبقاً لـ (المواصفات العالمية) وسوف تراعى فيها كل الجوانب التى من شأنها راحة الأموات من إنارة ونظافة وتشجير كما انها ستزود بأماكن تقوم بتوفير الحنوط والأكفان والشواهد كما سيتم تزويدها بجهاز كمبيوتر لحفظ بيانات المتوفين وأماكن دفنهم. ما أن إنتهى (حاج طه) من قراءة الخبر حتى قام بمناولة الصحيفة لابن اخيه (صلاح) الذى كان قد قرأ الخبر من قبل: ------------------------------------------------------------------ - والله ده الكلام .. المقابر الهسع موجودة دى والله تعبانة بالحيل تلاقى الغنم والكلاب والحيوانات داخلات فوقا … وبالليل ديك يا الضلمة .. والله ممكن الزول (يربطوا) ليهو فيها عديل كده. - والله يا (عم طه) إنت متفائل خلاص … هم الناس (الأحياء) تعبانين معقول (الميتين) يعملوا ليهم حاجات زى دى ؟ والله يا صلاح يا ولدى ما بعيد والله الناس ديل ناس آخرة ساكت ما ناس دنيا ما شفتهم قاعدين يقولوا ما لدنيا قد عملنا ؟؟ أهو هسع ح يدفنوكم فى (حتة نضيفة) ويدخلوكم بعد ما تموتوا فى (الكمبيوتر) كمان !! وتم التشييد : لاحظ سكان بعض الأحياء الطرفية المتاخمة لحدود الولاية كحى (أطلع برة) وحى (صابرين) وعدد من سكان الأحياء الطرفية الأخرى بالعاصمة حركة غير عادية ففى الفضاء الواقع أمامها إنتشرت … معدات .. كراكات … قندرانات.. سيخ… أسمنت … طوب … وعمال ذوو (سحنات آسيوية) يعملون ليل نهار … فى أقل من شهر تم الإنتهاء من تنفيذ أكثر من خمسين مدفناً قامت بتشييدها (شركة المدافن النموذجية) إحدى الشركات التابعة للولاية والتى إنشئت خصيصاً للمشروع وقد جاء ذلك من خلال الإعلان الذى نشر فى كافة الصحف اليومية والذى جاء فيه : بعد أن تم بحمد الله سبحانه وتعالى إفتتاح المدافن النموذجية فى أنحاء متفرقة من العاصمة نود أن ننبه المواطنين الكرام بأنه قد تم إيقاف عمليات الدفن فى جميع المقابر القديمة والبدء فى إستقبال الموتى بالمقابر النموذجية ! وقد إحتوى الإعلان على وصف تفصيلى لأماكن المقابر النموذجية العشرين التى غطت أرجاء وأنحاء كل الولاية كما إحتوى الإعلان أيضاً على ملحوظة تقول : بالمقابر أماكن لتجهيز الموتى غسيل حنوط - تكفين وفى آخر الإعلان ملحوظة صغيرة أخرى تقول : للحجز أو الإستفسار الإتصال بالهواتف المبينة أدناه ..... مضوى مات : بعد أسبوع وبينما كان (حاج طه) وابن اخيه صلاح كعادتهما يعودان حاج مضوى ويجلسان على نجيلة المستشفى قرأ الـ (حاج طه) فى الجريدة التى كان يحملها معه إعلان المدافن النموذجية وقام على الفور بمخاطبة صلاح قائلاً : - أها المقابر فى إسبوع واحد عملوها … أها كمان قول تانى حاجة؟؟ زمان الزول يموت الناس ترسل الأولاد يمشوا يجيبو حاجات الحنوط والكفن من السوق وجماعة يمشوا يحفروا ويجهزوا القبر .. والعجب لو الوفاة بالليل الناس تمشى تفتش الرتينة وين ؟ والفوانيس وين؟ … هسع بالله شوف جنس الراحات دى .. بالتلفون تحجز القبر وتمشى تلقاهو جاهز وتشيل زولك الميت توديهو يغسلوهو.. ويحنطو هو.. ويكفنوهو والناس تصلى عليهو .. ويدفنوهو كمان … على بالحرام الناس ديل ناس آخرة ساكت !! - يا حاج والله إنت غبيان ساكت … المستشفى ما فيها حجز للعيانين .. المقابر يعملو ليها حجز للميتين ؟ … يا حاج أنحنا صحى ما متنا لكن المقابر دى شقيناها. بس لكن عليك الله يا (صلاح) يا ولدى الناس ديل لو العملية دى ما عاملنها لى الله ساكت ومجانا بدون قروش كان منعوا الدفن فى أحمد شرفى والبكرى وحمدالنيل مش كان خلو الناس تدفن هناك !!! - يا حاج الناس ديل دى سياستهم يمنعوا الحاجة وبعدين يبيعوها ليك. - إنت بس يا صلاح مكجنهم ساكت !! بينما كان (حاج طه) وابن اخيه صلاح يتحدثان إذ سمعا أصوات بكاء وعويل صادرة من جهة عنبر مضوى فهبا مذعورين يستطلعا الأمر حيث وجدا أن سيد الأمانة أخد أمانتو حيث إنتقل حاج مضوى إلى الرفيق الأعلى وبعد أن فاق الجميع من هول الفاجعة إبتعد (حاج طه) قليلا من إزدحام المعزين والنائحين : كدى يا صلاح جيب ليا الجريدة الكنا بنقرأ فيها هسع دى فيها أرقام تلفونات المقابر الجديدة .. أخرج (حاج طه) هاتفه الجوال وذهب بعيدا من جوطة البكاء والعويل وقام بالإتصال بالرقم الموجود بالإعلان الذى فى الجريدة حيث جاء صوت تسجيل عذب يقول : - المدافن النموذجية ترحب بكم وأحسن الله عزاءكم … للتحدث باللغة العربية أضغط على الرقم 1 . للتحدث باللغة الإنجليزية أضغط على الرقم 2 . (حاج طه) يضغط على الرقم 1 ثم الصوت الناعم مواصلاً : - لحجز مقبرة أضغط على الرقم 3 . - لتجهيز الميت أضغط على الرقم 4 . - للإثنين معاً أضغط على الرقم 5 . - للإستفسار والتحدث لموظف الإستقبال أضغط على الرقم 6 . - بعد تفكير (حاج طه) يضغط على الرقم 6 فهو لديه عدد من الإستفسارات .. يرن الجرس فى الطرف الآخر ثم سرعان ما جاءه الصوت الناعم مرة أخرى غير أنه فى هذه المرة على الهواء : - ألو معاك المدافن النموذجية … أى خدمة. - والله يا بتى عندنا وفاة .. عندى شقيقى مضوى ده إتوفى هسه. - البركة فيكم يا حاج .. ممكن تدينى اسمك وصلة القرابة للمتوفي؟ - المتوفى اسمو مضوى البخيت مضوى وأنا شقيقو طه البخيت مضوى. - طيب الوفاة حصلت وين يا عم طه؟؟ - الوفاة حصلت هسه يا بتى فى مستشفى الجلطات بالخرتوم. - محل السكن بتاعكم وين يا حاج؟؟ - فى أمبدة بالردمية. - طيب يا حاج طالما إنتو فى أمبدة بالردمية أقرب مدافن ليكم هى ح تكون مدافن المرخيات النموذجية. - ودى وين يا بتى؟؟ - ما عندك مشكلة يا حاج العربية بتاعتنا ح تجيكم وتشيل الجثمان من البيت .. بس أدينى وصف البيت. - البيت يا بتى فى الردمية .. هو ثالث بيت على إيدك اليمين فى شارع حنزب ابن عكرمة المقاطع لشارع عياض ابن الأرط مقابل بقالة أم القرى المقاصدة مخبز- يستهبلون (مواصلا) زولكم ده لمن يجى أول ما يوصل المخبز ده على طول ح يشوف الصيوان!! - طلعتو ياحاج شهادة الوفاة؟؟ - لا لسع يا بتى. - ما مشكلة يا حاج عندنا طبيب مقيم فى المقابر لفحص الجثة وإستخراج شهادات الوفاة (ثم مواصلة) طيب يا حاج ح تجهزو الجثمان عندكم وإلا عندنا؟؟ - كدى يا بتى خليكى معاى دقيقة عشان أشاور الجماعة المعاى ديل … نادى (حاج طه) على بقية أشقائه وأبناء المرحوم وكبار رجالات الأسرة وشرح لهم الأمر وكيف أن الدولة قد سهلت أمر الدافنة وأن عربة المقابر سوف تأتى لإستلام الجثمان من المنزل وما عليهم إلا أن يمشوا خلفها نحو المقابر .. وأن المطلوب الآن أن يحددوا فيما إذا كان المرحوم سوف يتم غسله وتكفينه فى البيت أم ستتولاه المدافن النوذجية؟. إنقسم الناس إلى قسمين فبينما كان الشباب من الأسرة يرون أن يترك أمر تجهيز الجثمان للمدافن الحديثة ومافى داعى للتلتلة كان الكبار يرون أن يتم غسل وتكفين وتجهيز الجنازة بمنزل الفقيد حسب العرف والتقاليد. - يا جماعة بدل ما هسع نمشى نفتش الكفن والحنوط ونتأخر أحسن من هنا وطوالى على المقابر وعربيتم بدل ما تجينا فى البيت نكلمهم يجونا هسع هنا ونمشى الإذاعة ونقول إنو الدفن بالمقابر النموذجية فرع المرخيات بعد صلاة العصر وخلاس !!! وجد حديث (حاج طه) أذناً صاغية من الجميع الذين إقتنعوا به تماما مما حدا بـ (حاج طه) لرفع الموبايل ومواصلة الحديث مع (إستعلامات المقابر) : - آلو..... - أيوه معاك يا حاج … وصلتو لشنو؟ - أيوه خلاص يا بتى ح نجيب ليكم الجثمان تجهزوهو عندكم. - ونرسل ليكم العربية وين؟؟ - رسلوها لينا هسع فى المستشفى .. مستشفى الجلطات فى الخرتوم … عنبر (الموت السريع) !! - قلتا ليا يا حاج إنتا اسمك منو؟ - أنا طه البخيت والمتوفى مضوى البخيت. طيب شكراً يا حاج وتانى بقول ليك البركة فيكم وأحسن الله عزاءكم البركة فى الجميع يا بتى .. يلا منتظرنكم . بعد قرابة نصف ساعة من الزمن فتح باب المستشفى على مصراعيه لدخول عربة إسعاف سوداء اللون مكتوب على جانبيها( المدافن النوذجية) … ترجل منها شخصان يرتدي كل منهما (بالطو أبيض) ناصع ويحملان معاً نقالة حديثة : - (فى أدب وذوق) : لو سمحتو بنسأل من أسرة المرحوم مضوى البخيت؟ - أيوه أنا صلاح ولدو .. وداك عمى طه الإتصل بيكم. وسط بكاء وعويل النساء والفتيات من أفراد أسرة عم مضوى وأقربائه تم حمل الجثمان ووضعه على سيارة ( المدافن النموذجية) الجديدة. - يا عم طه إنت وصلاح أمشو مع الجثمان وأنا و(عمار) ح نمشى الإذاعة نذيع الخبر وبعدين نمشى نغشى بتاع الصيوانات و.. - (سائق عربة الإسعاف يتدخل) : إنتو ليه ما خليتو ناس المدافن النموذجية يعملو ليكم الحاجات دى؟؟ - (صلاح فى إستغراب) : حاجات شنو؟؟ - إذاعة خبر الوفاة .. وتحضير الصيوان والكراسى. - عرفنا إذاعة خبر الوفاة كمان الصيوان والكراسى بعملوها؟؟ - أيوه فى قسم مخصوص للحاجات دى .. لو عايزين كمان (الطباخين) بجيبوهم ليكم !!! إلى المدافن النموذجية : ركب الجميع مع الجثمان وبينما كانت العربة تشق طريقها متجهة إلى فرع مقابر (المدافن النموذجية) بالمرخيات كان السائق يتحدث بالموبايل مع مندوب المدافن النموذجية بالإذاعة ويقوم بتمليته خبر الوفاة : - آآى مضوى البخيت مضوى .. شقيق طه بالمخازن والمهمات سابقا .. وعباس التاجر بسوق أم درمان والمرحوم الوسيلة ووالد كل من (الأستاذ صلاح) المعلم (بمدارس يتفوقون) و…. وسوف يوارى الثرى بمقابر التيسير فرع المرخيات ويقام المأتم بمنزل المرحوم بأم بدة بالردمية شارع حنزب ابن عكرمة المقاطع لشارع عياض ابن الأرط. …. وبعد أن انتهى سائق الإسعاف من محادثته مع مندوب المدافن بالإذاعة يمسك بموبايله ويقوم بإجراء إتصال آخر : - آلو آلو .. أدينى يا (هويدا) بالله قسم الصيوانات … وبعد برهة… - أيوه يا مرسى بالله تودى ليك صيوان (10 * 15) أم بدة بالردمية شارع حنزب ابن عكرمة المقاطع لشارع عياض ابن الأرط … المرحوم اسمو مضوى البخيت مضوى فى مخبز قدام بيت البكا - ثم مواصلاً- أيوه ودى ليهم 400 كرسى و 5 غسالات إيدين و7 حفاظات موية و6 مراوح كبيرة ثم ملتفتا لـ (حاج طه) : - كده مناسب يا حاج ؟ - الله يخليكم يا ابنى … والله يخلى المسؤولين … والله يخلى الحكومة …العربية تجيك فى محلك ويشيلو الميت ويغسلوهو ويحنطوهو ويكفنوهو ويصلو عليهو ويدفنوهو وكمان بعد داك يجيبو للمواطن الصيوان والكراسى ولحدت غسالات الإيدين والمراوح وحفاظات الموية الباردة؟؟ - ثم ملتفتاً للسائق- عليك الله يا ولدى هسع ياتو حكومة فى الدنيا بتعمل جنس الكلام ده !! رقاد بى مزاج : كانت المرة الأولى التى يرى فيها (حاج طه) ومن معه أحد فروع المدافن النموذجية والتى كانت بحق نموذجية فى كل شئ ، فهى تقع على مساحة واسعة تمتد مد البصر تظللها الخضرة والأشجار وتحيط بسياجها الحديدى اللامع أعمدة الإضاءة … تتراص فيها القبور الخرسانية الجاهزة فى أشكال هندسية بديعة تفصل بينها ممرات من السيراميك الأبيض الناصع الذى تتناثر عليه هنا وهنالك أحواض من الزهور مختلفة الألوان .. ما أن توقفت العربة أمام البوابة الضخمة حتى قام أحد أفراد (الشركة الأمنية) المنوط بها حراسة المدافن بفتح الباب على مصراعيه حيث سارت العربة فى ممر حجرى طويل إلى أن توقفت أمام صالة بيضاء مغلقة عليها لافتة (مذهبة) كتبت بخط جميل تقول (صالة تجهيز الموتى) .. ما أن توقفت السيارة حتى فتح باب الصالة وخرج منه أربعة أشخاص يرتدون زياً موحداً عبارة عن بالطو أبيض وطواقى بيضاء حيث قاموا بحمل النقالة التى عليها الجثمان ودخلوا بها إلى داخل الصالة بعد أن أشاروا لأقرباء المتوفى الذين جاءوا مع الجثمان بالدخول أيضاً لحضور عملية التجهيز . الصالة من الداخل كما غرفة العمليات حيث غطيت جدرانها جميعاً بالسيراميك الأبيض الناصع … عدد من دواليب الحائط المليئة بأدوات التجهيز من حنوط وقطن طبى وشاش وأربطة وأكفان .. وأحواض مياه .. و(بنشات) لوضع (الجثامين) … بعد أن تم تجهيز جثمان المرحوم الحاج مضوى وبينما كان الجميع لا يزالون داخل غرفة التجهيز إذا بصوت ناعم كما الذى فى صالة مطار الخرطوم ينطلق من إحدى السماعات المثبتة على الحائط : - أرجو الإنتباه …أرجو الإنتباه … على السيد طه البخيت مضوى مقابلة الإستقبال .. على السيد طه البخيت مضوى مقابلة الإستقبال … أكرر على السيد طه البخيت مضوى مقابلة الإستقبال !!! فى مكتب إستقبال المدافن: إرتبك (حاج طه) فى بادئ الأمر لسماع اسمه بهذه الطريقة التى لم يعتد عليها .. ثم ما لبث أن قام بسؤال أحد الأشخاص الذين كانوا يتولون عملية التكفين : - الإستقبال بتاعكم ده وين يا ابنى؟ - شفت المبنى شمال الباب الخارجى داك … أيوه الفيهو القزاز الملون داك .. ده الإستقبال. خرج الـ (حاج طه) من صالة التجهيز وقد لفحته موجة من الحر والسخانة حيث برودة الجو والكندشة داخل غرفة التجهيز .. وما أن خرج حتى لاحظ أن أماكن توقف السيارات الملحقة بالمقابر إمتلأت بسيارات المعزين الذين كانوا يجلسون على كراسى وثيرة فى صالة طويلة مفتوحة الجوانب وامامهم أكواب الماء البارد . - أنا طه البخيت شقيق المرحوم مضوى البخيت. قالها بعد أن ولج إلى مكتب الإستقبال المكندش الأنيق وهو يقف أمام موظف يرتدى (فل سوت) وربطة عنق (سوداء) ويمسك بالماوس بيده اليمنى بينما يطالع فى شاشة الكمبيوتر التى أمامه : - مرحب يا حاج إتفضل. - إنت الفضيل. - البركة فيكم. - الله يبارك فيك. - طيب يا حاج أنحنا ودينا ليكم الحاجات الطلبتوها … الصيوان والكراسى وباقى الحاجات... - بارك الله فيكم يا ولدى. - وهو يناوله ورقة - كدى راجع الحاجات المشت ليكم دى شوف فى حاجة ناقصة نسيناها يا حاج عشان نوديها ليكم ؟ -(بعد أن أخرج نضارة القراية يقرأها فى سرعة) : لا لا ياولدى ده ذاتو كتير - الموظف وهو ينظر إلى شاشة الكمبيوتر ثم يستخرج ورقة من الطابعة الملحقة ويناولها لـ (حاج طه) قائلاً : القبر بتاع المرحوم ده رقمو 233 يا حاج .. ثم مواصلاً أدى الورقة دى للزول القاعد برة ده .. وكمان يا حاج كلم معاك ناسكم ديل قول ليهم المدافن هنا فيها محل إتصالات لو عاوزين يعملوا أى إتصالات خارج أو داخل السودان أو عايزين يعملوا فاكسات أو إيميلات يكلموا فيها أهلهم بحكاية البكاء دى بينما الموظف يتحدث لـ (حاج طه) إنبثق صوت من الإنتركم الداخلى يقول : نرجو الإنتباه .. نرجو الإنتباه … سوف تقام الصلاة على المرحوم مضوى البخيت بعد صلاة العصر مباشرة على الجميع التوجه للمسجد للصلاة - طيب يا حاج أمشى الصلاة وبعد الدفن أغشانى بى جاى وما تنسى أدى الورقة للزول البرة ده عشان يوروكم محل القبر رقم 233 ده وين !! - حاضر يا ولدى وتم الدفن البديع : فى طريقه لمكان الوضوء كان (حاج طه) يفكر فى كل هذا التيسير الذى عايشه منذ لحظة إتصاله بالمدافن وحضور العربة التى قامت بنقل الجثمان مروراً بصالة تجهيز الجثمان وإرسال