|
|
 مازن الجمَال و ممدوح أبَارو ..... أقيفوا النحدسكم
|
طبعا إنتو اولاد مدني و اولاد مدني ديل معروفين شفاتة درجة اولى
على قول عباس التني يقول ليك في الكوتشينة اولاد مدني يجلو المخاواة
عباس دا راجل فردة تمام واخو اخوان لاقيتو في الفجيرة في النادي السوداني
طبعا الفجيرة دي ظريفة جدا و مجتمع السودانيين فيها مترابط و متواصل عكس الإمارات التانية
هي الإمارات زاتها بقت ما زي زمان اسي زحمة وغلاء و حالة بطالة جدا اتملت هنود و بتان
الجامع الجمبنا بعد الصلاة تلقى البتان ديل دارشين كدة التقول صليت في كراتشي
و في زي سوق كدا ولا ميدان بقولوا عليه ميدان الرولة كان مشيت بيه يمين تحلف تقول ماشي في بونا ولا مدراس
اها بمناسبة بونا قاليك فيها جامعة قوية درسوا فيها سودانيين كتار
واحد منهم جعفر ابراهيم كنا بنقول ليه ود الطيار ,ابوهو كابتن اظنه في سودانير ولا حتة تانية ما مذكر
جعفر دا زول مستهبل كيف لكن وناس ونسة و بتاع جاكات درجة أولى لاقيناه في معسكر الإلزامية في فتاشة
كان شايل ليه البوم بتاع صور كله جكس كيني و افريقي و محشش ليك علينا بيه
فتاشة دي اخدنا فيها معسكر شهرين زي السم الله لا ضوقكم ليهم
كان في ملازم بتاع شرطة عسكرية خريج جديد وعاجباهو الضبانة في كتفه كرهنا البلي زاتو
يومي على الله شادينا بالليل و يطرشنا ليك من الفارغة ما ندر
كمان كان في واحد من العساكر سمين كدا ملقبنو كابوكي
كابوكي دا بقى سغيل سغالة وجنو يشحد التمباك و الفلة من الشباب و عادي يسلف منك اي حاجة و ينوم بيها
طبعا الحركة دي بايخة جدا اذكر كان في جارتنا في الصحافة مكرهة نسوان الحلة كلهم تشحد اي حاجة و ما بترجعها إلا بعد طلوع روح ستها
اها النسوان اتفقن بي وراها تاني ما يدوها اي حاجة لكن هي طلعت مفتحة نقشت النومة و بوظتها ليهم بس ما مذكر التفاصيل اسي
إن شاء الله الواطة تصبح بشد سلك للحاجة اسألها
ياخي انا زاتي مشتاق ليها و للحاج طولت منهم تعرف حقو اجازف لي اجازة اسبوع ولا اتنين كدا امشي اديهم طلة
بمناسبة الطلة دي قولة كترة الطلة بتمسخ خلق الله دي جاية من وين؟
بعدين ما عاجباني بشكلها دا مفروض تكون دقيقة اكتر يعني الناس البتريدهم و ترتاح ليهم مهما كتروا الطلة ما بمسخوا ليك عكس التانين ولا كيف؟
و بمناسبة ناس ترتاح ليهم أيوااااا اذكرت انا كنت دايركم في شنو
ياخي اتلومنا معاكم وما رحبنا بيكم في المنبر
تدونا خاطركم و تقبلوا ترحيبنا بيكم ولو متاخر شوية
شفتو كيف ؟
ابو حتوت
13-آذار -2008
|
|
 
|
|
|
|
|
|
|
 Re: مازن الجمَال و ممدوح أبَارو ..... أقيفوا النحدسكم (Re: محمد البشرى الخضر)
|
ود البشرى ياخي ده احلى ترحيب انا شفتو
ماخليت فيهو حاجه (تداعيات وكده)
انته عارف مازن ده دخل زي الضل
ياخي انا بعرفه عديييل كده ويتداخل معاي
وانا اقول يا اخوانا مازن الجمال ده
لحدي ما جانا الشمار
مش الزول لمه يدخل يكلم اصحابوا وناسوا كده
لزوم يقيفوا معاه
الزول ده قلع حقه برااااهو
له ولممدوح اجمل ترحيب
--
يعيش يعيش أبو سلافة
| |
|
|
|
|
|
|
|
|
|
Re: مازن الجمَال و ممدوح أبَارو ..... أقيفوا النحدسكم (Re: محمد البشرى الخضر)
|
ود البشرى ....
أحلى ثلاثة حاجات في البوست ده حاجتين ...
