|
|
 ما شفتو"نقد" يا ساري الليل
|
مع الاعتذار لحاتم الدابي للاقتباس..الفقد عظيم ولست بشاعر
ما شفت نقد تابع النجمات فات لي قدام .. يا ساري الليل
درويشاً من يا دوب صغير عشرة أعوام
الزول زول الله من الصلاح الرفعت عنهم الأقلام
دي بركة الرسل الدارو الآخرة أم خيرن دام
التركو نعيم الدنيا الزايل للعبدوها وللحكام
في يوم البحر الجانا وتسب وقام
يوم دخل الحلة وهد بيوتنا ترا وهدام
صبحنا ضيوف ما خلاّ وراهو صلة أرحام
يوم داكا نقدخلاها مرق سفره طويل مع الأيام
متجلبب بي تيبان الرحمة غطا وهندام
متنعلت بي أرض الله الواسعة خطى الأقدام
متزود شايل خير الزاد وحي وإلهام
ما شفت جناح جبريل غتاهو بقالو مظلة جلوس وقيام
فتشنا سما وفتشنا أرض ما شفنا منام
في التمر الشايل تكا سبيطو مدلدل خام
في الجرف الأخضر في لوبيهو وفي النجام
في جدول جاري يسقي الحلة تسرسر مويتو نعيماً دام
يبقالي نجع متوجه قاصد أرض الشام
ما شفتو هناك مع الحجاج لابس الإحرام
في يثرب ومكة وفي بيت الله المكسي رخام
يبقالي هناك يكون مندسي مع الخدام
يا ساري الليل أنا داير أوصيك وأديك كلام
الروح ان صعدت لي باريها وفي جنات الخلد مقام
لو كان لاقيتو في إي مكان في إي زحام
روح كلمو قولو الحلة بكت من شوقا إليك تغريك سلام..
|
|
  
|
|
|
|
adil amin
فيس بوك
تويتر
انستقرام
يوتيوب
بنتيريست