كتب الكاتب الفاتح جبرا المتوفرة بمعرض الدوحة
|
Re: تنقاسى السوق - أبو رنات -أبو دوم الحوشاب - جريف نورى والقرير -سلام... (Re: ست البنات)
|
عماد عثمان ! الوليد الفالح المو خمج !
يا حليلك يا أخوى - وبركة انت زاتك الجيت - أمانى اللقدابة ما كانت قعدتا سمحى وناسا
طيبين وبنيات حلال ووليدات حلال - عيلى بس فجعة كدى بس مرق من اللقدابة دى يا اخوى
وطشيتا لا عيرف اصد ولا عيرف امشى ! عيللى بكرى الباشمهندس ينبارك مسكنى قادنى ورانى الدرب -
وقالى خلاس عرفتى بوكان لقدابتك ? قوتلو أى تنبارك .
ودحين لامن اقشها ورشها - واوقد نارى للصاج - ولا عوقبان بكوريكلكون انت واخيانك تجوا -
انتو باقيلكون الزول النصيح بيقدر ياكل براهو زى الزهمول ?! باقى الفسالى كعبى وماب
تقدم سيدا !
بس والله اسع جيتك دى كيف عجبتنى وفرحتنى يا عماد اخوى الزين .
وبصدلك تانى .
ست البنات .
| |
|
|
|
|
|
|
Re: تنقاسى السوق - أبو رنات -أبو دوم الحوشاب - جريف نورى والقرير -سلام... (Re: ست البنات)
|
(قوز ام شديرة) القرير
خلف الجبال عند مقاشي كل يوم تتوارى شمسنا الدوارة لتعلن نهاية النهار وبداية ليل العاشقين والطنبارة خلفي كثبان الرمال الذهبية اشكال البيوت عند الطرف تعلن بداية الصحراء الجير الابيض يستقبل العيد الكبير والصغير او عريس قادم من (فوق)يزف لحسناء من حلتنا التحت او الفوق ...... زغاريد ام لابنها القادم من بلاد الحجاز امام بص يستعجل ليعبر النهر عند مروى يتحلق الناس مرحبين بالقادم ودموع تجفف بتوب قديم يستر جسدها الشامخ عزة يصير المكان نقطة انصهار شيوخ وشباب اطفال ونساء من كل الاعمار واخرون من فوق (التمساحي)يحيون على عجل والمنجل صاحب النصل الاملس الناعم يعلن عن علاقتة الطويلة بصاحبة يتململ الحمار من اخر تبدو عليه ملامح الجوع الطمع ينتهره صاحبة وهو يسحب (الصريمي)ويحاول ان يقف عند الطرف الاخر ..... غابات النخيل تشكل الافق والشفق الاحمر مثل ستائر القصور ...غير بعيد فوق هذا التل تقوم شجرة لم تغير ملامحها الصارمة ابدا تقوم الدنيا وتقعد حولها وهى هي افراح واتراح تمر وهى غير مكترثة من على هذا التل تحس انك جزء من الارض وامتداد لعوالم بعيدة احس ان المكان ينطوى على اسرار وهذة الشجرة شاهد ولكن شاهد لايبوح ....ترسو قوافل زكرياتى عندها وتضج افراحى منها وكل ما اتعب اخرج بعض الرمال احضرتها معى هنا عند ساحل الاطلنطى اغرس يدى فيها وادعبها حتى تبرد حمتى ويتوقف النزيف اعود بعد ذلك الى الدنيا افتح نوافز المكان تطل تلك البحيرات الصناعية ومساحيق المدن وغابات الاسمنت وسيارات الكورفيت والهمر تستبدل لوحتى القديمة اعيد يدى مره اخرى وتتحول غابات الاسمنت الى نخيل وتصير الكورفيت حماره(فى شهرها الرابع)الم اقل لكم اننى (مورود)و محموم وجراحى عميقة (تساسق)كل يوم بين ام شديرة وشارع الاطلنطى ....
سليمان ابراهيم سليمان
تداعت الكتابة عند هذا البوست رغم اننى ما كتبت زمان لكن (ست البنات لاحدهن)امسكت بيدى (الموجعاني) وصرخت حين طعنتنى شوكة (ود لقاى)من ياسكو وشلوخ وتجاعيد الزمن على وجهها النبيل عند عادل عثمان وكل المدوزنين والمطلوحين فى اركان الارض ياوجعى وياحزنى لبلادى
| |
|
|
|
|
|
|
Re: تنقاسى السوق - أبو رنات -أبو دوم الحوشاب - جريف نورى والقرير -سلام... (Re: ست البنات)
|
الملكة بت الملوك والملكات ( ملكة سبأ ) حبابك عشور مرات !
ورمضان كريم وبخيت عليك -
وسعلتى من مروى شرق ?
قصدك صنب !
مروى وصنب
بلد الملوك
ساعة البلود مافى الوجود
كانت حضاراتن تسود
بلد الملوك بلد العجب
عز البلد عز الطلب !
فيها الجمال سارح عجب
مندلى عند البير ورد
لابس زمام مال وانطرب
فوق ضل جناينو مستريح
دفيقو مال تنى السبيط
عرجونه مال ما انكسر
حشوا التمور رصوها رص
تمر الهبوب
تمر الجهال
تمر اليتامى والدرب
تمر المراغنة الكل حول
مليون شوال
عبوها عب
من غير ندم
خاتر سمح
شحنوها للسادة العزاز
زادوها ملوة وقفتين
من الغرب ومن الشرق
تمر الكروماب والسماعريت
تمر الحداديد وود جهينى
تمر الحماميد وود شلوك
مروى وصنب
ساكنات قلوب الناس سكون
من غير اذن !
