حوار هادئي مع تبارك، حول مفهوم دولة غير جهوية لكل السودانيين.

Quote: تبارك بغض النظر عن الاختلاف او الاتفاق معاك بس انا بحمد ليك انك سايق خط واضح وبتأسس لفهمك كويس لكن بقرايتى لمداخلاتك وقفت فى المداخلة دى بالذات انا شايف انو دا طرح يائس حسب قرايتى انا ليافطاتك الكنت شايلها دى انت رفعت يافطاتك لحاجات وما حصلت لغاية ما ياسر عرمان انسحب عشان كدا انت دايرنا نحرس الخزنة دى لين 2015 حتى لو (زى ما اشارت ليك عفراء) حتى لو كانت النتيجة انو نحنا امام عقلية كنكشت ومصرة تكنكش ...عقلية هى نفسها ما قادرة تفهم او تستوعب الورقة اللى فى الخزنة دى بتقول شنو او هى مدركة وما عايزاها تحصل يبقى السؤال هنا يا تبارك هل نفضل منتظرين وحارسين الخزنة دى لغاية ما نلقى البلد مافى ؟؟؟ ولو نحنا امام عقلية التجارب بتقول انها ما بتفهم غير لغة القوة وما بتفهم او حتى ما بتسمع لغة تانية انت متخوف ليه من ثورة ؟؟؟ طيب زى ما انت بتقول طالما هناك اوراق فى خزنة بتنادى بنفس مطالب الثورة وعشان كدا بتسال الثورة دى جاية تعمل شنو ؟؟او بتشوف انو الثورة دى عمل او فعل عكسى لما فى الاوراق ؟؟ طيب يا تبارك ما دام هى مجرد او اوراق محبوسة يا اخى خلى الثورة دى على الاقل تفك سجن الورقة دى . بعدين الثورة دى ما دام محروسة بفكر (بالمناسبة انا زاتى ضد الثورة الغوغاء) يبقى ما منها خوف بل هى الامل ... طبعا مع الانتباه لانو الثورة دى فى المقام الاول ضد الحزب ما ضد الدويلة (كما يقول بشاشا) اما الثورة ضد الدويلة ما محتاج لسلاح زى ما بيقول بشاشا بقدر ما هى محتاجة لثورة وعى ثورة الوعى انو الناس تصل للمساواة والعدالة وما اظن دى محتاجة لسلاح وقتل بقدرما هى محتاجة لعقول تصنع الوعى واكيد ما حنعدم العقول .. وكان عدمنا العقول يبقى محتاجين للبد شان شنو اصلا ؟؟؟