السرد الجميل بتاعك ..
مازن الجمال ... من مدني ... كمان ممدوح من مدني ؟؟ ..
| Quote: الكوتشينة اولاد مدني يجلو المخاواة |
والشاهد .. القصة الشهيرة لإمام المسجد عندما نسى سورة الفاتحة في صلاة..
ولسوء حظه كان الصف الأول خلفه من الجماعة ليردوا بصوت واحد "كتبوا 14"
______
ياخي واصل هضربتك الجميلة دي ..
-
| |
|
|
|
|
|
|
|
|
|
Re: مازن الجمَال و ممدوح أبَارو ..... أقيفوا النحدسكم (Re: محمد البشرى الخضر)
|
Quote: و بمناسبة ناس ترتاح ليهم أيوااااا اذكرت انا كنت دايركم في شنو
ياخي اتلومنا معاكم وما رحبنا بيكم في المنبر |
ات عارف يا ود البشرى انا مصنقر في مكة دي زي المسجون .. وكل يوم نفس الروتين
صحيت الصباح استحميت وطلعت مشيت الشغل .. اصوات تلفونات ما بتهدا ولا ثانية ..
صوت محطة اللاسلكي المزعج .. موبايل بيدق من ناس عاوزين شغلة ما بتطلع من نطاق الشغل
الممل وبعمل ليه صامت كالمعتاد .. جيت صنقرت فتحت الكمبيوتر رسلت البنقالي مشى جاب لي
سندوتش البيض المسلوق وقزازة الديو كالعادة .. اكلت وجاب لي كباية الشاي .. ولعت
سجارة هبشت الورق القدامي بدون نفس .. اتلفت على الكمبيوتر وفتحت النت وبديت اقلب
بدون هدف محدد وبطريقة الناس المقلقين ديك .. بفتح اي صفحة وقبل ما تفتح زي الناس بكون
فوق كتبت رابط الصفحة البعدها .. عشرة دقايق بالكتير وبكون طلعت من النت .
بخش في المعمعة المعتادة تلفونات .. مشاكل .. انت وين ياخ .. طالبنكم في الموقع الفلاني
.. وهكذا .. انتهى الدوام الاول .. رجعت للكمبيوتر مرة تانية والمرة دي فتحت الماسنجر ..
شاغلت دي .. قلت نكتة لي ديك .. دخل على واحد من اصحابي حكى لي شمار الحفلة حقت اول امس
وكيف كانت الاستراحة ضيقة والفنان كان مخستك .. والجكس الووب عليه ( على حسب وصفو ) وختاما
بـ اسمع انا ماشي اتغدا ..
ولا جا داخل علي ياسر اخوي .. وطلبات ناس البيت المعتادة .. القروش ثم النقود ثم البنكنوت .
قفلت الكمبيوتر وفتحت درجي طلعت البسكويت المحشي الكان لذيذ في يوم من الايام لكن مع مرور
الزمن بقى ممل وطعمو ما سمح .. اكلتو ومشيت كتحت لي حبة موية ومنها على الاستراحة .. رميت لي مرتبة في الواطة واترميت فيها .. فتحت الموبايل قلبت فيه شوية ونمت ..
صحيت مع صوت المنبه .. خشيت استحميت ورجعت المكتب .. مكرر
خلصت الدوام وطلعت مشيت على المطعم السوداني .. خشم خشمين وصحن فول
ورجعت البيت .. فتحت الكمبيوتر .. مكرر
ورقدت نمت ..
وصحيت الصباح .. مكرر
مكرر
مكرر ..
لحدي ما جاتني الموافقة وتفعيل الاشتراك في سودانيز
ات عارف يا ود البشرى بقيت مدمن تماما .. اتخيلت معاي المنظر !؟
لو ما اخدت جرعتي الكافية منو يوميا ممكن اقعد اكورك والم الناس .. ويجو الشماشرة
- ده مالو
ومرة من هناك ..
