|
|
|
 Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
نبدأ في اسئلة الكوشت :
ابراهيم للذين يرغبون فى الاغتراب ماذا تقول لهم ?
تعرف ،،
لو كان سؤالك عن الناس اللي إغتربوا فعلا ،
كان ممكن أقول ليهم كتير ،،
ويقولوا لي أكتر ،،،،،
بس،،
للذين يرغبون في الإغتراب ؟؟؟!!
وفي الوقت الراهن ؟؟!!
ما قادر أستوعب إنه لسة في ناس بتغترب !!!
ثقافة الإغتراب يمكن إنتشرت بصورة واسعة في فترة معينة ..
وده لعوامل كتيرة ،،
وظروف محيطة ،،
إضطرت معظم الشباب لطلب الهجرة والخروج من البلد ..
يمكن حتى بلدان المهجر كانت ظروفها غير ،،
وأبوابها مفتوحة لإستقبال الوافدين في مختلف المجالات ..
بس هسع ،،
ومع الظروف الراهنة ..
داخلياً ،،
وخارجياً ،،،
أعتقد صعب التفكير في الإغتراب ،،
طبعا ده من وجهة نظري ..
وحسب تجربتي مع الإغتراب ..
لكن ،،
ده ما بيمنع ..
ولا بيقفل الأبواب أمام من تتاح ليه فرصة مناسبة ..
والفرص المناسبة موجودة ..
وربنا يوفق الجميع لما فيه الخير ،،،،،،
| |
 
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
وياريت تتحدث بشفافيه عن مشاريعك ( العمليه و العلميه و الاجتماعيه و العاطفيه ) التى نجحت و التى فشلت :
يا كوشت ،،
الكلام في المشاريع دي يطول ..
وعاوز ليه وقت ...
طبعا قصدي المشاريع (العملية والعلمية ،، والإجتماعية ..) 
وبعدين ،،
الحتة بتاعت (و العاطفيه .. التى نجحت و التى فشلت دي ،،
ما هي ذاتها :
Quote: إبراهيم
عندك
قصة فاشلة؟؟ |
بتاعت القرود ..
ف ...
أنسى ،،،،
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
يا ليون ،،
Quote: والله يا إبراهيم ما قصرته تب ، لالا ما عليك أديت حق الوطن
ويا صلاح مختار ما تحكها شديد ، عليك الله كااااادوووو يحلقو
لي صلعة دي ما براها أخير من كتلوك ولا جوك جوك |
وللأوطان في دم كل حرٍ ،،
يدٌ سلفت ودينٌ مستحق ،،
تعرف ،،
حكاية الصلعة البعد ما الشعر يقوم ،
دي كانت أكتر حاجة بتعذب المجندين ..
يعني يرضيكم يمشوا يلفلفوا في كافتريات العمارات ،،
والصلعة تلمع ؟ ؟
وما تنسى ،،
آخر اليوم فيها مواجهة للعالم الخارجي ،،
ومواصلات ..
ويمكن تقابل (ناس بتعرفهم) ..
المعسكرات المقفولة كانت ساترة ده كلو ،،
شفتوا حجم المعاناة النفسية ،،
وبرضو يا صلاح مختار تقول لي ما أديت الخدمة الوطنية 
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
تعرفوا ،،
ورغم إني إتصرفت ،،
وزغت من الصلعة بتاعت خالد حبة ،،
برضو ما ريحونا ،،،
مرة واحد من الضباط ..
بس مزاج كده ،،
قال لينا بكرة تجوا حالقين كلكم ،،
(ياخي إنعل أبو شعرنا ده زاتووو) ،،،
وطبعا فيها تفتيش في الطابور وكدة ...
والما بيجي حالق ،،
وقع .....
ده برنامج ..
وبيعرفوا يحلقوا ليه هم ،،
وطبعا دي بتكون عملية جراحية ..
إنتقاما منك ..
وحتى تكون عبرة لمن تسول له نفسه ،،
بس نحن برضو إتحايلنا ... (شلة ناس هندسة ..)
