شحاد في نيويورك أحسن من صاحبنا دا في الخرطوم!
# هو صديقي وأخوي وصديق قديم من أيام الدراسة بس خلاص عذبنا بجد من تمغرب الواطه قاعد لحدي ما نتشعي بعدا حتين يفر يمشي بيتو المرض دا شنو والله أنا صابر عليهو سنين وما زعلتو أبدا العشرة ما بتهون أنا ح أحكي ليكم قصتو بس ما تضحكوا وتقولوا عني ( أبو الزهراء طحس) في شتاء 1988 كنت طالب في بيت الامانة الثانوية جانا مرفودمن محمدحسين الثانوية بسبب الملاسنة مع أستاذ في المدرسة المهم كان باقي للسنة شهور وهو ممتحن معنا شهادة بقت علاقة قوية بنا كمجموعة من وسط أمدرمان لانو عمو ساكن في بيت من بيوت السجن في الملازمين وهومعهو وهو من أولاد أم عضام قال حله في الجزيرة الزوال شاطر جدا بس ما عندو أي حس أجتماعي ومنتهي البرود طبعا أخوك من أيامو الطالب بحبالليالي الملاح والطرب والجكس العصري فقمت بتدريبو علي الاصوال المتعارف عليها من الملبس وطريقة الكلام وكمان المزاج العالي جدا يعني( مريسه ما معنا) أشرب نضيف يصح بدنك وكدا المهم كانت عندو ميزة ولازالت هي أنو من حفظة أغاني الحقيبة علي طريقة الفنان بادي محمد الطيب عطر الله ثراهاوصوتو معقول في عوالم البهجة وكمان ليهو حضور خصوصا لو قلع النضارة أخونا نجاح وكمان دخل طب جامعة الجزيرة طب شوف الدنيا بقي يغيب بالشهور لكين من يوم ماأتخرج بقي أساسي قبل الكراسي في صالون أبوالزهراء العامر دوما طبعا نحن شله مكونه من أربعة أعضاء نحجب العضوات بسبب الحرج الاجتماعي وعشان الظلاميين ما يقولوا أبو الزهراءمن الذين يودون أشاعة الفاحشة بين المسلمين والمسلمات واحد فيهم من الاربعة العظام أعضاء الصالون المسائي شغال في بنك والتاني عامل فيها رجل أعمال وهو نصاب عديل ألله يغفر ليهو ويسامحوا بس والله هو ظريف وزوال نكته والتاني مستشار قانوني كبيروالتالت ومو زوالي العكليته والله يا جماعة نائب أخصائي عديل كدا والعبدلله هو الرابع وصدر المجلس ومخرج الليلة وصناع المناسبات وضيء ليالي السماحات والحالم الرهيب صاحب العوالم الجميلة والسرير الوثير دا غير الالقاب التي تخلع علي سعادتنا من خلال التواصل الاجتماعي الانساني المتفرد ومساحات الحرية والبهجة الني نماحها لكافة الاخوة والزوار من كل بقاع الدنيا عند ما يكونوا بين ظهرانيننا المهم طبعا فترة الامتياز قضاها في مستشفي بحري بعدين بواسطة أصدقاء تم تعينو في مستشفي أمدرمان وعيونكم ما تشوف ألا النور أخونا أنتهت ساعات العمل الرسمية يجي ماري أها الليلة كيف يا خي أنا قاعد كان ماشي أي مشوار أنت معاي يقولي يا خي أنادي عارفه بس المزاج كيف والتحضيرات للمعلب أقوليهو سعادة المستشار هو المسئول من السوائل أنا بتاع حله بس برضو يسأل تاني يعني بلدي ومستورد أقوم بكل أدب أقول (ياخي نحن أنا وأنت المستورد ما بحوق فينا خليك واقعي ومعقول وتعال بعد صلاةالعشالانو ضربة البداية دايما عندنا الساعة تمانية ونص بعد ما يضمن ليلتو حتين يفراقني برجع تاني مع ضربة البداية يغني أغنية يشرب معها أربعة جرعات طويلة جدا ترمي الجمل أستمر الحال وأنا صابر لانو والله بالرغم من حالة البخل اللي فيهو فنان لايشق لا غبار المهم طبعا ممنوع بقرار جماعي من الشلة من أن يمد يدو للحلة وهو من الناس اللي سرقوا فرختي المحمرة ديك تذكروها الممهم أمتحان برت وان في الباطنية بالرغم من لعبوا والفوضي اللي عايشا نحج قلت خلاص ياولد ح يمشي أو يتنقل لمستشفي تاني لا حياة لمن تنادي بقي أرسخ من أول في المستشفي والشلةوبقي شريك أصيل في كل المعاملات الدنيوية حتي جكسويتي السابق ورثاالمهم بالعربي بقي زي ضلي لكين ربكم ما كريم معي قام قدم لوظيفة في برنامج الايذا في أثيوبيا بالله زي العارفين أنو أنا خلاث روحي مرقت ونفسي كرهتو طوال قبلواورسلوا ليهو التذكرة وأمس كنا عاملين ليهو قعدة الوداع وفي خطاب الوداع اللي قلتو ليهو اللي كان طويل جدا وعددت فيهومناقب المسافر وفي نهايتو ( لقدكنت بيننا زي الفانوس كل ليلة تكوس من قهوة المسا لقعدة مزاج تغني لينا ياصاحب الكاسات الطوال لكم نصحتك بأن الشحاد في نيويورك أخير منك يا نائب الاخصائي الفانوس الحمد لله اللي بعدك مننا وطوال ربي غربتك وأنشالله البرنامج دا يكون عمرو عمر البحور وبالله لما تكون عندك أجازة الدنيا كبيرة أكبر من ليالي أبو الزهراء العامرة وجميلة أجمل من عيون نسرين اللي سرقتها مني وكان سويت قروش أمشي أتخصص بوشك ما تجيء السودان قريب وح ندعو ليك بالنجاح وطول الغربة أخصائي الليالي الملاح وداعا الصديق اللدود مختار العنزه من أبناء قرية أم عضام ريفي المعاليق وداعا وشربنا نخبا بعدها وكان العشاء سمك وأطباق أخري فاخرة لا أذكرها وداعا من أخترق كل أشيائي الخاصة وسرق جكسويتي نسوا الدهباية وداعا أنشالله أشوفك يا صديق في الجنة . كنت صادق جدا معكم ومع نفسي ....! ومع الاعتذر لكل نواب الاخصائيين الكرام (لكين كان عله حقيقة) (عدل بواسطة زهير عثمان حمد on 01-16-2012, 07:27 AM)