- كر علي يا بنات امي الود مالو .. سجم خشمو وبتاع
ياخ لدرجة مبالغة .. انا لما ارقد واغمض عيوني خلاص للنوم .. بكون شايف سودانيز
العنوانين والاسامي وكده
طبعا في اعضاء اساسا بعرفم من بدري
لكن من الناس الاول مرة اتعرف عليهم
اول زول اتصلت عليه كان حاتم يوسف .. زول جميل وصاحب اخوي الكبير
واول مكالمة بينا استمرت ساعة وشوية .. ذكريات جميلة عن مدني .. ولما كانو بيجو يزاكرو في بيتنا .. ومواقف زمان .. وهلم جرا .. قمة في المتعة .. يا سلام عليك يا حاتم ياخ
تاني زول اتصلت عليه الظريف تمبس .. ياخ ده طبقت ليك فيه مشهد غريب .. كان تاني يوم
في احتفلات في جده ومفروض اشارك فيها بقصيدة .. وبحكم اني زول كبكابة ومجنتر في نفس الوكت
اول ما رفع السماعة قبل ما اقول ليه ألو .. شبكتو ليك كدي اسمع دي .. وابتديت اقول في القصيدة
خلعتو ليك جنس خلعة .. لكن هو طلع زول ألذ مني .. يا زول سمعني ليك للآخر وبكل متابعة بالرغم من انو كان جايط وجمبو في ناس بيتكلمو وبتاع .. زول جميل يا تمبس والله
جاني اتصال بعد العشا وانا ملخوم ومزنوق ومفلس وحالتي حالة .. يا ولد ترد ولا ما ترد
في النهاية كف نف .. الوو
جاني صوت ضكر كالعادة وعلى العليه قال لي : ات وين ّّ!!؟؟
انا طبعت بقيت شايف الدنيا فوشية ( وما تقولو لي الفوشية دا لونو كيف لاني ما عارفو )
وهو بكرر لي ات وين ياخ !؟؟
وانا بقيت ما شايف خلاص غير شاشة مفتوحة قدامي بتعرض .. عشا وسرير اضافي للنوم
وونسة مملة وسهرة طويلة .. وقروش ح تندفع وخسارات وانا مفلس ... الخ
هو زاتو لما حس بي تلجت قام خفف علي العيار حبتين واخيرا قال لي انا ود الصائم
ياخ انا لو كان في ار بجي ولا مصيبا في يدي وكان قدامي في اللحظة ديك كان فكيتا فيو
زول تلقائي وبسيط جدا في تعاملو .. ساخر لابعد درجة .. بالمختصر ود الصايم ممتع .
عارف خليتك في الاخير لي يا ود البشرى .. ح تعرف هسة
ياخ اول ما جيت خاشي وقلت كدي اتلب على اول ناس الاقيهم لقيت بوست ود البشرى بتاع الاسابيع
ياخ انت زاتك ساعدتني اني اخش فيك توش .. زول جميل خلاص .. وكمان احتضني طوالي ..
ياخ وكت كسير التلج مدور بهناك ومدورين انا ودكين البرمبالة وعجاجتنا في السما
وحاتكم ود البشرى دور لي الترشيح والانتخابات الما خمج .. ياخ زول مبالغة انت
مسكت السماعة عاوز اتصل عليو .. ونفسي كنت اتكلم مع الزول ده بأي طريقة .. لكن اتذكرت
اني جايي من اجازة ومفلس وشيكت على رصيدي لقيتو 78 هللة .. قلت يا ولد كدي اعمل مس كول
وتاني ساعدتو بي مس كول تاني .. ونسيت الموضوع على كده وبيني وبين نفسي قلت ياخ معقولة
زول عاوز تتعرف عليو تمسكل ليو ؟
بعد ساعتين جاني اتصال من الامارات .. ياخ زول سكرة .. بيضحك من ما بدت المكالمة لحدي ما خلصت
شفت .. ناقش اي حاجة .. جميل .. ات عارف يا ود البشرى لو اي زول اتكلم معاك بالتلفون بس خلي يلاقيك
صدقني ما حيكون عندك اي عدو في حياتك .
بريتكم شديد موش
حقيقة انا اسعد زول بينكم .. لاني بينكم
والله ما يحرمني منكم ..
| |
|
|
|
|
|
|
|
|
|
Re: مازن الجمَال و ممدوح أبَارو ..... أقيفوا النحدسكم (Re: محمد البشرى الخضر)
|
ود البشري وكل من رحب بنا سلام
آسف لو رديت عليكم متأخر بس ظروف عمل خارجي
انا حقيقة ما عرفتكم زي مازن ولا هاتفتكم
بس انا بعرف كل فرد في المنبر ده من خلال كتاباتو من نهاية 2004 وانا بتابع المنبر كل ما تسنح لي فرصة وكنت بتخيل نفسي عضو واردعلي كل موضوع في خيالي !!!