في حلاق في المعسكر ..
مشينا جريناها بالماكينة نمرة 2
وربنا عماهم مننا ...
مش الصلعة دي ؟
أبيييييييييييييت ..
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
طبعا بالإضافة للصلعة ..
ووقفات الشمس الطويلة ،،
والإرهاق البدني ..
والنفسي ...
الواحد كان شكله ....
أنسوا بس ،،
مرة كدة طلعنا بدري من المعسكر ...
قمت على التعترني ،،
قلت أمر على ناس الشركة الشغال فيها في نمرة 2
وحشوني ،،
وبالمرة ارجع معاهم بالترحيل ..
تعرفوا أول ما دخلت ،،
واحدة زميلتنا أول ما شافتني قالت شنو ؟
قالت (واااااااااااااااااااااااااااااااي) ،،
ده شنو ده ؟؟؟
أتخيلوا ،،،
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
هالـة حسن:
الأخت ،،
والزميلة العزيزة ..
هالة حسن .......
حقيقةً كانت واحدة من اللاتي تعاملت معهن عن قرب ...
نعم الأخت والزميلة هي ،،
هالة إنسانة بسيطة ،،
وسهل التعامل معاها ،،
طموحة ..
أتمنى ربنا يوفقها في حياتها ،،،
يمكن ،،
كتير من أولاد الدفعة (غير ناس كهرباء) ..
كانوا يتهيبوا التعامل معها ...
كانوا مصنفنها ضمن (الحناكيش) اللي عندهم عالمهم الخاص ..
ومن الصعب االتعامل معهم ،،
وده يمكن لأنهم ما أدوا نفسهم فرصة للتعامل معها ،،
والتعرف إليها عن قرب ....
وهسع ،،
والناس تتلاقى هنا في اليوم الحار من تاني ،،
حقيقة هالة أزهلت الكثيرين ..
بأسلوبها ،،
وأريحيتها ،،
وطريقة تفاعلها مع الأحداث ،،،
وطريقة تعاملها من الناس ،،،
وعرفوا هالة الحقيقية ....
_______________________
هالة ،،
بالله كسير الثلج ده مش يجيب نزلة ؟ عشان تصدقي بس ،، 
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
أبراهيم،
الله يكرمك ياخى،
(هو حلو و لا مش حلو؟؟؟)
دة بس من أصلك الطيب،،،
لكن،
يمكن ،،
Quote: كتير من أولاد الدفعة (غير ناس كهرباء) ..
كانوا يتهيبوا التعامل معها ...
كانوا مصنفنها ضمن (الحناكيش) اللي عندهم عالمهم الخاص ..
ومن الصعب االتعامل معهم ،، |
زى منو؟؟؟؟
سريع...سريع!!!
______________________________
نزلة و بس؟؟؟
حسه إحنا خايفين عليك من الإلتهابات...
أعمل حسابك من لعب الموية الكتير دة،،،،
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
صلاح مختـار:
للتحدث عن صلاح مختار ،،
حا أضطر أرجع للإجابة على سؤال سارة السابق ،،
لما أنا قلت :
Quote: وهسع ،،
ونحن نجتمع من تاني ،،
ونتواصل بكل الحب ده ،،
شعرت بما أضعته زمان ..
من صحبة كثير من الزملاء
والتقرب منهم أكتر .. |
قامت سارة قالت لي :
| Quote: زي منو إذا أمكن التحديد؟ .. |
صلاح مختار ،،
أخ عزيز ..
علاقتي بيه زمان لم تتعدَ زمالة الكلية ..
ولمات كافتريا هندسة ..
وشعور الأسرة الواحدة ...
بس ،،
هسع ،،
وبعد التعامل معاه ،،
و التقرب إليه أكتر ..
عرفت شخصية صلاح مختار بشئ من الوضوح ..
صلاح مختار ،،
إبن أمـدر ،،،
(و دي تعني الكثير ،،)
زول ترتاح للتعامل معاه ،،
ذكـي ...
