|
Re: حفل فنان الشباب أحمد الصادق.. فيرجينيا.. مايو 27 (Re: د. ياسر عبد القادر)
|
يابخت ناس أمريكا بالفنان الشاب أحمد الصادق
لكن مالو جاي بي بتاع الاورغن بس ؟؟؟
من الافضل أن يغني احمد الصادق باوركسترا كاملة... لأنو الغناء خلف الاورغن فقط لايعطي بعدا جماليا علي الغناء
وأتمني من الفنان احمد الصادق أن يستفيد من هذه الرحلة بان تصقل قدراته ومهاراته لاكتساب البعد الفني الراقي ... فالطريق مازال امامه طويلا وشاقا ليضع بصمته الفنية في خارطة الأغنية السودانية..
| |
|
|
|
|
|
|
Re: حفل فنان الشباب أحمد الصادق.. فيرجينيا.. مايو 27 (Re: Hisham Amin)
|
Quote: لحفلة كانت عبارة عن فشل تام في الصالة والحضور الضعيف والزمن الممحوق ولم نستمتع بالحفل تمني التعويض عندنا في جيرسي |
أتفق معاك ياصبرى فشل ونص ...... المكان بائس جدآ !!!!!!! الحضور غير مشرف ...... ياحليل فلادلفيا الزمان كانت مثل لكل الولايات فى الدقة ونجاح البرامج .... لعن الله السياسة وتمددها فى جوف الفن والطرب ....... الفنان الجايبو منو ؟؟؟؟؟ دا سؤال ماعندو اى معنى ........ الجاى الحفلة منو ؟؟؟؟؟ ابيخ سؤال !!!!!!!! ياخ تعال وشجع وادعم الفنان الجايك مليون ميل عشان يطربك !!!!!! الحفلة بكم ؟؟؟؟ 30$$$$ دولار دى كتيرة خلاص !!!!!! المهم مع الأسف الشديييييد فاشلة ومخجلة اتحرجنا مع الفنان والضيوف الكانوا اكتر عدد ومشاركة من اهل الدار....... ياصبرى حفل يوجرسى ماتفوتنا ليه جاين والله عشان نستمتع عندكم بدل الهباب الكان فى فلادلفيا ...... ياتاجو اعتذر لينا للفنان الشاب ذو الحنجرة الذهبية باسم كل من شارك فى حفلنا البائس جدآ ........... بالله قول ليهو ما تستاهل أول حفل ليك فى امريكا يكون فى فلادلفيا..... بالله يا طيفور تانى ما تبداء اى حفل لفنان واعد من غير تخطيط ومتابعة لصيقة لمعرفة المكان المقام فيه الحفل........ دا كلام خاص لفنان الشباب احمد الصادق ... معليش وآسفين جدآ لفشل حفلنا امسحا لينا فى الجخنون الغنيت فيه ............
| |
|
|
|
|
|
|
Re: حفل فنان الشباب أحمد الصادق.. فيرجينيا.. مايو 27 (Re: Mohamed Foto7li)
|
غايتو نحنا في فرجينيا ح نتخز قرار بعد ده نمسك اللعب الحلو بجاي، نجيب فنانيننا ونعمل ليهم الحفلات الشديدة و الأقاليم ياكلو نارن ههههه والداير يشاركنا مرحب بيه ومعليش يا نجاة وأمبارح كنا متوقعينكم و يا حسن حماد مافي فنان بيطلع لشي غير العداد مسحة الشنب و تكاليف الغربة وحق غسيل الأحزان. أمبارح فاق الحضور التوقعات، وصراحة الماشاف أحمد الصادق بيؤدي ماشاف والشافو بيدفع ضعف القيمة، وأود الإشارة إلى الموسيقار دسوقي دون أن اغمط حق ابداعه وفايز مليجي و عبده السر و كل الناس الوفدو في اعداد مهولة حتى آخر دقيقة و الشكر لأحمد الصادق، لرقيه و انسانيته و حضوره الفني المخيف، واسجل إعجابي بقدرته العالية على السيطرة التامة على موقعه طوال فترته على المسرح، فكأنما يحرك الناس بخيط خفي وسحر لا يقاوم.