الصيوان والكراسى والأغراض الأخرى إلى ذلك الأسلوب الراقى الذى عامله به موظف الإستقبال ……. تمت الصلاة على المرحوم مضوى … تم حمل الجثمان والتوجه به نحو مكان الدفن … القبور تحمل لوحات نحاسية ذهبية عليها رقم كل قبر … المكان يعبق برائحة الورود والزهور المتراصة فى أشكال هندسية بديعة بينما هنالك كنبات خرسانية هنا وهنالك لجلوس العجزة والمرضى وكبار السن .. إزيح الغطاء الخرسانى من (ود اللحد) المجهز سلفاً .. تم وضع الجثمان .. ثم وضعت ألواح الأسمنت المعدة مسبقاً .. وتمت إهالة (جرادل) الرمل المجهز سلفاً على القبر .. ثم وضع الغطاء الأسمنتى الثقيل … تم الدعاء للميت .. ثم أخذ المعزون فى رفع الفاتحة مع (حاج طه) وأقرباء الحاج مضوى الذين كانوا يقفون على مسطبة معدة خصيصاً لأقرباء الموتى .. تفرق الجميع وفجأة تذكر الـ (حاج طه) بأن عليه مقابلة موظف الإستقبال مجدداً. فى الإستقبال مرة أخرى : ما أن شاهد موظف الإستقبال الـ (حاج طه) وهو يدلف إلى داخل مكتبه حتى بادره : - البركه فيكم يا حاج. - الله يبارك فيك يا ولدى. - إن شاء الله الأمور تكون مشت كويس - الحمدلله ما خليتونا نحتاج لى حاجة. - إها يا حاج بتحتاجو أكيد لى شواهد للقبر. - أكيد يا ابنى. - طيب عندنا شواهد عادية يعنى مصنوعة من (الأسمنت) وعندنا شواهد (سيراميك) عادى وملونة.. فرز أول وفرز تانى أها عاوزين نديكم ياتو واحدة؟؟ - أى واحدة يا ابنى - طيب عاوزين الكتابة بالذهبى و إلا باللون الأبيض؟؟ - يا ابنى أى حاجة ما تتعبكم .. كفاية تعب عليكم بعد أن إنتهى الموظف من حديثه مع (حاج طه) صلح قعدتو أمام شاشة جهاز الكمبيوتر وبدأ فى الكتابة على لوحة المفاتيح.. فى هذه الأثناء دخل إلى المكتب صلاح الذى خاطب عمه قائلا : - يا عم طه الناس ديل ما منتظرنك ترجع الحلة معاهم؟ هنا وقف عم طه منتصباً موجهاً حديثه للموظف الذى يبدو أنه إنتهى من مهمته قائلاً : - طيب يا ولدى جزاكم الله خير!! - مندهشاً جزانا دى شنو يا حاج ؟؟ كدى أقرأ الفاتورة دى ؟؟ شركة التيسير للمدافن النموذجية فاتورة دفن ميت اسم المتـــوفى: مضوى البخيت مضوى سددت من قبل: طه البخيت مضوى التفاصيل: نقل جثمان ، غسيل جثمان ،فحص طبيب وإستخراج شهادة وفاة، حنوط ، تكفين، قيمة مقبرة ، صلاة على الجثمان، أجرة وقوف سيارات المعزين، فاكسات ومكالمات عالمية ، فاكسات ومكالمات محلية، مياه معدنية للمعزين، أجرة صالة للمعزين، أجرة مقبرة، شاهدين سيراميك ، كتابة بالقلم الذهبى ، صيوان 60 متر مربع (مغطى) 400 كرسى 5 غسالات إيدين و7 حفاظات موية و6 مراوح كبيرة .. المجموع عشرة تالاف وستمية ستة وسبعين جنيه (بالجديد طبعن)!! ما أن قرأ (حاج طه) الرقم حتى وقع على الأرض مغشياً عليه… فيما هب الموظف من مكتبه متجهاً نحوه ممسكا بيده لثوانٍ فى محاولة لمعرفة نبضه … ثم ما لبث أن خاطب (صلاح) الذى كان يقف واجماً: - ح تدفنو هنا برضو مش كدا؟!!