كنت اسرح مع الاستاذ منصور المفتاح واضحك مع سجيمان وود الموج
واذكر علي سبيل المثال لا الحصر:
صباح احمد وزيكو وكوستاوي وزوله 123(علي ما اذكر) وفرانكلي وهشام مدني ونوريت واساسي
و و و و و و و و و و
كثيرون لا اذكرهم كنت اعيش بين سطورهم واتعايش معها
ومنذ طلبت العضويه عام 2005 وانا ادرس كورس بالقاهره وانا انتظر دوري
حتي انني مع دوامة الحياة قد نسيت الموضوع إلا أن حصول شقيقي الاكبر وصديقي اسامة ابارو ايقظ في نفسي حلمي القديم وعكفت علي مراسله الباش بكري حتي نلت الباسويرد
وكنت اعرف ان المدخل الي هذا العالم جد صعب ويحتاج لثقة زائده وكنت اخاف من عدم القبول لعلمي التام بأن العضو الجديد دائماَ ما يكون منكمشاَ علي نفسة (بمشي جمب الحيط يعني) ولا يجد تجاوباَ في البداية لكن الحمد لله وجدت الاخوه والاخوات
اجمل مما كنت اتوقع
وقد حفوني بكل اوجه الكرم والاخوه الصادقة فلكم الشكر احبائي واخواني واساتذتي
ممدوح أبارو
| |
|
|
|
|
|
|
|
|
|
Re: مازن الجمَال و ممدوح أبَارو ..... أقيفوا النحدسكم (Re: محمد البشرى الخضر)
|
يا ابو حتوت 13-آذار -2008
أولا نبدأ بالترحيب بالإخوة الكرام مازن و ممدوح، أسماء ذاتا حلوة و بتاعت حناكيش مش زي... ولا بلاش من الأمثلة عشان ما يقولوا أب سنة بضحك على أب سنتين.
ثانيا ممكن أشارك؟
| Quote: إن شاء الله الواطة تصبح بشد سلك للحاجة اسألها |
إن شاء الله الواطة صبحت و لقيت فرصة تسأل الحاجة ربنا يحفظها هي و الحاج و جميع الحاجات و الحجاج... بالله ما تنسى الموضوع دا ضروري.
| |
|
|
|
|
|
|
|
|
|
Re: مازن الجمَال و ممدوح أبَارو ..... أقيفوا النحدسكم (Re: ممدوح أبارو)
|
Quote: يا ابو حتوت 13-آذار -2008
أولا نبدأ بالترحيب بالإخوة الكرام مازن و ممدوح، أسماء ذاتا حلوة و بتاعت حناكيش مش زي... ولا بلاش من الأمثلة عشان ما يقولوا أب سنة بضحك على أب سنتين.
ثانيا ممكن أشارك؟
Quote: إن شاء الله الواطة تصبح بشد سلك للحاجة اسألها
إن شاء الله الواطة صبحت و لقيت فرصة تسأل الحاجة ربنا يحفظها هي و الحاج و جميع الحاجات و الحجاج... بالله ما تنسى الموضوع دا ضروري. |
الرائع العوض ....
شكرا َ لحفاوة الترحاب بس حناكيش دي ما أظن
نحنا ناس ابسط من البساطه والشافو الواحد يشيب الصبي
بس مستورة والحمد لله
أكل حامدك أقنع ....ضرساَ ياخد علي طعامات الرجال أقلع
وعشيّك لا يبقي في ايد أخيك..... يمش عليك ويتماطل
وجرّب كل الصنع لامن عمل جبادة
ابت الحوتة تقبض مخي جابلو بلاده
| |
|
|
|
|
|
|
|
|
|
Re: مازن الجمَال و ممدوح أبَارو ..... أقيفوا النحدسكم (Re: ممدوح أبارو)
|
مرحب بممدوح ومازن ومرحب
بعذبوني انا الناس الصاعقة والنار منقد
رغم اني كنت غايب في الروكايب الا هذان اللاعبان قد لفتا
نظري بسلاسة حركتهما في الملعب عند عودتي...
وقلت في سري كده (الجلكسة) او بلاش
ولابد من لمحة ودهشة (موغلة) في الاعجاب لتداعيات ود البشري
الطاعمة وطريقته المميزة في السرد ومقدرته العالية علي اعتقالنا خلف
الاسكرين...
مرحب مازن وممدوح
وحبابكم 1000
| |
|
|
|
|
|
|
|
|
|
Re: مازن الجمَال و ممدوح أبَارو ..... أقيفوا النحدسكم (Re: عبدالكريم الامين احمد)
|
Quote: مرحب بممدوح ومازن ومرحب
بعذبوني انا الناس الصاعقة والنار منقد
رغم اني كنت غايب في الروكايب الا هذان اللاعبان قد لفتا
نظري بسلاسة حركتهما في الملعب عند عودتي...
