الحوت موهبة نادره علي طريقته, حوله مجموعة عاطلة من كل مايمت للامسانية بصله. يأكلؤن من مائدته, ويبصقون فيها في ان. الدوله اشياءها, الاهتمام بالطفيليين, والسراق ووزير للسخافة سعيد, بسخفه. ويوزع الابتسام علي جهله ام استغباء, لا ادري. الحوت كحال المبدعيين الاخريين, بجب ان يجدوا, الاهتمام والرعاية, من معجبيهم, ومقدري المواهب. خاصة المقيمين بالخارج.
مودتنا
01-04-2012, 06:21 AM
وليد عبد اللطيف وليد عبد اللطيف
تاريخ التسجيل: 08-09-2009
مجموع المشاركات: 6733
Quote: الدوله اشياءها, الاهتمام بالطفيليين, والسراق ووزير للسخافة سعيد, بسخفه. ويوزع الابتسام علي جهله ام استغباء, لا ادري.
ود الحبيب يسن الانسان لما لم يعرف انه ثروة قومية هذا هو حالة دي مشكلتنا نحنا في السودان وهي مشكلة جهل ليس إلا حتى المبدعين في جميع المستويات والمجالات طموحاتهم قليلة جدا والهم وااااااحد ... الدولة ذاتها تعبت مع الناس يا الفاضل اي شيء نرميهو فيها دا ليس دفاعا عن المهزلة الحاصلة الان في السودان بلد الانسان لم يجد طريقة حتى لو عايز يموت خارج السودان ... جميعكم نعرفون سلوك الفنان محمود عبد العزيز والاتجاه الذي يسير به
مصطفى محمود اخوي نحكي ليك ياخي الانسان تعرف عافيتة من صوته يعني اذا مريض من صوته ممكن تعرف حالتة مثال لو اتصلت على زول تلفون بقول ليك ياخي مالو صوتك متغير فيك شيء عيان مرضان لذلك لابد من الاهتمام بالصوت بالتغذية السليمة والتمارين فولدنا محمود عبد العزيز غايتو الله يكون في عونه ... محمود بغني من اواسط الثمانينات وطوال هذه الفترة تجده بين الجخانين ومتوحل في الدمار الشامل هو كويس للان عايش وربنا يحفظة للناس ...
حبيبنا الفاضل يسن شايف اخوك زمان كان معلم كيف قربت ابقى فنان كبير بس بت الكلــــــب ابت تدينا وادت فرفور الواقف جنبي دا عشان كدى قلنا نسك كورة القدم انا عايز اوصل فكرة انو اي شيء لابد من الاهتمام والمثابرة
01-04-2012, 12:07 PM
Mahmoud Mustafa Mahmoud Mahmoud Mustafa Mahmoud
تاريخ التسجيل: 11-26-2004
مجموع المشاركات: 4325
يا محمود ياخ انت داير الصراحه والنصيحه ؟ بتعرف الكواميد؟ محمود من قمنا وقعدنا معروف من زمان بيحب الجلسه والقعده وشلة تظبيط القعده وهو الفى جيبو ما حقو الصراحه ما عارف لو مازال الحال كما هو الحال حتى الان لكن على كل حال محمود محتاج يدخل مصحه استشفاء وعلاج لكن مش زى بتاعتنا الفى كوبر ديك محتاج مصحة استشفاء من الهباب لو لسه بيستخدم لحدى هسى لانه كده اكيد هو ينطبق عليه اسم مدمن بدون لف ودوران بس يوافق على الاستشفاء ونحجز ليهو رحله الى اسكندنافيا لمدة شهرين فقط بعيداً عن اى شلة سودانيين ومعجبين وغناء حفلات اقنعوه بس يأخد اجازه عن اى نشاط ويقوم برحلة استجمام لا يعرف مكانها الا قليلون الراجل ده بالجد ما محتاج كلام كتير بتاع اصحاب الا بس محتاج راحه واستجمام واستشفاء من اى مؤثرات والدايرين عافيته وخايفين على صحته من بكره يبتدوا مشروع تسفيره الى ابعد مصحة استشفاء ومرحباً به مع مرافقينه فى اسكندنافيا
============ اللهم هل بلغت فاشهد
01-04-2012, 05:36 PM
Mahmoud Mustafa Mahmoud Mahmoud Mustafa Mahmoud
تاريخ التسجيل: 11-26-2004
مجموع المشاركات: 4325
Quote: محمود محتاج يدخل مصحه استشفاء وعلاج لكن مش زى بتاعتنا الفى كوبر ديك محتاج مصحة استشفاء من الهباب لو لسه بيستخدم لحدى هسى لانه كده اكيد هو ينطبق عليه اسم مدمن بدون لف ودوران بس يوافق على الاستشفاء ونحجز ليهو رحله الى اسكندنافيا لمدة شهرين فقط بعيداً عن اى شلة سودانيين ومعجبين وغناء حفلات اقنعوه بس يأخد اجازه عن اى نشاط ويقوم برحلة استجمام لا يعرف مكانها الا قليلون الراجل ده بالجد ما محتاج كلام كتير بتاع اصحاب الا بس محتاج راحه واستجمام واستشفاء من اى مؤثرات والدايرين عافيته وخايفين على صحته من بكره يبتدوا مشروع تسفيره الى ابعد مصحة استشفاء ومرحباً به مع مرافقينه فى اسكندنافيا
محمود يا عربي عيدك سعيد شديد اها الدواء خبروا شنو ؟ يا جماعة ما تفهموا غلط دواء عديييل علاج ما تفهمونا غلط مع البوست دا سمح ؟
تعرف يا عربي متشكر لحسن ظنك شديد و ياريت يحصل ما نفكر فيه لكن عندي ظن خاص و مرة كتبتو هنا في مداخله و هو :- الحوت دا يا جماعة روح قلقه جداً و هو عارف تمام التمام بعمل في شنو و محمود دا مافي إي شله أو شيطان رجيم بقدر يقنعوا يعمل حاجة هو ما عايز يعمله ، محمود شخص يتوق لحاجة هي غير متوفره في و اقعه القدامه دا عشان كدا هو بتعب نفسوا ، كلامي دا عارفوا عجيب لكن وليد عبد اللطيف الجمبكم دا و بخاري يمكن يقدروا يحسوا و يشعروا القصة دي . محمود ما فنان عادي محمود دا حاجة تانيه خالص يا جماعة محمود دا رأسو الفيهو دا فيهو كلام كتييير و كتير جداً رغم انو الناس شايفاهو محتاج المساعده و المسانده لكن قطع شك هو شايف للناس حاجة تانية.
معليش لكلامي دا لكن كان لازم اقولوا .
و تحياتي ومحبتي دائمه لك يا عربي.
