يا طلاب وخريجي جامعة جوبا وثقوا تجاربكم هنا..

Quote: لاحظت ان السبب الرئيسي لعدم المشاركة هو عدم التذكر ! عبداللطيف يا جميل.. تعرف انت ختيت خارطة طريق عديل كده للكتابة في البوست وطبعا (ما بتخرش ميه) ..وان شاء الله يجوا ناس كتار لاثراء البوست والمرات حالتو تحنن (يدردق لوراء شديد)..وطبعا لا ابرئ نفسي ..لكن الواحد كان بتمني انو يخش معانا ناس عاصرت ايام الجامعة الاخيرة في جوبا عشان نقدر نتداعي اكثر ونحكي اكتر وبتركيز احسن.. وكلامك ده كلو بنجيهو بالمهلة كان ربنا مدا في الاجاّ ل..بس جند ليك زول من الناس العندهم باسوورد ديل عشان يحرس لينا بجاي ..لانو برضو متابعنك في بوستاتك التانية بهناك (بس الزول ده ما يكون محمد حلا –حيقلب لينا البوست ده ...ركن نقاش!-تحياتي له-ما قاصد حاجة والله!) لكن طبعا في حاجات كده عصرت فيها الناس وجبت ليهم حاجات جوه الحنان زاتو.. تعرف هناك حاجة جميلة جدا كانت في الجامعة..تطرق لها عدد من الاخوة هنا وهي العلاقة المميزة جدا بين الاساتذة والطلبة واحسن من عبر عن ذلك استاذ/الزين وبروفسر/بوب ..وساتعرض لاحقا لعلاقتنا المميزة مع الاساتذة وقتها ..استاذ/ الامين فيشريز ..درسنا كورس في الSudan foundation course والاستاذ/خالد عثمان محجوب درسنا الBotany .. وبرضو ..الي حد ما العلاقات بين الناس بصورة عامة بغض النظر عن اختلاف وجهات النظر السياسية (يعني بصورة ما..لم الاحظ طول ايامنا في جوبا –سنة واحدة-ذلك الاستقطاب السياسي الحاد ) وكانت اغلب العلاقا ت متوازنة وحميمة في اغلب الاحيان بين كل الناس(ما عدا قليل جدا من الحالات الشاذة)..ودي حاجة ميزت ناس جوبا.. علي كل حال ..ده تسجيل حضور رابع مرة..وبنرجع تاني .. تحياتي للصديق جمعة كوكو 87-موارد ..الارسل مشاركة فوق.. ويدك معانا يا جمعة..علي الاقل نحكي عن ايامنا في جوبا 87 وعن الزملاء والاصدقاء في دفعة 78+86..تحياتي عبرك للفردة الجيلي العجب(ميرغني المامون واحمد حسن جمعة ..زي ما قالت ليك اّمال) متوكل