01-15-2012, 06:09 AM

محمد البشرى الخضر

محمد البشرى الخضر
تاريخ التسجيل: 11-14-2006
مجموع المشاركات: 28869

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: شحاد في نيويورك أحسن من صاحبنا دا في الخرطوم! (Re: زهير عثمان حمد)
اريتك صاحب اليابا, دا شنو شيل الحال دا يعني الواحد كان جاك معزوم لازم يدفع الشيرنق و يكتبك ايصال

01-15-2012, 06:24 AM

Ahmed Abdallah

Ahmed Abdallah
تاريخ التسجيل: 08-12-2005
مجموع المشاركات: 5193

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: شحاد في نيويورك أحسن من صاحبنا دا في الخرطوم! (Re: محمد البشرى الخضر)
ابوحمار ده قالو بعمل كوكة اعمل حسابكـــــــ

01-15-2012, 04:40 PM

زهير عثمان حمد

زهير عثمان حمد
تاريخ التسجيل: 08-07-2006
مجموع المشاركات: 8273

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: شحاد في نيويورك أحسن من صاحبنا دا في الخرطوم! (Re: محمد البشرى الخضر)
أخي وصديقي ودالبشري تحياتي والله أنت دايما ظلمني أخوك أكرم من السيف بس دا أربع سنوات حسوما وبعدين طماع جدا حتي جكسويتي القديم أستحوذ عليها ولكين أخيرا جانا الفرج من الله فوق لك ودي أنت حسي وين في الشارقة ولا أبوظبي

01-15-2012, 06:08 PM

محمد البشرى الخضر

محمد البشرى الخضر
تاريخ التسجيل: 11-14-2006
مجموع المشاركات: 28869

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: شحاد في نيويورك أحسن من صاحبنا دا في الخرطوم! (Re: زهير عثمان حمد)
انا اسي في العين يا قريبك اها قلت ليك حنّك من الدامة !! طبعا دكتور و وجيه وبتاع اداك الطراوة و سلّمك الفاضي يا صاحبي لكن شينه منو ياخ بين الأخوان - بالذات أخوان الحلّة - في كود اوف كوندكت معليش يا معلّم تعيش وتتّرتح

01-15-2012, 07:40 PM

Salah Abdulla

تاريخ التسجيل: 03-15-2006
مجموع المشاركات: 3169

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: شحاد في نيويورك أحسن من صاحبنا دا في الخرطوم! (Re: محمد البشرى الخضر)
والله يا أبوالزهور خوّفتنا منك عديل!! ياخ أنا ده ممكن هسي دي أجيب صحبانك ديل واحد واحد، بس بوصفك ليهم ده!! يعني لو الواحد جا يتونس معاك، بكرة يلقى قصتو في نشرة تسعة واللا كيف!!