01-04-2012, 06:17 PM
Mahmoud Mustafa Mahmoud Mahmoud Mustafa Mahmoud
تاريخ التسجيل: 11-26-2004
مجموع المشاركات: 4325
Quote: الحوت دا يا جماعة روح قلقه جداً و هو عارف تمام التمام بعمل في شنو و محمود دا مافي إي شله أو شيطان رجيم بقدر يقنعوا يعمل حاجة هو ما عايز يعمله ، محمود شخص يتوق لحاجة هي غير متوفره في و اقعه القدامه دا عشان كدا هو بتعب نفسوا ، كلامي دا عارفوا عجيب لكن وليد عبد اللطيف الجمبكم دا و بخاري يمكن يقدروا يحسوا و يشعروا القصة دي . محمود ما فنان عادي محمود دا حاجة تانيه خالص يا جماعة محمود دا رأسو الفيهو دا فيهو كلام كتييير و كتير جداً رغم انو الناس شايفاهو محتاج المساعده و المسانده لكن قطع شك هو شايف للناس حاجة تانية
ما اختلفنا يا سفيان يا حبيب..
لكن الحوت كلامو الفي راسو دا...بالطريقة دي حا يضطر يتموا بهناك في الجانب الآخر لهذه الحياة..
الموت حق..برضو ما اختلفنا.. لكن البهدلة دي مافي ليها أي داعي تحت أي مسمى
خاصة لما تكون ناتجة عن إهمال يتم استغلاله وتوظيفه من بعض الجهلاء النفعيين...
أو (العفـنيين)..الأخيرة دي ما بطالة زاتو..
والله الدواء لسه منتظرين تأكيدات من الهمام سيف جبريل بخصوص الراجل النازل البلد..
تحياتي ومحبتي التي تعلم..
محمود العربي..
01-04-2012, 06:47 PM
الفاضل يسن عثمان الفاضل يسن عثمان
تاريخ التسجيل: 04-17-2008
مجموع المشاركات: 3279
كلامك زي حرفنتك, التي امتعتنا بها, في بواكير الصبي. كنا, نستمتع بتبلوهاتك الكروية انت والخواجة نزار عصرا وبالمساء, نلتاع هياما بأغاني الحوت في حواري بحري. ولي اظنك تتفق معي, باننا مخطئؤن, اذا صرنا, حكاماعلي سلوكيات المبدعيين الشخصية. رغم التداخل الوجداني الذي نشأنا عليه. من المفترض, ان يقف اعجابنا, للمبدعيين, عندما تبتدي حرياتهم الشخصية. الا في حالات تقتضي القيام بواجب تجاهم, كحال بوست مصطفي محمود الوفي دي. نحن فيما يظهر ابناء لجيل واحد, سفيان نابري والجميل بخاري ومصطفي ووليد, اثار الحوت بابداعه, عشقا وهياما في دواخلهم. ويجب ان يردوا الدين, وفاءا, لهذا الحوت, لا اقول النصيحة فقط, بل علاج ورعاية واستجمام, لا اظن بان ذلك بمستحيل او غريب. من ناحيتي, لندن لا فرق بينها وبين البيئة التي فيها الحوت الان لكن مساهمات مالية او البحث في طرق تودي لهذا العمل, ليس لي موانع للقيام بها.
مودتي لكل المتداخليين.
01-04-2012, 06:47 PM
سفيان بشير نابرى سفيان بشير نابرى
تاريخ التسجيل: 09-01-2004
مجموع المشاركات: 9574
يا جماعة مداخلتي اتكررت عشان كدا ح استفيد من المساحه دي في كلام
يا جماعة بالجد في نظري لو في زول بعتقد أنو محمود حولو شله بتحطم فيهو أو بتهبب في إي مصيبة يطلع الكلام دا من رأسو نهائي محمود دا ستين شله ما بتقدر تعمل ليهو حاجة . محمود برضو ما هو الفنان البعمل الحاجات صدفه ابداً ، مافي جريده جاء شايله الهواء و وقعت تحت رجلين محمود رفعه لقى فيها :- وعد اللقياء ابداً ما حصل و لا حيحصل محمود دا هو البفتش عايز شنو و بعملو و اقول ليكم اكتر من كدا !!؟ محمود دا الفنان الوحيد العمل شعراء إي و الله في ناس بقوا شعراء و شاعرات لانهم حبوا محمود دا في عضمو دا و روحو دي و رسموا ليهو قصة حياة و حكاية طووووويله و بعد داك كتبوا خيالاتهم دي شعر و شالوهو ادوهو لمحمود و محمود غناهو كاجمل ما يكون !!! فهمتوا عايز اقول ليكم شنو ؟ فهمتو ليه بقول ليكم محمود دا حاجة تانية مختلفه و ما حصلت و ما حتحصل !!!؟ يا جماعة محمود دا هبة كااامله ربنا منحنا ليها و نحن له شاكرين و الهبة دي إي نعم لازم ما نفرض فيها لكن لازم نقتنع أنها الهبة دي لازم تبقى كدا ودا هو المخليها اعظم هدية .
كدي راجعوا أغاني محمود شوفوا هو ليه اختار الأغاني دي ؟ و هل أغاني محمود دي بتشبهوا هو ولا لا ؟
و اصبروا لما عمر الفاروق يجيكم اصلاً هو مشغول مع نادي الشعر الحر لكن بجي و بخرش كبريتو فيكم .
Quote: يا جماعة محمود دا هبة كااامله ربنا منحنا ليها و نحن له شاكرين و الهبة دي إي نعم لازم ما نفرض فيها لكن لازم نقتنع أنها الهبة دي لازم تبقى كدا ودا هو المخليها اعظم هدية .
حبابك تاني وتالت يا سوفي ياخ..
لكن عاين..
محمود هبة كاملة..معاك ..النيل برضو هبة كاملة ربنا منحنا ليها ونحن له شاكرين..
طيب لو الناس اتعاملت بدون مسئولية في ثروة زي النيل مثلاً..موش ممكن تضيع أوانطة ساي؟؟
غايتو أنا أصلو ما ممكن أقتنع معاكم إنه الهبة دي لازم تبقى كدا..
وكمان ما ح أتفق معاك إنه الوضع الحالي هو المخليها أعظم هدية..
الزبدة: يعني يا سفيان يا صاحب..الناس يقعدوا يعاينوا للحوت كدا وهو يحث السير إلى الهاوية
وهم يتأملون عظمة الهبة والواهب؟؟ ياخي خليك عميق شوية ياخ..
المهم ..حاول استفيد لينا من مساحة قربك من الحوت دي في توصيل
روح وفكرة البوست دا..بأي طريقة..وبأي وسيط أو وسائط... ..
عمر الفاروق حبابو .. لكن ما حا يجيب كبريت أصعب من بتاعتك دي...
وحباب رأيك رغم الاختلاف...
