|
|
 حليل خالك ...
|
هذه قصيدة جميلة لشاعر الحلمتيش المعروف محمد الجاك الصراف المعروف بإسم (المتشعلق بن المنبرش)
حــلـيل خــالك ...!
الدُّخـْرِى يا ود اختِـى عِـز الدين
بآكـر تزور بيتنا وتشوف صورتى
وتقول : حبوبه ديييك صورة مِـنـُو الملصـُوقـَه فى الحيطه ؟ ! ...
يقولوا ليك : دى صورة خالك آ ولدى ... حليل خالك ! ...
أكان زولاً بشد الحـيل
يونسنا وكلامو لذيذ ... عديل بلحيل ....
كتير الناس تقول مجنون .. وما مجنون ...!
فى شيتاً جُـوّه فى قلبو يزاول ليهو حَامِى النـوم
يبـرِّم فى سبيب راسو ويساهر لى هوايد اللـيل
يقوم من نومو ضربة ديك
يفوت من بيتو بى ِريقـو زى الضيف
يشيل مُحْجَانو فى كتفو ..
وِيطـُـب مُخـْلاتـُو فى باطو..
وِيفارق الحله مستعجل مع هبة نسايم الصيف
وحفيان ساى ! .. يبارى القيف
يضُـرب الغابه وِتـْوَكـَّـر.. يحـِتْ فى ( السـّعَـفـه و العـُـلـّيف )
يهـز شـدراً فروعـو حديد
ولمّا العين تكون شافت قريب وبعيد ,
بهايم الحله تتوجه عشان ما تاكـُل المحتوت ..
يعاين ليها وِتـْبسم .. وما يحاحيها .. يمشى يفوت
حشاهُـو ضَـمرْ تقـول عجلاً مكـَدَّن فى الوِتِـد مربوط
بعد ماتـْغيب يقوم يرجع .. . يجيب نبقـاً تقول ياقوت
مغـسـَّـل بى دموع الحـُور ..
معلـّق فى رِقيبة السمحه فى البنوت
يخـُتـُّـو حداهـُو وِتـْـلـفــّتْ .. وجيهـو حزين ..
بدل مايقول بدور آكل .. يقول بس نادوا عز الدين
حليل خالك ... !
* * * * * * * * * *
أكان زولاً بريد الجوطه والحفلاتْ
محل مايسمع النـّقره ,
يخت طاقيتو فى راسو
ويشيل طمبورو فى ايدو
وِيدِجْ حفيان برا نعلات...
دلاليك العرس داقات ...
ريحة المحلب المخلوط مع الصندل ...
حنة ملخوخة فى طاسات..
ضـريرتاً ماليه خشم ( الحـُق) ...
وام العريس مشغوله بس بالدخله والمرقه
وبنات عم العريس واقفات
يسالمن ديل ... ويعزمن ديل .. ويجاملن ديل ...
وشايلات جرتقاً ما غـَشْ !
خرز منضوم مع اللولى ..
وهلالاً زى هلال شوال .. حرير يلمَعْ !
زغاريت البنات طاقات ..
عريس بالفرحه داير انشق ..
محصن نفسو بى ياسين
وجايبين ليهو عضم الحوت
ومالى ضراعو بالحجبات ..
حجاب جلادو ( ود فراج ) .. غـليد وَاحَمَـرْ ..
مَـتقــّـله بطنو بالآيات
وهـاك يا زغبره وْجـُوطه ..
وناس داخلين وناس مارقين
وناس قاعدين وناس واقفين
وناس نايمين وناس صاحيين
وناس ضاحكين وناس باسمين
وناس رايقين وناس جايطين
وضيفاً جا وضيفاً فاتْ ..
وخالك منسى فى طرف الصريف واقف ..
لا زولاً يقولـُّو أمش ..
ولا زولاً يقولـُّـو تعال ..
دموعو تسيل مطر صابـّات
طبق طمبورو قبـّـل صاد
وجاك راجع .. يغنى ليك ..
غـُنـَاهـُو حزييييين ......
غـُناياً يبعث الميتين
حليل خالك ..!
