|
|
 أهني الشعب السوداني وأهنيه هو زاتو...واهني حليمة خالتي في المملكة
|
وهي عبارة اكتشفت مع متابعتي الكثيرة للبرنامج اللطيف (أفراح افراح) أن ثلثي الشعب السوداني (بمزيعيهم)لا يعرفون معناها
فتأتي العروس القيافة بمنظرها المبهر فتجعلك تستنفر جميع حواس الملاحظات لديك لتطلع فيها حاجة ناقصة (وما تلقى) ثم تبوء محاولتك بالنجاح حيث ما ان تفتح فمها حتى تكتشف انها يعني (شوية عويرة) فتقول بعد ان تعوج راسها قليلا بعد ان يسألها المذيع اللطيف نفس السؤال المكرور..وبتحبي تقولي شنو في الليلة دي؟ فتعوج راسها حوالي٤٠ درجة مئوية (والبعض يبالغ فيجعلها ٦٠ درجة )...وترد (والله يعني بقول لكل اهلي شكرن ليكم ) فتبتسم تلقائياً لهذا الامتنان الجميل لتلتخها فجأة في نص الجملة الشكرية فتقول (كما أهني الشعب السوداني) فتتساءل عن ما دخل الشعب السوداني في الموضوع إلا ان يكون ظن العروس أن زواجها لهو بمثابة عيد استقلال السودان مثلا..يومه الوطني...كرنفال شعبي...زواج بامر جمهوري...شئ ما يستدعى ان تتم عبره تهنئة الشعب السوداني كوووووله بالزواج الميمون...فتضحك بعد ان يزيد المذيع في أسئلته التقليدية (وبتحبي تقولي للعريس شنو) فتعوج رأسها ايضاً سالب 40 درجة مئوية وفمها زاوية قائمة وتناظره بخجل وتقول (بحب اهنيه واقول ليه مبروك عليك) فتتأكد أن العروس (لا لا ... بالجد عويرة) حتى إذا ما اخذ المايكرفون أحد اقرباء العروس او العريس، فيردد أيضاً، (والله احب اهني الشعب السوداني بهذه المناسبة السعيدة) فتتأكد أن ربما العيلة كلها عويرة
ثم تنتظر الأسبوع المقبل فتردد المذيعتان (حلاااااتهم ياخي) نفس الجمل ونفس المضمون ونفس صندلية العنود،ونفس الجلسة المشدودة (كأنه في ضهرهم عود ياخي) ، لتأتي حفلة جديدة فتتابع بنفس الانبهار وانت تحاول أن تجد بس حتة حتة شئ ناقص (علشان ما تنغاظ) إلا وتسمع نفس الجمل بنفس الترتيب (وتحبي تقولي شنو في اليوم السعيد ده) فترد (ما حدش احسن من حد) احب اهني الشعب السوداني، كما اهني اخواتي مريم ومريومة في السعودية فتتأكد أن الموضوع فيه إنة
يصر مقدم الحلقة أن يسأل بنت خالة ام جدة عم العريس، (تحبي تقولي شنو في الليلة دي) وكأنه مثلاً يتوقع أن يقول أحدهم في مرة من المرات (إن شاء الله يتطلقوا إن شاء الله تطلع عاقر ما بتولد إن شاء الله يطلع سكرنجي يا بركة من صلى وقال يا الله) لكن في كل مرة تحبط الآمال في كل مرة يرد المسئول (بيت مااااااااااال وعيال، يغلبها بالمال وتغلبو بالعيال ايووي يوووو يوووووويييي) الخ الخ الخ
اووووووف
انا لو معد البرنامج، فهناك ثلاثة حلول لهذا الوضع البايخ ، أن أعد البرنامج ..أعد من إعداد....أعد البرنامج بأسئلته وإجاباته والاهم مضمونه أو ... الغي البرنامج وأجعلها لقطات متفرقة هنا وهناك من بعض الحفلات ، أو أتوقف أنا عن متابعة البرنامج وكان الله يحب المحسنين
اقول قولي هذا ولا أنسى أن اهني شعب البورد بعيد الأضحية ورخص أسعار الخرفان.. كما احب أن اهني الشعب السوداني بمناسبة اني اليوم كتبت بوست في سودانيز اون لاين... ايوووووي يوووووي يووووووي ..بخته والله
|
|
 
|
|
|
|
|
|
|
|
Re: أهني الشعب السوداني وأهنيه هو زاتو...واهني حليمة خالتي في المملكة (Re: ايهاب)
|
بت قضيم .. حبابك ألف
ليك وحشة والله
أهنيك وأهني كوكب زحل ذاتو بدون مناسبة
الأسئلة الروتينية المكررة تقود لإجابة من نفس النمط
والمايك والكاميرا ليهم رهبتهم .. عشان كدا يا ريت
تتم تهيئة العرسان وأهلهم ليلموا نفسهم ويرتبوا أفكارهم
وكمان الكلام لازم يتمنتج .. مرات في دراب بترمي لو اتذاع
زي ماهو كان ما طرشق العرس بعكر موية البيت
ختاماً اهني البورد والبوردات المجاورة بعودة بت قضيم
وان شاء الله يطيب ليك المقام وما تلحقي أم فيونكة