01-15-2012, 09:58 PM

Salah Abdulla

تاريخ التسجيل: 03-15-2006
مجموع المشاركات: 3169

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: شحاد في نيويورك أحسن من صاحبنا دا في الخرطوم! (Re: Salah Abdulla)

Quote: ابوحمار ده قالو بعمل كوكة
اعمل حسابكـــــــ

كاااااااااك..
أتاريه ، أنا أقول الناس دي بتكورك مالها!!!

----
أحمد عبدالله ، قالوا صوت الكوكة زي صوت الضب، الكلام ده صحي؟؟

* أضفنا (واو) الجماعة..

(عدل بواسطة Salah Abdulla on 01-16-2012, 05:54 AM)

01-15-2012, 10:13 PM

زهير عثمان حمد

زهير عثمان حمد
تاريخ التسجيل: 08-07-2006
مجموع المشاركات: 8273

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: شحاد في نيويورك أحسن من صاحبنا دا في الخرطوم! (Re: Salah Abdulla)
أخونا صلاح عبدالله تحياتي والله يا صديقي ماكدا وكمان أنت ماعارف مدي صحة المعلومات دي يا شيخنا كلهامعلومات مضروبه بالله ياجماعة أحسنوا الظن بالرفيق أبوالزهراء (عدل بواسطة زهير عثمان حمد on 01-16-2012, 04:19 AM)

01-15-2012, 10:31 PM

زهير عثمان حمد

زهير عثمان حمد
تاريخ التسجيل: 08-07-2006
مجموع المشاركات: 8273

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: شحاد في نيويورك أحسن من صاحبنا دا في الخرطوم! (Re: زهير عثمان حمد)
ياود البشري ياصديقي هو نفسو سغيرا وهي جربانه وخلاص أنكشف المستور وربنا فكني من الاتنين دامه وأس أسود أسمعني البلد اللي أنت فيها دي ما فيها بيوت عاليه أقصد عمارات وكدا

01-15-2012, 11:08 PM

خضر الطيب

خضر الطيب
تاريخ التسجيل: 06-24-2004
مجموع المشاركات: 10323

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: شحاد في نيويورك أحسن من صاحبنا دا في الخرطوم! (Re: زهير عثمان حمد)
والله يابو الزهور بالغتا مع صاحبك دا ياخى فى داعى للفضائح؟؟ الستره واجبه

01-16-2012, 04:23 AM

زهير عثمان حمد

زهير عثمان حمد
تاريخ التسجيل: 08-07-2006
مجموع المشاركات: 8273

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: شحاد في نيويورك أحسن من صاحبنا دا في الخرطوم! (Re: خضر الطيب)
الاخ خضر الطيب تحاياي دا كلوا عشان أنعدل الزوال دا ودي أسمها الاصلاح بالتشهير

01-16-2012, 07:13 AM

Mohammed Ahmed Saeed

Mohammed Ahmed Saeed
تاريخ التسجيل: 12-19-2005
مجموع المشاركات: 690

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: شحاد في نيويورك أحسن من صاحبنا دا في الخرطوم! (Re: زهير عثمان حمد)
الاخ زهير تحية وتقدير لمن اللة انعم عليك وفكاك منو كشف الحال لزومو شنو ان كان مااوردتة صحيح فابشرك بانك اغتلت صديقك معنويا فى ام عظام وكل القرى المجاورة وكل ما اوردتة سوف يحسب علية وخصوصا الاسافير مفتوحة وبدون حدود.

01-16-2012, 10:34 AM

قيقراوي

قيقراوي
تاريخ التسجيل: 02-22-2008
مجموع المشاركات: 10380

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: شحاد في نيويورك أحسن من صاحبنا دا في الخرطوم! (Re: Mohammed Ahmed Saeed)

Quote:
واحد فيهم من الاربعة العظام أعضاء الصالون المسائي شغال في بنك والتاني عامل فيها رجل أعمال وهو نصاب عديل ألله يغفر ليهو ويسامحوا بس والله هو ظريف وزوال نكته والتاني مستشار قانوني كبير والتالت ومو زوالي العكليته والله يا جماعة نائب أخصائي عديل كدا والعبدلله هو الرابع

لووووووووب
ديل خمسة يا ابو الزهراء ياخي

-----

ذكرتني خالي - الله يرحمو - كان لمن يحكي نكتة بنس ننتظروا عشان نحسب ليو الشخصيات الصرح بعددها في المدخل ..
غالباً بجلّيها زيك كدا!!