ولمااااح ...
خياله واااااسع ..
مع شئ من السخرية ،،
قصدي ،،
مع كثير من السخرية ،،
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
نـزار جعفر:
نزار بارتيتا ،،
لحسن الصدف ،،
الثلاثة السألتني عنهم يا كوشت ..
هم أولاد أمدرمان ،،،
ودي بتغني الواحد عن كتير من الكلام ...
نزار جعفر ..
(ننـــــــو ...)
زول عسل شديد ..
ومحبوب من الجميع ،،
سهل الدخول فيه ،،
و التعامل معه ،،
أفتدقدناه كثيرا في جدة ...
عاوزين تعرفوا قصة ( ننــــــو) ؟؟
أقول يا ننو ؟؟
نسيت حاجة ،،،
نزار يده طاااعمة .. في الطبيخ ،،،
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
ولو طلب منك ان تهدى ثلاثة اشخاص هدايا قيمه ..... تهديهم شنو ولمن من الناس ؟؟ ،،
يعنى مطلوب تحديد نوع الهدية و اسم الشخص ؟
طيب ،،
ممكن تقول الهدية الأولى لعمر الحبر ،،
أهديه لابتوب ،،
تعويض بدل الضاع يوم (جاد) ،،،
وعشان يحن علينا ويرجع لليوم الحار ،،،،،
بالنسبة للباقين ،،
بصراحة ،،،
لقيت الناس الممكن أهديهم كتاار ،،
أكتر من إثنين ،،
عشان كده أحسن ما أزعل زول .......
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: Hisham Magzoub)
|
يا سلام ياخي
والله المولد دا فايتني... معليش يا جماعة إني خاشي شمال كدا... لكن من زمان دكين كلمنا وا قال لينا بكري دقسنا و عمل لينا منبر برانا و كلامو (على الأقل بالنسبة لي) طلع صاح... لأنو الواحد بدخل المنبر الرئيسي سريع كدا و ما بينتبه للمنبر دا... و صراحة طولت ما طليت بجاي.
لكن زي ما بقولو القلوب شواهد و من غير أي سبب الليلة دخلت هنا عشان ألقى البوست دا عن واحد من أعز و أحب و أجمل من جمعتني بهم دروب الحياة. درست مع إبراهيم الابتدائي (في رواية الأولية و في رواية أخرى الأساس) في مدرسة الهجرة الابتدائية و هو كان يدرس بنهر و أنا بنهر آخر و رغم المنافسات المعروفة في تلك المرحلة بين الأنهر المختلفة فقد كان إبراهيم هو الأقرب و كم قضينا من زمن معا إما بنزلهم العامر إو بمنزلنا ثم انتقلنا معا إلى مدرسة أم درمان الأميرية حيث درست السنة الأولى و انتقلت إلى بحري حيث قلت لقاءاتنا و إن لم تنقطع حتى التقينا مرة أخرى في الجامعة و أصبحت غرفتهم بداخلية كردفان غرفتي الثانية خصوصا أيام الامتحانات بزعامة الأخ أكرم يوسف و عمر الصادق و معتز عريس. آخر لقاء لي بإبراهيم كان بمنزلهم في أم درمان عندما جئته معزيا في والدته (رحمها الله و جعل قبرها روضة من رياض الجنة) و مودعا له في طريقه إلى السعودية. طبعا كلكم بتعرفوا إبراهيم لكن لا بد من ذكر أنه من أرق الناس و لا يتحمل أن يسمع أي إنسان كلمة جارحة أو يتسبب في زعل أي زول. فرقتنا الحياة في أركان الأرض و لكن الأمل باق أن نجتمع يوما إن شاء الله و إمكن كان الله مد في الأعمار يكون تقاعدنا في السودان و نلقى لينا فرصة نجتر فيها ذكريات أيام ثبت لنا أنها أجمل أيام العمر بلا منازع.
