|
|
 نحنا شنو ؟ نحنا ولاد حرام ؟ افتونى ياعالم !!
|
نحنا شنو ؟ نحنا ولاد حرام ؟ نحنا خلقنا لنكون عبيد تحت أسياد في كل مكان ؟ نحن نلقاها من منو والا منو ؟ المعارضة عجايز ومخرفين .. وحركات مسلحة ماقادرة تتجاوز اطارها الجهوي .. الحاكومة لامه في بطنه كل عفن المجتمع من سارقين ومفسدين ولا أخلاقيين من كل الأحزاب .. أحزاب مصت دمنا وطلعت روحنا في أصعب سنين النضال .. وببساطة تجي القيادات من بره وتلم عياله وتشارك .. في إحساس ...أمر وأصعب من الغربة والعزلة داخل بيتك .. كوننا ما نأكل وما نشرب وما نتعالج وما نتعلّم وما نلبس كلو مقدور عليهو .. لكن يصل الأمر لدرجة جلد أخواتنا وإغتصابهن ..وقتلهن .. ونحنا نرفع في صور القتل والتعزيب والنزوح ونبكي .. ندخل اليوتيوب نشوف ونسمع ونبكي .. البلد كلها اتملت شحاديين ودبابيين ومجانيين ومسطوليين وسكارى .. يقع زول من كبري القوات المسلحة ورأس مالو فاتحة !! تموت بت بطلقة من شرطي ورأس ماله ياناس باركوها خلاص بنسمي الشارع باسمها ونديكم تعويض ..
نحنا مالنا مليانين غبن وفقر وجهل ومرض وخوف ؟ خلوها الحاكومة العندها جيش وشرطة وأمن واسقاطه محتاج ترتيب وتنسيق وتخطيط أحزابنا دي بتعمل فينا كده ليه ياخي ؟ نحنا منو زاتو عشان نسقط نظام ؟ المعترف بينا منو ؟. لا أحزابنا ولا النظام ولا الحركات المسلحة ولا حتى ناس بيتنا .. يانا نحنا زاتو النشحد حق التمباك والسجاير وعصير الحب , ويشتروا لينا في هدومنا وجزمنا وشراباتنا وحتى هدومنا الداخلية .. زول جايب خبرنا مافي ..
تطول لسانك تاخد طلقة من الحاكومة .. تطول لسانك على الاسياد تتفلّق وتتنبّذ من مجموعات القطيع .. ترفع رأسك في البيت يمارسوا عليك حصار اقتصادي ..
نحنا منو ؟ ومن وين جايين ؟ وعايزين شنو ؟
أفتوني يا عااااااااااااااالم ..
|
|
 
|
|
|
|
azz gafar
فيس بوك
تويتر
انستقرام
يوتيوب
بنتيريست