01-05-2012, 07:06 AM
وليد عبد اللطيف وليد عبد اللطيف
تاريخ التسجيل: 08-09-2009
مجموع المشاركات: 6733
Quote: الحوت دا يا جماعة روح قلقه جداً و هو عارف تمام التمام بعمل في شنو و محمود دا مافي إي شله أو شيطان رجيم بقدر يقنعوا يعمل حاجة هو ما عايز يعمله ، محمود شخص يتوق لحاجة هي غير متوفره في و اقعه القدامه دا عشان كدا هو بتعب نفسوا ، كلامي دا عارفوا عجيب لكن وليد عبد اللطيف الجمبكم دا و بخاري يمكن يقدروا يحسوا و يشعروا القصة دي . محمود ما فنان عادي محمود دا حاجة تانيه خالص يا جماعة محمود دا رأسو الفيهو دا فيهو كلام كتييير و كتير جداً رغم انو الناس شايفاهو محتاج المساعده و المسانده لكن قطع شك هو شايف للناس حاجة تانية.
معليش لكلامي دا لكن كان لازم اقولوا .
سفيان ياحبيبي والله كلامك دا امكن انا ماعرفت اوصولو للناس بحكم اننا في يوم من الايام كنا قريبين من هذا الظاهرة الفنية واقول ظاهرة لان محمود تاني ما بتكرر بالساهل امكن الا بعد 25 سنة تاني لقدام محمود فعلا روحة قلقة محمود متخيل نفسو هو رسول الفن والانسانية عايز يقدم شيء للبشرية لكن في نفس الوقت ماعارف يقدم شنو او ماقدار يعبر عن الاشياء التي يريد ان يوصلها محمود صعب اقناعة بالساهل وماممكن تفرض عليه شيء هو ما داير يعلمو محمود عمل مؤسسة ( محمود عبد العزيز ) لكي يكرم اخوانة من الفننين الذين سبقوة محمود مشكلتة بدا كبير وتربع مع الكبار واصبحت له بصمتة وطريقة الخاصة في الغناء التي وجدت محاربة شديدة من النقد الهادف والغير هادف الغريبة كان لاشغال بالهادف لا بغير الهادف هو ماشي والناس تهترش محمود شنو وماعارف شنو محمود خرب الغناء لفت الايام وفي فترة وجيزة استطاع ان يعمل قاعدة جماهيرة كبيرة .. محمود محتاج الى الدولة ان تتبنى حالتة وتقدم له مثل ماقدم للسودان ولشعبة يجب رعايتة في مستشفيات خارج السودان مثلة ومثل الاعب ماردونا محمود هو من كسر قاعدة سمح الغناء في خشيم سيدو . . سفيان بالله ماتشاغل مالك علينا خلينا نقرا بس الناس دي هنا بتكتب شنو
01-05-2012, 07:39 AM
هشام عباس هشام عباس
تاريخ التسجيل: 08-30-2010
مجموع المشاركات: 5609
المشكلة انو محمود عبد العزيز نفسو ما عايز يقدر الموهبة الربانية بتاعتو دى والمشكلة التانية انو الحول محمود ملتفين عليه ما عشان موهبتو انما لاغراض نفعية تانية عشان كدا لا محمود قادر يعين نفسو ولا الحولو عايزين يعينوه .. وبكدة نفقد ثروة غنائية وموهبة فنية بكل بساطة ونتفرج صراحة لست من عشاق محمود عبد العزيز وان كنت استمع له مرات كثيرة ولا اعرفه ولم التقيه من قبل لكن كلما ارى هذا المحمود بين فترة واخرى فى لقاء تلفزيونى اتعجب بحس انى بشوف بقايا انسان بحس انو الزول القدامنا فى الشاشة دا ميت ليه سنوات وما لقى زول يدفنو هذا البوست اعتبره خطوة جميلة اولا لاقناع محمود انه ملك لمحبيه وليس نفسه لكى يعرف قدر نفسه ثانيا لكى تنتشلونه من يد عصابة تمص خيراته وتدمره بعدها تبدا خطوات العلاج تحياتى
01-05-2012, 08:14 AM
Mahmoud Mustafa Mahmoud Mahmoud Mustafa Mahmoud
تاريخ التسجيل: 11-26-2004
مجموع المشاركات: 4325
الاخ وليد عبد اللطيف لك التحية على هذا البوست الذي ينصب في إنغاذ درة فنية وظاهرة فنية عظيمة فالاستاذ محمود عبد العزيز ثروة فنية كبيرة تستحق ان نحافظ عليها بعيدا عن سلوكه ولكن كيف نحافظ عليها فهذا ما يستوجب عمله حالا قبل ان نفقد هذه الثروة للابد ،، انا من اكثر المحبيبن لصوت هذا الفتي ولغناءه الجميل ولكن هل يدرك محمود قدر موهبته هذه التي وهبها الله اياه ؟ لا اظن ذلك ، لأنه لو كان يدرك ذلك لما تحول من فنان عظيم لرجل يسوق نفسه وراء الدمار والإدمان ،، وأنا اكتب هذه الاسطر يتقطع قلبي عليه وينفطر لأننا فقدنا مثل هذه الثروة الغنائية الكبيرة لان الذي يسمع او يرى محمود في التسعينات او مطلع الالفين لا يصدق ما يراه وما يسمعه في الوقت الحالي من شخص شاخ صوته وهرم بصورة ملحوظة ونحل جمسه وتغيرت ملامحه بصورة عجيبة ،،، على العموم نسال الله ان يتوب علينا وعلى محمود وان ينجح الناس في مساعدته وإنتشاله من طريق الموت الذي يسير فيه ،،، وامسكو في كلام الاخ الفنان محمد زكريا ده وان شاء الله ننغذ ما يمكن إنغاذه ... والتحية لكل المتداخلين في هذا البوست على آراءهم المفيده وعلى حبهم لهذا الفتى الابنوسي الجميل والشكر ايضالكل البشر الذين يهيمون عشقا في فن هذا الفتى العجيب ... ودومو بخير
تحياتي : ياسر العيلفون
01-05-2012, 08:28 AM
Mahmoud Mustafa Mahmoud Mahmoud Mustafa Mahmoud
تاريخ التسجيل: 11-26-2004
مجموع المشاركات: 4325
طبعاً يا صاحبي كلامي دا كلو ما معناهو أنا ضد إي مبادرة زي ما انت عارف بس بقول المبادرة دي الناس تكون فيها حساسه جداً لانو محمود زول صعب وما و لو و صلوا الكلام دا قطع شك نتيجتوا بتكون عكسيه تماماً (أنا عااارف النوايا هنا تمام انها كلها للخير) و ساعته حنكون خسرانين كتير.
