|
|
 Re: ناس بورتسودان ! الكلام ده صحيح؟ (Re: سفيان بشير نابرى)
|
.
بورسودان التسعينات البتذكروا عنها حركة نشيطة في شغل الصادر والوارد ............
رصيف الشمالية , والمخازن في الاسكلا وسلبونا وحي الخليج وغربال الحبوب الزيتية
وتنوك بان ماجد , وعم سعد ( الله يرحموا ) .....
والميناء الجنوبي ( الحاويات ) ....................
يمكن لطبيعة شغل الواحد ما دخل في مجتمعه شديد لانو الشغل في متابعة الصادر
بخليك مرات حتى يوم الجمعة شغال .........
مع كده اهله البعرفوها بقولوا عصرها الذهبي كان زمان ...........
بورسودان كمدينة .... ممكن المدينة الوحيدة في السودان الاتعملت كمدينة
طبيعة المدن في السودان بتنشأ كقري ....... أو تجمعات حول ضريح شيخ ما
بورسودان وضع مختلف عشان كده ..... بتحس أى حاجة فيها في مكانه ...
مكتب البريد ... حديقة البلدية ..... السوق .......
في التسعينات إختلفت عن بورسودان الكنت بسمع عنها وبشوفه في ألبومات والدتي
الوصفة لى أماكن لما مشيت أشتغل في بورسودان لقيت حتى ذكرها أمحي زي
المارين قاردن ( الحديقة البحرية ) ..... وفي أماكن تانية لما أقارن كيف كانت صورة
في الألبوم القديم وصورة لما شفتها ....... بحس انو الزمن داسه بخطوات إهمال ماعادية
يعني لقيت مدينة مختلفة عن تصورات والدتي اوائل السبعينات لما الشغل ودي والدي الله يرحموا
بورسودان ...........
في سنوات شغلى فيها البتذكروا عنها صوت البوابير اللستر ...... كان عندها مشكلة كهرباء مزمنة
ورغم كده كان فيها حياة اجتماعية نشطة .... وحياة رياضية حي العرب / الهلال ...... وفندق بلاس
وفعليا في مصانع كبيرة بس بقت أثر بعد عين ...... زي الاطارات الدولية
يعني البلد محتاجة إنعاش للصناعة _ لاستيعاب الناس وتوفير فرص العمل _
أكتر ماتكون محتاجة لتجميله كمدينة .... الناس لو ما شتغلوا وأحوالهم أنتعشت شوية ماظن يحسوا بالجمال
ووقتها كان أغلب الناس البشتغلوا في أعمال مسانده في مجال الصادر _ عمال يوميات _
لما يقيف الشغل أحوالهم بتقيف ............
بورسودان الفي خاطري قهوه في سوق المنقبة بعد الفجر بشوية .......
تشرب فيها الجبنة وتتوكل على الميناء أو المخازن أو المكتب في سوق بورسودان عماره عبد المجيد بدر .....
ايام مهما مضي عليها فيها شي....................................... بيظل في الخاطر
وبالجد بتظل البلد الاتمنيت أستقر وأشتغل ... فيها وإن أتت الرياح عكس ما أحب ...........
والتحيات لها
|
|
 
|
|
|
|
|
| |
فيس بوك
تويتر
انستقرام
يوتيوب
بنتيريست