حوار هادئي مع تبارك، حول مفهوم دولة غير جهوية لكل السودانيين.

Quote: بوست متعة سلام يا بشاشا، تبارك والدفعة قيقراوي الانا مستغرب ليهو لييه بشاشا مصر ينتظر في راس التمنتاشر لمن الكورة تجيهو مدردقة عشان يجيب القون! بشاشا في وادي (انا خابرو) واخونا تبارك في وادي آخر، وكل دقيقة والتانية بشاشا يقول لي تبارك لا ياخي انت لسه ما فهمتني، كيزان شنو ونيفاشا شنو الكلام الفوق دا ممكن تتجاهلوهو بكل بساطة نقطة سطر جديد انا اتفق مع بشاشا، حتى وان لم يفصح الى الآن عن آلياته لتفكيك ماهو قائم الآن (منذ 56) لخلق دولة غير جهوية فذات الامر يؤرقني جدا انا مشكلتي ليست مع الدستور، او البرلمان او .... الخ (بالمناسبة دي عندنا دستور مكرب جدا) فعلا النظام القائم من 56 او حتى من قبل كده فيهو مشكلة كبيرة جدا، يعني في عضم الدولة نفسها عضم الدولة هو شنو بي فهم بسيط؟؟ هو انسانها، لمن يكون في مشكلة في عضم اي شغلانه تاني اي محاولات للتجميل بدستور (مكرب) وبرلمان كبير وفيهو تمثيل نسبي وخرتمية وزير ... دا كله ما بنفع انو القصة ح تمشي لثورة مسلحة او غير (في الغالب الاعم ستكون مسلحة) فيا تركب سفينة الثورة دي يا تلجأ لجبل قد يعصمك من الطوفان او تتلحس نرجع لحتة انسان السودان اللهو عضم السيستم السيستم الفي سودان قبيح لاقصى درجة، اسغلالي حد الاستعباد، ما منو رجاء والقصة اي زول شايفها وعامل منها نايم او ما حاسي بيها او لا يعتقد انها مشكلة اساسا اي حافلة في الموقف لو كان سايقها زولا ازرق فاحتمال انه سواق اجير فيها زي 90 في المية كده اي بالضرورة ان مالكها بالضرورة جلابي اي شمالي شايل طورية وماشي جهة الحواشات في الجزيرة فبالضرورة هو ماشي حواشتو، اما لو سألت اي غرباوي في نفس الجهة فلابد وان الاجابة ستكون - ماشي حواشة فلان - بالضرورة جلابي وشايفك يا تبارك جيت على سيرة ما يحدث بالجزيرة - ساعود لمداخلتك مرة اخرى - وهنا ممكن شوية احاول ابين الفرق بين وجهات النظر ولييه بشاشا بعتبرو للآن حوار طرشان استشفيت من كلام تبارك عند ذكره لحوادث كنابي الجزيرة انو بتكلم عن عنصرية ودا كلام ما صاح ومفروض يتعالج والقانون يتصلح والدستور يتفعل والعنصريين ديل يتأدبوا ... الخ اما بشاشا ما شغال بقصة العنصرية دي كتير، وانو القانون مفروض يشتغل والبقول لزول يا عب ودوهو السجن ... بشاشا بسأل او بفترض انو الثورة دي لمن خلاص الهردبيس ينتهي الزول الغرابي دا يكون مالك واطة في الجزيرة زيو وزي اي زول تاني جلابي وللا شريفي بشاشا داير يضرب السيستم المندسي داك THE UNWRITEN LAW بين الجلابة، علي باليمين ديل عندهم سيستم اسكت ساكت بس ما عراف قبل فترة مع التشكيلة الوزارية الجديدة زي القريت لي عنوان بوست لواحد من دارفور مبسوط انو التشكيلة الجديدة فيها ستة وزراء ووزراء دولة من دارفور عيييييييييييك على قولك يا بشاشا ما داير احلف ساكت، لكن لو مجلس الوزراء كله بقى غرابة، مجلس شنو بي بشيرهم زاتو لو قام من الكرسي وال 66 وزير من دارفور، دارفور دي ما تتحرك بنط واحد في التنمية لو الجلابة ديل قالو اوكي بنك الشمال - سيدي الميرغني سيتي بنك - سيدي المهدي (هو هسع عندو بنك شنو) بنك فيصل - الكيزان ولسه الجلابة ماشين في السكة يمدوا السواد الاعظم من انسان السودان عايش على هامش ما يتيحه السيستم (نميري - احزاب - كيزان - عبود) ما فرقت الليلة نزرع قصب - خلاص نزرع قصب، تلاتة انفار بحددوا لزي كم الف من العمالة الموسمية مسار حياتهم الليلة بايتين في كنانة وللا نمشي نحصل لقيط القطن في طابت؟؟ ياهو كده، بس لافين في محيط ومزاج من يمتلك البنوك، شركات الاستيراد والتصدير، الوسطاء، الوكالات الاجنبية، شركات النقل ساهرتوا بينا جاو

