|
Re: (ياماما بطلي الحركات دي ..نحن قاعدين نتمشى).. (Re: حاتم محمود الجاك)
|
الكريم مصطفى بشار لك التحية ده جيل مختلف وزمن مختلف جيل الفيس بوك والــ آي فون كما يقال عنه ... زمن حلو ربنا يهنيهم بيه بس التحديات والاغراءات فيه كبيرة وكتيرة .. ربنا يحفظ أولادنا ويهديهم وييسر عليهم... نظرتنا نحن للامومة بتختلف عن نظرة أمهاتنا ليها وكذا الحال بالنسبة لأمهاتنا مع جداتنا .. كل جيل بيكون أقرب لاولاده من الجيل القبله...زمان ما كان في حاجة إسمها صداقة بين الأبناء والآباء، أو قول لو في كانت قليلة وبتحفظ...هسه موجودة ولله الحمد... لكن يا أخي الكريم ما هي في النهاية "ون باكيج"... يعني إذا عايزة بنتي تكون قريبة لي وأكون صحبتها ح تخاطبي مرات زي ما بتخاطب صاحباتها وفي الغالب أنا بكون برضو بعمل كده .. كونها تتخطى خط "التوقير" المتعارف عليه في جملة زي الخلعتك دي يعتبر مشكلة صغيرة مقدور عليها... بالنسبة للأزياء الفاضحة.. طبعا "الفضوحيه" دي مسألة بتعتمد على مفهوم كل واحد مننا لما هو فاضح .. مش كده وبس بعض اللبس بيكون فاضح في بنت وغير فاضح في أخرى.. قصدي أقول المسألة نسبية.. عندك مثلا في الجامعة البنات لازم يلبسوا طرحة واسكيرت طويل وممنوع لبس البنطلون... ده المفروض إنه حشمة والبنطلون في المقابل لبس فاضح... الخلى مطلق بنطلون يكون فاضح شنو ومطلق اسكيرت يكون حشمة شنو؟ في لبسة تعتمد على البنطلون محترمة أكتر بكتير من اسكيرتات بلبسوها عادي البنات في أي مكان... والطرحة المرمية باهمال على الكتف أو فوق الراس أهميتها شنو إذا ما كان المقصود منها جمال الملبوس وأناقته... الالزام لزومه شنو وبيقع بالشكل ده في أي خانة ؟ بعدين بصراحة السوق ذاته ما مدي الناس فرصة... بالله عليك الله شوف قباحة "سترة الملابس العارية" عند البنات المسلمات... تلقى الواحدة لابسة خمسين قطعة عشان تستوفي شروط الحشمة ... والله أنا بحن عليهم... طبعا هم في النهاية تعايشوا مع العاري والتعديل وأخرجوه كزي مرغوب فيه .. غايتو الله غالب، البدائل قليلة خاصة في بلد الجلاد فيه واقف ليهن زي الخازوق...
|
|
|
|
|
|
|
|
|