يقول ليك "كان في تلاتة انفار .. " و القصة كلها تكون عن وااااااحد!!

01-16-2012, 11:08 AM

عبد الناصر الخطيب

عبد الناصر الخطيب
تاريخ التسجيل: 10-25-2005
مجموع المشاركات: 5180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: شحاد في نيويورك أحسن من صاحبنا دا في الخرطوم! (Re: Mohammed Ahmed Saeed)
. يا زهير أدامك الله وأبقاك , عّدلت مداخلتي من مبالغة ... حيث أردت التعليق علي صاحب ((الطوال)) ومفيدها المختصر إن جلسات الأصحاب وسمرهم ... إن رفقها كؤوس .. تستدعي القصار وقصار القصار إن جلس الناس ليسهروا ويسمروا .... فالاخري تشي دوما برجل قلق , عجول يعب الطوال كالماء لا ليرتوي من ظمأ ... لكن ليطفي نار تشب في دواخله هم وقلق .... يحسب أنها تتبدد كلما شرب وهو في ذلك واهم ...وهذا الرجل ليس جليس مثالي ... ومن الأفضل له أن يشرب طواله واحد بعد الأخر وحيدا في بيته قبل أن ينام لان لجلسات الأصحاب معني أخر تماما ... والرجسترار ( نائب الأخصائي ) صاحبك الذي تهجوه مثله كثير بين الناس سائر , فكثيرون متى عبو طوالهم بدو في اللغلقة والونسة .... في القصص الميته , لكن للحق قلة منهم تذكر الجكس المسروق ... أو المقلوع رجالة وحمرة عين ... فكن متفائل دوما إن ما يأتي دائما أجمل .... ودونك القائل لا انظر الى ما لم أفت طمعا ولا أبيت على ما فات حسرانا ... فما يمضي يمضي دون أسي أو حسرة والناس ولاد يومهم ومتي ما إجتمعوا في ساعة حظ ... وجب أن يستثمروا لحظتهم فيما يفيد ويبدد الهم ويجلب الفرح حتى لا تصبح جلستهم ..........حائط مبكي ... لكنك تبقي المتفرد والخطير ... يا صاحب السرير الوثير وإن كان لم يبلغني خبر مشابه لسريرك ... غير كرسي لرجل يكني بالرب نواحي الموردة ... لا أعرف عنه غير السيرة وكرسيه الأكثر طولا من كراسي الجميع في جلستهم ... (( ياروحي أنصفني من ظلمك لانو قاسي ..... )) إن ما صاحبها العود ونقّر عليه فكان وتر وإيقاع معا .... يتقدم الليل حتى يكاد يتعثر على مداخل الصبح الجديد ويتفرق الناس وما من قوم أكتمل جمعهم يوما ولم يتفرقوا ... وهكذا الدنيا ... ستمضي الأيام ثم تتذكر صاحبك بحنين غريب لتلك الأيام وهكذا دورة الزمن يرى الناس دوما ما مضي بكثير من الحنين .... فانتظر قليلا ...ثم أكتب عن صاحبك صاحب ((الطوال)) عفاه الله وفرج كربه ...... أمس كتبت بتهّور ثم محوت على الأقل المنبر في حزن وحداد الرجل صاحب الشموع أنطفي له الرحمة والمغفرة , غير أن المرء في مجتمعنا بحاجة لبعض الوقار أو كثيره .... إن اتصل الأمر بالطوال , عندها الناس تراهم يصمتون فبعض الأمور إدعاء الجهل بها أبلغ من الخوض فيها ....... فأمل أن تدرك ذلك في مقبل الأيام أن أصحاب الطوال أنفسهم لن يغفروا لك قصارك وطوالك إن ما بدي لهم ما أعلنت وإن أخفوه هم ... وسلمت يا صاحب السرير الوثير أقرؤك من حين لأخر وأتابع حروفك ..... وتجعلني أراهن أني سأبتسم ثم أضحك ليس منك او عليك لكن من زماننا ........ ------------------------------------------- # وربنا يحفظك ويحميك من النظام العام فلهم طوال أخرى من عنج (عدل بواسطة عبد الناصر الخطيب on 01-16-2012, 11:10 AM) (عدل بواسطة عبد الناصر الخطيب on 01-17-2012, 10:50 AM)

01-19-2012, 07:27 AM

عبد الناصر الخطيب

عبد الناصر الخطيب
تاريخ التسجيل: 10-25-2005
مجموع المشاركات: 5180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: شحاد في نيويورك أحسن من صاحبنا دا في الخرطوم! (Re: عبد الناصر الخطيب)

.