وقلت في سري كده (الجلكسة) او بلاش
ولابد من لمحة ودهشة (موغلة) في الاعجاب لتداعيات ود البشري
الطاعمة وطريقته المميزة في السرد ومقدرته العالية علي اعتقالنا خلف
الاسكرين...
مرحب مازن وممدوح
وحبابكم 1000 |
عبد الكريم او كيكي كما يحلو لهم تسميتك
ازيك يا جميل؟
متابع معاك اخبار ابو الجقادو وابكرونة
ياريت لو في مقدورك تمدنا بي اسامي الشهور مقارنة بالعربيه
عند ابو الجقادو وابكرونة حتي تكتمل الفائده
في هذا البوست
أيام الله وشهورو كلها واحد؟؟
| |
|
|
|
|
|
|
|
|
|
Re: مازن الجمَال و ممدوح أبَارو ..... أقيفوا النحدسكم (Re: elnadeif)
|
اولا مازن وممدوح مااااا عندنا فيهم كلام ...
ومرحب بيهم وهم فعلا حلوييين ،،،،
لكن ياااا ود البشرى الفيك عرفناها ،،،،،،،
ها ها ها هها ها ها ها ها ها ها ( حتى الثمالة) ********
الحقوا يا جماعة ود البشرى مركب مكنة ناس عماد وتمبس وعمار
كبار ادباء البورد !! والجماعة البكتبو بوووووووووووووووو ديك ،، ومن ثم تتوالى عليهم الردود
من شاكلة واصل السرد
يااااااا لها من روعة
امتعتنا ياصاح ....
حبسنا الا نفاس ،،،، واصل
وكدا !!!
تقوموا تخذلوهو قدر دا .. وما تفهموها ليهو وتخشو عليه شمال
الى ود البشرى فى محنته
ياخى والله حكى متعة ضحكت انا لما دمعتا .... خمجت ليهم الحكى بتاعهم ومسختو
عفيت منك ،،،،،،،، وشايفاك استلفت المفراكه ( وجوه مفروكة ) وعصدت ، لبن،، سمك ،، تمرهندى !
ــــــــــــــــــــ
غايتو مفروض عماد والذين معه يحردوا الكتابة حولين قمرييين دا اذا ما اعتزلو !!
نيابة قسرية عن ود البشرى العتبى لعماد ومجموعة الادباء بالبورد حتى يرضو ...
لاحظو برضو فى سرده الادبى لم يستطع ود البشرى الخروج عن تخصصه موضوع الدكتوراة
خاصته ... بموضوعات البورد وشخصياته
| |
|
|
|
|
|
|
|
|
|
Re: مازن الجمَال و ممدوح أبَارو ..... أقيفوا النحدسكم (Re: محمد البشرى الخضر)
|
ود البشرى !!
ماكانش يتعز والله ،، ماعندى مسنجر ،،، لسه انا مارجعوا لى
مصنفه من المتامرين ،،، غايتو لحدى مايرجع ........
انت ماسمعت قصة الجماعة العماااالقه ومفتلين وقفوا سيد التاكسى
نص الليل ركبوا كلهم ،، القدام بصوت اجش غليظ قال لى ماشيين زقلونا
سيد التاكس قال ليهم ،، عليكم الله دقونى هنا !!!!! لوووووووول
ــــــــــــــ اها النبى الرسول كان ما خليتنا هنا !
| |
|
|
|
|
|
|
|
|
 Re: مازن الجمَال و ممدوح أبَارو ..... أقيفوا النحدسكم (Re: دينا خالد)
|
مرحب بود الجمّال وود أبارو
يا دندونة
ياخ ودالبشري قعد وإتفرجخ و تمخض ليكتب ما كتب اعلاه
تقومي تكسري ليو الدُش في يدو !!
بعدين يا دندونة ياخ زقلونة شنو !! زقلونة دي بقت قريبة شديد ..
مش اخير من التفكير في زيارة الحارة دشليون !!
و لولا ستر الله و رعايته و تنزيل الملاكـ الحارس في تلكـ اللحظات 
__
ياخ .. ياخ .. ياخ .. انتي العرفكـ زقلونة شنو ؟
و هو زاتو ودالبشري ده ما بيقدر يمشي زقلونة حدو شارع الشنقيطي بس
| |
|
|
|
|
|
|
|
|
|
Re: مازن الجمَال و ممدوح أبَارو ..... أقيفوا النحدسكم (Re: محمد البشرى الخضر)
|
البشرى ؟؟؟
اذا كنت انا المقصوده بى هناية دى
فانا اعلن هنا مقاطعتى لكل بوستاتك ومداخلاتك
وادعوا لتسيير مسيرة النصره ... فانا ما خاطبتك يوما بغير اسمك !!!