--
وان بيقيتى يا الملكة من السماعريت ! بس انتى لحم ودم قطع شك !
ست البنات .
| |
|
|
|
|
|
|
Re: تنقاسى السوق - أبو رنات -أبو دوم الحوشاب - جريف نورى والقرير -سلام... (Re: ست البنات)
|
العزيزة منى خوجلى - سلام وحمدلله بسلامة العودة -
وانشاء الله تكونى جيبتيلى معاك حيبيبة حرجل ومحريب - ولا تكونى نسيتى القراصة المخمرة - وطرد البركاوى
والدفيقات شى !!!وكمان مجوز القرقوشى - وان شاء الله تكونى بليتى شوقك فى البلد وشبعتى فى الترمس والدفيق -
وزكيتى الدانانيين ولعبتى بالطاب - واندفنتى فى الرملا - ونشلتى ألمى من البير - وشلتى القش فوق ريويسك !
وغايتو بس وا حلالك !!
وسليميلى عليى خالتى جارة وأخياتك .
ست البنات .
| |
|
|
|
|
|
|
Re: تنقاسى السوق - أبو رنات -أبو دوم الحوشاب - جريف نورى والقرير -سلام... (Re: ست البنات)
|
أخوى طارق جبريل !!!!
سلامات ومراحب -
ورمضان كريم وسعيد عليكم بالمغرب - واهلنا الشايقية بيقولوا ليها :
( فاس الما وراها ناس )
لكن انت جبت لى خبرا زيين ومطمن ! الله يطمنك -
وعبد الواحد دا حبيب القلب والروح والوجدان !!!
لكن هو ماهو عجوز - عاد دابك زعلتنى منك تب !
وان شاء الله يبقى عجوز فى وشى الموت -- وربنا يطوللنا فى عيميرو ويخليهو لينا -
دا حبيبنا - واخونا - وأبونا - وملاذنا فى الدنيا الكربة دى -
وقولو بتسلم عليك ومشتهياك - وقولوا قالت لك ( أريتك تبقى طيب انت - وأنا البيى كلو هيين )
وأبقولى عليهو عشرة - دا دوخرينا وعقابنا !
باقى هو مو زولا هيين !
ومشكور اخوى طارق وربى يديك العافى .
ست البنات .
| |
|
|
|
|
|
|
Re: تنقاسى السوق - أبو رنات -أبو دوم الحوشاب - جريف نورى والقرير -سلام... (Re: ست البنات)
|
أخى وحبيبى عبد الواحد كمبال -
سلام وشوق كتير - وشرف ونور للبوست والمنبر أى يحط قلمك النيير بهما !
وأتمنى ان تسعفنا بشيق الحديث والمعلومات عن الأرض الطيبة ( تنقاسى السوق ) وما جاورها من قرى
عتيقة - طيبون أهلها - والذين لم يبق منهم الآ القليل - فقد ارتحل جل الخيرين عنها !
وأعترف بأنى كتاباتى هذه ما هى الآ اجترار لماض أناس أعزاء على النفس - وتاريخ لأرث طيب - أخادع
النفس متوهمة بأن( أحمد كمبال وست البنات لا زالا بيننا روحا وجسدا !) وبان ( أردب - والروة - وستى
فاطمة - وحسنة بت عمر - وكاكا- وبت ود كروم- والروضة -وعلى ميرغنى - وابنعوف -وفاطمة بت حسين )ما
فتئوا يتجاذبون الحديث معى كل يوم - فيتضاءل حجم الفواجع ويطمئن القلب بان فقدهم ليس بحقيقة بل
اضغاث وتوهم ...
لك وللمتداخلين والقراء ( الذين يجمعهم هاهنا ذكر الدفيق - والقنقر - والأشميق - والأنقا والسبروق -شوقا
وتلمسا لود ضاع فى سنوات الترحال والأغتراب - والفراق !) كل الترحاب والود .
وفى انتظار طلتك البهية .
ست البنات .
| |
|
|
|
|
|
|
Re: تنقاسى السوق - أبو رنات -أبو دوم الحوشاب - جريف نورى والقرير -سلام... (Re: ست البنات)
|
اختنا ست البنات والله لمة الناس الظريفين ديل هناوالنضم الظريف ده خفف عليناكتير الواحد كل مايعطش يجى جارى هنابارك الله فيكم لكن انا ملومكم شويه عشان ماقطعتو البحر وجيتو لينا فى الشرق وحدستونا عنه شويه قالوا فيه اسارات كتيره انا باقى من الشرق لكن بقولوا علينا شوايقة لندن...دى عينه من دوبيتنا كتبته حبوبتنا مهبره بت عبود عليعا رحمة الله: غنيت بالعديلة .. لي عيال شايق البَرَشو الضعيفة ويلحقوا الضايق
الليلة استعدوا .. وركبوا خيل الكرّ وقدامهم عقيدهم بالأغر دفَّر جنياتنا الأسود .. الليلة تتنتر ويالباشا الغشيم .. قول لي جدادك : كرّ
بجى صادى انشاء الله
| |
|
|
|
|
|
|
Re: وسلام يالكرو وأهلا ! (Re: ست البنات)
|
الاخ البعيو - سلام ورمضان كريم -
ومرحببك -
والشرق يااكنو الكرو ?
تانى بس مانا فايتنكون - والليلى فطورنا عندكون !
بس كتروا القراريص - وكمان بيصيلتن غليدى وحيبيبات بليلى .
وبس قوت صاد - عاد لا تنوهدب شى .
ست البنات .
| |
|
|
|
|
|
|
Re: تنقاسى السوق - أبو رنات -أبو دوم الحوشاب - جريف نورى والقرير -سلام... (Re: ست البنات)
|
لماذا نذكر تلك الديار
| |
|
|
|
|
|
|
|