و يا محمود العربي و يا بخاري و يا كل الناس اهو أنا ذاتي بديت اتصالات و برضو جاني تلفون من اقرب زول بهتمه بالحوت و بالواضح قال هو متابع الموضوع دا شديد و انهم كاقرب ناس للحوت و معه بشكل دائم قاعدين يتناقشوا في البوست دا و مهتمين جداً بمبادرة (محمد زكريا) و بقولوا انو الموضوع دا ممكن يبقي و يكون بس بترتيبات اكتر من كده .
Quote: و يا محمود العربي و يا بخاري و يا كل الناس اهو أنا ذاتي بديت اتصالات و برضو جاني تلفون من اقرب زول بهتمه بالحوت و بالواضح قال هو متابع الموضوع دا شديد و انهم كاقرب ناس للحوت و معه بشكل دائم قاعدين يتناقشوا في البوست دا و مهتمين جداً بمبادرة (محمد زكريا) و بقولوا انو الموضوع دا ممكن يبقي و يكون بس بترتيبات اكتر من كده .
علي الأيمان كلام رجال مرة واحدة...
شوف يا سفيان ... مافي في الدنيا موضوع ما ممكن يبقى..بس الترتيبات الأكتر من كدا شنو..
عشان الناس تدخل طوالي في تنسيق بصورة سلسلة وتلقط راس الخيط...كله في الله
معاً من أجل الحوت..
مبادرة ماشة والبشريات مدهشة عديل ..
تسلموا كلكم والله.. وأضفتك بالمناسبة يا سفيان
أرح ..
01-05-2012, 01:58 PM
سفيان بشير نابرى سفيان بشير نابرى
تاريخ التسجيل: 09-01-2004
مجموع المشاركات: 9574
انا غايتو الحاجة الوحيييدة المتأكد منها إنو ماف زول في الدنيا دي بحب الهلال ومحمود أكتر مني.. وما عايز اكتب اي شي في الموضوع ده.. بس عايز اقول حقيقة للتاريخ للناس الما عارفة وبتكتب ساي.. السموءل خلف الله وزير الثقافة والإعلام وقف ولايزال يقيف مع محمود أكتر من وقفتكم الأسة دي وده كلام انا متأكد منو ومحمود زاتو بيكةن عارفو فما تنبزوا وتهاجمو الراجل ساي..وعن نفسي ما حبيت هذا الوزير إلا لهذا السبب وإلا فانا عندي ردم كتييير كنت عايز أرشو بيهو..
01-06-2012, 11:46 AM
Mahmoud Mustafa Mahmoud Mahmoud Mustafa Mahmoud
تاريخ التسجيل: 11-26-2004
مجموع المشاركات: 4325
Quote: السموءل خلف الله وزير الثقافة والإعلام وقف ولايزال يقيف مع محمود أكتر من وقفتكم الأسة دي وده كلام انا متأكد منو ومحمود زاتو بيكةن عارفو فما تنبزوا وتهاجمو الراجل ساي..وعن نفسي ما حبيت هذا الوزير إلا لهذا السبب وإلا فانا عندي ردم كتييير كنت عايز أرشو بيهو..
ولد داااااا...
عمر الفاروق حتة واحدة؟؟؟ إيه الهنا دا يا ناس..
حبابك بالرغم من إنك ما سائل في أي حاجة..وبتعتبر إنه تناول الشأن الحوتي منطقة مغلقة خاصة بعمر الفاروق وكدا..
طيب..والحال كذلك .. ليش ما تتم جميلك وتحب معاك مريخنا ووالينا والعجب..لأنه دي كلها حاجات بحبها الحوت لدرجة الهيام..
السمؤال والله زول ما ساهل... ودي لعبته ...
لكن للأمانة الناس هنا على الأقل في البوست دا..ما قاعدة تنبز أو تهاجم ساي.. الناس دي موجوعة بوجع الحوت..
والمبادرة بتاعتنا هنا تحتمل وترحب بأي زول وأول ترحيب بيكون بالسمؤال والجهد الرسمي...
نرحب بيك وإنت "سيد بيت" في الحالة دي...
نستفيد برضو من الــ Connections بتاعتك في دعم التواصل الإيجابي مع الحوت
في رحلته إلى اسكندنافيا..
..
منور يا عم عمر..
..
01-06-2012, 12:01 PM
Mahmoud Mustafa Mahmoud Mahmoud Mustafa Mahmoud
تاريخ التسجيل: 11-26-2004
مجموع المشاركات: 4325
محمود ، وبخاري ، وسفيان ، ومحمد زكريا - تشكرات علي الإهتمام بهذا الإنسان الرائع.. لو في مقترحات - للخروج والإستشفاء بالخارج نقترح علينا جاي
وياسفيان هنا في عمر دفع الله ، وخدر ، وضياء ميرغني ، وتروس ، والجليلي وهيثم منصور - وكلهم زملاء أعضاء بالمنبر ومستعدين لتفهم الموضوع أكان بقت علي المرقة البرا لزوا لينا جاي وخلو الباقي..
مع مودتي وياسفيان ياصديق ختني في الصورة .
01-07-2012, 06:43 AM
وليد عبد اللطيف وليد عبد اللطيف
تاريخ التسجيل: 08-09-2009
مجموع المشاركات: 6733
Quote: بكامل قواي العقلية ومحض إرادتي... أعلن على الملأ ومن خلال هذه المساحة
عن رغبتي في أن يغني محمود عبد العزيز اللحن بتاعي دا..
سفيان نابري.. وليد عبد اللطيف..عمر الفاروق...المطلوب توصيل الفكرة دي لكل من:
صاحب الكلمات الشاعر الزميل الجميل/ عصام عيسى رجب..
صاحب الحب والدهشة والكبرياء الفنان الجميل/ محمود عبد العزيز..
مصطفى يظهر انت مافي كامل قواك العقلية يازول دا شغل لذيذ وبسيط ومنعش اهو يادوب صباحنا اصبح صباح زي صباح العريس لحن جميل ولانضمة فيهو غايتو انت بتذكرني الراحل المقيم الفنان بادي احمد الطيب قريبك
Quote: كلامك زي حرفنتك, التي امتعتنا بها, في بواكير الصبي. كنا, نستمتع بتبلوهاتك الكروية انت والخواجة نزار عصرا وبالمساء, نلتاع هياما بأغاني الحوت في حواري بحري. ولي اظنك تتفق معي, باننا مخطئؤن, اذا صرنا, حكاماعلي سلوكيات المبدعيين الشخصية. رغم التداخل الوجداني الذي نشأنا عليه. من المفترض, ان يقف اعجابنا, للمبدعيين, عندما تبتدي حرياتهم الشخصية. الا في حالات تقتضي القيام بواجب تجاهم, كحال بوست مصطفي محمود الوفي دي. نحن فيما يظهر ابناء لجيل واحد, سفيان نابري والجميل بخاري ومصطفي ووليد, اثار الحوت بابداعه, عشقا وهياما في دواخلهم.