ما بسمح ليك تخاطبنى كدا !!
فيصل ياصديقى !!
ما ح تلقى زول يعرف مناطق الهامش والنازحين قدرى فى البورد دا !!
بحكم عملى فيها منذ تخرجى فى 2002 ... وكلامك صاح دى اصبحت جووه البلد
مقارنة بما احاط بها من امتدادات جديدة !!!
النكته دى بتكون قبل 1989 ،،،، لووووووول
اماالعسكر والفاشية الموجودين فى بيتنا ديل فاحكامهم بتبدا بعد الخامسه
مساء ،،،،،،، يعتى لو ما كان فى نهار ... كنت الا ارحل معاك فيبدو حالى كما وصفه
الشاعر ::::: كالمستجير من الرمضاء بالنار .......
بعدين بطل الشماتة ياسغييييييل .... فالمسلم ليس بشمات ولا طعان ولا هماز ولا لماز
المسلم دا يعنى يمووووووووت عدييل كدا !! وعشان انت ما بتنسى اصلو ما ح احكى ليك الفطر معاى منو الليله
| |
|
|
|
|
|
|
|
|
|
Re: مازن الجمَال و ممدوح أبَارو ..... أقيفوا النحدسكم (Re: محمد البشرى الخضر)
|
يااخوى وكت براك عارف ماتحن علينا شوية
ذنبنا شنو جمعتنا دى تودرها لينا فى حاتم
يوسف قال ليك والبنغالى جاب ليك عصير بيض
مسلوق وسندويتش ديو وحرقت ليك سجارتين فى
الشغل يااخوى شغلكم اب سجار دة وين؟؟؟
كما لايفوتنى ان ارحب بالاجيال الجديدة
مازن ومحمود ابارو
وصاحب البوست ودالبشرى (ولا ماياهو)
والفلتة دينا خالد بس طلب بسيط لو سمحتى
تبطلى الحواشة الكبيرة البتخليها فاضية
بين كتابتك الفوق والتحت ولو مابتقدرى تبطليها
بس صغريها شوية يافالحة وشكرا
| |
|
|
|
|
|
|
|
|
|
Re: مازن الجمَال و ممدوح أبَارو ..... أقيفوا النحدسكم (Re: دينا خالد)
|
لووووووووووووووووول
| Quote: ما بسمح ليك تخاطبنى كدا !! |
شايف دندونة مركبة مكنة آمنة و كده
ود البشري انا لو محلكـ بخلي البوست ده و بحرد المنبر و تاني ما بجي هنا لا بـ عِدة ولا بدون عِدة
دندونة
انتي عارفة انه لولا العسكر و الغاشية ديل ما كان قدرتي تصلي مناطق الهامش ..
في فرق بين انكـ تصلي مناطق الهامش و انتي تحت حماية ربانية و بين انكـ تصليها تحت غضب الهي
المستجير بالنار من الرمضاء ::: زي فكرة الجاكيت في عز البرد في طرف الهامش البعيد دااااكـ ..
اما قصة الفطور دي مقدور عليها ..
بما انه الصحف السيارة توزع مجانا.. او يصدر منها العدد الاسفيري
و دي بمناسبة الفطور مع الشكر لصديقي المهتم بقضايا الهامش محمد عبدالرحيم
حلوة حكاية 1989 دي
_
ابو حتوت
نوبي و دينا الاتنين ما بتقدر عليهم .. راجع روحكـ تاني سيدي نهر الحياة المتجمد
| |
|
|
|
|
|
|
|
|
|
Re: مازن الجمَال و ممدوح أبَارو ..... أقيفوا النحدسكم (Re: محمد البشرى الخضر)
|
غايتو ابارو دا بعرفوا حتى ولو ما لاقيتو قبل كدا لانو عندنا واحد في حلتنا أسمو ابارو بالرغم من ان اسمو مبارك محمد الصافي ..