تحياتي
| |
|
|
|
|
|
|
|
|
|
Re: أهني الشعب السوداني وأهنيه هو زاتو...واهني حليمة خالتي في المملكة (Re: maia)
|
صباح الخير
طوال مساء الخميس ويوم الجمعة وأنا احاول ان ارد علي هذا البوست
ولأن كلمة المرور مسجلة في جهاز العمل،،،اني اتذكر كلمة المرور لادخل من جهاز البيت واشار ك، يا حسرة،،،
ضاعت كلمة المرور من ضمن الكثير الذي ضاع بسبب عوامل التعرية والزمن
يا اخوانا شكلو الواحد فعلاً كبر وهو ما حاسس
يا حفيظ
يا هوبة تسلم
وبخته شديد طبعاً
لكن هو كان منو؟؟!!
| |
|
|
|
|
|
|
|
|
|
Re: أهني الشعب السوداني وأهنيه هو زاتو...واهني حليمة خالتي في المملكة (Re: بت قضيم)
|
تحياتي يا ابو حسين
وتسلم
لكني الغريبة ما بغيب، أنا بجي كل فترة والتانية اطل واقرأ، أما عن المشاركة، فكثير ما احس بأن هناك الكثير الذي يمكن أن يقال، ولكن لا فائدة من أن يقال...
ثم ان البورد بقى سياسي بالدرجة الأولى، وانا لا افهم في السياسة ولا اتعاطاها، ولله الحمد والمنة
ما علينا
على فكرة
من زمان عايزة اشكرك جزيل الشكر يا ابو حسين، أنك ما غبت عن أي بوست شاركت به في سودانيز أون لاين من قبل
بالجد جد
شكرن جزيلن
يخليك
| |
|
|
|
|
|
|
|
|
|
Re: أهني الشعب السوداني وأهنيه هو زاتو...واهني حليمة خالتي في المملكة (Re: بت قضيم)
|
Quote: أهنيك وأهني كوكب زحل ذاتو بدون مناسبة
الأسئلة الروتينية المكررة تقود لإجابة من نفس النمط
والمايك والكاميرا ليهم رهبتهم .. عشان كدا يا ريت
تتم تهيئة العرسان وأهلهم ليلموا نفسهم ويرتبوا أفكارهم
وكمان الكلام لازم يتمنتج .. مرات في دراب بترمي لو اتذاع
زي ماهو كان ما طرشق العرس بعكر موية البيت
|
سنجاوي العزيز
تحية طيبة
هو ده المقصود
أنا شخصياً مرة في بلاد الله الواسعة، نازلة من ليموزين، اول ما اتلفت لقيت قدامي مذيعة وكاميرا واكشن وبتاع طبعا اتخلعت شديد
سألتني (ما رأيك في السينما؟ وهل تفضلي تشوفي فيلم في السينما أوا لتلفزيون؟؟)
جاوبت بلا تفكير (في السينما) لما سألتني ليه قلت (لأنها واسعة)
إجابة غبية طبعاً استمريت وصديقاتي نضحك فيها لشهور
فعلاً رهبة الكاميرا لكني اعذر نفسي لانها كانت مفاجئة، أما عن برنامج معد مسبقاً لا مفاجئة فيه فاعتقد لازم يكون اكثر تحضيراً وفائدة
اليومين دول شايفاهم زادوا الفكرة بأن جعلوا فيها سحب وهدايا ومكياجات وما إلى ذلك، ولو ان الموضوع عبارة عن إعلانات مغلفة، لكنها على الأقل برضو فكرة جديدة مش بطالة
يا سنجاوي
وكما قلت للعزيز ابو حسين والللللله انا قاعدة
يااخوانا ما ملاحظين للنور الجاهر ده؟؟
لوووووووووولز
تسلمون شديد
| |
|
|
|
|
|
|
|
|
|
Re: أهني الشعب السوداني وأهنيه هو زاتو...واهني حليمة خالتي في المملكة (Re: بت قضيم)
|
قبل تلاتة اسابيع كدا زارني الاخ مامون في المنزل بخصوص دعوتي لزواج , وبما ان الزيارة بمناسبة دعوتي لزواج فالكلام جاب الكلام حتى وقفنا في برنامج افراح افراح بتاع قناة النيل الازرق كان عنده راي جميل جدا في الموضوع , قال مامون تعرف برنامج افراح افراح دا تقريبا " عري" الشعب السوداني وضح قدر شنو انه انحنا كسودانين مهوسين بالبوبار والمغالاة في موضوع الزواج , واضاف " العري" الجد حصل في موضوع التعامل مع المايك اضاف كسودانين وضح جليا من خلال فضائينا وخصوصا البرنامج " المفروض " انه عفوي بتاع افراح افراح نجد مشكلة حقيقية في الوقوف خلف المايك والرد دوما علي نفس السؤال وبنفس العبارات في كل مرة لكل الضيوف لكل الزواجات لكل الخمايس التي يعرض فيها البرنامج دون الخروج عن سياق " بيت مال وعيال" وكان تجاوز تلك ا لعبارة يعتبر خروجا عن الملة . وليس في ذلك اشكال كما قال ولكن الاشكال كل الاشكال انه حتي هذه العبارة تجد الكثير من التعلثم والتاتاة وملاواة الحلق .