ياسلام عليك يا الفاضل يسن ياخي محمود عبد العزيز عندما نسمعة بذكرنا وبرجعنا لاشياء كثيرة في بحري وذكريات مليانة حب الفنان محمود راجل فنان وانسان وعندما تجتمع الانسانية مع الفن بتصبح حاجة تانية امكن نعرف اشياء عن الفنان محمود لاعرفها هنا الاخرين وليس لنا غير نقول محمود عبد العزيز فنان فنان
01-07-2012, 08:21 AM
Mahmoud Mustafa Mahmoud Mahmoud Mustafa Mahmoud
تاريخ التسجيل: 11-26-2004
مجموع المشاركات: 4325
Quote: وياسفيان هنا في عمر دفع الله ، وخدر ، وضياء ميرغني ، وتروس ، والجليلي وهيثم منصور - وكلهم زملاء أعضاء بالمنبر ومستعدين لتفهم الموضوع أكان بقت علي المرقة البرا لزوا لينا جاي وخلو الباقي..
الغريبة يا محمد off hand كدا .."همست همساً" لحبيبنا سفيان ..قلت ليهو عليكم بهولندا..
لكن كمان الهمام ود زكريا سبقكم.. وهو قنصل الإنسانية بالقارة العجوز..
وحيث أن الماعون "معاً" .. ماعون نبيل وكبير.. غالباً يكون التنسيق ما فيهو مشكلة
فلك وللأحباب الذين ذكرت صادق التقدير والمحبة..
محمود العربي..
..
01-07-2012, 11:28 AM
محمد زكريا محمد زكريا
تاريخ التسجيل: 09-01-2009
مجموع المشاركات: 4909
حل اخير وجدته بنفسى اهم مراحل العلاج هو الاعتراف بالمشكله ودى بالذات هى نقطه تقطع نصف المسافه للعلاج وزى ما قلت انجمامه من الروتين والشله والنمط المعيشى يعنى شوية تغيير من ابسط الحلول واسهلها حسب رؤيتى بعد تقليب الامر على كل النواصى هى زياره بترتيبات وتنظيم مسبق له يحضر فيها الحوت الى النرويج وتحجز له شاليه صيفى او شتوى فى منطقة جميله وهادئه ويرتب له برنامج علاجى وغذائى صحى يعنى ببساطه جو نضيف اكل نضيف شراب موية الله نضيف.......... تانى فى شنو؟ الموسيقى ح نشوف برنامج يكون لراحته النفسيه وللتغيير ممكن تكون هنالك تجربه جلسات وزيارات الى معاهد الموسيقى مثلاً او يشارك فى ورش مع الموسيقيين الاجانب من جنسيات مختلفه, ممكن تسجيلات, تصوير فيديوهات كليب ممكن حلقات الخ الاقتراحات ممكن تكون كتيره لكن اهم شىء هو الترتيب والتنظيم بدراسه لكل اقتراح خطوه بخطوه كترت الكلام, نديكم فرصه تقروا ونسمعكم
ياخ مفروض تكون فى شفافيه وحرية تعبير والواضح ما فاضح المهم قطعنا وعدلنا......كده كويس
يا محمود يا أخوى، مافى كلام ممكن يتقال!! عارف أنا قاصد شنو ( الناس عميانا و طرشة ياخ)..
المهم بى اختصار، انا نشأته فى أسره فنية، تعرفت على معظم الآلات الموسيقية منذ الصغر و تعلمت بعضها. كنت حابب أمشى الموسيقى و المسرح، ناس البيت كانوا دايرين الطب و لى الهندسة، و جننونى من صغير ( أمشى أقرأ!!) فى كل لحظة حاولت أتواصل مع الهواية. أسى بعزف على الكيبورد و الأكورديوم بس على قدر حالى. عندى مجموعة غنائية كاملة ( أكتر من 20 عمل) ملحنة، ما قادر أصحح مسارها و الما مساعد صوتى القبيح و الكيبورد الفقير للإيقاعات الشرقية و السودانية...
يا عربي ياخ و ينك بهناك؟ رساااالتين ما ترد عليهم ؟
يا مورتون النبي فيك اغشاني بهناك .
أبو زر عمر سلام ياخ و مشتاقين تصدق موضوع البربوزل بتاع نجوم الغد أنا لسه ماشي فيهو كويس ؟ و غالباً في الأيام الجاية اصل نتيجه علي ضوها ح نتناقش نقاش طوووويل .
و يا عربي بالجد اللحن ابداع و ما شاء الله العود و الصوت تماااام ... الحمد لله الما ضعته لينا تحت السخان داك .
01-08-2012, 07:15 AM
محمد زكريا محمد زكريا
تاريخ التسجيل: 09-01-2009
مجموع المشاركات: 4909
الصراحه يا محمود انا ما بحب اقول رأى تحليلى بسهولة فى كيفية تناول اعمال محبى الموسيقى والغناء ودائماً ما احتفظ لنفسى بالتحليل الموسيقى واعلق على الذوق العام يعنى ما بستخدم الادوات العلميه والنظريات الموسيقيه التى اعرفها فى تقييم الاعمال وانما استخدم الانطباع الاول والتذوق الفطرى وذلك يجعلنى احدد من الوهله الاولى ان اواصل الاستماع او اتوقف والسبب بسيط انا لم اطرح نفسى كناقد فنّى ومحلل موسيقى بعد رغم انتهالى من هذا الضرب اكاديمياً ذلك نسبة للمسؤوليه الجمه والتى تطلب التفرغ التام لها حيث لابد من الاستماع بتجرد وبتركيز وتكرار السمع للاعمال وتحليلها ماذوره ماذوره وحرف حرف وووووو وحتى لا اطيل عليكم المقدمه التوضيحيه لدور الناقد الفنّى والمحلل الموسيقى ومسؤولياته نحن لا نقدم نقد فنّى وتحليل موسيقى فى السودان بالشكل الصحيح واذكر مره واحده فقط كتبت تحليل عن اغنيه واستخدمت كل المصطلحات التحليليه واشرت الى الجماليات والى الاخطاء لم يتفهمنى الا الملمين بالموسيقى ولو يفترض ان المستمع والمتذوق الجيد يجب ان يكون له ولو قدر قليل من الالمام بالمصطلحات التى تستخدم فى النقد والتحليل الموسيقى ودى اساس مشكلة اغنيتنا السودانيه ان المتلقى لا يلم بقوانين اللعبه الموسيقيه كما يلم بقوانين كرة القدم لذا تجد التجارب تطرح وتقدم وتقيّم بدون المام كبير يذكر غير الفطرة الذوقيه
ولسه ح اجيك بس ما تقول لى احذف وعدّل
01-08-2012, 11:22 AM
محمد زكريا محمد زكريا
تاريخ التسجيل: 09-01-2009
مجموع المشاركات: 4909
