شقة مصر

Quote: وانتو بتصلبوا في ملهم نسيتو أهم حاجة إحصاء المسروقات احسبوا القروش وطلعوا منها إيجار الشقة وسعر العفش وقروش النضافة خلال الشهور الفاتت وصيانة العربية وشوفوا الباقي كم العربية ما بتمشي براها مفروض يتأجر ليها سواق عشان يستقبل بيها المرضى في المطار ويوديهم المستشفيات الشقة ما بتنضف وتترتب براها وأكيد مفتاحها ما بختوهو تحت الطوبة .. لازمها غفير يشرف عليها الناس لما شاركت ما كانت قدامهم خطة وميزانية ودفاتر محاسبية واضحة ولا وضعت ميزانية للشخص المشرف البستقبل الناس على حساب رزقه وشغله وبيديهم خبرته بمستشفيات مصر قبل مشوار التاكسي ولا وفرت متطوعين يساعدوهو على أرض الواقع عشان يقدر يشتغل في زمن فراغه الناس لما شاركت كانت واضعة ثقتها الكاملة في ملهم وهو بناء على الثقة دي اصبح يتصرف من نفسه بدون الرجوع للبقية والسبب إنه على أرض الواقع مافي زول غيره .. احسبوا التكاليف تاني وشوفوا المال المستغل أكتر من أجرة الغفير والسائق ولا لأ ! نعم ملهم أخطأ في إنه تصرف بناء على ثقة الناس ما بطريقة علمية وما فكر في إنه الناس البتصدقوا وتدفع بدون ما تشوف الحالات دي ممكن تخونه في يوم من الأيام .. وواضح إنه كان بعتمد على الذاكرة والموبايل في التوثيق بدون شغل مستندي مؤسس .. خطأ ملهم خطأ إجرائي لكن المبلغ المستغل ما أظن بصنفوا في خانة حرامي على كل حال انتو ما قصرتو ونجضتوهو بكل الاتجاهات طلعوهو من الزيت شوية عشان ما يحرق .. يحرق دي يعني الناس تفقد الثقة في بعض وتحجم عن التعاون في مقبل الأيام .. خاصة إنه ديك بهناك مشغلة ليها حفلة شماتة في بوست منبثق. كلامي دة ما تبرئة لملهم بقدر ما هو تحجيم الموضوع لوزنه الطبيعي - بحسب رؤيتي - اللي ما حتعجب 90% من المشاركين في البوست