* * *
عمار الدنيا مهما زاد , مصيرو زوال
تـُرُبـْتـَا الـزول تنادِيهـُـو
وعـُمر الزول تتم ايامُـو مهما طال
وخالك كان اظن عارف سنينو قلال ..
وناجع ديما فوق سيقانو ودّر عمـرو بالترحال
عصاتو (سَلـَم ) .. شرابو سموم
قـدُرْ ما يزيد عليهو الجـوع , يقـرِّط ( تِكـّـة ) السروال
دريبو وَعَـرْ مـلان بالشـوك
كِضِـبْ كان قـالو كـاس لـي نعـال !
هو خالك خال ؟! ..
دا من جـِنـُّـو .. يسافر فى الفيافى بَـرَا ..
وشاغل بالو سك الصيد ..
مخلى قليبو ناسى ورا ..
ضلام الدنيا فى عيونو ويفتش لى منابع النور
لسـانو انسـل ..
ريقـو فـتيت ..
وسـاكن ديمه فى العَـتـْمُـور ..
مشـَرِّك للغـزال بالخيت ..
وزارع فى الاراضى الـبور ..
دا قمحان من بنات آدم
وراجـى يمـوت يهاجـر لى بنات الحـور ..
حـليل خـالك ..!
* * * * * * * * * *
وآآآآخــر عـمرو يا ولـدى ..
مرض مرضـاً ..!
مرض مرضـاً ..!
مرض مرضـاً ..!
.. رقد خـالك تلاته سـنين ..
وكـُلّ الشافتو تسكلج ..
تقـول : كـُـر.. كـُـر .. دا ما بـِحيَا .. !
ومـلك يامـين يقـول يامـييين ..!
كتير البطـّـل الشغله وقعد حرسو ..
يشـهدو فـيهو بالتلـقين
وكم كم مره جـبنا المـويه فى القـرعه
عشـان ما نـْغـَـمـِّد العـينين
ومـاتن تب اديـَّاتـُو
جـلد ملصـوق على عضـامو
وْحَـطب مدّاهِـن الكـُرعـين
وجبنا (حَنـُوطنـَا ) للتجهيز
بقينا نعد ضليعاتو
ونقول : يا الروح سكونك وين ؟!
لقينا الروح تطق مسجونه فى الحلقوم
مربـّطه بى سلاسل (كـُنْ )..
وطايعه الواحد القيوم ..
تقول : يارب ..
متين امرق .. متين امرق .. متين امرق
ونحن قعدنا فى ( الدلجه ) وحرسنا (ايوب)
شهور وشهور ... بقينا ( سُـقـُد )
وما ضاقت عيونـَّا النوم ..
وكل الحله منكسره ومجاملانا :
ناس ( التايه بت منشار)
وبت حمدون
بنات طه .. وبنات التوم
واخوات كمال الدين ..
عمتك كلتوم
وبت حاج احمد ( السـُرّه )
وبنات طيبه
وبخيته الرايقه بت جادين ..
دموعن بلــَّنْ الواطا .. وتيابـِن جَرْجَرَنْ دمـُّـور ..
وحزنانين على خالك ..
عشان خالك قليبو حنين ..
وشال فى كتفو هم الناس ..
يشيل ويردُم
يشـيل ويردُم
ويدس فى همـو فى قلـبو
ويقاسى براهو حر النار
دا شيتاً مابْـتشوفو العين
وهمـُّـو كِـتِرْ ..
وقلبو انقد يوم العيد
وخالك مات ..
مـات ماضـاق العـديل والـزين ..
حـليل خـالك ..
حـليل خـالك يا عـزالدين ..!!
* * *
|
|
 
|
|
|
|
|
|
|
|
Re: حليل خالك ... (Re: ابراهيم محمد الحسن)
|
يا عمر موسى ..اللرجال خوسة
نناديكم ما تجو .. نجيكم في المنبر ..تمشوا تخلو
تعال وتعال.. ما في داعي للغياب
ابراهيم..
يديك العافية
النفس الطالع ونازل في المنبر
ويا عمر..