وللحديث صلة يازهير الخطير صاحب السرير الوثير :

Quote: برضو يسأل تاني يعني بلدي ومستورد أقوم بكل أدب أقول (ياخي نحن أنا وأنت المستورد ما بحوق فينا خليك واقعي ومعقول

ومن ما شابهها من السير والأخبار, أن صاحب ما أراد أن يكرم أصحابه , بزجاجين من الويت هورس _ ويسكي _
فحضروا وهم في ونستهم عن المستورد النضيف ... شربوا الزجاجات وعندها قال قائل منهم ياجماعة عوزين نبدأ القعدة وينو العرقي !!! ........
فأحبط الرجل أيما إحباط وتحسر على نضيفه الذي بدده عليهم , وما بين المستورد الممحوق والبلدي البحوق ...
تاريخ قد يكون بتاريخ وجود الجنس البشري في السودان والبلدي في عرف أهل السودان أتصل منه بالقديم ( المريسة )
وكان لها في سالف العصور أماكن تقدم فيها ( الاندايه ) ولها مبان من طين او قش ترفع فيها رايات بمثابة المنارات السوامق التي تهدي اليها ..............
حيث تصب في قرعة بيضاء , ( مد قرعتك ) ثم مضت قرعت المريسة وإن ظلت القرعة مجازا لأشهر انيه شرب عرفها أهل السودان وبعض أهل جواره ...

حيث يتم صنع المريسة من المواد المحلية المتوفرة وأهمها الذرة . والدخن والموز وغيره .. ومن أسمائها الكثيرة جدا الدكاى .. وأم تف .. وأم بلبل .. والعسلية .
.والبقنية .. الحسوة .. وكبس التور .. البغو .. قدو قدو .. الوِرد ... وكان للناس طقوسهم في شرب المريسة من كأس ( المسحه ) وهو الكاس الذي يقدم عند دخول الرجل للانداية
وحتى فك السّكره صباحا ......... بأم فتفت ....

وقد تجد في كتاب ( الأندية ) للمرحوم الطيب محمد الطيب صاحب الصور الشعبية توثيق أجمل مفصل في إنسياب وجزاله ...
وقد تكون المريسة في التراث والإرث التاريخي .... بعض ما شرب إسماعيل باشا وهو في ضيافة المك نمر قبل أن يحرقه ........
غير مأسوف على شبابه الغض

ثم أفل نجم المريسة على ما يبدو وتسيد العرقي الموقف و خلفها على اللقب وأصبح هو ((( البلدي))) دون منازع ......
ولا عزاء للقدود قدو وقدو قدو _ صاحب السوط _ وذكريات الصبا الباكر لتمر المريسة ( المّشك )
وهو ملقي على قارعة الطريق ... للغنم والطير فيه نصيب
ثم أصبحت السيرة كلها بعض من صحو الذكري المنسية وإن بدت ذكريات بعيدة واحينا منكوره ,و الشينة منكورة

---------------
# وإن مد الله في الاجل قد أعود لاتكاءة أخري يا صاحب السرير ............

(عدل بواسطة عبد الناصر الخطيب on 01-19-2012, 07:28 AM)
(عدل بواسطة عبد الناصر الخطيب on 01-19-2012, 07:49 AM)

01-19-2012, 11:04 AM

زهير عثمان حمد

زهير عثمان حمد
تاريخ التسجيل: 08-07-2006
مجموع المشاركات: 8273

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: شحاد في نيويورك أحسن من صاحبنا دا في الخرطوم! (Re: عبد الناصر الخطيب)
يا صديقي عبدالناصر الخطيب تحياتي العاطرات لكم أثلجث صدري بما كتبت وأيقظت في شجون رهيبه أنها متعة العقول وتزجية القلب المعلول وبهجةالوقر عندما تغيب الافراح أني صادق لقد أحتفلت بهذه الكلمات أيما أحتفاء ونزلت علي برد وسلام ومتعك ربي بمباهج الدنيا وجعلك من أقوام الحبور والسمر أذكر في كتاب المرحوم الطيب محمد رحمهالله الاندية (أغنية العسلية) تبدأهكذا عسلية أمونة ونيفسه الاحلي من الشري أبو كديسه أنه سفر قيم تكلم عن الاندية بصدق الباحث وولع أهل السودان بالبهجة دمت لي صديق

[رد على الموضوع]

صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]