الفطرة الذوقيه هى الانطباع الاول الذى يجعلك تشعر بأنك مرتاح للاستماع لعمل موسيقى او غنائى او فنّى وهذه الفطره يمكن ان تكون مبنيه على حسب مكونات البيئه المحيطه بنا والنشاءة ويمكن ان تكون مكتسبه حسب مرونه الشخصيه على التحور او التطور مع البيئات الجديده يا محمود مشاكل الموسيقى والغناء عندنا والتحدث فى امرها تحتاج بوست منفرد ووقت ومتخصصين ومتحاورين جادّين لو اطلت الحديث ح تقولوا على منظراتى عشان كده ارجع ليك لاغنيه التى قمت انت بلحنها والنقد هو عمليه ايجابيه فى المقام الاول تساهم فى تصليح المسارات الفنيه والتذوق حتى ولو كانت ايجابيه او سلبه فى نتائج خلاصتها نواصل فى مكان اخر يوماً ما المهم استمعت ولاول المره هذا الصباح قم اعدت الاستماع مرات عديده وذهبت ابحث عن النص حتى تكتمل الصورة فى ذهنى
اولا قبل كل شىء اقول لك اننى لا استمع الى عمل موسيقى الى نهايته واعيد الاستماع اليه ان لم ارى فيه ما يستوجب ذلك اذن اثمن اولاً على هذه التجربه اللحنيه والغنائيه فى شكلها العام تستحق الالتفات اليها وتحليلها وهى جديره بالنقد اؤكد من استماعى المكرر تأثرك ببعض الفنانين الكبار والتشرب من رحيقهم وهذا لا يحسب سلبياً على العمل ولكن يعطى حكم التشبيه بانه مثل عمل الفنان الفلانى يعنى العمل له خصوصيته فى اللحن والكلمات بشكله الخاص لكن فى الشكل العام فهو يشابه اعمال اخرى ولو انه يختلف وذلك اجده فى اللزمات الموسيقيه والكوبليهات ايضاً لاحظت عملية الركوزات فى الحرف الرابع من السلم نزولاً من الاوكتاف وتكرار الجمل نفسها هى من الاشكال السائده فى حقبة معينه من فترات الغناء السودانى اعترف انها حقبة الفنانين الكبار من ابوعركى ومصطفى سيد احمد الخ العقد الفريد وهذه محمدة وتعطى بعد ايجابى
نواصل ولا؟
01-08-2012, 11:41 AM
Mahmoud Mustafa Mahmoud Mahmoud Mustafa Mahmoud
تاريخ التسجيل: 11-26-2004
مجموع المشاركات: 4325
كويس نواصل ومن التسجيل الصوتى (the audio recording) نبتدىء اولاً اعيب استخدام المؤثرات الصوتيه بمبالغه مثل الصدى والتردد المتأخر echo or audio delay والملاحظ بوضوح منذ البدايه هذا المؤثر الصوتى جعل ترددات العزف على العود (عزف جميل ) تطغى على خط الميلودى وتشكيلاته مما اخل بالايقاع الزمنى ووتيرته the tempo وجعله غير متناسق مع المرجعات اللحنيه وجدت صعوبه فى تتبع المقدمه بسبب خلل الايقاع الناتج من المؤثر الصوتى او عدم وجود ايقاع داخلى ثابت للجملة اللحنيه خصوصاً عندما يكون هنالك مرجع لنفس الجمله اللحنيه الاساسيه والتى تقسممت الى اكثر من ثلاثه جمل كامله لذا يصعب تتبعها وحفذها بسهوله والحقيقه ان هنالك حسابات رياضيه عديل كده يمكن تتحسب عشان تعرف الخلل وين بالمناسبه هو ما بيظهر الا للناس الدارسين موسيقى فاطمئن ومن المقدمه التى اعيب فيها التكرار والتطويل اللحن مبنياً على ميزان ال 3/4 او الصحيح هو 6/8 المسمى عندنا بالسودانى ايقاع التم تم او هو balad بمسمى آخر وتستمر المقدمه على هذه الجمل المختلفه المكره الى بدايه الكوبلى الاول حيث الغناء والكلمات الشعريه وجدت ايضاً صعوبه فى تمييز مخارج الكلمات واعيب على التسجيل اما الاداء الصوتى للمغنى فهو رائع ولا ادرى لماذا لم تستثمر الصوت بعد فى مشروع فنان جاد اجمل شىء آخر هو عدم تطويل الاغنيه حيث لا يتعدى فترة زمنها الاربعة دقائق واكذا يفترض ان تكون مدة فترة الاغانى ولكن يمكن ان تقسم مكان الغناء بدلاً عن ان تغنى القصيده كلها فى كوبليه واحد كان يمكنك ان تختصر المقدمه فى عدم التكرار والتركيز على الكوبليهات الغنائيه وتقسيمها افتقد المركبات الهارمونيه طبعاً لان طريقتنا فى العزف على العود على انها آله لحن افقى بالرغم من انها آله يمكن عزف المركبات عليها عموماً هذه هى مشكله كبيره ومعضلة اغنيتنا السودانيه وهى التركيز على اللحن الافقى وتجاهل المركبات الهارمونيه واهميتها فى اللحن الاساسى وفى اثناء الغناء
الغلطه الكبرى التى قمت بها هى ان تطرح عمل غنائى للنقاش دون وضعه او طرحه بالطريقة السليمه حيث يجب ان تقوم بتسجيل نضيف وتنفيذ موسيقى مكتمل لكن لا عليك يمكنك القيام بتسجيل جديد وحاول الاستعانه بموسيقيين محترفين فى التنفيذ وكن جاداً وواثقاً بأنك تطرح عملاً يستحق النقد الجاد
العزيز محمود مصطفى محمود الى هذا ارجوا ان تعتبركلامى هذا نقد هادف وتحليل مبسط جداً والى مذيداً من التجارب الجاده والابداع
================= والى هنا نكتفى مع تحياتى الخالصه
Quote: اولاً اعيب استخدام المؤثرات الصوتيه بمبالغه مثل التردد المتأخر echo or audio delay والملاحظ بوضوح منذ البدايه هذا المؤثر الصوتى جعل ترددات العزف على العود (عزف جميل ) تطغى على خط الميلودى وتشكيلاته مما اخل بالايقاع الزمنى ووتيرته the tempo وجعله غير متناسق مع المرجعات اللحنيه وجدت صعوبه فى تتبع المقدمه بسبب خلل الايقاع الناتج من المؤثر الصوتى او عدم وجود ايقاع داخلى ثابت للجملة اللحنيه خصوصاً عند يكون هنالك مرجع لنفس الجمله والحقيقه ان هنالك حسابات رياضيه عديل كده يمكن تتحسب عشان تعرف الخلل وين بالمناسبه هو ما بيظهر الا للناس الدارسين موسيقى فاطمئن ومن المقدمه التى اعيب فيها التكرار والتطويل
يا الله عليك يا مورتون ياخي..