العهدة علي الراوي يقال أن الأسم دا جاهو نتيجة لانو كان ثيردباك مقطعة عديل كدا .. الضبانة ما تفوت منو دا غير انو عندو ميزة الردم .. يعني لو حاولت مرة تعمل فيها سكسك برقدك ساسو .. ياخ أنا احب ليك ابارو دا جنس حب لله في الله كدا ويمكن لانو لعاب .. اها عشان كدا ابارو بتاع هنا دا انا حبيتو لله لله كدا ويمكن لانو عشان قدموا لينا مبتدع أدب الجرجير (من جرجرة ) ..
المهم مرحب بيهو كتير ومرحب بي مازن الجمال وبرضو بحبو موش لان أسمو علي وزن رأفت الهجان وبس .. لا .. لكين لانو أنا متأكد بعرفو وهو بعرفني شديد وإتلاقينا في حتات كتيرة ونحن في الحقيقة أصحاب أصحاب إحتمال نكون لعبنا زملاء في قعدة وست واللا هارت واللا مشتركين في منتدي عكس الريح سوا واللا اية حاجة .. المهم الزول دا بعرفو حق المعرفة وما عايز ليهو ترحيب مني .
يا ود البشري ياخ عندي طرايف شديدة من الخور .. والخور دا ما الخور بتاعكم الهنا دا ..لا .. دا خورنا نحن بحلتنا في الجزيرة قمنا لقينا الحتة البنلعب فيها اسمها الخور ودا شهد نبوغنا في مختلف المجالات .. بلي .. فل .. الرمة وحراسا .. حرينا .. شليل .. كورة شراب بتاع عساكر محشي باكياس نايلو وأحيانا ورق وباقي دلاقين ..
المهم كنا افذاذ هناك ومازلنا أفذاذ والحمدلله ..
البقية في العدد القادم ..
| |
|
|
|
|
|
|
|
|
|
Re: مازن الجمَال و ممدوح أبَارو ..... أقيفوا النحدسكم (Re: طلحة عبدالله)
|
Quote: غايتو ابارو دا بعرفوا حتى ولو ما لاقيتو قبل كدا لانو عندنا واحد في حلتنا أسمو ابارو بالرغم من ان اسمو مبارك محمد الصافي ..
العهدة علي الراوي يقال أن الأسم دا جاهو نتيجة لانو كان ثيردباك مقطعة عديل كدا .. الضبانة ما تفوت منو دا غير انو عندو ميزة الردم .. يعني لو حاولت مرة تعمل فيها سكسك برقدك ساسو .. ياخ أنا احب ليك ابارو دا جنس حب لله في الله كدا ويمكن لانو لعاب .. اها عشان كدا ابارو بتاع هنا دا انا حبيتو لله لله كدا |
الاخ طلحة عبدالله بعد التحية
مشكور علي الروح الحلوه دي
اسم أبارو جانا من جدنا أبارو بغرب شندي منطقة السيال وله فيها بنية أو قبة موجوده إلي الان بجانب قبة أبنة حميده وحواره عبد الحميد
ويقال أنه كان شيخاَ له مريديه وحيرانة وكانو يبارونة اي يتبعوه لذا سمي بهذا الاسم البارو ثم تحول إلي أبّارو بتشديد الباء
دامت الموده والمحبة في الله
| |
|
|
|
|
|
|
|
|
|
Re: مازن الجمَال و ممدوح أبَارو ..... أقيفوا النحدسكم (Re: محمد البشرى الخضر)
|
لا حولا
بالله البوست غاتس غتسة الصفحة الكم ما عارف
اها كنا وين
ايوة بنرحب بأولادنا - على قولك يا منو - مازن وممدوح وشايفك قلتي البينكم عامرة
ربنا يعمر القلوب بالمحبة دايما إن شاء الله اها قصة عامرة دي ذكرتني قولة قميص عامر
اكتر ناس بستخدموها ناس الكوتشينة - الوست تحديدا - لتفوير القيم
يعني لما الإسكور يكون ناقص رقم معين وتقوم التوزيعة تجيب نفس الرقم يقول ليك قميص عامر
لكن اصلها شنو دي ما متأكد منها مية مية
التوزيعة في الكوتشينة بسموها العشرة و احيانا الشوتة يقوليك قومناهم في تلاتة شوتات
شفتي يابت الشيخ الشوت متنوع وزي ما قلتي الشباب شايتين شوت لذيذ
مرات يقوليك الزول دا شايت ضفاري كناية عن الشتارة او ما شابه
دا بذكرني زميلا لينا ايام الجامعة بكاي بكى شديد لكنه اشتر و ما بعرف يتعامل مع البنات