طبعا لم اكذب خبرا يوم الدعوة لبست بدلتي الفرمالة الجديدة ومشيت متأبطا معجم السهروردي في تهاني الافراح التي يحيها وردي , وفي سري اتمتم لموني الليلة في مايك عشان اوريكم كيفة الوقوف خلفه وتدبيج الخطب العصماء في مال الافراح , لسؤ الحظ يومها محمد طه مراسل برنامج افراح افراح في جدة كان يومها كاتل حفلة في مكة بي اسيا مدني ولم يشفع تحنيسي لزميل البورد الذي كان يحي الحفل يومها " حسن خليفة" ان يفك المايك شدة بس حيث حسمني بشدة حينما قال " يا اساسي بطل حركات بورداب سودانيز اون لاين دي وعشقهم الخرافي للمايك " يومها احسست بشعور عمر الفاروغ الذي بنواحي الرياض حينما دعي لحفل بورداب الرياض ولم يعط فرصة في المايك لانه يومها كان موقوفا من بكري وخوطب بالاخ " المتصفح "
بتقضيم الجابك يجيب عقابك
| |
|
|
|
|
|
|
|
|
Re: أهني الشعب السوداني وأهنيه هو زاتو...واهني حليمة خالتي في المملكة (Re: اساسي)
|
حسن خليفة عرفها و طلع نجيض و الا لاندلقت الروعة و لصّقت كل الضيوف الى
مقاعدهم من فرط عسليتها هههه
و الله يا بت قضيم و اساسي،
هذا البرنامج لا امتلك اي طاقة ولا لياقة لمشاهدة تلت ساعة منه!
تلقاني كررركرب وقفت على حيلي و لملت كريعاتي و اتخارجت
هل يا ربي لاني ما زلت عزابي؟ ام للورم الذي عنه تتحدثون؟!
ربما لكلها مجتمعة يا فارم الامعاء!
تتعدد الاسباب و البيضنة واحدة.
| |
|
|
|
|
|
|
|
|
|
Re: أهني الشعب السوداني وأهنيه هو زاتو...واهني حليمة خالتي في المملكة (Re: بت قضيم)
|
Quote: فتضحك بعد ان يزيد المذيع في أسئلته التقليدية (وبتحبي تقولي للعريس شنو) فتعوج رأسها ايضاً سالب 40 درجة مئوية وفمها زاوية قائمة وتناظره بخجل وتقول (بحب اهنيه واقول ليه مبروك عليك) فتتأكد أن العروس (لا لا ... بالجد عويرة) حتى إذا ما اخذ المايكرفون أحد اقرباء العروس او العريس، فيردد أيضاً، (والله احب اهني الشعب السوداني بهذه المناسبة السعيدة) فتتأكد أن ربما العيلة كلها عويرة
|
سلامات يا بت قضيم وفشيتيني لاني مغبونه من سناريو البرنامج دا ايتوها غبينه
ملاحظاتك مظبوطه وكمان اي زول متابع البرنامج دا ح يحفظ جمله
(وبتحبي تقولي للعريس شنو) فتعوج رأسها ايضاً سالب 40 درجة مئوية وفمها زاوية قائمة وتناظره بخجل وتقول
(بقول ليه الف مبروك وان شاء الله اقدر اسعده  ) فتتأكد أن العروس (لا لا ... بالجد ماقادره اعبر)
| |
|
|
|
|
|
|
|
|
|
Re: أهني الشعب السوداني وأهنيه هو زاتو...واهني حليمة خالتي في المملكة (Re: بت قضيم)
|
يا سعد الدين
ياخ بطل الحقد
علشان يعني لسة ما دخلت دنيا تحقد على العالم دي؟؟
ما شفت البنات ديل مولعات كيف؟!