طبعاً معاك حق ونأسف للإزعاج..
ليس دفاعاً لكن الحقيقة إنه "العدة" التي استخدمتها في "تنفيذ" العمل دا
هي عبارة عن "سوفتوير" رخيص من النت...ولابتوب "قديم" وعود للاستخدام المنزلي...الباقي شوية إحساس وفطرة أرجو أن تكون سليمة..
وأكيد لاحظت برضو إنه هناك نوع من "الخفوت" في الصوت..لأنه الغرفة القاعد فيها ملاصقة لغرفة واحد جارنا لحيته حدها الحزام...
فشنو..بكون عايز أغني ..آخد راحتي..أمتع رويحتي دي...على طريقة الراحل بادي محمد الطيب...لكن..في الظروف المعاشة..
يمكنني أن أقول - بكل أسف - أنه ليس بالإمكان..أفضل مما كان..
لكن الواحد مبسوط الحمد لله...قول لي لشنو؟؟؟
لأنه أول حاجة العمل لقى اهتمامك...ودي براها بالدنيا...
وتاني حاجة..لأني حصلت على فائدة عظيمة وأفكار وتوجيهات ما كان لي أن أجدها لو اكتفيت بقول "رائع" ..."عظيم"...يا سلااااااااااااام"...
الحاجات دي بالمناسبة عمرها ما كانت دافع للتجويد...
Quote: لكن لا عليك يمكنك القيام بتسجيل جديد وحاول الاستعانه بموسيقيين محترفين فى التنفيذ وكن جاداً وواثقاً بأنك تطرح عملاً يستحق النقد الجاد
المافي شنو على قول قيقراوي... "مطر إيديك" بين إيديك...أعتبر النموذج دا عبارة عن Guide وأعمل فيهو إنت كمحمد زكريا العايزو..
يعني نرحب بأي سمكرات ولمسات توزيعية متخصصة..وأعد إرساله لنا ...على الأيمان أنا مستعد عن طريق الحبيب وليد عبد اللطيف
أحجز في أحسن استوديو وأركب صوت - قدر الصوت الفضل لينا دا - حتى بعد داك أرجعه ليك ترجيهو الحوت "صرة وخيت"...
قلت شنو؟؟ تكلفة البريد وأي أتعاب أخرى خليها علينا...
Quote: العزيز محمود مصطفى محمود الى هذا ارجوا ان تعتبركلامى هذا نقد هادف وتحليل مبسط جداً والى مذيداً من التجارب الجاده والابداع
الحقيقة لن أكذب وأقول ليك ح أعتبرو نقد هادف..لأني بالفعل - أكرر بالفعل أعتبر هذا "كنزاً" من المعرفة والتوجيه
لم يكن من الممكن العثور عليه لولا جميل اللقيا هنا في هذا المكان المحضور المقروء المسموع...
تفضل أخي باستلام أطنان المحبة ومساحات شاسعة من الاحترام والتقدير..
محمود العربي..
..
01-08-2012, 07:04 PM
Abuzar Omer Abuzar Omer
تاريخ التسجيل: 07-26-2008
مجموع المشاركات: 2109
Quote: أبو زر عمر سلام ياخ و مشتاقين تصدق موضوع البربوزل بتاع نجوم الغد أنا لسه ماشي فيهو كويس ؟ و غالباً في الأيام الجاية اصل نتيجه علي ضوها ح نتناقش نقاش طوووويل .
الحبيب سفيان عساك طيب،
يا عزيزى إن شاء الله الحاجات تجهز على نار هادئة، و نستفيد من الوقت فى دراسة التفاصيل. و متذكر أمر على بوسط خليل ( الولد فعلاً غناى). و الناس البتقول ما عندو صوت حقو، أو ما عندو خصوصية. دى كلها غلطات اللجنة الفنية. المفروض أول حاجة، يخلوا الواحد يعرف إمكانته و نوع صوته و حدود الصوت. الشاب بغنى فى المناطق الأمنة للصوت، لكن ممكن يمشى فى الغليظ لحدى عمق كبير. كان يختاروا ليهو يغنى لى أبو داؤد مثلاً. المهم لنا عودة..
مودتى..
01-08-2012, 07:40 PM
Abuzar Omer Abuzar Omer
تاريخ التسجيل: 07-26-2008
مجموع المشاركات: 2109
Quote: نحن لا نقدم نقد فنّى وتحليل موسيقى فى السودان بالشكل الصحيح واذكر مره واحده فقط كتبت تحليل عن اغنيه واستخدمت كل المصطلحات التحليليه واشرت الى الجماليات والى الاخطاء لم يتفهمنى الا الملمين بالموسيقى ولو يفترض ان المستمع والمتذوق الجيد يجب ان يكون له ولو قدر قليل من الالمام بالمصطلحات التى تستخدم فى النقد والتحليل الموسيقى ودى اساس مشكلة اغنيتنا السودانيه ان المتلقى لا يلم بقوانين اللعبه الموسيقيه كما يلم بقوانين كرة القدم لذا تجد التجارب تطرح وتقدم وتقيّم بدون المام كبير يذكر غير الفطرة الذوقيه
Quote: يا محمود مشاكل الموسيقى والغناء عندنا والتحدث فى امرها تحتاج بوست منفرد ووقت ومتخصصين ومتحاورين جادّين لو اطلت الحديث ح تقولوا على منظراتى
من الاقتباس الأول، أود التأكيد على أهمية النقد فى كل ضروب الابداع. و الملاحظ لساحات الإبداع عندنا فقرها للنقاد، لذلك لا يحدث التطور المنشود و تظل مسألة التكرار هى السمة السائدة. أما عن مدى استعدادية المتلقى العادى ( ذينا كدة)، فهى موجودة، مكللة بالرغبة الأكيدة فى المعرفة و التطلع القلق، لرؤية غد أجمل و أكمل ينتظم كل شئ يخص الوطن.
من الاقتباس التانى، أقول ليك ( المافى شنو؟؟)..
فى اعتقادى، الميزة الأهم للموقع هى وجود متخصصين فى كل المجالات، يملكون الرغبة الأكيدة فى رفع مستوى الفهم و تطوير أمكانات الغير فيما يخص مجالهم. و على ذلك يمكن أن تقيس. لذلك لا أميل مثلاً لمسألة الكاتب المفضل، فكل صاحب دراية و موضوعية، (مفضل). إذا كان الأمر يتعلق بمجال معرفته و إبداعه..
