|
|
 يا جماعة الحاصل شنو ؟؟؟؟؟
|
البلد جايطة جوطة.... جوطة شديدة.... والواحد فينا بقى ما عارف كوعو من بوعو.... نضم وهيصة ولخبطة...ونضم بصراحة كدي... يخلي الزول يشيل هم وما ينوم الليل......ويكون راقد فوق عنقريبو ..و.. يودي.. ويجيب... ولما تغلبو الحكاية تب.. ينوم!... سلفاكير قال داير الانفصال... لام اكول الكان اول البارح داير الوحدة... صبح حردان، وقال داير الانفصال... ياسر عرمان لي حسي ما قادر أعرفو داير شنو؟؟....الصادق المهدي ينضم وينضم وفي النهاية وقت ما عرف شي في البلد... قال يدرسو الجنس في المدارس ويدخلوهو في المناهج.. وبيني وبينكم نضم سيد الصادق دا ما تدوهو البحر... الترابي في رمضان احبطنا إحباط شديد لما قال مافي ليلة قدر ولا حاجة... ونحن مساكين املنا الوحيد في باقي عمرنا تراها ليلة القدر دي... نستناها كل سنة في رمضان ونعاين لها والواحد فينا يقول مشاكلو دي مافي شي بتحلها ليهو غير ليلة القدر .. نستناها زي الاكننا مقدمين للوتري بتاع امريكا.... ان جلّت السنة دي نقول قطعاً السنة الجاية ما بتجلي...أها جا شيخ حسن قال وينكم ليلة القدر ماها في... كلوكلو....قال ممكن المرا تبقى إمام وتصلي بالناس... غايتو يا شيخ حسن الجامع البتكون الإمامة فيهو مرا الجماعة يحجزو لصلاة الجمعة من قبال شهر.. الما بيصلي تلقاهو طابي مصلايتو في اباطاو وجاري على الجامع، وناس يكونو ما ركعو اصلو من الله خلقهم تلقاهم يكابسو في الصف القدامي.....و برضو قال المسلمة ممكن تعرس يهودي واللا مسيحي...المهم هي تعرس...هن لاقيات؟...حسي شايف بنيتو... جات وقعدت تفتل فوق حبلو... وقالت نضم أبوها كلو صح... ومافيهو أي غلط...الناس الغبيانين قالوا كيف تقول كدي؟.. يا جماعة من الله خلقكم سمعتو بي بت قالت نضم أبوها غلط؟... وإن هي اتجاسرت وقالت نضم ابوها دا غلط تاني منو البيقول النضم دا صاح؟ خليكم عاقلين!.....موسم الهجرة الى نيجيريا..... قدر ما في فنانة لفحت توبا... وشالت جواز سفرها.. وقالت ماشة نيجيريا... ويشاكلن في السفر على نيجيريا..مونيكا قالت لندى القلعة إنتي أكبر مني في العمر عشان كدي ما بنضم معاكي... والله يا مونيكا دايرة النصيحة واللا الجنبها؟ إن دُرتي النصيحة الاتنين إنتي وندى ماكن صُغار.. وإن دُرتي الجنبها برضكن الاتنين ما كن صُغار.. بس الله يكبّر العقول!...... وبرنامج نجوم الغد بقى يخرّج فنانات جاهزات للسفر لنيجيريا... حتى الفنانة فهيمة اليا دوب فقعت من البيضة.. قالوا انتهت من البرنامج ما وصلت أهلها عديل... غسلت هدومها وكوتن وستفّت شنطتها وقالت ماشة نيجيريا...... ومن هنا.. و.. دوغري على مايدوغري...لكن معاها حق... قالو القروش في نيجيريا... ولا بيعدوها.. رزمة ولب عن كرعين الفنانة.. وهي تلقّط وتخُم وتخت في شنطتا ما بلوما والله... وأخير ليها من تقعد معانا هنا وتستنا ليلة القدر...القنعنا منها شيخ حسن!
قفل الباب:-
عش للمساء وللنسائم والسحر
عش للعشيات المبللة الثياب من المطر
عش للقصيد يزور بيتك رائعاً.. مثل القمر
ودع الترحل في دروب الشوق..