نجف بس
عموماً.. الله يساعدك تدخل دنيا الزواج إن شاء الله علشان تطلع من دنيا رب العالمين مباشرتن
والكلام ده على مسعوليتي
لوووووول
الصورة في البروفايل للطفلة بانة ربنا يعودها بالسلامة إن شاء الله
قريبتك يا سعد الدين؟؟ لانها قريبتي نوعاً ما
| |
|
|
|
|
|
|
|
|
|
Re: أهني الشعب السوداني وأهنيه هو زاتو...واهني حليمة خالتي في المملكة (Re: بت قضيم)
|
تحياتي يا دلال عز الدين
اسمك فني شديد على فكرة
شخصياً لا الوم العروس، اولاً لافتراض رهاب المايكرفون كما جاء على لسان المفتي اساسي، وثانياً لأن معد البرنامج لم يعد برنامجه زي العالمين
لا افهم ما معنى (معد البرنامج) بالنسبة للقنوات السودانية
يجيب كرسي وستارة مثلاً
يفرش السجادة
أو يعمل شنو بالظبط؟؟؟
يعني الدراما وقلنا ده طرفنا منها، البرامج الحوارية يا ستار يا حفيظ
طيب البرامج الترفيهية
؟؟؟!!
سبحان الله ياخي
سلمتي يا عسل
| |
|
|
|
|
|
|
|
|
|
Re: أهني الشعب السوداني وأهنيه هو زاتو...واهني حليمة خالتي في المملكة (Re: بت قضيم)
|
ALGARADABI
أوعك تدخل لينا الموضوع في ناس الهامش والمهمشين ومن يهمشونهم
حوالينا ما علينا... البعاتي اخير
ثم وبمزيد من الحزن والأسى، نعلمكم انكم لستم الوحيدين الذين تظنون في بعتتنا
بالمناسبة قصة البعاتي دي، عايزة ليها بوست منفصل،، ليفضح - على قول صاحب أساسي- انفصامية مثقفي العشب السوداني، وهم يتحدثون عن السياسة وأهلها، والمعارضة ومتعاطيها، والعروبة والأفرقة،والهامش والمهموشون، وفصل الدين عن الدولة أو تلصقيهم سوا بالشترتون
ثم أهل السودان وايمانهم بالبعاتي والناس البموتوا ويقوموا وكده
وعموماً
البركة فيك يا هناي فيني
اللهم ت(غبلني) (غ)بول حسن
وأجعل مثواي الجنة
يا ث)غيل)
سلمت
| |
|
|
|
|
|
|
|
|
|
Re: أهني الشعب السوداني وأهنيه هو زاتو...واهني حليمة خالتي في المملكة (Re: بت قضيم)
|
العزيزة بت قضيم
صباحك جميل
في برنامج افراح افراح يوم الخميس اول امبارح، اتكلمت واحدة من امهات العرسان ( اوجه تحياتي وتهنئتي للشعب السوداني) اتذكرت كلامك في البوست
الدخل الشعب السوداني شنو
لووووول
بعدين بالجد ما في داعي يدوا المايك للعرسان عشان يتكلموا اكيد الكلام حيكون عبيط وما عندو معنى
والاصرار يجيبوا الحفلة قاجة والناس مهججة
وكلو كوم ووشوش مليانة بودرة زي في حفلة تنكرية
نجوى ابراهيم المذيعة المصرية كان عندها برنامج بتجيب فيهم مناسبات الزواج في قناة ام بي سي
بالجد شتان ما بين افراح افراح والبرنامج بتاعها
برنامجها مرتب وراقي
يا بت قضيم احنا شعب متكلف ما تلقائي ، اذا تحدث متكلف واذا ( قشر) متكلف
والحاجة البتحير في الاعراس السودانية حالة الاهميات والكبكبة لما زفة العرسان تجي ، ليه ناس العرس بيكونوا بتجاروا وبيدوا احساس انه في مركبة فضاء نازلة والبنات الحول العروس والدور البيكونوا داخلين فيهو من المشغولية وغرفة عمليات عسكرية مع انه دي لحظة مفروض تكون بسيطة وجميلة وتتم بطريقة بسيطة
تسلمي يا بت قضيم
| |
|
|
|
|
|
|
|
|
|
Re: أهني الشعب السوداني وأهنيه هو زاتو...واهني حليمة خالتي في المملكة (Re: بت قضيم)
|
صباحك مايا