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: صلاح ليون)
|
يا اللله ،،،
ما تتخيلوا شعور الواحد كيف بيكون ،،
لما يجي داخل البوست من الصباح ،،
ويلقى إسم شخص عزيز ،،
عزيز جداً ،،،
الأخ والصديق ياسر علي الشيخ (العوض) ...
حقيقةً إفتقدناك كثيرا ياسر ،،،
في أوقات نحن الأحوج إلى أمثالكم فيها ،،،
إن كان على مستوى اليوم الحار ،،
أو على المستوى الشخصي ،،،
نتمنى نلتقي في القريب ،،،
ونجتمع على خير ،،
وتمشي السودان وتلقى الأهل بخير ،،
وترجع بالسلامة ،،
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
سلام أس ما لا نهاية لكل عشاق البوست الرائعين
مداخلة سريعة كده من زولة أرهقها التعب و الإعياء
يا جماعة بيري ده كفاهو لحدي هنا
و نشوف الباقين البالين رؤوسهم و منتظرين
أنا محتاجة ليه شوية في دعم الكلية
............................................................
إبراهيم في سطور:
أنا ماشفت إنسان حساس ومرهف ورقيق وواضح ذي إبراهيم البير
و كمان مجامل شدييييد و حتى لو علي حساب أي شئ
و كمان بيحب الأرشفة و التوثيق لكل شئ
خطه جميل و كتاباته منظمة (ده أيام الدراسة)
و قلبو أبييييييييييييض
بس ما عارفة قصة ما بينسى الزعل دي جابها من وين
الحمدلله ما حصل بيننا زعل حتى الآن
و إن شاء الله ما يحصل
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: Tahani abdalla Attia)
|
تهاني البير ،،،
كفارة وسلامتك ياخ ،،
وإنشاء الله ما تشوفي شر ،،،،
كلامك ده بالنسبة لي خير ختام ،،
وحا أقرض على كده ،،،
Quote: بس ما عارفة قصة ما بينسى الزعل دي جابها من وين
الحمدلله ما حصل بيننا زعل حتى الآن .. |
فعلا ،،
الحمد لله ما حصل بيناتنا زعل ،،
ولا أظن يحصل ،،،
بس جد يا تهاني ،،
عن تجارب ،،
زعلي كعب شديييد ،،
خصوصا لما يُقابل حسن النية ،،، بسوئها ،،،،
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
قبل كل شئ الف سلامه ليك ياتهانى و اجر و عافيه
ابراهيم بوستات التعارف و التوثيق ده ماعندها نهايه
يعنى بوست مفتوح والكل يسأل وانت تجاوب وممكن بدون اسئله توثق
وعموما شكرا للاغنيه و فعلا هيبه يا مريخ هيبه
وبرغم انك بتتزاوغ من بعض الاسئله بنوع من الدبلوماسيه لكن بنمشيها ليك
سؤال توقعته ولكنه لم يرد و ماهى اجابته
وبرضو سؤال للمتابعين > ابحث عن طارق الكوتش فى احدى صور التخرج اعلاه
راجعين
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: Elawad)
|
وديدي ،،
مرحب بيك ،،
رغم إنك جاي متأخر ،،
وما حاورتني ولا اتعرفت علي ،،
حمدا لله على سلامة الرجوع ،،
Quote: كت اتوقع منك الكثير عن هؤلاء.. (قبر الدوق)
Quote: صلاح مختار ،،
إنت بالمناسبة ،،
كنت مع ناس (قبر الكلب) ؟؟
لكنك اختصرت الموضوع .. ممكن سؤال؟؟؟؟ |
وأنا العرفني شنو عن (قبر ال dog) ؟؟؟!!!
أقول ليك نحن ناس العمارات ،،
هييييييييييييي يكة ،،،
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
ده كان شعوري ،،
وأنا أدخل اليوم الحار في أيامي الأولى ..
لما تفاجأت بأنه الأخ ياسر عضو وواحد من اللي بيكتبو فيه :
Quote: يا الله ...
ياسر علي الشخ ..
