|
|
 *** الفقدة بعد الموت والفراق شن طعمها ؟ ***
|
سلام يا الحبان كلكم والبركة في الجميع في احزانا الغرقت الجرح لا جوة
بطبعنا نحن السودانيين مجامليييين لامن بي هناك , وحنينيين لأبعد حد والحمد لله
لكن بعد السفر والشتات كتر والغربة ليلها طوووول , بقى الواحد يتم كم ونيف سنة ما يلاقي اقرب الناس ليه
كتير وكتير جدا ناس تسافر بعد كم وتاشر سنة تلقى الشفع الخلوهم زمان بقوا طواااااال ما شاء الله والبنوت الكانن بلعبن في طرف البيوت بي ضفاير
بقن دقر العين يتضايرن من الكبار , الواحد فينا لامن ينخلع يقول الزمن ده جرى فررر كدة ولا الناس ديل كبروا مالهم ؟؟
اها النجيكم للنجيضة على قول ود الصائم , بعد الزمن يطول والسنوات تجري واحدة ورا التانية , ومشغوليات الغربة تهد الحيل
والزمن يسرقنا كلنا , تبقى المواصلة الزمان يا حليلا راحت ونشفت مع الطملة في الخيران , وكبارنا كان حبوبات كان جدود ولا عمات ولا اعمام الخ
يشيلوا ويسألوا , يا ناس فلان كيفنو ؟ اولاده وست بيته ؟
اها فلان ده يكون خالو ولا عمو لزم ليه كم وكم سنة ما سمع صوته ولا حتى في الأعياد
وعجلة الحياة تلفح كف كف
والموت سبيل الأولين والآخرين
فجعتن يجيك تلفون يقولوا ليك قريبك فلان مات في شأن الله والرسول
ويكون الله يرحمه سأل منك ومن جناك لامن ريقو نشف , ورسل ليك اطنان سلام . وقطع شك في صلواته بدعو ليك
تقوم جري بعد تأخدلك بكية وجوعيرة ، تجتر بي حرقة الأيام الجميلة الكنت معاه فيها وسط الأهل ,
وترسل جري تجيب الرصيد من مافي ، حتى لو ما عندك تدين وتتصل في اليوم داك وتتكلم مع ناس الفراش كللهم حتى الجايين عابرين الطريق
المتفن في الفراش كلو تنضم معاه يعزوك وتعزي , ميزانية كم ريال ولا كم دولار تروح في اللحظة دي
في حين إنه ممكن اقل من المبلغ ده بكتير تنظم نفسك وتطلع ليك مبلغ بسيط لكل شهر 3 ولا 4 إتصالات كفاية جدا
والله يا جماعة كلنا ولا اقول معظمنا متلومين في اهلنا وقرايبنا لوم شديد خلاس, الأهل ما هم افراد البيت بس!
في باقي العائلة من الخيلان الخالات الأعمام والعمات والجيران برضو ليهم حق علينا
ليه ما نفقد بعض حتى ولو مره في الشهر , في ناس يكونوا معاك في بلد الغربة وليك شهور ما لاقيتهم
تسمع فجأة مات ابوه ولا اخوه ولا اي قريب ليه , تقعد تضاير وتفتش رقمو تتصل بيه
المواصلة وصانا بيها الإسلام خاصة مواصلة الأرحام
فيها اجر عظيم ولي المواصل راحة بال ما بعدها راحة
لو شلنا التلفون واتصلنا بي قريبا لينا طولنا منه , تلفونا بفرحوا قطع شك وبريحوا جووة في حشاه كأنه شافك قدامه
وراحته اجرها ليك , وإنت زاتك بتحس بالرضا,إن دعا ليك ساي بالصحة والعافية والخير ورد الغربة , دي براها بالدنيا كلها
بصراحة يا جماعة ما بوجعني إلا فقدة بعض الناس لأهلها ومعارفها بعدما يسمعوا إنه فقدوا عزيز ليهم , يتصلوا يعزوا كأداء واجب ليس إلا!!!
بالطبع الواجب مهم لكن في اولويات قبل ما يبقى واجب نخاف من اللوم فيه وبس..
متاوقة
يلا تعالوا كلكم تحت النيمة دي ونمرق النصيحة ونصلح العوج
|
|
 
|
|
|
|
|
| العنوان |
الكاتب |
Date |
| *** الفقدة بعد الموت والفراق شن طعمها ؟ *** | اسماء الجنيد | 02-28-12, 04:25 PM |
| Re: *** الفقدة بعد الموت والفراق شن طعمها ؟ *** | اسماء الجنيد | 02-28-12, 04:45 PM |
 Re: *** الفقدة بعد الموت والفراق شن طعمها ؟ *** | Balla Musa | 02-28-12, 08:04 PM |
| Re: *** الفقدة بعد الموت والفراق شن طعمها ؟ *** | Amani Al Ajab | 02-28-12, 08:14 PM |
| Re: *** الفقدة بعد الموت والفراق شن طعمها ؟ *** | خالد علي محجوب المنسي | 02-28-12, 08:40 PM |
| Re: *** الفقدة بعد الموت والفراق شن طعمها ؟ *** | هند محمد | 02-28-12, 08:47 PM |
 Re: *** الفقدة بعد الموت والفراق شن طعمها ؟ *** | اسماء الجنيد | 02-28-12, 11:38 PM |
| Re: *** الفقدة بعد الموت والفراق شن طعمها ؟ *** | اسماء الجنيد | 02-28-12, 11:58 PM |
| Re: *** الفقدة بعد الموت والفراق شن طعمها ؟ *** | طارق جبريل | 02-29-12, 00:24 AM |
| Re: *** الفقدة بعد الموت والفراق شن طعمها ؟ *** | اسماء الجنيد | 03-01-12, 11:17 PM |
| Re: *** الفقدة بعد الموت والفراق شن طعمها ؟ *** | سجيمان | 03-02-12, 12:09 PM |
| Re: *** الفقدة بعد الموت والفراق شن طعمها ؟ *** | الفاتح ميرغني | 03-03-12, 04:53 PM |
| Re: *** الفقدة بعد الموت والفراق شن طعمها ؟ *** | نادر الفضلى | 03-03-12, 06:37 PM |
| Re: *** الفقدة بعد الموت والفراق شن طعمها ؟ *** | اسماء الجنيد | 03-04-12, 06:09 PM |
| Re: *** الفقدة بعد الموت والفراق شن طعمها ؟ *** | اسماء الجنيد | 03-04-12, 06:17 PM |
| Re: *** الفقدة بعد الموت والفراق شن طعمها ؟ *** | اسماء الجنيد | 03-05-12, 01:32 AM |
|
| |
اسماء الجنيد
فيس بوك
تويتر
انستقرام
يوتيوب
بنتيريست