والله يا حليل خالك
| |
|
|
|
|
|
|
|
|
|
Re: حليل خالك ... (Re: الخطاب مساعد الماحي)
|
خطاب مساعد ذااااااااااااااااتو
والله مرحب بيك
انا بجي بس انت ما تكورك
ابراهيم محمد الحسن
سلامات
| Quote: النفس الطالع ونازل في المنبر |
والفة المنبر
طبعا ياابراهيم انا القصيده نزلتها للناس الماعاصرت محمد الجاك الصراف في الجامعه (يعني للبرالمة )
العجائز يمتنعون وكلم الكوتش قول ليه عمر قال ليك ما يشوفك حايم في البوست دا
البوست دا للصغار فقط يعني من الخطاب مساعد وانت نازل
لك عميق الود
| |
|
|
|
|
|
|
|
|
|
Re: حليل خالك ... (Re: Omer Musa Abbas)
|
Quote: العجائز يمتنعون وكلم الكوتش قول ليه عمر قال ليك ما يشوفك حايم في البوست دا
البوست دا للصغار فقط يعني من الخطاب مساعد وانت نازل |
سامع يا كوشت ،،
ما (نشوفك) حايم هنا ،،
| |
|
|
|
|
|
|
|
|
|
Re: حليل خالك ... (Re: Amna Mohamed Arh)
|
كم؟؟؟؟؟؟؟؟؟
Quote: يعني ورا ناس سارة طواااالي
ديل ياخي ليهم اربعة سنين ونص يادوب |
وانا اشيل واستغفر لمن يتشمشر واللا يقرق .. واقول الزول سنير وما في داعي..
انت متاكدة من الكلام دة .. عشان انعدل كويس
| |
|
|
|
|
|
|
|
|
|
Re: حليل خالك ... (Re: الخطاب مساعد الماحي)
|
سيرة البحر شغالة بهنا ،،
الخطاب يستفسر:
Quote: مسعول من الخير انت آاخوي..
انت ابراهيم دة اكبر مني واللا اصغر |
قامت آمنة وضحت ليه ،، وفكت ليه اللبس :
Quote: ابراهيم دا دفعة هالة
يعني ورا ناس سارة طواااالي
ديل ياخي ليهم اربعة سنين ونص يادوب |
قام الخطاب اتخلع:
إنت قايلنا عجائز يعني ولا شنو؟
عجائز ناس الكوشت ،،
| |
|
|
|
|
|
|
|
|
|
Re: حليل خالك ... (Re: ابراهيم محمد الحسن)
|
خطاب
سلامات
ورمضان كريم ياخوي
وبليلة .......... وبليلة
امنة
كل سنة وانتي طيبة وتصومي وتفطري علي خير
قلتي لي الولييد الاسمو ابراهيم دا طلع دفعة 2005 والله وقع معاي وقعة
اناكنت مفتكرو من ناس 87 المحتلين المنبر
ابراهيم
حبابك وكت طلعت مننا وفينا
لكن كدي النسعلك انت دفغة ليمن عنبه؟
| |
|
|
|
|
|
|
|
|
|
Re: حليل خالك ... (Re: ابراهيم محمد الحسن)
|
خطاب
سلامات
ورمضان كريم ياخوي
وبليلة .......... وبليلة
امنة
كل سنة وانتي طيبة وتصومي وتفطري علي خير
قلتي لي الولييد الاسمو ابراهيم دا طلع دفعة 2005 والله وقع معاي وقعة
اناكنت مفتكرو من ناس 87 المحتلين المنبر
ابراهيم
حبابك وكت طلعت مننا وفينا
لكن كدي النسعلك انت دفغة ايمن عنبه؟
| |
|
|
|
|
|
|
|
|
|
Re: حليل خالك ... (Re: ابراهيم محمد الحسن)
|
امنة
انا ما موافق علي التاجيل لبعد رمضان
انا داير اضغط الولييييييد ابراهيم دا
لكن ممكن نخلي البرنامج دا لبعد الفطور
ابراهيم
اركز للجاياك اوعى تزوغ
تخريمة:
انت قريت في ياتو قسم؟
ايمن عنبة دا من معمار (يعني مما مهندس)
| |
|
|
|
|
|
|
|
|
|
Re: حليل خالك ... (Re: Omer Musa Abbas)
|
عمر ،،
| Quote: انا داير اضغط الولييييييد ابراهيم دا |
الليلة ووووووووووووووووووووووب ،،
(بتاعت أميرة الشيخ - صاحبة كيكي ،،،)
انت ما عارف إني أنا من ناس وردية الصباح ،،
والمساء ده للأسرة والأولاد ،،
| |
|
|
|
|
|
|
|
|
|
Re: حليل خالك ... (Re: ابراهيم محمد الحسن)
|
الليله يا ابراهيم لقيت القدرك
بالله يا الخطاب وعمر الولد ابراهيم دا حكو
لانو كان بستغل فارق اللياقه بينا وبينو
من زمان ونحن بنفتشليه اولاد جيلو عشان يريحونا منو شويه
| |
|
|
|
|
|
|
|
|
|
Re: حليل خالك ... (Re: Hisham Magzoub)
|
هشو ،،
| Quote: من زمان ونحن بنفتشليه اولاد جيلو عشان يريحونا منو شويه |
يعني عُشرة مافي ؟
أنا لي سنتين بأحاول أجاريكم ،،
وعامل نفسي واحد منكم ،،
تقومو ،،
تتخلو عني بكل بساطة !!