يا داب ما عرف الحاجة وخلطها يوم و التاني بالله بي شتارته يطيرها ليك زي الهبوب
- كان الله مد في الأجل بحكي ليكم طرف من شتارته لي قدام - اها زولنا دا كان عندو اخوه في الدفعة القدامنا عكسه تماما
زول هادي و ديسنت و ينطبق عليه قولك يا الطاهر بتاع الدخول زي الضل القلت عليه يا سلام عليه ياخ
ياخي ايام الجامعة دي كانت جدا لذيذة الزمن داك زاتو الدنيا كانت بي خيرها
انا اتذكر المصاريف المقررة علي ألف جنيه
و جبنا شهادة من اللجنة الشعبية و حركات وبتاع خفضوها لينا لخمسمية أذكر إسي اقل كلية بقت بالملايين
هو زاتو المليون الزمن دا ما بسوى حاجة بالله مماتفكو خلاس تقنع منو
وعلى حس المليون بالله شفتو برنامج من سيربح المليون ياخي ديل بجيبوا ليهم فارات من وين زاتو ما عارف
اسئلة ساهلة تغلبهم و قرداحي زولك دا يا سامي - مرحب بيك بالمناسبةدي - مرات تحس به بجاوب ليهم عديل كدة بالله التقول عساكر اصلو العساكر ديل موصومين بالحتة بتاعة الغباء دي يقول ليك و سط كل عشرة جنود تلطاشر جندي غبي طبعا دي مبالغة و زيادة موية حبتين من نوادر العساكر ايام الدفاع الشعبي في القطينة كان في تعلمجي قديم عامل رقيب اول كان اسمه بشارة كان دايما بردد في قولة اهم خمسة حاجة عند المستجد تلاتة الأكل و النوم - كدا الصاح يا حاتم يوسف -
ي ا سلام ياخ على ايام الدفاع الشعبي و القطينة كنا لسة شباب و اولاد لذاذ على قولك يا ابوساندرا -
أكبر همنا و مبلغ علمنا كيف تجازف اكبر كمية من البلح البوزعوه المنسقين
و تدبر لنفسك مكان آمن تاخد ليك فيه غمدة وعادة كانت المخاضرات الليلية أفضل خيار للنوم
بمناسبة النوم دي اسي نعسان و اظني جاز المصافي كملتو صباحاتو بيض
وكدا
نواصل
أبوحتوت
20-آذار-2008
| |
|
|
|
|
|
|
|
|
|
Re: مازن الجمَال و ممدوح أبَارو ..... أقيفوا النحدسكم (Re: محمد البشرى الخضر)
|
Quote: رسلت البنقالي مشى جاب لي
سندوتش البيض المسلوق وقزازة الديو كالعادة |
ياها عادتك جنك لهطى وشلهته لكن من سيئ لي اسوى مااااشي الله يرحم الجداد البقيت تاكل ِدحُ
اتذكرتك في القاهرة في معرض كتاب وقع في يدي كتاب نكات اسمع دة منو
دكتور تحاليل امه ماتت قال (تحاليلي) يامه
حبابك و ممدوح أبَارو
ودى
| |
|
|
|
|
|
|
|
|
|
Re: مازن الجمَال و ممدوح أبَارو ..... أقيفوا النحدسكم (Re: oudenoord)
|
| Quote: ياها عادتك جنك لهطى وشلهته لكن من سيئ لي اسوى مااااشي |
يعني يا احمد مع التعوسية دي دايرني امشي للاسحن كيف
| Quote: الله يرحم الجداد البقيت تاكل ِدحُ |
تصدق العشرة ريال ما لقيتا لحدي هسة
| Quote: دكتور تحاليل امه ماتت قال (تحاليلي) يامه |
دي فاتت على عمار
تحاليل وتكبير
____________
ياخ مشتاق ليك شوق مبالغة .. والسودان دا انت ما تمشيه إلا ونحنا مافيشين
يا ريت لو كنت جيت ايام الخميج ديك
مسطول اتصل عليه واحد وهو بصلي .. قام رد عليو
داك قال ليو : انت وين .!؟
المسطول قال ليو : في التحيات لله
| |
|
|
|
|
|
|
| |
محمد البشرى الخضر
Muna Khugali
الطاهر عثمان
Hatim Yousif
أبو ساندرا
محمد عبد الماجد الصايم
مازن الجمّال
ممدوح أبارو
Elawad
الجندرية
elnadeif
عبدالكريم الامين احمد
دينا خالد
فيصل نوبي
احمد التجانى احمد
طلحة عبدالله
oudenoord
بشير جبريل علي
فيس بوك
تويتر
انستقرام
يوتيوب
بنتيريست