هل نشهد اليوم بداية لثورة كوبرنيكية جديدة تغير من رؤيتنا للعالم .. ؟!!

Quote: اعجبني رد اللادرية في "كونتاكت " على سؤال الاطفال البقت تدرسهم عن : وجود غيرنا في الكون؟ قالت : لو مافي .. يكون دا بذار شديد!! لكنها رجعت -يا ربي! - بحقيقة واحدة .. مفادها : كم ضئيلين نحن! .. عزيزين .. و كم مفروض نقدر و نحب انفسنا اكتر!!

تعرف يا قيقا..
لو حاولنا نتأمل في مسألة ضئالتنا دي علميا
حنتحير بحق و حقيقة !!

كدي دي محاولة فطيرة مني للتوضيح :
أولا حجم الأرض يساوي تقريبا 1,083,210,000,000 كلم مكعب !!
و للمقارنة حجم الإنسان العادي يساوي 0.00007 كلم مكعب

يلا شوف في الرسمة دي حجم الأرض مقارنة بغيرها بيبقى كيف ..




النجوم المقارنة بيها الأرض و الشمس دي مشهورة و بنشوفها في السماء ليلا !!
و هاك فيديو زيادة كمان ..


.
.
.
.
.
.
أها لو إفتكرت إننا ضئيلين ..
فيؤسفني إني أزيدك في الشعر بيت ..

فحجم الفراغ ما بين النجوم بالنسبة لحجم النجوم زاتها خرافي بحق !!
فلو كانت الشمس بحجم كورة صغيرة قطرها 23 سم
فحيكون أقرب نجم لينا (Alpha Centauri)
بيقع على مسافة 6,700 كلم !!!
علما بأنه بيقع على بعد 4 سنوات ضوئية* بس!!!

و عشان كده برغم أن النجوم جوه المجرات في المتوسط بتبلغ 100 بليون نجمة لكل مجرة
إلا إنها متباعدة من بعضها لدرجة إنو لو إصطدمت مجرتين تماما ببعضهما
فممكن ما تتصادم من نجومهم و لا واحده إلا نادرا جدا !!

يلا الكون المعروف قطره تقريبا 46 بليون سنة ضوئية
و قطر المجرة في المتوسط بيساوي 30 ألف سنة ضوئية
و المسافة المتوسطة بين المجرات بتساوي 3 مليون سنة ضوئية

علشان نقدر الأبعاد دي شوف المساحة الصغيرة دي من السماء



المساحة الصغيرة دي ركز عليها تلسكوب الفضاء هابل و صورها في لقطة مشهورة..
شوف لقى فيها شنو ..



كل نقطة من النقط في الصورة دي هي مجرة كاملة بنجومها !!
تقدر عدد المجرات في الصورة دي بـ أكتر من 10 ألف مجرة !!
و بيرجع تاريخ المجرات دي لقريب من 13 بليون سنة**

.
.
.
أها لو إفتكرت إننا ضئيلين ..
فيؤسفني إني أزيدك في الشعر بيت تاني ..

فحسب نظرية التضخم الكوني Inflation البيفسر بيها حاليا الإنفجار العظيم
هناك مناطق من الكون بره الحدود البنعرفها دي بكتير***
و حجم الكون الما مشاهد ده أكبر بـ 23 ضعف حجم كوننا البنعرفو ده !!
يعني حجم الكون الكبير ده بالنسبة للما شايفينو زي حجم الذرة للكون الشايفينو !!

.
.
.
أها لو إفتكرت إننا ضئيلين ..
فيؤسفني إني أزيدك في الشعر بيت تالت ..

حسب نظرية الأوتار الفائقة فكوننا ده كله الشايفينو و الماشايفينو
هو بس واحد من مجموعة كاملة من أكوان في أبعاد تانية عددها
10 مرفوعة للأس 500 !!!

و علشان تقدر ضخامة العدد ده شوية ..
هل تعرف أن عدد الذرات في الكون كله
بتساوي بس 10 مرفوعة للأس 80 !!!


علشان تأأأأأمن بس

محبتي



_______________________________________________
* ده بيدينا فكرة عن شساعة مفهوم السنة الضوئية كوحدة للمسافة !!
** كل شوف في المكان هو شوف برضو في الزمان
فنحن بنشوف المجرات دي زي ما كانت قبال 13 بليون سنة !!
*** الأجزاء دي بتبتعد عننا بأسرع من الضوء
و مبدئيا ما ممكن تأثر فينا و لا نعرف عنها حاجه حسب النسبية
(حأشرح كل الحاجات الرصيتها دي في سياق البوست بإذن الله)