أنا شكلي حا أنضم لناس عمر بن الخطاب ،،
قصدي عمر ،،
والخطاب ،،
| |
|
|
|
|
|
|
|
|
|
Re: حليل خالك ... (Re: ابراهيم محمد الحسن)
|
ابراهيم،،،
Quote: يعني عُشرة مافي ؟
أنا لي سنتين بأحاول أجاريكم ،،
وعامل نفسي واحد منكم ،، |
شفت نتيجة مجاراتك ليهم
الناس قايلاك قدرهم،،،
لكن الحمد لله جوك القدرك
عشان يحلوك من العجائز ديل،،
| |
|
|
|
|
|
|
|
|
|
Re: حليل خالك ... (Re: Amna Mohamed Arh)
|
والله با عمر الموضوع دة شكلو فيهو كاميرا خفية
لكن ما مشكلة
وقالوا : الصقر ان وقع كترت البتابت عيب
وقالوا : البتبلبل .. اخير يعوم
دحين آاخوي ان بقت خفية واللا علنية .. اكرب بطنك
| |
|
|
|
|
|
|
|
|
|
Re: حليل خالك ... (Re: ابراهيم محمد الحسن)
|
براهيم سلامات
والله مع وردية الصباح دي تجيني حايم بهنا اضربك ضرب غرائب الابل
والله الكوتش ما يحلك مني
| Quote: هي معمار بقت ما هندسة ،، |
اسمها كلية الهندسة والمعمار
ابراهيم بطل زوغان ورد علي السؤال (انت مرقت من ياتو قسم ) عشان نبدا معاك اللعب
امنة
سلامات
ابراهيم دا زول بتاع فتنة ما ركزي معاه
خطاب
ود بليلة
هناك في ونفوك ولا مافي(نوير)
| |
|
|
|
|
|
|
|
|
|
Re: حليل خالك ... (Re: Omer Musa Abbas)
|
عمر ،،
Quote: ابراهيم بطل زوغان ورد علي السؤال
(انت مرقت من ياتو قسم ) عشان نبدا معاك اللعب |
كدة بتزعلني منك ،،
وده دليل على عدم المتابعة والمذاكرة ،،
ياخي أنا سيرة حياتي كلها بقت كتاب مفتوح في المنبر ده ،،
والناس عارفين كل صغيرة وكبيرة ،،
حتى حلق أسيل القافل عليه الكوشت وولده ،،
معروف ،،
تقوم تقول لي مرقت من ياتو قسم ؟؟
طيب أسال البير ،،
| |
|
|
|
|
|
|
|
|
|
Re: حليل خالك ... (Re: Amna Mohamed Arh)
|
امنة
| Quote: أنا فوتها ليك بمزاجي |
لكن مزاجك طلع رااااااايق
واللا دة عشان الجو المباااا
يا عمر موسى ..