ذلك الرجل الإنسان بمعنى الكلمة .. وين أراضيك يا باشمهندس .. زمن طويل لم نحظى برؤياك أو أخبارك
والظاهر إنه البوست ده - ذي ما اتوقعت - حا يحرك الكثير والكثير من الأشجان والذكريات المحفورة في الدواخل واللي كانت فعلا في إنتظار من يزيل الغبارعنها أمثال الأخوة الرائعين (خليل - كيكي - أبوبكر - ياسر علي الشيخ - وغيرهم وغيرهم ) ..
والظاهر يا ياسر شريط الذكريات ما حا يرجع لغاية أيام الهندسة بس - بل حا يمتد إلى الوراء - إلى أيام هي الأجمل والأعمق - ايام مدرسة الهجرة الإبتدائية وأمدرمان الأميرية..
وطبعاً الأخ ياسر نحن إفتقدناه في مدرسة المؤتمر الثانوية - لأنهم رحلو إلى بحري وكان بذلك إضافة ثرة لناس بحري الحكومية .. وطبعا برحولهم إفتقدنا الملح بتاع سيارة والده دكتور علي الشيخ العوض (له الرحمة) ،، اللي كان بيوصلنا بيها طيلة أيام أمدرمان الأميرية .. رغم إن علاقاتنا إمتدت .. وحظينا باللقاء مرة أخرى في كلية الهندسة ..
بالمناسبة .. في حادثة بسيطة .. ومقولة من الأخ العزيز ياسر ما بنساها أبداً .. وهي اننا مرة في البركس وفي عز زنقة الإمتحانات - اعتقد إنه إمتحان Sub صاحبنا ال Drawing وجاء وقت الصلاة .. قام ياسر قال لي : (نمشي نصلي - بارك الله في عملٍ قطع للصلاة..) .. والظاهر إنه فعلا ده حصل لأني باسيت ال Sub ..هذه الكلمات البسيطة ،، العميقة في المعنى أنا ما زلت كل ما أقولها أتذكر الأخ ياسر .. |
وكل ما تجي سيرة ياسر ،،
بأتذكر الكلمات دي ،،،
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: صلاح ليون)
|
ليون ،،
Quote: أحسن نخلي التفسير لي صلاح مختار
مع العلم إنو لسه ما لقى اجابة
لي سوال (انك ما عملت الخدمة؟؟) |
طبعا صلاح مختار لو كان من ناس قبر ال dog (بتاعت وديدي) ،،
فأكيد بالنسبة ليه أنا ما أديت الخدمة ،،
(وش مادي لسانه ،،)
Quote: لكن انا تفسيري إنك علم على راسك
نار واقدم من المخرج الكوتش ذاتو
ولهذا السبب استحى انو يكتبها ليك |
جائز ،،
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
إيميل من آمنة...
Quote: مساء الخير على الشباب
يا خوانا انا ما كنت عاوزة اعلق على بوست ابراهيم دا هسة وكل يوم بدخل اقرأ فيه شوية لكن والله الكلام دا عجبني شدييييييييييييييييييييد
طبعا كلكم بتعرفوا إبراهيم لكن لا بد من ذكر أنه من أرق الناس و لا يتحمل أن يسمع أي إنسان كلمة جارحة أو يتسبب في زعل أي زول.
