|
|
 شاعر يهجو سودانير: جنك اكيد ياهو جنك قبل حكم اب عاج نميرى
|
وقعت سودانير في شر أعمالها بعد أن غضب عليها الشاعر (محمد جيب الله كدكي) الذي كان من ضحاياها فهجاها هجاءا (جريريا) بقصيدة طويلة يقول في نهايتها أنه لن يكون من زبائنها مستقبلا(اما انا بعد انقرصت ان جيتك عميان بصيرى !)
سودانير داير اقول لك
امان الله وماك شكيرى
بطنى عليكي دم دم
مقالبك بالجد كتيرى
كل الخاض يوم تجاربك
ما نام بى عين غريرى
مواعيد ثابتى ما عندك
وتجننى وكتين تطيرى
الزول ماب يضمن قيامك
ولو فى اللفة الاخيرى
حكاية امشو وتعالوا
مقولة دى عندك شهيرى
غلبنا نكيفك ضمة
وكمان اصبحنا فى حيرى
نقول استهبال دا منك
ولا نعدك عويرى ؟؟
جنا الدتى الماها ميتى
بلاك بقى ما عندو سيرى
وبقيتى لبانة فى خشمو
منافسى الجبنة الضفيرى
صب عليكى جام غضبو
ومعاهو وقعتك مريرى
فوقك دق الدهلة
وماسك الطارة الكبيرى
شنو الخلاك تسفهيهو
بعد ما اديتى تاشيرى
حرام زول ود بلد زى دا
تعاملى كانه ليبيرى
دا واقعك وانا مابهتك
كان من نفس الكاس مصيرى
نجيك بى وطنية صادقة
وريد زى بحر الدميرى
بس لكن يا خسارة
بنلقى مواقفك فطيرى
نفوسنا تملى من جهتك
مجرحة ترجع كسيرى
ويوم ماقدّرت حواء
البقت للسودان سفيرى
معاها ادم جاكى يقدل
وقاشر فل بالسديرى
وصلاة النبى فوق محمد
وعليك جا لابس الزفيرى
وثلاث جدعان مبارنو
وفى ايدو بنيتو الصغيرى
صورة ايدها الله عالم
تحن فى شوق للجبيرى
الا تجبر كيفن معاكى ؟
ومع هالحال العسيرى
ميزانك من يبدأ يوزن
طويلنا بيصبح حجيرى
وخدماتك هي هي
قدر ما جيناك فقيرى
جنك اكيد ياهو جنك
قبل حكم اب عاج نميرى
ما معقول خمسة مرات
تروح الشنطة الكبيرى !!
يومى ادج لى مطارك
بى امجاد ماها ميرى
صبح جيبى من الرضاعى
صديق اول لى حضيرى
ودسيت البى والعليا
من تالا الخل والعشيرى
ولقيت الف قيامى قايمى
وامة من الناس غفيرى
مصيبة غيرى خلتنى
نسيت عيشى بلا خميرى
داك عريس عفشو رايح
بن مقلى من الهجيرى
العرق من جسمو يتخابت
نزل موياتاً غزيرى
هو خجلان وعندك الخجلة
مكفنة داخل حصيرى
ملاوز من عين نسيبتو
وشمارات اهلو فى الجيرى
يقولو مطلق ايديهو
وجا لاشبشب لاحريرى
الزمن عندك بلا قيمى
هبوب كتاحة وضريرى
من الطيران الحداكى
متين تبغرى بس تغيرى ؟؟
متين تبقى قدر كلمتك
وبالثقة نلقاك عاد جديرى ؟؟
توفرى راحة الزباين
عليك كان جات مستجيرى
اما انا بعد انقرصت
ان جيتك عميان بصيرى !
وعلى تعويضى الله قادر
وهو صاحب ايد مو قصيرى !
|
|
 
|
|
|
|
maman
فيس بوك
تويتر
انستقرام
يوتيوب
بنتيريست