مافي نويرولا ونفوك .. لكن في حاجات تانية بحكيها ليك في وكت تاني عشان ما تسرح
ابراهيم كهرباء
ويا امنة:
ااااالغة
| |
|
|
|
|
|
|
|
|
|
Re: حليل خالك ... (Re: الخطاب مساعد الماحي)
|
خطاب
ابراهيم دا شكلو كمره خفية
شكيتك علي اللا نام ولااكل الطعام كان الموضوع طلع كمره خفية
ابراهيم
ياخي ما تجيب من الاخر وتريحنا
لانو اخلاقي ضيييييقة وخطاب وامنة ديل عارفني
| |
|
|
|
|
|
|
|
|
|
Re: حليل خالك ... (Re: Omer Musa Abbas)
|
والله يا ابراهيم
دخلت روحك في حتة كيف كيف كده
غيها شكية لي اب ايدا قوية
وفيها اخلاق ضيقة بدون وجود السيد رمضان
فما بالك بوحوده ؟؟
بس نحن قاعدين نتفرج
وتشيل وتسمي في الناس المساكين
مرة ابو عنقريب
ومرة ابو كديسة
ومرة ابو جلمبو ( دي نجرة )
برضو نقول نسبة للعشرة التي بيننا والملح والملاح الله يعينك
.........
اين انت يا هؤلاء الزول ( عارف نفسو !!! )
| |
|
|
|
|
|
|
|
|
|
Re: حليل خالك ... (Re: حمد محمد احمد)
|
عمر موسى...
رمضان كرييييم...
Quote: ابراهيم
ياخي ما تجيب من الاخر وتريحنا
لانو اخلاقي ضيييييقة وخطاب وامنة ديل عارفني
|
و ده شنو كلام ضيق الأخلاق ده؟؟؟
ما عهدناك...
ولا شنو يا آمنة وخطاب...
| |
|
|
|
|
|
|
|
|
|
Re: حليل خالك ... (Re: sara Eltayeb suliman)
|
ساره
حبابك
ورمضان كريم
ابراهيم دا نحن من زمان محترمنو ومفتكرنو من مجايلي الكوتش وكده
لكن طلع برلومك
نحن الحملة دي ما حانوقفها الا ابراهيم يعلن الهزيمه او يشرد يخلي المنبر
دمتي بخير
عمر
| |
|
|
|
|
|
|
|
|
|
Re: حليل خالك ... (Re: ابراهيم محمد الحسن)
|
خطاب ،،
Quote: الضمير (حرف الكاف) يعود لاخر علم ذكر قبله
واخر علم مذكور على ما اعتقد كان ابراهيم |
لا لا ،،
المخاطب بالجملة هو خطاب:
Quote: خطاب
ابراهيم دا شكلو كمره خفية
شكيتك علي اللا نام ولااكل الطعام كان الموضوع طلع كمره خفية |
فـ (ابراهيم دا شكلو كمره خفية) دي جملة إعتراضية ساكت ،،
والأصل هو :
Quote: خطاب
شكيتك علي اللا نام ولااكل الطعام كان الموضوع طلع كمره خفية |
وقع ليك ،،
| |
|
|
|
|
|
|
|
|
|
Re: حليل خالك ... (Re: ابراهيم محمد الحسن)
|
Quote: خطاب
امنه
ساره
ابراهيم |
انت حددت ناس محددين
لكن لا باس نحن برضو الكبار
ربنا يشفيك شفاء لا يغادر سقما
وكما تقول الدكتورة
شرك مقسم فوق الدقشم ( بدون تدخلات من حاج علاء الدين )
| |
|
|
|
|
|
|
|
|
|
Re: حليل خالك ... (Re: Hisham Magzoub)
|
Quote: أكان زولاً بريد الجوطه والحفلاتْ
محل مايسمع النـّقره ,
يخت طاقيتو فى راسو
ويشيل طمبورو فى ايدو
وِيدِجْ حفيان برا نعلات... |
الأخ عمر موسي:
مهداة لك صورة للأخ العزيز محمد الجاك الصراف وهو في حالة (جوطة)
الصـــراف لمن لايعرفه شخصية مرحة..ساخرة..وله (شيطان شعر) مخاويييه..
| |
|
|
|
|
|
|
| |
ابراهيم محمد الحسن
الخطاب مساعد الماحي
Amna Mohamed Arh
Hisham Magzoub
حمد محمد احمد
sara Eltayeb suliman
علاء الدين محمد بابكر
فيس بوك
تويتر
انستقرام
يوتيوب
بنتيريست