والما حضر حفلة في فيرجينيا ما حضر كمال طيفور صديقي العزيز يا ريت منك خمسة تاني ويا فضلي مدبر الإنقلابات العاطفية لك محبتنا جميعا.
| |
|
|
|
|
|
|
Re: حفل فنان الشباب أحمد الصادق.. فيرجينيا.. مايو 27 (Re: Tagelsir Elmelik)
|
يا صبري ياخي تحيتي من قبة مدني السني لغاية قبب العركيين
أود أن أقول راي شخصي جدا أنا لأول مرة اسجل إعجاب بهيئة و طريقة لبس فنان سوداني ( بجتنب أدءه الفني بالطبع) و كما يسمي (بيلي جويل) المغني الأمريكي الشهير الفنان البلبس (الفل سوت) بالمحامي أو المحاسب فان الوصف لا ينطبق على أحمد الصادق فهو كما يقول العارفين Hip to the core ويحمل كل خصائص البوب ستار دون شك ساكتب مطولا عنه قريبا
بختنا يكون عندنا زول زي ناس تيدي آفرو و فيمي كوتي، لو الكيزان ديل خلو الغتاتة بتاعتن دي
| |
|
|
|
|
|
|
Re: حفل فنان الشباب أحمد الصادق.. فيرجينيا.. مايو 27 (Re: Tagelsir Elmelik)
|
تاج يا جميل..
أفرحني جداً نجاح الحفل والشواهد كثيره علي ذلك.
أحمد الصادق حباه الله بصوت جميل و يمتلك كاريزما علي المسرح لا يخطئها الكفيف. كما يمتلك هدوء الواثق من مقدراته ، ينسرب إلي الناس كالفراشة خفةً ، و الرحيق مذاقا. الرجل بسيط جداً و (مستخت) فيه تواضع الملوك ، قريب جداً من الناس لذلك يلتف حوله جمهور لا يستهان به و هذا لم يأت من فراغ إطلاقاً.
شهادتي قد تكون في أحمد الصادق مجروحه ، ولكن قد حاولت أن أوثق لبعض أعماله في بوست كتبته في 2010 كخطوه تشجيعيه لسماع آراء الناس ، قصدت أن يكون عنوان البوست مثيراً للجدل بمثل ما أحدثه ظهور أحمد الصادق علي الساحة الفنية السودانية من جدل كبير.
المهم أنا سعيد يا تاج بهذا الإحتفاء بفنان أري فيه عافيه تبشر بفنان جيد إن شددنا من أذره بعيداً عن الغتاته التي أشرت ليها.
الإمبراطــور أحمــد الصـادق (بوست توثيقي)
تحياتي
فاروق أبحُــوّه
| |
|
|
|
|
|
|
Re: حفل فنان الشباب أحمد الصادق.. فيرجينيا.. مايو 27 (Re: د. ياسر عبد القادر)
|
Quote: وفلادلفيا برضو يا جماعة السودنينن ما كتار شديد يعنى برضو مشكورين على المحاولة اعلم بأن الفنان لا يصب كل اهتمامه فى العداد وان كان طبعاً شئ مهم |
الاخ حسن حماد دعنى اختلف معك ، الجالية فى مدينة فلادلفيا كبيرة جدآ دا ما سبب ، وبعدين حفلات فلادلفيا دائما ناجحة الا الحفل الاخير دا لذلك كانت دهشتنا وصدمتنا كبيرة !!!! ..... يا ملك والله ندمانة لعدم حضورى لحفلكم العامر بناسوا وفنانو الراقى بختكم ياراقين ..... لكن تانى معاكم معاكم ........
| |
|
|
|
|
|
|
Re: حفل فنان الشباب أحمد الصادق.. فيرجينيا.. مايو 27 (Re: حبيب نورة)
|
تتقدم شركة البحر الأحمر بالشكر الجزيل لكل الذين شاركو وساهمو فى إنجاح هذا المهرجان الغنائى الكبير ونخص بالشكر والإمتنان الفنان الشاب المبدع صاحب الحنجرة الذهبية أحمد الصادق والفرقة الموسيقية .. دسوقى , مليجى وعبدو السر أمسية ما كانت لتكون بهذا البريق لولا وقفة محبى الفنان أحمد الصادق الذين ظلو يرددون معه الأغنية تلو الأخرى حتى نهاية الحفل ولابد من الإشادة بالجهد الكبير الذى بذل حتى يخرج الحفل بهذه الصورة المشرفة لكل السودانيين المقيمين بولاية فيرجينيا وضيوفهم من الولايات الأخرى
أبو السرة إنت و بكرى أبو بكر The power behind the force إنشاء الله يوم شكركم ما يجى
وشكراً على البوست و اللقطات الجميلة يا أبو سامى .... وفى إنتظار باقى الصور
الأخت نجاة تحياتى ليك ولناس فيلى وإنشاء الله نقدر نعوضكم فى مرة أخرى
فضلى البكرى ع/ Red Sea Team
| |
|
|
|
|
|
|
|