طبعاأنتوح تقولوا شقي ومجنون بالتاكيد الاتنين مع يعض بس أقول شنو هي كانت سنه كبيسه جدا معي فلس رهيب جدا و مستمر الفلس أسمو (عطيه) طبعا وهو صديق حميم جدا لعدد مهول من صغار العاملين بالدولة والقطاع الخاص وهو علاقتو بالصحفيين حميمه شديد لدرجة أنو عطيه دا ما بحب في بلدنا غير أهل الصحافة والمبدعين يعني معهم عشرة عمر لو بتعرف حالة الفلس اللي معي دي لا بحلها تمويل أصغر وزبالة ولا زبالة سنة من جهات عاليه والله العشرين جنيه دي لما ألقها بعد ولادة وكمان متعسرةوتعالوا شوفوا كمية الديون حتي ست الشاي داقا جرس معي وتصرخ (السكر زاد وأنا الحاجات بشتريها وعندي ألتزامات )وأخوكم بعد حنك فنان وأقنع مشفوع بكلمة رقيقة حتين يكبوا لي كباية شاي ولا قهوة المهم قادر أمشي أحوالي علي مستوي القهوة والشاي لكين الحرافنه هنا في قصة النوامه والدواء بالليل طبعا كنت ولا أزال معتمد أعتماد كامل بجموعة أخوان موجودين هنا معنا في أجازات وندماء وأولاد كاس بيتعلموا طقوس المزاج من العبد لله هم ديل وقود الحياة بالليل من حلة ولحمة وبهارات وفحم ومزة والدواء زاتو أنواع برضو الحته دي في ليها حل بالرغم من المعاناة وبعد مرات يقوموا يخربوا مزاج الواحد بتصرفات صبيانية كدا وأنا بقيت مصاب بحاله من الاحباط و الزهج والقرف التي سببها في الاصل الوضع العاطفي اللي أنا عايشو والشواكيش بس خلوها مستورة والله تجنن وتخلي الواحد يبقي حمامة مسجد ويعرف أنو بنات حواء زي ما قال الشيخ فرح ودتكتوك (بوالات قريب لابد يعبين فيك نكرات جميل للفارس الجايب ) لكين برضو أنا مجتهد عشان ألقي بت الحلال وأكمل نصفي ديني كيف ما عارف لازم من أنجاز بعينو ألله غالب السنة أنتهت وما في حتي قرد عايز يعيش معي حتي ######ي هرب وأظن لقي مكان أكثر متعة من الاوضة والبرندا ديل وحوض السمك سمكو مات نسبة للأهمال وعدم متابعة الرعاية بقيت برأي (يا خلا ) ذايتو كانت كل الشهور غاية في العذاب وأنعصرت لحدي ما أمنت أنو الحياة في العاصمة القومية قدر ظهرو المتعة وبطنو الكدر نجي لمجال العمل ليست هنالك أنجازات تذكر مراسل صحفي جربان مرة مرة يلقي خبر يعمل منو قرشين حلويين لكين الدين لهذه الاموال القادمة من خارج الحدود بالمرصاد وصحفي في جريدة أخير منها القعدة في البيت وعلي الصعيد الاجتماعي علاقات تعبانه ومضحكة وجربانه زي زحمة الالوان ومصارعة التيران تعمل للعاقل قلق وقلق شديد جدا وما وراها غير السهر والمشاكل تمشي المطار مرتين في الاسبوع والمقابر مرة والسوق كل جمعه والمستشفيات ما بين المغرب والعشا برضو مرتين في الاسبوع وكم عقد كدا ما قدرت أمشي لانو لا حق مواصلات ولازوال عندو عربيه يوصلك بعدين الاعراس اللي في صالات والاندية دي بتخرب علي لان ضربةالبداية المتفق عليها من أخوان الصفا الساعة 8 ونص يعني دا موعد عشان يتغيير صعب وأنا كمان بقيت مبرمجة علي كدا بعد التوقيت الرسمي لا خوان الصفا أخوكم أخر بهدله (الريالاه) أي اللعب يسيل والنخرين كمان والدموع وأخر حكه ! لكين لو كانت ضربة البداية في موعدها الواحد بيكون حالو معقوله السنةالفاتت دي كانت عام الدلاقين والملابس بأمتياز ورهيبه كمان كل الاصدقاء من أقصاع الدنيا رسلوا ملابس للعبد غاية في الجمال وذوق فنان لكين ما كنت قادر أبيع منها لانها هدايا من أصدقاء وأقرباءيعني الفائدة كانت شوية ملابس وجزم وأحلي حاجة فيها ملابس دا ...... ملونة اللهم سترك ياربي من كل ذنب السنه دي كانت طويله جدا زي عمر أبليس وما فيها أي وفر ولا جنيه واحد مع غلاء في كل شيء من علبة الكبريت للفحم والزيت واللحم والادوية البلدية والمستوردة وكمان العلاج والمواصلات زادت بس خلاص خلوها تمشي عشان أمكن الجايه تكون خدرا لانو السنة اللي ح تفوت دي أخدت معها سنه من عمرنا ومشوا مننا ناس عزز جدا علينا ورحلوا عن دنيانا أحب الناس والله بس لو الواحد ما عندو مهدئات وبعض الامل وحاله حب مبهمه كل زمان حلاهابأي طريقة يا مثبت العقل والدين ثبت قلبي علي لايمان
الحمدالله وما تحزنوا لانو أنا لسه حي وقادر أمارس حياتي بالرغم من هذا الضنك !!!!!!!!!!!!
*ربي أجعل العام الجديد عام خيرا ورد غربة الاحباب وأكفنا شر الشواكيش والفقر والمرض وأجعله أسعد الاعوام علينا أجمعين أنك سميع مجيب
كل عام وأنتم بخير وحقق الله أحلامكم في العام القادم لانو العبد لله ماشي أجازة ح يرجع يوم الاتنين
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير عثمان حمد
فيس بوك
تويتر
انستقرام
يوتيوب
بنتيريست