ختاماً يا سيدى العزيز لقد طربنا لمداخلاتك القيمة، و لك أن تكثر من التنظير، لأن له معجبين برضك..
01-08-2012, 07:42 PM
محمد زكريا محمد زكريا
تاريخ التسجيل: 09-01-2009
مجموع المشاركات: 4909
Quote: المافي شنو على قول قيقراوي... "مطر إيديك" بين إيديك...أعتبر النموذج دا عبارة عن Guide وأعمل فيهو إنت كمحمد زكريا العايزو..
يعني نرحب بأي سمكرات ولمسات توزيعية متخصصة..وأعد إرساله لنا ...على الأيمان أنا مستعد عن طريق الحبيب وليد عبد اللطيف
أحجز في أحسن استوديو وأركب صوت - قدر الصوت الفضل لينا دا - حتى بعد داك أرجعه ليك ترجيهو الحوت "صرة وخيت"...
قلت شنو؟؟ تكلفة البريد وأي أتعاب أخرى خليها علينا...
ياخ كلمات مفرداتك بس تنم عن ذوق واحساس وما تنسى القاسم المشترك فى محبتنا للحوت وعشان الحوت مستعدين على عمل اى شىء بس نلقى الوقت وربنا يقدرنا مع بعض على ما فيه الخير لهذا الفنان الراقى بس من هنا بالله كدى نركز فى موضوع سفر الحوت نفسه وموضوع البوست وزى ما علمت انا وانت حقوا نعلم المعجبين والمتابعين ونملكهم اخر التطورات ولا شنو؟ عشان الناس تطمئن شويه محمود يا خوى انت قايل التوزيع والسمكرة دى حاجه ساهله ولا شنو؟ دى بتاخد الزول من كل الكون الحولو يعنى لازم يتفرغ تماماً كم يوم لو ما كم اسبوع ياخ ايام ساورا عمل توزيع واحد قعدنى فى اوضتى تلاته ايام متواصله المهم اطمئن مطر ايديك ح تتسمكر ان شاء الله وتطلع فى ثوب جديد بس نتابع بهناك
Quote: من الاقتباس الأول، أود التأكيد على أهمية النقد فى كل ضروب الابداع. و الملاحظ لساحات الإبداع عندنا فقرها للنقاد، لذلك لا يحدث التطور المنشود و تظل مسألة التكرار هى السمة السائدة. أما عن مدى استعدادية المتلقى العادى ( ذينا كدة)، فهى موجودة، مكللة بالرغبة الأكيدة فى المعرفة و التطلع القلق، لرؤية غد أجمل و أكمل ينتظم كل شئ يخص الوطن.
من الاقتباس التانى، أقول ليك ( المافى شنو؟؟)..
فى اعتقادى، الميزة الأهم للموقع هى وجود متخصصين فى كل المجالات، يملكون الرغبة الأكيدة فى رفع مستوى الفهم و تطوير أمكانات الغير فيما يخص مجالهم. و على ذلك يمكن أن تقيس. لذلك لا أميل مثلاً لمسألة الكاتب المفضل، فكل صاحب دراية و موضوعية، (مفضل). إذا كان الأمر يتعلق بمجال معرفته و إبداعه..
ختاماً يا سيدى العزيز لقد طربنا لمداخلاتك القيمة، و لك أن تكثر من التنظير، لأن له معجبين برضك..
هى اوضاع لافرازات اوضاع اخرى والدليل هى هجرة الكثير من اهل الفن الذي كان يمكن ان تتمرحل على اياديهم مهمة نقل الرساله الفنيه ونقلها الى الاجيال المتعاقبه هنالك فجوة وفاقد تطور مرحلى فى النقد الفنّى حتى فى التحصيل الاكاديمى والدور الاجتماعى اللهم الا الطفرات الفرديه هنا وهناك واشتغل المهتمين والمتخصصين بمهام اخرى فى غير نطاق تخصصاتهم انا القدامك همومى اصبحت اولاً تنظر الى الوضع السياسى بشكل عام ومهموم بمآلاته وانعكساته على المجتمع السودانى فى كل نواصيه الثقافيه والفنيه والرياضيه والاجتماعيه والاقتصاديه الخ ياخ ما تتور علينا الهموم علينا فقط ان نتأمل بان شمس الابداعات ستشرق فى كل صباح جديد مع من يتحفونا بها ونتأمل ان يتحقق الحلم بوضع اجمل مع كل شحنة طاقة يبثونها فى دواخلنا المهلكه بالترقب والامال والانتظار
============= تحياتى يا زول يا رائع
الاستعجال ما كويس ...بيعمل اخطاء املائيه عشان نعدلها
(عدل بواسطة محمد زكريا on 01-08-2012, 09:55 PM) (عدل بواسطة محمد زكريا on 01-08-2012, 10:17 PM) (عدل بواسطة محمد زكريا on 01-09-2012, 07:45 AM)
01-09-2012, 05:17 AM
Mahmoud Mustafa Mahmoud Mahmoud Mustafa Mahmoud
تاريخ التسجيل: 11-26-2004
مجموع المشاركات: 4325
الى كل الحواته والمهتمين بالشأن الحوتى نبشركم بأنه قد تلقينا ايميلات من النوع السمين يبدو فيها تضافر الجهود والعمل قائم على نار هادئه والشغل بداء ينجض فترقبوا معانا الاخبار المفرحه قريباً
01-12-2012, 12:12 PM
Mahmoud Mustafa Mahmoud Mahmoud Mustafa Mahmoud
تاريخ التسجيل: 11-26-2004
مجموع المشاركات: 4325
ياخ بى صراحة، أنا بعتقد أن الأزمة الفنية و حالات الهبوط الاختيارى حلها فى مسألة ال Co-writer و طبعاً مرجع ذلك لعدم أمتلاك فرد لكل الخيوط.. حتى القاصد مصطفى سيد أحمد، ظهرت فى بعض الأغنيات مسألة تشابه الألحان..
لذا أنا بصدد مشروع يؤكد هذا التصور. أحتاج مساعدتك و لى قدام المختصين ناس محمد زكريا. شجعنى عشان أعرض عليك بقية الأعمال. حقيقة أنا فى الأشد الشوق لأغنيات الوطن فهلا اجتمعنا لنغنى للوطن!!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Mahmoud Mustafa Mahmoud
الفاضل يسن عثمان
وليد عبد اللطيف
بخاري عثمان الامين
معاوية عوض الكريم
محمد زكريا
سفيان بشير نابرى
هشام عباس
ياسر السر
Awad Elkarim Babiker
عمر الفاروق
منوت
محمد ادم الحسن
Abuzar Omer
أمجد الزين
طارق عبد اللطيف نقد
فيس بوك
تويتر
انستقرام
يوتيوب
بنتيريست