وها أنت و أنا و الكثير من إبناء "الجلابة" مغتربين نسعى لرزقنا كالآخرين بالضبط
وأين ميزك السيستم قانونيا ولا رسميا عن الآخرين؟؟؟
دخلت جامعة الخرطوم بإجتهادك ... ودخل معك الكثير من "المهمشين" بإجتهادهم برضه ...
ورينى السيستم فرق بينك وبين د. خليل - عليه رحمة الله - بشنو؟؟؟
ولا بينك وبين الجنرال إيدام ...
ولا بينك وبين تراجى القانونية وصاحبة الجمعية إياها ...
ولا بينك وبين أبوبكر صالح صاحب أوكامبو ...
ولا بينك وبين محمد الزاهد صاحب المرصد ...

ولا يمكن الكم قيم فى إتحاد التنس ديك ... ولا شوية الإسكالوب بانيه بتاع النادى العربى داك؟؟؟

يا أحمد مافى عنصرية و تمييز مقنن ومؤسس فى السودان ..
ما هى إلا ظروف جيوسياسية وتاريخية وإقتصادىة وإجتماعية ... وأغلبها لها علاقة بفترة الحكم الثنائى و المهدية ..
ومثل تلك الظروف متوفرة فى كثير من الدول والأمثلة كثيرة ...
للخروج من هذه الحالة نحتاج لعلم وفهم وروح إبداعية وعمل جاد للأسف إفتقدها الآباء "المؤسسين" ويفتقدها السودانيين الى اليوم ...
وحتو ولو إفترضنا إن هناك نظام عنصري ....
درس جنوب إفريقيا ليس ببعيد ...

فليس هد المعبد بمن فيه ....و من ثم التفكير بما يجب عمله بعد ذلك على رأى بشاشا

الذى توافقه إنت ..
وإنما على رأى تبارك :

Quote: ... حلولنا تبدأ بقبول سيادة الديموقراطية أولاً ... ثم بتكريس قيمها من كفالة الحقوق المدنية والفصل بين السلطان والتعددية وسيادة القانون ... مع ملاحظة موازين القوي الاقليمية والعالمية وأجندات الاستغلال الإقتصادي وحروب الموارد بين الدول العظمي وتأثيرها على السياسة المحلية ... وأجندات الهوس الديني والخطابات الهادمة للديموقراطية من أساسها ...

المشكلة يا أحمد الإنتخابات و الجهاد المدنى يحتاج لتفكير مضنى وتخطيط جاد ويحتاج لعمل شاق وشاق جدا ...
وستكون نتائجه مبهرة ودائمة و تراكمية تؤسس للمستفبل ..
أما الإنقلاب أو العمل المسلح (فلأن الصفوة و القيادات يمارسونه من عل ) فإنه الأسهل ولكن نتائجه كارثية...

وسلامات يا صاحب ...

(عدل بواسطة أمير عثمان on 01-06-2012, 02:34 PM)