درب الشوق يا قلبي وعر..
|
|
 
|
|
|
|
|
| العنوان |
الكاتب |
Date |
| يا جماعة الحاصل شنو ؟؟؟؟؟ | عاطف عمر | 10-21-10, 11:11 AM |
| Re: يا جماعة الحاصل شنو ؟؟؟؟؟ | عاطف عمر | 10-21-10, 11:14 AM |
 Re: يا جماعة الحاصل شنو ؟؟؟؟؟ | محمد عبدالرحمن محمد | 10-21-10, 11:50 AM |
| Re: يا جماعة الحاصل شنو ؟؟؟؟؟ | عاطف عمر | 10-21-10, 01:16 PM |
| Re: يا جماعة الحاصل شنو ؟؟؟؟؟ | عاطف عمر | 10-23-10, 04:15 PM |
| Re: يا جماعة الحاصل شنو ؟؟؟؟؟ | عاطف عمر | 10-21-10, 01:26 PM |
| Re: يا جماعة الحاصل شنو ؟؟؟؟؟ | عاطف عمر | 10-21-10, 01:29 PM |
| Re: يا جماعة الحاصل شنو ؟؟؟؟؟ | عاطف عمر | 10-21-10, 01:34 PM |
| Re: يا جماعة الحاصل شنو ؟؟؟؟؟ | عاطف عمر | 10-21-10, 01:38 PM |
| Re: يا جماعة الحاصل شنو ؟؟؟؟؟ | عاطف عمر | 10-21-10, 01:40 PM |
| Re: يا جماعة الحاصل شنو ؟؟؟؟؟ | عاطف عمر | 10-21-10, 01:42 PM |
| Re: يا جماعة الحاصل شنو ؟؟؟؟؟ | عاطف عمر | 10-21-10, 01:44 PM |
| Re: يا جماعة الحاصل شنو ؟؟؟؟؟ | عاطف عمر | 10-21-10, 01:47 PM |
| Re: يا جماعة الحاصل شنو ؟؟؟؟؟ | لطفي علي لطفي | 10-21-10, 06:24 PM |
| Re: يا جماعة الحاصل شنو ؟؟؟؟؟ | مهيرة | 10-21-10, 06:49 PM |
| Re: يا جماعة الحاصل شنو ؟؟؟؟؟ | Haydar Badawi Sadig | 10-21-10, 08:25 PM |
| Re: يا جماعة الحاصل شنو ؟؟؟؟؟ | عاطف عمر | 10-23-10, 10:24 AM |
| Re: يا جماعة الحاصل شنو ؟؟؟؟؟ | عاطف عمر | 10-22-10, 07:53 PM |
| Re: يا جماعة الحاصل شنو ؟؟؟؟؟ | عاطف عمر | 10-22-10, 11:44 AM |
| Re: يا جماعة الحاصل شنو ؟؟؟؟؟ | أبو ساندرا | 10-22-10, 05:33 PM |
| Re: يا جماعة الحاصل شنو ؟؟؟؟؟ | لطفي علي لطفي | 10-23-10, 07:05 PM |
| Re: يا جماعة الحاصل شنو ؟؟؟؟؟ | عاطف عمر | 10-24-10, 08:25 PM |
| Re: يا جماعة الحاصل شنو ؟؟؟؟؟ | عاطف عمر | 10-24-10, 05:21 AM |
| Re: يا جماعة الحاصل شنو ؟؟؟؟؟ | ودقاسم | 10-24-10, 05:52 AM |
| Re: يا جماعة الحاصل شنو ؟؟؟؟؟ | عثمان رضوان | 10-24-10, 09:05 AM |
| Re: يا جماعة الحاصل شنو ؟؟؟؟؟ | عاطف عمر | 10-25-10, 12:41 PM |
| Re: يا جماعة الحاصل شنو ؟؟؟؟؟ | عاطف عمر | 10-25-10, 05:29 AM |
| Re: يا جماعة الحاصل شنو ؟؟؟؟؟ | جمال المنصوري | 10-25-10, 05:34 AM |
| Re: يا جماعة الحاصل شنو ؟؟؟؟؟ | عاطف عمر | 10-25-10, 08:42 PM |
|
| |
عاطف عمر
فيس بوك
تويتر
انستقرام
يوتيوب
بنتيريست