( وش مستغرب جنس استغراب)
إبراهيم انت طبعا تعريفك مفروض يفوت الصفحة الرابعة دي
وشايف سارة وقفت عن الرابع وما عارف الخامس حيكون متين
يمكن تكون متضامنة ، أما إنت ما عايزين نقول 8 لكن شد
حيلك وبالذات لو جات صحبتها هنا وبدو الدفير سوياً
يا صلاح صحبة سارة ما كانت جاية بجاية هسة .... لكن عليكم الله الكلام دا ما بجيب النحل(وش مجهجه )ويا ابراهيم والله شهادة الدكتورة ما بعدها اي كلام
إبراهيم في سطور:
أنا ماشفت إنسان حساس ومرهف ورقيق وواضح ذي إبراهيم البير
و كمان مجامل شدييييد و حتى لو علي حساب أي شئ
و كمان بيحب الأرشفة و التوثيق لكل شئ
خطه جميل و كتاباته منظمة (ده أيام الدراسة)
و قلبو أبييييييييييييض
بس ما عارفة قصة ما بينسى الزعل دي جابها من وين
الحمدلله ما حصل بيننا زعل حتى الآن
و إن شاء الله ما يحصل
ياجماعة انا في عزاستمتاعي بالصفحة الرابعة دي ومجدعة في الردود الفوق دي فجأة القى ليك اسمي وكمان امتحان ....والله يا ابراهيم لو ما كانت دكتورة تهاني قالت الكلام الفوق دا كنت قطعت ليك رد من شبطي القديم ... لكن في إطار كسير التلج المدور دا حا اقول ليك امرك ياهندسة وانت تسأل ونحن نجاوب(بس بدون تعسف وتحديد ترتيب)الحج دا كان فيه اركان زيادة منها زيارة ابراهيم...وزيارة باب شريف...وحاجة تالتة راحت مني....(بالمناسبة أنا زرت باب شريف قبل كم سنة) م
|
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: sara Eltayeb suliman)
|
صباح الخير يا هندسة ،،،
آمنة ،،
Quote: الحج دا كان فيه اركان زيادة منها زيارة ابراهيم...وزيارة باب شريف...وحاجة تالتة راحت مني....
(بالمناسبة أنا زرت باب شريف قبل كم سنة) م |
الليلة ووووووب (بتاعت أميرة الشيخ - صاحبة كيكي وهالة ) ،،
لكن طلعتِ ما ساهلة ،،
يا ربي كنتِ مذاكرة كويس؟ ،،
ولا رجعتِ جريتي البوست من أوله ،،
(قرايات قابات ،،)
وأنا اقوووول ،،
الناس ديل وين أمس ،،
على العموم ،،
قراية القابات يا ما باصت ناس ،،
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
حفلة الـTour :
أذكر ،،
وبعد أسبوع المهندس الثامن ،،
كان معرض الإلكترونيات فاز بالجائزة الأولى ،،
كهرباء ،،
وي ييييييي (بتاعت كيكي ،،)
وطبعا الشباب على الهبشة ،،
وبس عاوزين ليهم سبب ،، عشان يبرمجوا ،،،
قررنا نحتفل بالمناسبة ،،
كانت كافتيريا السطع (في ال Tour ) ،،
مهملة ومهجورة من سنين ،،
وما مستفيدين منها بالصورة الأمثل ،،
يعني لو لقت زول يرعاها ،، ويستفيد من إمكانياتها الجمالية ،،
مش كانت وفرت على كثيريين ،،
الهجرة للكافتريات المجاورة ،،
(عشان يشربوا ليمون بس ،، ما لحاجة تانية ،،،)
يتبع ،،
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
قررنا نعمل الإحتفال في كافتريا السطح ،،
بس ،،
دي عاوزة شغل ومجهود،،
ونحن لها ،،
تم تكوين غرفة عمليات ،،
واتوزعنا المهام ،،
طبعا الطلوع للكافتيريا في سطح ال Tour
بالسلالم كان أمر صعب ،،
فمجموعة كان عليهم المصعد ،،
تشغيله وتنظيفه ،،
ومجموع عليها تنظيف الكافتريا والقاعة في السطح ،،
ومجموعة مسئولة عن ال Catering ،،
ومجموعة إعداد البرنامج ،،
غايتو طلعت حفلة حلوة جدا ،،
____________
الصور جاية ،،
| |
|
|
|
|
|
|
| |
Hisham Magzoub
ابراهيم محمد الحسن
صلاح ليون
sara Eltayeb suliman
Elawad
Tahani abdalla Attia
فيس بوك
تويتر
انستقرام
يوتيوب
بنتيريست