Quote: في برنامج افراح افراح يوم الخميس اول امبارح، اتكلمت واحدة من امهات العرسان ( اوجه تحياتي وتهنئتي للشعب السوداني) اتذكرت كلامك في البوست
الدخل الشعب السوداني شنو
لووووول
|
الغريبة ما عارفة سر الإصراري الرهيب اني اتابع البرنامج من قولة تن لقولة مع السلامة للأسبوع الجاي
برغم الملل والتقليدية، لكن ربما الغريزة الأنثوية تسعى سعي حثيث لان تشوف فستان العروس ومكياجها، العريس وجيه واللا اي كلام، ناس العرس لابسين كيف، وكتير جدا انتظر اي شخصية بعرفها، ورغم كل المتابعة ما شفت ولا مرة اي أحد بعرفه شخصياً
Quote: بعدين بالجد ما في داعي يدوا المايك للعرسان عشان يتكلموا اكيد الكلام حيكون عبيط وما عندو معنى
والاصرار يجيبوا الحفلة قاجة والناس مهججة
وكلو كوم ووشوش مليانة بودرة زي في حفلة تنكرية
|
لا المايك ليه داعي، لا (يلا نبارك للعرسان) في ليها داعي، أول ما العروس تجي على رأيك والزفة، طبعاً في فضول ان الواحد يشوف العروس خصوصاً من جنس الحريم، لكن اللمة والزحمة والضيق ما عندهم معنى لأنها ببساطة حتجي تمر وممكن كل الناس تشوفها، خصوصا ًان نادر اليومين ديل مايكون في شاشات إضافية للعرض
انا بقى سمي وموتي، لما يجلسوا العرسان في الكوشة يتلموا الناس ليباركوا خصوصا ًالاطفال، يا سااااااتر، مع ان مجرد الحضور للحفل لهي مباركة في حد زاتها، ثم لا اتوقع أن العرسان في الساعة البايخة دي حينتبهوا مين جامل ومين ما جامل
غايتو نحن السودانيين عندنا عادات ما تلاقيها عند أي شعب تاني
زي (نبشر) للفنان، ما معناها لماذا هي؟؟؟؟؟؟؟؟
الله اعلم
وما جاء بخصوص المكياج، فاللهم بارك في القنوات الخليجية، لكن والحق يقال، بقى عندنا نوع من اتقان المكياجات زمان ما كان في..
Quote:
نجوى ابراهيم المذيعة المصرية كان عندها برنامج بتجيب فيهم مناسبات الزواج في قناة ام بي سي
بالجد شتان ما بين افراح افراح والبرنامج بتاعها
برنامجها مرتب وراقي
|
شن جاب لي جاب ؟؟؟
Quote: يا بت قضيم احنا شعب متكلف ما تلقائي ، اذا تحدث متكلف واذا ( قشر) متكلف
|
تماماً.... اصح ما قيل في البوست، يدين بتصفق ما عارفة اجيبهم كيف
كل الود
| |
|
|
|
|
|
|
|
|
|
Re: أهني الشعب السوداني وأهنيه هو زاتو...واهني حليمة خالتي في المملكة (Re: بت قضيم)
|
يا حسن ياخي ان شاء الله تسلم
رديت عليك في البوست المعني
انت عارف -بصراحة يعني - انا بشعر بامتنان شديد لما القى حد سأل عني، لأني عندي قناعة ان زمننا الجميل في البورد انتهى
وبصراحة زمان ما كان في هذا الكم الهائل من الكتاب الرائعين، للأسف انهم ما كتبوا في صحف وهم احسن من احسن كتاب الصحف السودانية اليومين ديل، لذلك الواحد بقى يطل ويخف، بحن لايام الكتابات القديمة البسيطة التلقائية بتاعت زمان في البورد، وفي نفس الوقت، سعيده جداً جداً ببعض الأيادي الذهبية في هذا الزمن الهباب، ولو لم يتشهروا أو يظهروا في قنواتنا المهببة
تسلم يا حسن ويطرح البركة فيك ان شاء الله
| |
|
|
|
|
|
|
| |
بت قضيم
ايهاب
ABUHUSSEIN
walid taha
saadeldin abdelrahman
عمران حسن صالح
Dalal Ezzaldin
ALGARADABI
Abd-Elrhman sorkati
مريم بنت الحسين
حسن حماد محمد
فيس بوك
تويتر
انستقرام
يوتيوب
بنتيريست